Read Akha 2 Gawˇliˬtu 10 Bible Online

2 Gawˇliˬtu 10 - Akha bible

2 Gawˇliˬtu 10

¹Naw maꞈ nehˬ-ehˇ jawˇ naˇ nui ma nahˬ jawˆ ni gʼeh-awˇ, naw maꞈ-ahˇ gaˇ mahˇ kaˬ gaˇ jawˇ naˇ nui ma huiˬ-eu gʼaˬ lehˇ naw maꞈ kuˇ-eu ngaˇ Pawˇluˆ naw maꞈ-ahˇ heu loꞈ-ehˇ shaˇ-eu ma. Ka li-euˬ nui nahˬ nui yu hawˇ-eu gʼawˬ shaˬ gaˬ-eu jeˬ laꞈ kʼoeˇ shaˇ-eu jeˬ pyeuꞈ-eu ma.

²Ngaˇ naw maꞈ jawˇ gaˇ oe ngeh, nui ma huiˬ laˇ ni taˬ jahˇ nehˬ laꞈ. Nga maꞈ-ahˇ shiˬ shaˬ jiˇ-euˬ nui noeˬ mehˬ nah caw teh-awˇ dehꞈ-eu meh lehˇ ehˇ laˇ-eu deuˬ-euˬ mehˬ shi ngaˇ nui ma huiˬ-eu gaˇ kawˆ bi mawˇ ma lehˇ kʼaˬ duˬ ni ehˇ tsehˆ-eu ma.

³Nga maꞈ-aˬ, miˇ tsaˬ kʼoeˇ taˆ jawˇ luꞈ-eu tsawˇ haˬ ngeuˇ ma. Ehˇ kʼawꞈ, miˇ tsaˬ shiˬ shaˬ jiˇ-ahˇ taꞈ-eu guiˇ deuˆ luꞈ-eu maˬ ngeuˇ.

⁴Nga maꞈ zmˬ luꞈ-eu guiˇ deuˆ-eu keu ka-aˬ, miˇ tsaˬ kʼoeˇ taˆ zmˬ luꞈ-eu guiˇ deuˆ-eu keu ka maˬ ngeuˇ. Nga maꞈ-euˬ guiˇ deuˆ-eu keu ka-aˬ, ziꞈ dah ni gʼeh-eu taˆ deuˬ-ahˇ laˆ cawˆ nehˬ nya-eu Miˬyehˇ-euˬ baoˬ ma. Maˬ tsaˬ maˬ dawˇ gaˇ tsawˇ pyehˇ pyehˇ-eu jeˬ-ahˇ nga maꞈ laˆ cawˆ-eu ma.

⁵Miˬyehˇ-ahˇ siˬ nya-eu jeˬ-ahˇ kʼaˇ laˆ tsoeˬ-eu nui ma huiˬ-eu mahˇ-eu jeˬ-ahˇ nga maꞈ gʼeu ka-eu ma. Nui noeˬ yawˬ hmˬ na luꞈ-ahˇ nga maꞈ paꞈ cuꞈ-awˇ, Ka li-euˬ ehˇ dawˬ bi naˇ haˬ-eu ma.

⁶Naw maꞈ Ka li-ahˇ tiˬ byah tiˬ loꞈ saˇ jaˇ ziꞈ laˇ-euˬ gaˇ nga maꞈ ya mawˇ duˬ gʼaˬ naˇ, saˇ jaˇ maˬ kʼaˇ ziꞈ-eu tsawˇ haˬ-ahˇ kʼehˬ-eu gʼaˇ duˬ nga maꞈ lehˬ hmˬ taˬ-euˬ ma.

⁷Naw maꞈ-aˬ, myaˆ-ahˇ mawˇ laˇ-eu kʼoeˇ taˆ paw-euˬ gaˇ kawˆ-ahˇ tehꞈ-ehˇ haw-eu meh. Ngaˇ Ka li-euˬ tsawˇ haˬ ma lehˇ kʼaˬ duˬ ni ehˇ tsehˆ peuˬ-eu tsawˇ haˬ jawˇ-eu ngeuˇ naˇ, yawˬ ha gaˇ kawˆ yawˬ ha yaw muiˬ paˬ-ehˇ paˇ bi shaˇ noeˬ duˬ-awˬ. Aˬ jeˬ miˇ neh ehˇ naˇ, nga maꞈ kʼawꞈ aˬ yawꞈ loꞈ-ehˇ Ka liˬ-euˬ tsawˇ haˬ pyeuꞈ-eu ma.

⁸Sahˬpaˬ Yeˬsuˇ neh nga maꞈ-ahˇ biꞈ laꞈ-euˬ baoˬ gaˇ kawˆ ngaˇ kʼahˬ sehˇ aˇ dzehˬ jehˆ dzeuˇ-euˬ baw law hawˇ kʼawꞈ, ngaˇ maˬ shaꞈ dawˇ. Baoˬ kʼoeˇ-aˬ, naw maꞈ-euˬ jah-eu jeˬ bi huiˬ bi mahˇ laˇ-eu gʼaˇ duˬ meh. Naw maꞈ-ahˇ laˇ cawˆ-eu gʼaˇ duˬ maˬ ngeuˇ-a.

⁹Ngaˇ naw maꞈ-ahˇ sahˬ boꞈ boꞈ-awˇ guˆ tsiˬ nyehꞈ-eu nga lehˇ maˬ bi gʼoˆ pyawˆ mawꞈ nya.

¹⁰“Pawˇluˆ neh boꞈ-euˬ sahˬ boꞈ-aˬ, kah dui dui-awˇ gʼaˬ kʼaˆ dui dui meh. Ehˇ kʼawꞈ, aˬ yawꞈ-euˬ gʼawˇ mawˇ nga maꞈ nehˬ-ehˇ jawˇ naˇ, nahˬ jawˆ ni gʼeh-awˇ, aˬ yawꞈ neh ngehˬ-euˬ dawˬ baoˬ tiˬ pawꞈ-iˬ maˬ ahˇ-a” lehˇ, tsawˇ haˬ tiˬ paˆ na deuˬ ehˇ tehꞈ-a.

¹¹Kʼoeˇ loꞈ-ehˇ ehˇ-eu deuˬ bi gʼoˆ shaw mawꞈ-eu-aˬ, nga maꞈ gaˇ mahˇ jawˇ ngeh naw maꞈ jawˇ gaˇ boꞈ ahˇ leꞈ-euˬ sahˬ boꞈ laꞈ kʼoeˇ ehˇ taˬ-euˬ jeˬ hawˇ-eu, nga maꞈ naw maꞈ jawˇ gaˇ oe keuˆ-awˇ mˇ le-eu jeˬ-aˬ, nyiˬ jeˬ maˬ ngeuˇ de. Tiˬ jeˬ tehꞈ ma.

¹²Yawˬ haˇ yawˬ ha maˬ gaˇ ma lehˇ noeˬ-eu tsawˇ haˬ kʼoeˇ deuˬ naˆ ni nga maꞈ kʼawꞈ maˬ gaˇ ma lehˇ maˬ ehˇ peuˬ-eu uˬ taꞈ, aˬ yawꞈ maꞈ-ahˇ maˬ ciˬ cehˆ leˇ peuˬ nya. Aˬ yawꞈ maꞈ aˇ naˆ ni dzawˬ-eu nga. Yawˬ haˇ yawˬ ha daˇ dza dza-awˇ, yawˬ haˇ yawˬ ha sawˇ poeˬ-eu meh.

¹³Ehˇ kʼawꞈ, nga maꞈ-aˬ, aˇ dzehˬ nui paw aˇ dzeuˇ dzeuˇ ni kʼahˬ sehˇ maˬ jehˆ. Miˬyehˇ neh bi mˇ laꞈ-euˬ gaˇ laꞈ kʼoeˇ kʼahˬ sehˇ jehˆ-eu tehꞈ ma. Naw maꞈ nehˬ-ehˇ mˇ luꞈ-eu heu kʼawꞈ, Miˬyehˇ neh bi mˇ laꞈ-euˬ meh.

¹⁴Naw maꞈ kʼawꞈ, Miˬyehˇ neh nga maꞈ-ahˇ bi mˇ laꞈ-euˬ gaˇ laꞈ kʼoeˇ ahˇ-eu tehꞈ miˇ neh, naw maꞈ jawˇ gaˇ nya maꞈ Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ yuˇ-awˇ oe ngeh, kʼoeˇ uˬ taꞈ-ehˇ aˇ dzehˬ maˬ mˇ gʼeh-aˬ.

¹⁵Kʼoeˇ miˇ neh, nga maꞈ-ahˇ bi mˇ laꞈ-euˬ taꞈ-ehˇ aˬ cawˬ mˇ dzehˬ gʼeh-eu gaˇ nga maꞈ kʼahˬ sehˇ maˬ jehˆ. Nga maꞈ-aˬ, naw maꞈ-euˬ jah-eu jeˬ huiˬ laˇ mahˇ laˇ gaˇ noeˬ tmˬ-awˇ, Miˬyehˇ neh bi mˇ laꞈ-euˬ laꞈ kʼoeˇ tehꞈ-ehˇ naw maꞈ jawˇ gaˇ kʼoeˇ naˆ maˬ tseˇ huiˬ-eu gaˇ deuˬ-ahˇ ya mˇ gaˇ noeˬ tmˬ-eu ma.

¹⁶Kʼoeˇ naˇ, naw maꞈ jawˇ-eu miˇ kʼahˬ iˇ dzeuˇ gʼeh-awˇ nga maꞈ Laˬ kʼaˬ cehˇ-eu Guiˬ lahˬ dawˬ mehˬ-iˇ nya tehꞈ-a. Kʼoeˇ ngeh jawˇ, aˬ cawˬ-euˬ deh yaˇ-ahˇ mˇ taˬ-euˬ jeˬ-ahˇ nga maꞈ kʼahˬ sehˇ maˬ paˇ ya jehˆ-aˇ.

¹⁷Ehˇ kʼawꞈ, “Kʼahˬ sehˇ kʼaˇ jehˆ mawꞈ-eu tsawˇ haˬ deuˬ Sahˬpaˬ Yeˬsuˇ neh mˇ taˬ-euˬ gaˇ kawˆ jehˆ-awˬ” lehˇ Jaˇliꞈ laꞈ kʼoeˇ ehˇ taˬ-euˬ meh.

¹⁸Yawˬ haˇ yawˬ ha maˬ gaˇ ma lehˇ noeˬ-eu tsawˇ haˬ-aˬ, ja ceuˬ paˬ-ehˇ gʼeh-eu tsawˇ haˬ maˬ ngeuˇ-a. Sahˬpaˬ Yeˬsuˇ neh maˬ gaˇ meh lehˇ noeˬ-euˬ tsawˇ haˬ tehꞈ-ehˇ ja ceuˬ paˬ-ehˇ gʼeh-eu tsawˇ haˬ pyeuꞈ-eu meh.