Read Akha 2 Gawˇliˬtu 13 Bible Online

2 Gawˇliˬtu 13 - Akha bible

2 Gawˇliˬtu 13

¹Nymˬ-mˇ jawˇ poˆ naw maꞈ jawˇ gaˇ ngaˇ oe-eu lehˇ gʼeh-eu heu-aˬ, smˬ poˆ tiˬ poˆ ma. “Aˬ cawˬ-ahˇ yaˇ kʼaˬ ja ngeh tsawˇ kaˬ nyiˬ gʼaˬ smˇ gʼaˬ ya bi jawˇ meh” lehˇ Jaˇliꞈ laꞈ kʼoeˇ ehˇ taˬ-euˬ jaˆ-eu meh.

²Naw maꞈ laꞈ kʼoeˇ dzeuˇ laˇ ngeh iˬ baˇ mˇ-euˬ deuˬ hawˇ-eu nui deuˬ dawˬ tawˆ luꞈ-ahˇ ngaˇ heu loꞈ-ehˇ ehˇ mawꞈ-eu ma. Ngaˇ naw maꞈ jawˇ gaˇ nyiˬ poˆ tiˬ poˆ oe ngeh, gaˇ kawˆ heu naw maꞈ-ahˇ ehˇ nehˬ gʼaˬ-euˬ ma. Nymˬ-mˇ ngaˇ naw maꞈ nehˬ-ehˇ maˬ jawˇ ngeh kʼawꞈ, tiˬ poˆ paˇ ehˇ poˆ-eu ma. Ngaˇ yawˬ poˆ yawˬ paˇ oe ngeh, tiˬ gʼaˬ-ahˇ-iˬ maˬ paˇ taˬ nehˬ ma lehˇ ehˇ taˬ-euˬ ma.

³Ngaˬ-ahˇ gʼoe-awˇ Ka li dawˬ ngehˬ-eu gaˇ kawˆ naw maꞈ siˬ mawꞈ-eu loꞈ-ehˇ ya siˬ ya mawˇ duˬ tehꞈ-a. Naw maꞈ-euˬ gaˇ kawˆ-ahˇ taꞈ leˇ-awˇ aˬ yawꞈ nahˬ jawˆ ni gʼeh-eu maˬ ngeuˇ-a. Aˬ yawꞈ-euˬ baoˬ naw maꞈ-ahˇ bi mawˇ-eu meh.

⁴Aˬ jeˬ miˇ neh ehˇ naˇ, nahˬ jawˆ ni gʼeh-eu laꞈ kʼoeˇ aˬ yawꞈ-ahˇ laꞈ yaꞈ kʼoeˇ taˆ bi taꞈ sehꞈ-euˬ kʼawꞈ, Miˬyehˇ-euˬ baoˬ baˬ da neh nymˬ-mˇ aˬ yawꞈ dehꞈ luꞈ meh. Aˬ yawꞈ-ahˇ taꞈ-eu laꞈ kʼoeˇ nga maꞈ kʼawꞈ nahˬ jawˆ ni gʼeh-eu ma. Ehˇ kʼawꞈ, naw maꞈ nehˬ-ehˇ nga maꞈ dehꞈ taꞈ luꞈ-eu heu-aˬ, Miˬyehˇ-euˬ baoˬ-ahˇ gʼoe-awˇ Ka li nehˬ-ehˇ dehꞈ luꞈ-eu miˇ neh deuˇ geuˆ ni jaˆ luꞈ ma.

⁵Naw maꞈ jah-eu jeˬ-ahˇ ziꞈ dah ni tuˆ tehˬ luꞈ ma loˇ lehˇ yawˬ haˇ yawˬ ha pyehˆ tseˇ haw-awˬ. Yawˬ haˇ yawˬ ha lawˬ haw-awˬ. Yeˬsuˇ Ka li naw maꞈ laꞈ kʼoeˇ jawˇ meh lehˇ maˬ siˬ duˬ te loˇ. Maˬ ngeuˇ naˇ, lawˬ haw-eu jeˬ laꞈ kʼoeˇ naw maꞈ smˬ-iˇ teˬ loˇ.

⁶Lawˬ haw-eu jeˬ-ahˇ nga maꞈ gʼaˬ leˇ-euˬ gaˇ kawˆ naw maꞈ siˬ nya meh lehˇ ngaˇ jah-eu ma.

⁷Naw maꞈ yaw lehˬ jeˬ maˬ ya mˇ ni nga maꞈ Miˬyehˇ-ahˇ guiˬ lahˬ shaˇ luꞈ ma. Lawˬ haw-eu jeˬ-ahˇ nga maꞈ gʼaˬ leˇ-euˬ gaˇ kawˆ bi doˆ laˇ-eu lehˇ heu loꞈ-ehˇ shaˇ-eu maˬ ngeuˇ. Lawˬ haw-eu jeˬ-ahˇ nga maꞈ smˬ-iˇ-euˬ gaˇ duˇ leˇ law hawˇ kʼawꞈ, tsaˬ-eu jeˬ-ahˇ naw maꞈ mˇ nya ni shaˇ-eu jeˬ pyeuꞈ-eu ma.

⁸Aˬ jeˬ miˇ neh ehˇ naˇ, yaw tsaˬ yaw dawˇ jeˬ-ahˇ bahˬ leˇ-eu jeˬ nga maꞈ maˬ mˇ nya-a. Yaw tsaˬ yaw dawˇ jeˬ gʼaˇ duˬ tehꞈ-ehˇ nga maꞈ ya mˇ meh.

⁹Nga maꞈ gʼaˬ baˬ-awˇ naw maꞈ gʼaˬ kʼaˆ gaˇ nga maꞈ laˬ kʼaˬ cehˇ-eu ma. Nga maꞈ guiˬ lahˬ shaˇ-eu-aˬ, naw maꞈ bi huiˬ bi mahˇ dzehˬ laˇ-eu gʼaˇ duˬ ma.

¹⁰Ngaˇ naw maꞈ jawˇ gaˇ oe keuˆ ngeh, Sahˬpaˬ Ka li neh ngaˬ-ahˇ biꞈ laꞈ-euˬ baoˬ zmˬ-awˇ, naw maꞈ-ahˇ yaw kʼaˆ kʼaˆ-ehˇ maˬ ya jahˇ nehˬ-eu gʼaˇ duˬ, gaˇ mahˇ kaˬ gaˇ jawˇ ngeh neh heu loꞈ-ehˇ boꞈ ahˇ leꞈ-euˬ jeˬ pyeuꞈ-eu ma. Baoˬ kʼoeˇ-aˬ, naw maꞈ-ahˇ bi laˆ cawˆ-eu gʼaˇ duˬ biꞈ laꞈ-euˬ maˬ ngeuˇ-a. Naw maꞈ bi huiˬ bi mahˇ laˇ ni mˇ-eu gʼaˇ duˬ biꞈ laˬ-euˬ meh.

¹¹Aˬ yuiꞈ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu loꞈ-ehˇ ehˇ ma. Laˬ kʼaˬ cehˇ-eu jeˬ oꞈ luꞈ-uˇ. Naw maꞈ dehꞈ paˇ-awˬ. Ngaˬ-euˬ shaˇ dawˬ naˇ haˬ nehˬ laꞈ-awˬ. Tiˬ gʼaˬ tiˇ gʼaˬ tsaˬ leˇ dzoeˇ leˇ-awˬ. Gʼoeˇ-eu gaˬ-eu jeˬ hawˇ-eu nui saˇ oꞈ-eu jeˬ biꞈ-eu Miˬyehˇ naw maꞈ nehˬ-ehˇ jawˇ tehꞈ-a.

¹²Naw maꞈ tiˬ gʼaˬ tiˇ gʼaˬ yaw muiˬ yaw shawˇ laꞈ kʼoeˇ mehˬ cuˇ cuˇ-awˇ ha-awˬ.[1] Miˬyehˇ-euˬ tsawˇ haˬ dawˬ tawˆ luꞈ, naw maꞈ-ahˇ dawˬ cawˬ puˬ ahˇ leꞈ-euˬ meh.

¹³Sahˬpaˬ Yeˬsuˇ Ka liˬ-euˬ guiˬ lahˬ yaw dzahˇ, Miˬyehˇ-euˬ gʼoeˇ-eu gaˬ-eu jeˬ hawˇ-eu, Muiˬ-eu Shawˇ-eu Yaw sahˇ Miˬyehˇ-euˬ cawˬ cawˬ-eu jeˬ, naw maꞈ dawˬ tawˆ luꞈ kʼoeˇ taˆ jaˆ luꞈ-uˇ.