Read Akha 2 Gawˇliˬtu 2 Bible Online

2 Gawˇliˬtu 2 - Akha bible

2 Gawˇliˬtu 2

¹Kʼoeˇ miˇ neh, naw maꞈ maˬ paˇ bi noeˬ shaˬ-eu gʼaˇ duˬ, naw maꞈ jawˇ gaˇ maˬ paˇ oe ma lehˇ ngaˇ noeˬ tsehˆ-euˬ ma.

²Ngaˇ laˬ kʼaˬ cehˇ ni jahˇ-eu deuˬ pyeuꞈ-eu naw maꞈ-ahˇ ngaˬ neh bi noeˬ shaˬ-euˬ ngeuˇ naˇ, ngaˬ-ahˇ laˬ kʼaˬ cehˇ ni jahˇ nehˬ laꞈ-eu aˬ suˇ gʼaˬ paˇ jawˇ nmˇ. Kʼoeˇ miˇ neh, ngaˇ naw maꞈ-ahˇ sahˬ boꞈ kʼoeˇ taꞈ boꞈ ahˇ leꞈ-euˬ jeˬ pyeuꞈ-eu ma.

³Ngaˇ laˬ kʼaˬ cehˇ ni jahˇ nehˬ laꞈ paˬ-ehˇ gʼeh-eu tsawˇ haˬ deuˬ neh ngaˇ ya noeˬ shaˬ ni paˇ bi jahˇ-eu lehˇ naw maꞈ jawˇ gaˇ ngaˇ maˬ paˇ oe mawꞈ miˇ-a. Aˬ jeˬ miˇ neh ehˇ naˇ, ngaˇ laˬ kʼaˬ cehˇ naˇ, naw maꞈ dawˬ tawˆ luꞈ kʼawꞈ laˬ kʼaˬ cehˇ meh lehˇ ngaˇ jah-eu ma.

⁴Ngaˇ nui ma cawˆ dui dui-awˇ shaˬ zahˬ mˇ-eu laꞈ kʼoeˇ, myaˆ biˇ doˆ doˆ-ehˇ naw maꞈ-ahˇ sahˬ boꞈ kʼoeˇ taꞈ boꞈ ahˇ leꞈ-euˬ ma. Ngaˬ-euˬ nui ma laꞈ kʼoeˇ-aˬ, naw maꞈ-ahˇ bi noeˬ shaˬ mawꞈ-eu maˬ ngeuˇ. Ngaˇ naw maꞈ-ahˇ aˇ naˆ ni gaˬ-eu gaˇ kawˆ bi siˬ duˬ mawꞈ-eu ma.

⁵Tsawˇ haˬ tiˬ gʼaˬ na aˬ cawˬ bi noeˬ shaˬ-eu jeˬ mˇ naˇ, ngaˬ-ahˇ tehꞈ-ehˇ coeˬ laˇ-eu maˬ ngeuˇ-a. Naw maꞈ-ahˇ kʼawꞈ ui cuiˆ na coeˬ leˇ-eu meh. (Gaˇ kawˆ heu aˇ dzehˬ maˬ ehˇ dzeuˇ mawꞈ-eu miˇ neh, ngaˇ heu naˆ ni tehꞈ-ehˇ ehˇ-eu ma.)

⁶Kʼoeˇ loꞈ-ehˇ gʼeh-eu tsawˇ haˬ-ahˇ Ka li zaˬ aˇ muˇ laꞈ kʼoeˇ uˇ-eu tsawˇ haˬ myaˬ ni tiˬ paˆ nui ma tsaˬ-awˇ kʼoeˇ loꞈ-ehˇ daˇ nehˬ-euˬ-aˬ, gʼaˬ tehꞈ-a.

⁷Ehˇ kʼawꞈ, aˬ yawꞈ aˇ dzehˬ dzeuˇ ni noeˬ shaˬ-awˇ maˬ ya cawˆ-iˇ ni, nymˬ-mˇ naw maꞈ aˬ yawꞈ-ahˇ iˬ baˇ pyehˬ nehˬ-awˇ gʼaˬ biꞈ nehˬ-eu tsaˬ tehꞈ-a.

⁸Kʼoeˇ miˇ neh, naw maꞈ aˬ yawꞈ-ahˇ maˇ maˇ ni gaˬ-eu gaˇ kawˆ bi siˬ-eu gʼaˇ duˬ, ngaˇ naw maꞈ-ahˇ shaˇ-eu ma.

⁹Naw maꞈ ngaˬ neh mehˬ-euˬ tsoˆ-euˬ dawˬ-ahˇ aˇ naˆ ni naˇ haˬ geuꞈ-eu nga lehˇ ngaˇ siˬ duˬ mawꞈ-eu miˇ neh, naw maꞈ-ahˇ lawˬ haw-eu laꞈ kʼoeˇ sahˬ boꞈ kʼoeˇ taꞈ boꞈ ahˇ leꞈ-euˬ jeˬ pyeuꞈ-eu ma.

¹⁰Tsawˇ haˬ tiˬ gʼaˬ na mˇ lehˬ-euˬ gaˇ naw maꞈ iˬ baˇ pyehˬ nehˬ naˇ, ngaˇ kʼawꞈ tsawˇ haˬ kʼoeˇ gʼaˬ-ahˇ iˬ baˇ pyehˬ-eu ma. Ngaˇ tiˬ jeˬ paˬ gʼaˇ duˬ iˬ baˇ pyehˬ naˇ, ngaˬ neh iˬ baˇ pyehˬ-euˬ kʼoeˇ-aˬ, naw maꞈ gʼaˇ duˬ Ka li-euˬ mehˬ shi iˬ baˇ pyehˬ-eu jeˬ pyeuꞈ-eu ma.

¹¹Nehꞈ Saˬdaˬ aˬ dui-ahˇ maˬ bi gʼaˬ laˇ ni ngaˇ kʼoeˇ loꞈ-ehˇ mˇ-eu ma. Aˬ jeˬ miˇ neh ehˇ naˇ, aˬ yawꞈ-euˬ bawˬ toˆ aˬ dui siˬ nya luꞈ ma.

¹²Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ-eu lehˇ Daˬloˇ meuˬ-ahˇ ngaˇ laˇ keuˆ ngeh, kʼoeˇ gaˇ gaˇ mˇ nya ni Sahˬpaˬ Yeˬsuˇ ngaˬ-ahˇ gaˇ ma pah nehˬ laꞈ taˬ-euˬ gaˇ ya mawˇ-euˬ ma.

¹³Ehˇ kʼawꞈ, a nyiˇ Tiˇtuˆ-ahˇ kʼoeˇ gaˇ maˬ ya mawˇ-euˬ miˇ neh nui ma tiˬ pawꞈ-iˬ maˬ saˇ nya. Kʼoeˇ miˇ neh, kʼoeˇ gaˇ jawˇ-eu tsawˇ haˬ deuˬ-ahˇ dawˬ cawˬ puˬ yaꞈ-awˇ, Maˬgeˬdawˇniˆˆ miˇ kʼahˬ-ahˇ le gʼeh leꞈ-euˬ ma.

¹⁴Ehˇ kʼawꞈ, Miˬyehˇ-euˬ guiˬ lahˬ-ahˇ ja ceuˬ-eu ma. Aˬ jeˬ miˇ neh ehˇ naˇ, Ka li laꞈ kʼoeˇ aˬ dui gʼaˬ leˇ nya ni aˬ yawꞈ sheuˬ gʼeh nehˬ laꞈ-awˇ, tsiˇ yaw saw jeˬ yawˬ gaˇ na luꞈ saw keuˆ-iˇ-eu loꞈ-ehˇ, Ka li-ahˇ siˬ nya-eu jeˬ yawˬ gaˇ na luꞈ byah-iˇ ni nga maꞈ-ahˇ aˬ yawꞈ zmˬ nehˬ laꞈ-euˬ meh.

¹⁵Aˬ jeˬ miˇ neh ehˇ naˇ, nga maꞈ-aˬ, ka kʼoꞈ-eu jeˬ za gʼaˬ-euˬ deuˬ jawˇ gaˇ maˬ ehˇ, piˬ-iˇ byoˆ-iˇ luꞈ-eu deuˬ jawˇ gaˇ maˬ ehˇ saw keuˆ-iˇ-euˬ, Ka li neh Miˬyehˇ-ahˇ lawˇ nehˬ-euˬ tsiˇ yaw saw jeˬ-ahˇ duˇ-eu ma.

¹⁶Piˬ-iˇ byoˆ-iˇ luꞈ-eu deuˬ gʼaˇ duˬ-aˬ, bi shiˇ-eu yaw buꞈ behꞈ laꞈ gaˇ duˇ-awˇ, ka kʼoꞈ-eu jeˬ za gʼaˬ-euˬ deuˬ gʼaˇ duˬ-aˬ, bi dehꞈ laˇ-eu yaw saw jeˬ-ahˇ duˇ-eu meh. Heu loꞈ-ehˇ gʼeh-eu gaˇ mˇ nya-eu aˬ suˇ gʼaˬ jawˇ ta.

¹⁷Nga maꞈ-aˬ, aˬ cawˬ loꞈ-ehˇ yawˬ ha gʼaˇ duˬ jiˇ jeuˬ ahˇ ni Miˬyehˇ dawˬ kawˬ mehˬ-eu tsawˇ haˬ maˬ ngeuˇ. Ehˇ kʼawꞈ, Miˬyehˇ neh kʼehˇ gʼeh leꞈ-euˬ tsawˇ haˬ pyeuꞈ-eu miˇ neh, Ka li-euˬ zaˬ kʼaˆ loꞈ-ehˇ Miˬyehˇ mehˬ shi dawˇ coe ni ngehˬ-eu tmˇ-eu ma.