Read Akha 2 Gawˇliˬtu 4 Bible Online

2 Gawˇliˬtu 4 - Akha bible

2 Gawˇliˬtu 4

¹Miˬyehˇ gʼawˬ shaˬ gaˬ-eu laꞈ kʼoeˇ nga maꞈ-ahˇ gaˇ heu bi mˇ laꞈ-euˬ miˇ neh, nga maꞈ-euˬ nui ma gʼaˬ maˬ baˬ.

²Shaꞈ dawˇ paˬ-ehˇ gʼeh-eu zaꞈ taˬ-euˬ jeˬ-ahˇ nga maꞈ tiˬ jawˇ-iˬ maˬ mˇ. Mehˇ shuiˇ shuiˇ-eu jeˬ hawˇ-eu Miˬyehˇ dawˬ kawˬ-ahˇ yuˇ pyawˆ-eu jeˬ nga maꞈ maˬ jahˇ. Yaw tsaˬ yaw dawˇ jeˬ-ahˇ bya cehˆ ni mehˬ-awˇ , nga maꞈ-ahˇ aˬ cawˬ jah coeˇ ni Miˬyehˇ-euˬ mehˬ shi dehꞈ luꞈ-eu ma.

³Nga maꞈ mehˬ luꞈ-eu Laˬ kʼaˬ cehˇ-eu Guiˬ lahˬ dawˬ heu dehˬ kaˬ taˬ-euˬ ngeuˇ lawˬ naˇ, luˬ-iˇ seˇ-iˇ luꞈ-eu tsawˇ haˬ deuˬ-euˬ gʼaˇ duˬ tehꞈ-ehˇ dehˬ kaˬ taˬ-euˬ jeˬ pyeuꞈ-eu ma.

⁴Miˇ tsaˬ heu-ahˇ uˆ lahˇ luꞈ-eu miˬyehˇ pyeuꞈ-eu nehꞈ Saˬdaˬ neh aˬ yawꞈ maꞈ-euˬ nui ma-ahˇ yaw zahˇ laꞈ kʼoeˇ piˬ lahˇ taˬ-euˬ miˇ neh, aˬ yawꞈ maꞈ maˬ jah-a. Kʼoeˇ miˇ neh, Miˬyehˇ-ahˇ duˇ duˇ dehꞈ dehꞈ pyeuꞈ-eu Ka li-euˬ gaˇ kawˆ Laˬ kʼaˬ cehˇ-eu Guiˬ lahˬ dawˬ-euˬ yaw shehꞈ kʼahˬ sehˇ aˬ yawꞈ maꞈ kʼoeˇ taˆ bya luꞈ gaˇ aˬ yawꞈ maꞈ maˬ mawˇ nya-a.

⁵Nga maꞈ-aˬ, yawˬ ha-euˬ gaˇ kawˆ mehˬ luꞈ-eu maˬ ngeuˇ. Yeˬsuˇ Ka li-aˬ, tsawˇ haˬ dawˬ tawˆ luꞈ-euˬ Sahˬpaˬ pyeuꞈ-awˇ, nga maꞈ-aˬ, aˬ yawꞈ-euˬ gʼaˇ duˬ naw maꞈ-euˬ zaˬ kʼaˆ pyeuꞈ-eu gaˇ kawˆ mehˬ-eu ma.

⁶“Yaw zahˇ laꞈ kʼoeˇ yaw shehꞈ bya tehꞈ-a” lehˇ ehˇ-eu Miˬyehˇ hawˇ-eu Ka li-euˬ myaˆ pyawˬ kʼoeˇ taˆ bya doˆ le-euˬ Miˬyehˇ-euˬ yaw shehꞈ kʼahˬ sehˇ-ahˇ nga maꞈ siˬ nya laˇ ni nga maꞈ-euˬ nui ma laꞈ kʼoeˇ yaw shehꞈ bi bya laꞈ-euˬ Miˬyehˇ-aˬ, aˬ yawꞈ tiˬ gʼaˬ tehꞈ meh.

⁷Ehˇ kʼawꞈ, huiˬ dui dui-eu baoˬ-aˬ, nga maꞈ-euˬ maˬ ngeuˇ-ehˇ, Miˬyehˇ-euˬ pyeuꞈ-eu gaˇ kawˆ siˬ duˬ mawˇ duˬ laˇ ni, nga maꞈ-aˬ, saꞈ laˇ paw taꞈ leˇ-eu poeˬ dui dui-eu pyuˇ shuiˇ myawˬ gahˬ heu deuˬ dawˆ ahˇ taˬ-euˬ miˇ tsaˬ oeˬ lahˬ loˆ ni tehꞈ ma.

⁸Shaˬ zahˬ gʼawˬ mya jeˬ-ahˇ nga maꞈ ya daˬ-euˬ ma. Ehˇ kʼawꞈ, yaw li uˬ duˬ maˬ keuˆ le-aˬ siˬ. Tiˬ poˆ na noeˬ dui noeˬ duiˇ gaˇ keuˆ-euˬ ma. Ehˇ kʼawꞈ, nui ma cawˆ gaˇ maˬ keuˆ-aˬ siˬ.

⁹Kʼehˬ-eu kʼaˆ-eu jeˬ-ahˇ ya daˬ-euˬ ma. Ehˇ kʼawꞈ, cawˬ tiˬ gʼaˬ-iˬ maˬ baw ni bi byehˇ dzeh gaˇ maˬ keuˆ-aˬ siˬ. Diˬ lah nehˬ laꞈ gaˇ ya daˬ-euˬ ma. Ehˇ kʼawꞈ, shiˇ tsehˆ gaˇ maˬ keuˆ-aˬ siˬ.

¹⁰Yeˬsuˇ dehꞈ luꞈ-eu gaˇ kawˆ nga maꞈ-euˬ gʼawˇ mawˇ laꞈ kʼoeˇ aˬ cawˬ mawˇ nya ni, aˬ yawꞈ shiˇ-euˬ kʼoeˇ nga maꞈ-euˬ gʼawˇ mawˇ laꞈ kʼoeˇ aˬ myah luꞈ pi luꞈ-eu ma.

¹¹Nga maꞈ-euˬ buꞈ-iˇ cehˇ-iˇ nya-eu gʼawˇ mawˇ heu laꞈ kʼoeˇ Yeˬsuˇ dehꞈ luꞈ-eu gaˇ kawˆ aˬ cawˬ mawˇ nya ni, nga maꞈ yaw dehꞈ dehꞈ-eu heu aˬ yawꞈ gʼaˇ duˬ aˬ myah luꞈ shiˇ paˬ-ehˇ tsaˬ laˇ-eu meh.

¹²Ehˇ mawꞈ-eu-aˬ, saꞈ laˇ dehꞈ-eu jeˬ-ahˇ naw maꞈ siˬ nya laˇ ni, shiˬ shaˬ jiˇ shiˇ-eu jeˬ-ahˇ nga maꞈ maˬ tsehˆ leˇ ni ya tahˬ puˬ luꞈ ma.

¹³“Ngaˇ jah-eu miˇ neh dawˬ ngehˬ-eu ma” lehˇ, Jaˇliꞈ laꞈ kʼoeˇ tsawˇ haˬ tiˬ gʼaˬ neh ehˇ taˬ-euˬ jaˆ-eu meh. Jah-eu nui ma kʼoeˇ siˬ-ahˇ duˇ ni nga maꞈ jah-eu miˇ neh dawˬ ngehˬ-eu ma.

¹⁴Sahˬpaˬ Yeˬsuˇ-ahˇ bi gʼoꞈ dehꞈ laˇ-euˬ Miˬyehˇ-aˬ, nga maꞈ-ahˇ Yeˬsuˇ nehˬ-ehˇ bi gʼoꞈ dehꞈ laˇ-awˇ, naw maꞈ nehˬ-ehˇ tiˬ kawˆ loꞈ-ehˇ aˬ yawꞈ mehˬ shi bi sheuˬ keuˆ laꞈ tehꞈ-a lehˇ nga maꞈ siˬ nya ma.

¹⁵Nga maꞈ kʼaˇ ya daˬ-euˬ heu deuˬ dawˬ tawˆ luꞈ, naw maꞈ-euˬ gʼaˇ duˬ pyeuꞈ-eu ma. Miˬyehˇ-euˬ guiˬ lahˬ yaw dzahˇ za-euˬ tsawˇ haˬ tiˬ jawˇ saˇ-iˬ tiˬ jawˇ myaˬ laˇ luꞈ-eu loꞈ-ehˇ, Miˬyehˇ-euˬ yaw shehꞈ kʼahˬ sehˇ hawˇ-eu aˬ yawꞈ-euˬ guiˬ lahˬ-ahˇ ja ceuˬ-eu jeˬ, tiˬ jawˇ saˇ-iˬ tiˬ jawˇ myaˬ laˇ tehꞈ-a.

¹⁶Heu miˇ neh, nga maꞈ-euˬ nui ma tiˬ jawˇ-iˬ gʼaˬ maˬ baˬ. Nga maꞈ-euˬ shiˬ shaˬ jiˇ gʼawˇ mawˇ tiˬ jawˇ saˇ-iˬ tiˬ jawˇ teˬ le byoˆ le luꞈ kʼawꞈ, nga maꞈ-euˬ saꞈ laˇ gʼawˇ mawˇ tiˬ nah saˇ-iˬ tiˬ nah gʼaˬ yaw shuiꞈ za luꞈ ma.

¹⁷Tiˬ kʼehˬ tiˬ yamˬ laꞈ kʼoeˇ nga maꞈ ya daˬ luꞈ-eu ehˇ nyaꞈ maˬ nyeuˆ-eu shaˬ zahˬ heu-aˬ, maˬ shaˇ cehˆ nya gaˇ keuˆ ni huiˬ-eu mˬ maˬ maˬ byaˆ zaˇ ziˇ ziꞈ-eu yaw shehꞈ kʼahˬ sehˇ-ahˇ za nya ni lehˬ hmˬ luꞈ gaˇ duˇ-eu ma.

¹⁸Aˬ jeˬ miˇ neh ehˇ naˇ, myaˆ nuiˆ haw mawˇ nya-eu jeˬ-ahˇ aˬ dui noeˬ tsoˆ taˬ-euˬ maˬ ngeuˇ. Myaˆ nuiˆ maˬ haw mawˇ nya-eu jeˬ-ahˇ noeˬ tsoˆ taˬ-euˬ ma. Myaˆ nuiˆ haw mawˇ nya-eu jeˬ-aˬ, tiˬ kʼehˇ laˇ kʼehˬ gmˬ-eu tehꞈ meh. Ehˇ kʼawꞈ, myaˆ nuiˆ maˬ haw mawˇ nya-eu jeˬ-aˬ, mˬ maˬ maˬ byaˆ zaˇ ziˇ gmˬ-eu meh.