Read Akha 2 Gawˇliˬtu 7 Bible Online

2 Gawˇliˬtu 7 - Akha bible

2 Gawˇliˬtu 7

¹Ngaˇ gaˬ dui dui-eu cawˬ deuˬ-oˇ, Miˬyehˇ aˬ dui-ahˇ kʼoeˇ loꞈ-ehˇ saˇ jaˇ dzaˬ taˬ-euˬ miˇ neh, aˬ dui-euˬ gʼawˇ mawˇ hawˇ-eu saꞈ laˇ-ahˇ bi jawꞈ-iˇ nya-eu yawˬ jeˬ na luꞈ-ahˇ tsiˬ shawˇ dzeh-awˇ, Miˬyehˇ-ahˇ yaw zeu baw-awˇ guˆ-eu laꞈ kʼoeˇ yaw muiˬ yaw shawˇ shawˇ-ehˇ byah byah ni dehꞈ kaˇ-euˇ.

²Nga maꞈ gʼaˇ duˬ naw maꞈ-euˬ nui ma pah nehˬ laꞈ-awˬ. Tsawˇ haˬ tiˬ gʼaˬ-ahˇ-iˬ nga maꞈ maˬ mˇ lehˬ haw-aˬ. Tsawˇ haˬ tiˬ gʼaˬ-ahˇ-iˬ nga maꞈ maˬ laˆ cawˆ haw-aˬ. Tsawˇ haˬ tiˬ gʼaˬ-ahˇ-iˬ nga maꞈ maˬ myawꞈ maˬ shuiˇ haw-aˬ.

³Ngaˇ heu loꞈ-ehˇ ehˇ-eu-aˬ, naw maꞈ kʼoeˇ taˆ iˬ baˇ taˬ-awˇ ehˇ-eu maˬ ngeuˇ. Ngaˬ neh ehˇ dzeuˇ yaꞈ-euˬ loꞈ-ehˇ, dehꞈ ngeh maˬ ehˇ , shiˇ ngeh maˬ ehˇ, maˬ gʼawˬ-iˇ ni naw maꞈ-ahˇ nga maꞈ gʼoeˇ luꞈ gaˬ luꞈ ma.

⁴Naw maꞈ-ahˇ ngaˇ bya cehˆ ni ngehˬ cawˬ luꞈ-eu ma. Naw maꞈ-ahˇ ngaˇ nui kʼahˇ shiˇ dui dui nya. Nga maꞈ shaˬ zahˬ ya tahˬ puˬ dui dui kʼawꞈ, ngaˬ-euˬ nui ma kʼaˬ duˬ ni jaˆ luꞈ ma. Ngaˇ laˬ kʼaˬ cehˇ-eu byah kʼaˇ luꞈ ma.

⁵Nga maꞈ Maˬgeˬdawˇniˆˆ miˇ kʼahˬ-ahˇ laˇ keuˆ-euˬ kʼawꞈ, yaw saˇ maˬ oꞈ nya. Yawˬ paw na luꞈ shaˬ zahˬ keuˆ le teuˇ le-awˇ, aˬ cawˬ nehˬ-ehˇ ya ja dzaˬ-eu uˬ taꞈ, nui ma laꞈ kʼoeˇ guˆ-eu jeˬ pi luꞈ-eu ma.

⁶Ehˇ kʼawꞈ, nui ma cawˆ-eu deuˬ-ahˇ gʼaˬ biꞈ-eu Miˬyehˇ-aˬ, Tiˇtuˆ-ahˇ bi laˇ-eu laꞈ kʼoeˇ nga maꞈ-euˬ nui ma-ahˇ gʼaˬ biꞈ lahˬ laꞈ-euˬ meh.

⁷Aˬ yawꞈ laˇ-euˬ baˬ da neh tehꞈ-ehˇ nga maꞈ gʼaˬ ahˇ laˇ-euˬ maˬ ngeuˇ. Naw maꞈ aˬ yawꞈ-ahˇ aˬ joˆ-ehˇ gʼaˬ biꞈ-euˬ gaˇ kawˆ aˬ yawꞈ ja mehˬ nehˬ laꞈ-euˬ miˇ neh, nga maꞈ gʼaˬ ahˇ laˇ-euˬ ma. Naw maꞈ ngaˬ-ahˇ aˇ naˆ ni mawˇ mawꞈ-eu gaˇ kawˆ maˬ ehˇ, pyeuꞈ dzeuˇ yaꞈ-euˬ gaˇ kawˆ-ahˇ naw maꞈ aˇ naˆ ni noeˬ shaˬ luꞈ-eu gaˇ kawˆ maˬ ehˇ, naw maꞈ ngaˇ jawˇ paw aˇ naˆ ni pyawˬ mawꞈ-eu gaˇ kawˆ maˬ ehˇ, nga maꞈ-ahˇ aˬ yawꞈ dzawˇ mehˬ laꞈ-euˬ meh. Kʼoeˇ miˇ neh, ngaˇ laˬ kʼaˬ cehˇ-eu maˬ ehˇ jiˇ coeˇ nya.

⁸Ngaˬ neh boꞈ-euˬ sahˬ boꞈ kʼoeˇ taꞈ naw maꞈ-ahˇ bi noeˬ shaˬ-euˬ kʼawꞈ, sahˬ boꞈ kʼoeˇ taꞈ-ahˇ ngaˬ neh boꞈ-euˬ gaˇ ngaˇ nui ma maˬ saˇ-ehˇ maˬ gʼeh. Sahˬ boꞈ kʼoeˇ taꞈ baˬ da neh naw maꞈ tiˬ kʼehˬ tiˬ yamˬ ya noeˬ shaˬ luꞈ gaˇ ngaˇ ya mawˇ law nmˇ-aˬ, ngaˇ nui ma maˬ saˇ-eu kʼawꞈ baw tehꞈ-a.

⁹Ehˇ kʼawꞈ, nymˬ-mˇ ngaˇ laˬ kʼaˬ cehˇ-eu ma. Heu loꞈ-ehˇ ehˇ ngeh, naw maꞈ noeˬ shaˬ ni ya boꞈ-euˬ miˇ neh laˬ kʼaˬ cehˇ-eu ma lehˇ ehˇ mawꞈ-eu maˬ ngeuˇ. Naw maꞈ kʼoeˇ loꞈ-ehˇ noeˬ shaˬ-euˬ kʼoeˇ baˬ da neh, naw maꞈ yaw dehꞈ dehꞈ paˇ-euˬ gaˇ ngaˇ laˬ kʼaˬ cehˇ-eu ma lehˇ ehˇ mawꞈ-eu ma. Nga maꞈ baˬ da neh naw maꞈ maˬ ya smˬ-iˇ-eu gʼaˇ duˬ, Miˬyehˇ nui ma tsaˬ-eu laꞈ kʼoeˇ naw maꞈ kʼoeˇ loꞈ-ehˇ ya noeˬ shaˬ-euˬ jeˬ pyeuꞈ-eu meh.

¹⁰Miˬyehˇ nui ma tsaˬ-eu laꞈ kʼoeˇ ya noeˬ shaˬ-eu jeˬ-aˬ, nui ma-ahˇ bi noeˬ paˇ-awˇ, ka kʼoꞈ-eu jeˬ za ni sheuˬ gʼeh-eu jeˬ pyeuꞈ-eu meh. Kʼoeˇ baˬ da neh nui ma maˬ saˇ-ehˇ gʼeh-eu maˬ loˬ-a. Ehˇ kʼawꞈ, tsawˇ haˬ zaˬ-ahˇ taꞈ leˇ-awˇ noeˬ shaˬ-eu jeˬ-aˬ, shiˇ-eu jeˬ-ahˇ uˬ duˬ duˬ leˇ-eu meh.

¹¹Naw maꞈ neh noeˬ shaˬ-euˬ kʼoeˇ-ahˇ Miˬyehˇ aˬ joˆ-ehˇ jahˇ-euˬ gaˇ shaˇ noeˬ haw sheˇ. Naw maꞈ guiˬ lahˬ saꞈ laˇ paw nui ma keuˆ dui dui laˇ-euˬ meh. Naw maꞈ yawˬ ha maˬ mˇ lehˬ-euˬ gaˇ kawˆ bi siˬ bi mawˇ mawꞈ dui dui laˇ-euˬ meh. Yaw tsaˬ yaw dawˇ laꞈ kʼoeˇ nui ma pehˇ-eu, kʼahˬ lahˇ-eu, ngaˬ-ahˇ mawˇ mawꞈ dui dui-eu, ngaˬ-euˬ gʼaˇ duˬ nui ma keuˆ dui dui-eu, yaw lehˬ mˇ gaˇ yaw kʼaˆ-ehˇ daˇ nehˬ mawꞈ-eu, heu deuˬ naw maꞈ-euˬ laꞈ kʼoeˇ pyeuꞈ doˆ laˇ-euˬ meh. Yawˬ jeˬ na luꞈ laꞈ kʼoeˇ yawˬ ha maˬ lehˬ maˬ ca-eu gaˇ kawˆ bya cehˆ ni doˆ laˇ ni naw maꞈ dehꞈ-euˬ meh.

¹²Kʼoeˇ miˇ neh, sahˬ boꞈ kʼoeˇ taꞈ ngaˇ boꞈ-euˬ kʼawꞈ, aˬ cawˬ-ahˇ mˇ lehˬ-euˬ tsawˇ haˬ gʼaˇ duˬ boꞈ-euˬ maˬ ngeuˇ. Aˬ cawˬ mˇ lehˬ gaˇ ya daˬ-euˬ tsawˇ haˬ gʼaˇ duˬ boꞈ-euˬ kʼawꞈ maˬ ngeuˇ. Nga maꞈ gʼaˇ duˬ naw maꞈ nui ma aˇ naˆ ni keuˆ-eu gaˇ kawˆ Miˬyehˇ mehˬ shi naw maꞈ siˬ duˬ mawˇ duˬ nya ni boꞈ-euˬ ma.

¹³Kʼoeˇ baˬ da neh, nga maꞈ-euˬ nui ma gʼaˬ tiˬ tiˆ lahˬ laˇ-euˬ ma. Nga maꞈ-euˬ nui ma gʼaˬ tiˬ tiˆ lahˬ laˇ-euˬ tehꞈ maˬ ngeuˇ-a siˬ. Tiˇ tuˆ-euˬ nui ma gʼaˬ doeˇ dah kʼaˇ za ni naw maꞈ dawˬ tawˆ luꞈ caw ba nehˬ-euˬ miˇ neh Tiˇtuˆ laˬ kʼaˬ cehˇ-eu kʼoeˇ, nga maꞈ-ahˇ laˬ kʼaˬ cehˇ-eu jeˬ bi lahˬ laˇ gaˇ duˇ miˇ-a.

¹⁴Naw maꞈ-euˬ gaˇ kawˆ Tiˇtuˆ-ahˇ ngaˇ kʼahˬ sehˇ jehˆ-euˬ ma. Kʼoeˇ loꞈ-ehˇ kʼahˬ sehˇ jehˆ-euˬ baˬ da neh ngaˇ daˬ ga kʼaˇ maˬ za. Nga maꞈ naw maꞈ-ahˇ aˬ myah luꞈ kʼaˇ ngeuˇ-eu loꞈ-ehˇ dawˇ coe ni ehˇ-euˬ ma. Tiˇtuˆ mehˬ shi nga maꞈ kʼahˬ sehˇ jehˆ-euˬ kʼoeˇ kʼawꞈ, kʼaˇ ngeuˇ-eu loꞈ-ehˇ naw maꞈ-ahˇ ehˇ-eu ma.

¹⁵Aˬ yawꞈ neh naw maꞈ-ahˇ mehˬ nehˬ tsoˆ nehˬ-euˬ jeˬ-ahˇ naw maꞈ naˇ haˬ geuꞈ mawꞈ-eu nui ma ahˇ-awˇ, Miˬyehˇ mehˬ shi naw maꞈ guˆ-awˇ yaw dzuˬ dzuˬ-eu laꞈ kʼoeˇ aˬ yawꞈ-ahˇ ha geuꞈ nehˬ-euˬ gaˇ aˬ yawꞈ paˇ noeˬ mawˇ leˇ ngeh, aˬ yawꞈ-euˬ nui ma laꞈ kʼoeˇ naw maꞈ-ahˇ gaˬ-eu jeˬ bi lehˬ lehˬ laˇ-euˬ meh.

¹⁶Ngaˇ naw maꞈ-ahˇ nui ma taˬ coeˇ-eu miˇ neh laˬ kʼaˬ cehˇ dui dui nya.