Read Akha 2 Gawˇliˬtu 9 Bible Online

2 Gawˇliˬtu 9 - Akha bible

2 Gawˇliˬtu 9

¹Yuˇdaˆ miˇ kʼahˬ-ahˇ jawˇ-eu Miˬyehˇ-euˬ tsawˇ haˬ deuˬ-ahˇ caw ba-eu pyuˇ daˬ gaˇ kawˆ naw maꞈ-ahˇ ngaˇ sahˬ boꞈ boꞈ nehˬ-eu maˬ paˇ loˬ meh.

²Naw maꞈ caw ba mawꞈ-eu nui ma ahˇ meh lehˇ ngaˇ siˬ nya-awˇ, Maˬgeˬdawˇniˆˆ miˇ kʼahˬ-ahˇ jawˇ-eu Ka li zaˬ deuˬ-ahˇ naw maꞈ-euˬ gaˇ kawˆ ngaˇ kʼahˬ sehˇ jehˆ mehˬ gʼaˬ-euˬ ma. “Aˬgaˬyaˇ miˇ kʼahˬ-ahˇ jawˇ-eu Ka li zaˬ deuˬ-aˬ, miˇ nui kʼoꞈ ba neh caw ba nehˬ-eu gʼaˇ duˬ lehˬ hmˬ dah taˬ-euˬ meh” lehˇ ngaˇ ehˇ nehˬ-euˬ ma. Naw maꞈ nui ma keuˆ-eu gaˇ kawˆ ya gaˬ ngeh, aˬ yawꞈ maꞈ dawˬ tawˆ luꞈ ehˇ gʼaˬ ni nui ma keuˆ laˇ-euˬ meh.

³Naw maꞈ gaˇ kawˆ nga maꞈ neh kʼahˬ sehˇ jehˆ taˬ-euˬ kʼoeˇ yawꞈ ngehꞈ-ehˇ maˬ ya bi pyeuꞈ-eu gʼaˇ duˬ, aˬ nyiˇ heu deuˬ-ahˇ naw maꞈ jawˇ gaˇ ngaˇ kʼehˇ gʼeh leꞈ-euˬ ma. Ngaˬ neh ehˇ dzeuˇ-euˬ loꞈ-ehˇ caw ba-eu gʼaˇ duˬ naw maꞈ lehˬ hmˬ dah taˬ-euˬ duˇ.

⁴Ehˇ kʼawꞈ, Maˬgeˬdawˇniˆˆ miˇ kʼahˬ-ahˇ jawˇ-eu tsawˇ haˬ deuˬ ngaˬ nehˬ-ehˇ oe ngeh, naw maꞈ maˬ lehˬ hmˬ taˬ ni jawˇ gaˇ ya mawˇ naˇ, naw maꞈ daˬ ga-eu gaˇ kawˆ ngaˇ maˬ paˇ ehˇ nahˇ miˇ-a. Naw maꞈ-ahˇ jah jah-ehˇ kʼahˬ sehˇ jehˆ-euˬ nga maꞈ kʼawꞈ aˇ naˆ ni daˬ ga nmˇ.

⁵Kʼoeˇ miˇ neh, ngaˬ-euˬ gʼawˇ mawˇ naw maꞈ jawˇ gaˇ maˬ oe mi naˆ-ehˇ, naw maꞈ neh damˬ ma lehˇ ehˇ taˬ-euˬ loꞈ-ehˇ bi laˆ dah taˬ jiˇ-eu gʼaˇ duˬ, aˬ nyiˇ heu deuˬ-ahˇ jeˬ huˬ kʼehˇ gʼeh leꞈ-eu tsaˬ-eu duˇ lehˇ ngaˇ noeˬ-eu ma. Kʼoeˇ miˇ neh, ngaˇ oe keuˆ ngeh naw maꞈ laˆ uiˬ gʼaˬ jiˇ-awˇ, aˬ cawˬ ehˇ-eu miˇ neh damˬ-eu maˬ ngeuˇ-ehˇ, yawˬ ha nui ma keuˆ-awˇ damˬ-euˬ jeˬ pyeuꞈ-eu gaˇ kawˆ aˬ cawˬ-ahˇ mawˇ leˇ tehꞈ-a.

⁶Ngaˇ ehˇ mawꞈ-eu-aˬ, heu loꞈ-ehˇ ma. Ui cuiˆ tehꞈ-ehˇ sehˬ-euˬ tsawˇ haˬ-aˬ, ui cuiˆ tehꞈ-ehˇ ya yehˬ tehꞈ-a. Gʼawˬ mya ni sehˬ-euˬ tsawˇ haˬ-aˬ, gʼawˬ mya ni ya yehˬ tehꞈ-a.

⁷Kʼoeˇ miˇ neh, aˬ yawꞈ gʼaˬ yawꞈ yawˬ ha neh kʼaˇ noeˬ tsehˆ taˬ-euˬ loꞈ-ehˇ damˬ-awˬ. Nui ma maˬ keuˆ ni damˬ-eu maˬ ehˇ, aˬ cawˬ ehˇ-eu miˇ neh damˬ-eu maˬ ehˇ, taˬ bi pyeuꞈ. Aˬ jeˬ miˇ neh ehˇ naˇ, laˬ kʼaˬ tiˬ cehˇ damˬ-eu tsawˇ haˬ-ahˇ Miˬyehˇ gaˬ-eu meh.

⁸Naw maꞈ yawˬ ha gʼaˇ duˬ kʼaˇ loˬ-eu jeˬ tiˬ byah ni jaˆ laˇ-awˇ, aˬ cawˬ-ahˇ caw ba nehˬ nya-eu gʼaˇ duˬ aˇ dzehˬ kʼawꞈ tiˬ byah ni jaˆ laˇ ni, Miˬyehˇ naw maꞈ-ahˇ guiˬ lahˬ biꞈ nehˬ nya-eu meh.

⁹Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Shaˬ zaˬ zahˬ zaˬ deuˬ-euˬ gʼaˇ duˬ, gʼawˬ mya ni damˬ nehˬ-eu tsawˇ haˬ, yawˬ ha neh gʼawˬ shaˬ gaˬ-euˬ kʼoeˇ, mˬ maˬ maˬ byaˆ zaˇ ziˇ ziꞈ meh.”

¹⁰Ka-eu gʼaˇ duˬ siˬ yoeˬ hawˇ-eu dzaˬ-eu gʼaˇ duˬ kaˬ muˇ biꞈ-eu Miˬyehˇ-aˬ, naw maꞈ damˬ-eu jeˬ-ahˇ taꞈ leˇ-eu loˬ-eu siˬ yoeˬ nuiˆ yoeˬ dawˬ tawˆ luꞈ biꞈ nehˬ laꞈ-eu uˬ taꞈ, naw maꞈ nui ma keuˆ-awˇ damˬ-eu jeˬ siˬ le loˆ le-awˇ gʼawˬ mya ni za laˇ ni caw ba tehꞈ-a.

¹¹Naw maꞈ neh damˬ-euˬ jeˬ-ahˇ nga maꞈ sha miˇ nehˬ-eu baˬ da neh, aˬ cawˬ gʼawˬ mya ni Miˬyehˇ-ahˇ ja ceuˬ ni naw maꞈ aˬ myah luꞈ damˬ nya-eu gʼaˇ duˬ, Miˬyehˇ naw maꞈ-ahˇ smˇ muiˬ bi muiˬ laˇ tehꞈ-a.

¹²Aˬ jeˬ miˇ neh ehˇ naˇ, naw maꞈ heu loꞈ-ehˇ mˇ-eu heu-aˬ, Miˬyehˇ-euˬ tsawˇ haˬ loˬ luꞈ-eu tsahˇ-ahˇ gaˇ dahˇ tsoeˬ leˇ-eu tehꞈ maˬ ngeuˇ-a. Miˬyehˇ-euˬ guiˬ lahˬ-ahˇ ja ceuˬ-eu jeˬ kʼawꞈ maˬ ehˇ jiˇ coeˇ ni bi doˆ laˇ-eu meh.

¹³Naw maꞈ Ka li-euˬ Laˬ kʼaˬ cehˇ-eu Guiˬ lahˬ dawˬ-ahˇ saˇ jaˇ ziꞈ gaˇ maˬ ehˇ, Miˬyehˇ-euˬ tsawˇ haˬ kʼoeˇ deuˬ hawˇ-eu aˬ yawꞈ-ahˇ nui ma keuˆ-eu laꞈ kʼoeˇ damˬ nehˬ gaˇ maˬ ehˇ, aˬ cawˬ ya mawˇ ngeh, naw maꞈ neh mˇ-euˬ gaˇ heu-ahˇ haw-awˇ tsawˇ haˬ gʼawˬ mya ni Miˬyehˇ-euˬ yaw shehꞈ kʼahˬ sehˇ-ahˇ ja ceuˬ tehꞈ-a.

¹⁴Aˬ cawˬ naˆ maˬ tseˇ huiˬ-eu Miˬyehˇ-euˬ guiˬ lahˬ naw maꞈ laꞈ kʼoeˇ ahˇ-eu miˇ neh, aˬ yawꞈ maꞈ naw maꞈ-ahˇ gaˬ dui gʼoeˇ dui dui-eu laꞈ kʼoeˇ, naw maꞈ gʼaˇ duˬ guiˬ lahˬ shaˇ tehꞈ-a.

¹⁵Miˬyehˇ aˬ dui-ahˇ maˬ ehˇ jiˇ coeˇ-eu laꞈ sawˬ biꞈ laꞈ-euˬ miˇ neh, aˬ yawꞈ-euˬ guiˬ lahˬ-ahˇ ja ceuˬ kaˇ-euˇ.