Read Akha Gaˬlaˬtiˆ 3 Bible Online

Gaˬlaˬtiˆ 3 - Akha bible

Gaˬlaˬtiˆ 3

¹Gaˬlaˬtiˆ miˇ kʼahˬ-ahˇ jawˇ-eu dawˇ ga deuˬ-oˇ. Aˬ suˇ gʼaˬ neh naw maꞈ-ahˇ mehˇ shuiˇ paˇ bi shuiˇ tawˆ teˬ. Yeˬsuˇ Ka li laꞈ yaꞈ kʼoeˇ taˆ kamˇ shiˇ-euˬ gaˇ kawˆ naw maꞈ-euˬ myaˆ kʼeh yaw duˬ duˬ-ehˇ dzawˇ nehˬ gʼaˬ-euˬ maˬ ngeuˇ-a loˇ.

²Zahˇ dawˬ kʼoꞈ dawˬ-ahˇ mˇ byah-eu baˬ da neh Miˬyehˇ-euˬ Yaw sahˇ za teˬ loˇ. Maˬ ngeuˇ naˇ, Laˬ kʼaˬ cehˇ-eu Guiˬ lahˬ dawˬ-ahˇ ya gaˬ-awˇ jah-euˬ baˬ da neh za teˬ loˇ lehˇ, ngaˬ-ahˇ ehˇ nehˬ laꞈ sheˇ.

³Naw maꞈ aˇ naˆ naˆ-ehˇ dawˇ ga ga te. Miˬyehˇ-euˬ Yaw sahˇ-ahˇ gʼoe-awˇ naw maꞈ neh aˇ dahˬ beh taˬ-euˬ jeˬ-ahˇ, yawˬ ha-euˬ baoˬ-ahˇ gʼoe-awˇ aˇ saˬ saˬ-eu gʼeh te loˇ.

⁴Naw maꞈ neh kʼaˇ puˬ kʼaˇ mawˇ dzeuˇ yaꞈ-euˬ dawˬ tawˆ luꞈ yawꞈ ngehꞈ-a loˇ. Yawꞈ ngehꞈ maˬ ngeuˇ-a.

⁵Miˬyehˇ neh naw maꞈ-ahˇ Yaw sahˇ Miˬyehˇ biꞈ nehˬ leꞈ-awˇ zahˬ leˇ paˬ-ehˇ gʼeh-eu jeˬ mˇ mehˬ-euˬ kʼoeˇ, naw maꞈ Zahˇ dawˬ kʼoꞈ dawˬ-ahˇ mˇ byah-euˬ miˇ neh-a loˇ. Laˬ kʼaˬ cehˇ-eu Guiˬ lahˬ dawˬ-ahˇ ya gaˬ-awˇ jah-euˬ miˇ neh-a loˇ.

⁶Aˬbyaˬhaˬ neh ya puˬ ya mawˇ haw-euˬ jeˬ-ahˇ shaˇ noeˬ haw sheˇ. “Aˬ yawꞈ Miˬyehˇ-ahˇ jah-awˇ, aˬ yawꞈ-euˬ jah-eu jeˬ baˬ da neh Miˬyehˇ aˬ yawꞈ-ahˇ yaw tsaˬ yaw dawˇ tsawˇ haˬ lehˇ ha geuꞈ nehˬ-euˬ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

⁷Kʼoeˇ miˇ neh, maˇ maˇ ni Aˬbyaˬhaˬ-euˬ zaˬ deuˬ uˆ deuˬ-aˬ, jah-eu jeˬ ahˇ-eu tsawˇ haˬ deuˬ meh lehˇ naw maꞈ siˬ duˬ-eu tsaˬ meh.

⁸Yuˇdaˆ tsawˇ haˬ maˬ ngeuˇ-eu deuˬ kʼawꞈ jah-eu baˬ da neh Miˬyehˇ-ahˇ tsaˬ leˇ tsahˇ leˇ nya ni Miˬyehˇ jahˇ tehꞈ-a lehˇ, Jaˇliꞈ laꞈ kʼoeˇ aˇ hu ba neh ehˇ taˬ-euˬ jaˆ-eu meh. Kʼoeˇ miˇ neh, Jaˇ liꞈ dawˬ kawˬ kʼoeˇ Aˬbyaˬhaˬ-ahˇ Laˬ kʼaˬ cehˇ-eu Guiˬ lahˬ dawˬ mehˬ-eu laꞈ kʼoeˇ, “Nawˬ-ahˇ gʼoe-awˇ tsawˇ jeuˬ dawˬ tawˆ luꞈ-ahˇ Miˬyehˇ guiˬ lahˬ biꞈ tehꞈ-a” lehˇ ehˇ taˬ-euˬ meh.

⁹Aˬbyaˬhaˬ jah-euˬ baˬ da neh guiˬ lahˬ za-euˬ meh. Kʼoeˇ loꞈ-ehˇ duˇ ni, aˬ yawꞈ loꞈ-ehˇ kʼaˇ jah-eu tsawˇ haˬ dawˬ tawˆ luꞈ guiˬ lahˬ za-eu meh.

¹⁰Zahˇ dawˬ kʼoꞈ dawˬ-ahˇ mˇ byah gaˇ gʼoe gʼoe-ehˇ dehꞈ-eu tsawˇ haˬ deuˬ-aˬ, yaˬ kʼehˇ yaˬ-eu jeˬ-ahˇ ya daˬ-eu meh. Aˬ jeˬ miˇ neh ehˇ naˇ, “Zahˇ dawˬ kʼoꞈ dawˬ sahˬ boꞈ laꞈ kʼoeˇ kʼaˇ boꞈ taˬ-euˬ yawˬ jeˬ na luꞈ-ahˇ aˬ myah luꞈ maˬ byehˇ ni maˬ caw teh geuꞈ-eu tsawˇ haˬ-aˬ, Miˬyehˇ neh yaˬ kʼehˇ yaˬ-euˬ jeˬ-ahˇ ya daˬ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

¹¹Nymˬ-mˇ poˆ jawˇ-aˬ, tsawˇ haˬ tiˬ gʼaˬ-iˬ Zahˇ dawˬ kʼoꞈ dawˬ-ahˇ gʼoe-eu laꞈ kʼoeˇ Miˬyehˇ-ahˇ maˬ tsaˬ maˬ tsahˇ leˇ nya-a lehˇ siˬ duˬ laˇ taˬ-euˬ meh. Aˬ jeˬ miˇ neh ehˇ naˇ, “Jah-eu baˬ da neh Miˬyehˇ-ahˇ tsaˬ leˇ tsahˇ leˇ-euˬ tsawˇ haˬ tehꞈ-ehˇ ya dehꞈ-eu meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

¹²Ehˇ kʼawꞈ, Zahˇ dawˬ kʼoꞈ dawˬ-aˬ, jah-eu jeˬ-ahˇ tiˬ pawꞈ-iˬ maˬ taꞈ-a. Aˬ jeˬ miˇ neh ehˇ naˇ, “Zahˇ Dawˬ kʼoꞈ dawˬ laꞈ kʼoeˇ kʼaˇ ehˇ taˬ-euˬ yawˬ jeˬ na luꞈ mˇ byah-eu tsawˇ haˬ ya dehꞈ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

¹³Ehˇ kʼawꞈ, aˬ dui gʼaˇ duˬ yaˬ kʼehˇ yaˬ-eu jeˬ-ahˇ Ka li daˬ-awˇ, Zahˇ dawˬ kʼoꞈ dawˬ neh aˬ dui kʼoeˇ taˆ bi keuˆ le-euˬ yaˬ kʼehˇ yaˬ-eu jeˬ laꞈ kʼoeˇ aˬ yawꞈ aˬ dui-ahˇ ka kʼoꞈ nehˬ laꞈ-euˬ meh. Aˬ jeˬ miˇ neh ehˇ naˇ, “Aˇ bawˇ kʼoeˇ taˆ kʼaˇ paꞈ gʼeu sehꞈ-euˬ tsawˇ haˬ-aˬ, Miˬyehˇ neh yaˬ kʼehˇ yaˬ nehˬ-euˬ jeˬ-ahˇ ya daˬ-euˬ tsawˇ haˬ meh” lehˇ, Jaˇ liꞈ laꞈ kʼoeˇ ehˇ taˬ-euˬ meh.

¹⁴Miˬyehˇ neh Aˬbyaˬhaˬ-ahˇ saˇ jaˇ dzaˬ taˬ-euˬ guiˬ lahˬ yaw dzahˇ kʼoeˇ, Yeˬsuˇ Ka li-ahˇ gʼoe-awˇ Yuˇdaˆ tsawˇ haˬ maˬ ngeuˇ-eu deuˬ-ahˇ biꞈ nehˬ nya ni, Ka li kʼoeˇ loꞈ-ehˇ kamˇ shiˇ-euˬ meh. Kʼoeˇ-aˬ, Miˬyehˇ neh aˬ dui-ahˇ biꞈ ma lehˇ saˇ jaˇ dzaˬ taˬ-euˬ Yaw sahˇ Miˬyehˇ-ahˇ, jah-eu jeˬ ba da neh aˬ dui za nya ni mˇ-euˬ jeˬ pyeuꞈ-eu meh.

¹⁵Aˬ yuiꞈ aˬ nyiˇ Ka li zaˬ deuˬ-oˇ, yawˬ nah na luꞈ ya puˬ ya mawˇ luꞈ-eu gaˇ kawˆ yaw jeˬ ma jeˬ tiˬ hmˬ ngaˇ ehˇ-eu ma. Tsawˇ haˬ nyiˬ gʼaˬ yaw kaˬ gaˇ kawˆ tiˬ jeˬ na-ahˇ taꞈ leˇ-awˇ saˇ jaˇ dzaˬ-eu laꞈ kʼoeˇ sahˬ boꞈ boꞈ tsehˆ gʼaˬ naˇ, tiˬ gʼaˬ-iˬ maˬ paˇ laˆ pyaˆ nya-eu uˬ taꞈ, dawˬ tiˬ dawˬ-iˬ maˬ paˇ dawˆ lahˬ nya meh.

¹⁶Miˬyehˇ-aˬ, Aˬbyaˬhaˬ hawˇ-eu aˬ yawꞈ-euˬ zaˬ-ahˇ saˇ jaˇ dzaˬ-euˬ meh. Jaˇliꞈ laꞈ kʼoeˇ Aˬbyaˬhaˬ-euˬ “zaˬ deuˬ uˆ deuˬ” lehˇ maˬ ehˇ taˬ-aˬ. Kʼoeˇ miˇ neh tsawˇ haˬ gʼawˬ mya ni-ahˇ saˇ jaˇ dzaˬ-euˬ lehˇ ehˇ mawꞈ-eu maˬ ngeuˇ-a. Aˬbyaˬhaˬ-euˬ “zaˬ” lehˇ, tiˬ gʼaˬ-ahˇ tehꞈ-ehˇ ehˇ taˬ-euˬ meh. Ka li tiˬ gʼaˬ-ahˇ tehꞈ-ehˇ saˇ jaˇ dzaˬ-euˬ gaˇ ehˇ mawꞈ-eu meh.

¹⁷Ngaˇ ehˇ mawꞈ-eu-aˬ, heu loꞈ-ehˇ ma. Aˬbyaˬhaˬ nehˬ-ehˇ Miˬyehˇ dawˬ ma saˇ jaˇ dzaˬ-euˬ meh. Kʼoeˇ sawˇ miˇ tsa oeˬ yaˇ smˬ tseˇ kʼoꞈ gʼeh-awˇ neh hawˇ-eu biꞈ leꞈ-euˬ Zahˇ dawˬ kʼoꞈ dawˬ kʼoeˇ-aˬ, Miˬyehˇ neh dzaˬ taˬ-euˬ saˇ jaˇ kʼoeˇ-ahˇ maˬ laˆ pyaˆ nya-a.

¹⁸Miˬyehˇ neh biꞈ-euˬ jeˬ biˇ-aˬ, Zahˇ dawˬ kʼoꞈ dawˬ-ahˇ taꞈ-eu jeˬ pyeuꞈ-eu ngeuˇ naˇ, aˬ yawꞈ neh saˇ jaˇ dzaˬ taˬ-eu gaˇ taꞈ leˇ-eu jeˬ maˬ paˇ ngeuˇ meh. Ehˇ kʼawꞈ, Miˬyehˇ neh dzaˬ taˬ-euˬ saˇ jaˇ baˬ da neh jeˬ biˇ kʼoeˇ Aˬbyaˬhaˬ-ahˇ Miˬyehˇ biꞈ-euˬ meh.

¹⁹Toˆ-ehˇ ngeuˇ naˇ, Zahˇ dawˬ kʼoꞈ dawˬ kʼoeˇ aˬ jeˬ-euˬ gʼaˇ duˬ pyeuꞈ ta. Kʼoeˇ-aˬ, mˇ lehˬ-euˬ jeˬ-ahˇ bi siˬ nya-eu gʼaˇ duˬ biꞈ lahˬ laꞈ-euˬ jeˬ pyeuꞈ-awˇ, Miˬyehˇ neh saˇ jaˇ dzaˬ taˬ-euˬ gʼaˬ pyeuꞈ-eu Aˬbyaˬhaˬ-euˬ zaˬ kʼoeˇ gʼaˬ oe keuˆ ngeh keuˆ ni bi zmˬ-eu gʼaˇ duˬ biꞈ taˬ-euˬ jeˬ pyeuꞈ-eu meh. Zahˇ dawˬ kʼoꞈ dawˬ-aˬ, mˬ taˆ gʼaˬ kʼehˇ neh hehˇ ka leꞈ-awˇ, tsawˇ kaˬ tiˬ gʼaˬ-ahˇ neh tiˬ tiˆ biꞈ nehˬ le-euˬ jeˬ pyeuꞈ-eu meh.

²⁰Ehˇ kʼawꞈ, tiˬ gʼaˬ-ahˇ tehꞈ-ehˇ taꞈ-eu jeˬ ngeuˇ naˇ, tsawˇ kaˬ maˬ loˬ-a. Miˬyehˇ-aˬ, tiˬ gʼaˬ tehꞈ meh.

²¹Toˆ-ehˇ ngeuˇ naˇ, Zahˇ dawˬ kʼoꞈ dawˬ kʼoeˇ Miˬyehˇ neh dzaˬ taˬ-euˬ saˇ jaˇ-ahˇ laˆ cawˆ ta loˇ. Maˬ ngeuˇ-a. Aˬ jeˬ miˇ neh ehˇ naˇ, dehꞈ-eu jeˬ biꞈ laꞈ nya-eu zahˇ dawˬ kʼoꞈ dawˬ-ahˇ tsawˇ haˬ zaˬ deuˬ za taˬ-euˬ ngeuˇ naˇ, zahˇ dawˬ kʼoꞈ dawˬ kʼoeˇ-ahˇ mˇ byah-eu laꞈ kʼoeˇ Miˬyehˇ-ahˇ tsaˬ leˇ tsahˇ leˇ nya tehꞈ-a.

²²Ehˇ kʼawꞈ, miˇ tsaˬ heu dawˬ tawˆ luꞈ iˬ baˇ uˆ lahˇ-eu uˬ moˆ jawˇ luꞈ-eu meh lehˇ Jaˇliꞈ laꞈ kʼoeˇ ehˇ taˬ-euˬ meh. Kʼoeˇ miˇ neh, Yeˬsuˇ Ka li-ahˇ jah-eu deuˬ-ahˇ biꞈ ma lehˇ ehˇ taˬ-euˬ laꞈ sawˬ kʼoeˇ-aˬ, jah-eu tsawˇ haˬ deuˬ-ahˇ biꞈ-euˬ meh.

²³Ehˇ kʼawꞈ, jah-eu jeˬ maˬ keuˆ le nmˇ kaˬ, keuˆ le luꞈ-eu jah-eu jeˬ kʼoeˇ-ahˇ maˬ pah mehˬ nehˬ laꞈ kʼoeˇ keuˆ ni, Zahˇ dawˬ kʼoꞈ dawˬ neh aˬ dui-ahˇ piˬ lahˇ taˬ-euˬ meh.

²⁴Jah-eu jeˬ baˬ da neh Miˬyehˇ-ahˇ aˬ dui bi tsaˬ bi dzoeˇ leˇ nya-eu gʼaˇ duˬ Ka li maˬ oe keuˆ kʼoeˇ keuˆ ni, Zahˇ dawˬ kʼoꞈ dawˬ kʼoeˇ aˬ dui-ahˇ haw piˇ tawˬ-euˬ meh.

²⁵Nymˬ-mˇ-aˬ, jah-eu jeˬ-euˬ aˇ yamˬ keuˆ le-euˬ miˇ neh, Zahˇ dawˬ kʼoꞈ dawˬ koeˇ aˬ dui-ahˇ maˬ paˇ haw piˇ meh.

²⁶Jah-eu jeˬ baˬ da neh, naw maꞈ dawˬ tawˆ luꞈ Yeˬsuˇ Ka li laꞈ kʼoeˇ Miˬyehˇ-euˬ zaˬ pyeuꞈ-eu meh.

²⁷Naw maꞈ Ka li laꞈ kʼoeˇ iˇ cuꞈ kʼaˇ shawˇ-euˬ deuˬ-aˬ, mehˬ tsoeˬ dm-eu loꞈ-ehˇ Ka li-ahˇ dm taˬ-euˬ gaˇ duˇ meh.

²⁸Kʼoeˇ miˇ neh, Yuˇdaˆ tsawˇ haˬ hawˇ-eu Yuˇdaˆ tsawˇ haˬ maˬ ngeuˇ-eu deuˬ maˬ ehˇ, zaˬ kʼaˆ hawˇ-eu buˬ-iˇ-euˬ tsawˇ haˬ maˬ ehˇ, kʼaˬ dzeˇ zaˬ hawˇ-eu zaˬ miˬ zaˬ maˬ ehˇ, tiˬ pawꞈ-iˬ maˬ paˇ beu meh. Aˬ jeˬ miˇ neh ehˇ naˇ, Yeˬsuˇ Ka li laꞈ kʼoeˇ, naw maꞈ dawˬ tawˆ luꞈ tiˬ kawˆ meh.

²⁹Naw maꞈ Ka li-euˬ tsawˇ haˬ ngeuˇ naˇ, Aˬbyaˬhaˬ-euˬ zaˬ deuˬ uˆ deuˬ lehˇ sawˇ nya-eu miˇ neh, Miˬyehˇ neh saˇ jaˇ dzaˬ taˬ-euˬ jeˬ biˇ za tehꞈ-a.