Read Akha Gaˬlaˬtiˆ 4 Bible Online

Gaˬlaˬtiˆ 4 - Akha bible

Gaˬlaˬtiˆ 4

¹Ngaˇ ehˇ mawꞈ-eu-aˬ, heu loꞈ-ehˇ ma. Aˬ da-euˬ jeˬ biˇ oꞈ-eu aˬ li tiˬ gʼaˬ-aˬ, yawˬ jeˬ na luꞈ aˬ yawꞈ-euˬ pyeuꞈ-eu kʼawꞈ, aˬ yawꞈ zaˬ yaw nyiˇ pyeuꞈ ngeh, zaˬ kʼaˆ tiˬ gʼaˬ loꞈ-ehˇ ya dehꞈ tawˬ-eu meh.

²Aˬ da gʼaˬ neh ehˇ taˬ-euˬ aˇ yamˬ maˬ keuˆ laˇ kʼoeˇ keuˆ ni, aˬ yawꞈ-ahˇ bo saˆ-eu deuˬ hawˇ-eu aˬ yawꞈ-euˬ gaˇ mˇ dah nehˬ-eu deuˬ ya bi jawˇ-eu meh.

³Kʼoeˇ loꞈ-ehˇ duˇ ni, aˬ dui guiˬ lahˬ saꞈ laˇ paw tsawˇ kʼaˆ maˬ kʼaˆ laˇ kʼoeˇ keuˆ ni, boeˬ boeˬ luˆ luˆ-ahˇ uˆ lahˇ luꞈ-eu yaw sahˇ deuˬ-euˬ laꞈ oˆ zaˬ kʼaˆ ya geuꞈ-eu meh.

⁴Ehˇ kʼawꞈ, aˇ yamˬ tsaˬ laˇ ngeh jawˇ, Miˬyehˇ neh aˬ yawꞈ-euˬ Zaˬmaˇ-ahˇ bi oe-euˬ meh. Zaˬ miˬ zaˬ-euˬ uˬ maˆ laꞈ kʼoeˇ neh dehꞈ doˆ le-awˇ, Yuˇdaˆ tsawˇ haˬ-euˬ Zahˇ dawˬ kʼoꞈ dawˬ uˬ moˆ jawˇ-euˬ meh.

⁵Aˬ dui Miˬyehˇ-euˬ za pyeuꞈ laˇ nya ni, Zahˇ dawˬ kʼoꞈ dawˬ uˬ moˆ dehꞈ luꞈ-eu tsawˇ haˬ deuˬ-ahˇ ka kʼoꞈ-eu gʼaˇ duˬ, aˬ yawꞈ kʼoeˇ loꞈ-ehˇ dehꞈ le-euˬ meh.

⁶Naw maꞈ Miˬyehˇ-euˬ zaˬ pyeuꞈ-eu gaˇ kawˆ bi siˬ bi mawˇ-eu gʼaˇ duˬ, “Aˬ da-oˇ, ngaˬ Da-oˇ” lehˇ aˬ dui-ahˇ bi guˇ laꞈ-euˬ aˬ yawꞈ-euˬ Zaˬmaˇ-euˬ Yaw sahˇ kʼoeˇ, aˬ dui-euˬ nui ma laꞈ kʼoeˇ Miˬyehˇ neh bi uˇ le-euˬ meh.

⁷Kʼoeˇ Miˇ neh, naw maꞈ-aˬ, zaˬ kʼaˆ maˬ paˇ ngeuˇ meh. Aˬ li pyeuꞈ laˇ-euˬ meh. Aˬ li pyeuꞈ-eu miˇ neh, Miˬyehˇ-euˬ jeˬ biˇ oꞈ-eu tsawˇ haˬ meh.

⁸Dzeuˇ laˇ ngeh, naw maꞈ Miˬyehˇ-ahˇ maˬ siˬ nya kʼoeˇ keuˆ ni, Miˬyehˇ maˬ ngeuˇ-eu yaw sahˇ deuˬ-euˬ zaˬ kʼaˆ geuꞈ-euˬ meh.

⁹Nymˬ-mˇ poˆ jawˇ-aˬ, naw maꞈ Miˬyehˇ-ahˇ siˬ nya laˇ-euˬ meh. Maˬ ngeuˇ naˇ, Miˬyehˇ naw maꞈ-ahˇ siˬ nya-euˬ meh lehˇ kʼawꞈ ehˇ-awˬ. Gʼaˬ baˬ dui dui-awˇ tiˬ jeˬ-iˬ maˬ jahˇ nya-eu yaw sahˇ kʼoeˇ deuˬ jawˇ paw naw maꞈ aˬ joˆ-ehˇ paˇ gʼoꞈ pyawˇ-iˇ mawꞈ-eu nya. Aˬ jeˬ miˇ neh aˬ yawꞈ maꞈ-euˬ zaˬ kʼaˆ paˇ geuꞈ poˆ mawꞈ-eu nya.

¹⁰Aˇ nah aˇ yamˬ, aˇ kʼoꞈ aˇ la toꞈ-awˇ taˬ huiˬ-eu laꞈ kʼoeˇ, naw maꞈ lah-eu daw-eu meh.

¹¹Naw maꞈ gʼaˇ duˬ ngaˬ neh kʼaˇ mˇ kʼaˇ shaˇ-euˬ jeˬ yawꞈ ngehꞈ-ehˇ pyeuꞈ jiˇ gaˇ kʼahˬ lahˇ dui dui nya.

¹²Aˬ yuiꞈ aˬ nyiˇ Ka li zaˬ deuˬ-oˇ, ngaˇ naw maꞈ loꞈ-ehˇ pyeuꞈ laˇ-euˬ miˇ neh, naw maꞈ ngaˬ loꞈ-ehˇ pyeuꞈ laˇ-awˬ lehˇ shaˇ-eu ma. Naw maꞈ neh ngaˬ-ahˇ mˇ lehˬ taˬ-euˬ tiˬ jeˬ-iˬ maˬ jaˆ-a.

¹³Ngaˇ naw maꞈ-ahˇ Laˬ kʼaˬ cehˇ-eu Guiˬ lahˬ dawˬ mehˬ beh beh ngeh poˆ, aˬ jeˬ miˇ neh mehˬ-euˬ gaˇ kawˆ-ahˇ paˇ noeˬ mawˇ haw sheˇ. Ngaˇ naˇ-eu miˇ neh mehˬ-euˬ maˬ ngeuˇ-a loˇ.

¹⁴Ngaˇ naˇ-eu baˬ da neh naw maꞈ ya shaˬ dui dui-euˬ kʼawꞈ, naw maꞈ ngaˬ-ahˇ maˬ byehˇ dzeh nehˬ laꞈ-euˬ uˬ taꞈ, yehˬ bawˬ-ehˇ maˬ gʼeh nehˬ laꞈ-aˬ. Mˬ taˆ gʼaˬ kʼehˇ-ahˇ ha-eu loꞈ-ehˇ ha nehˬ laꞈ-euˬ meh. Yeˬsuˇ Ka li-ahˇ ha-eu loꞈ-ehˇ ha nehˬ laꞈ-euˬ meh.

¹⁵Kʼoeˇ ngeh naw maꞈ laˬ kʼaˬ cehˇ dui dui-euˬ meh. Nymˬ-mˇ aˬ jeˬ paˇ pyeuꞈ-iˇ teˬ. Kʼoeˇ ngeh naw maꞈ-euˬ myaˆ nuiˆ kʼeuꞈ doˆ-awˇ ngaˬ-ahˇ dawˆ tsoꞈ nehˬ laꞈ nya law nmˇ-aˬ, naw maꞈ kʼoeˇ loꞈ-ehˇ dawˆ tsoꞈ nehˬ laꞈ mawꞈ-eu nui ma ahˇ meh lehˇ ngaˇ ehˇ tsehˆ nya ma.

¹⁶Nymˬ-mˇ ngaˇ naw maꞈ-ahˇ yaw tsaˬ yaw dawˇ jeˬ ehˇ nehˬ-euˬ miˇ neh, ngaˇ naw maꞈ-ahˇ muiˇ-eu tsawˇ haˬ pyeuꞈ shaw taˬ loˇ.

¹⁷Tsawˇ haˬ kʼoeˇ deuˬ naw maꞈ gʼaˇ duˬ nui ma keuˆ gaˇ duˇ-eu meh. Ehˇ kʼawꞈ, nui maˬ laꞈ kʼoeˇ kʼoeˇ loꞈ-ehˇ maˬ ngeuˇ-a. Naw maꞈ hawˇ-eu aˬ yawꞈ maꞈ tiˬ gaˇ taꞈ leˇ nya ni, naw maꞈ ngaˬ nehˬ-ehˇ gʼawˬ-iˇ gaˇ aˬ yawꞈ maꞈ geuꞈ mawꞈ-eu meh.

¹⁸Ngaˇ naw maꞈ nehˬ-ehˇ jawˇ ngeh tehꞈ-ehˇ maˬ ngeuˇ ni, yawˬ jawˇ na luꞈ yaw muiˬ jeˬ-ahˇ naw maꞈ nui ma keuˆ naˇ, muiˬ dui dui tehꞈ-a.

¹⁹Ngaˇ gaˬ-eu ngaˬ-euˬ zaˬ deuˬ-oˇ, Ka li-euˬ aˇ gʼehˇ naw maꞈ laꞈ kʼoeˇ ahˇ laˇ ni, zaˬ baw luꞈ-eu aˬ ma tiˬ gʼaˬ uˬ maˆ naˇ-eu shaˬ-eu loꞈ-ehˇ naw maꞈ gʼaˇ duˬ ngaˇ shaˬ zahˬ mˇ-eu maˬ tsehˆ leˇ nya.

²⁰Nymˬ-mˇ ngaˇ naw maꞈ nehˬ-ehˇ jawˇ mawꞈ dui dui nya. Ngaˇ nui ma yawˬ siˬ yawˬ paˇ-awˇ, naw maꞈ-ahˇ nahˬ yu ni mehˬ mawꞈ tsoˆ mawꞈ dui dui nya. Naw maꞈ gʼaˇ duˬ ngaˇ kʼahˬ lahˇ dui dui nya.

²¹Naw maꞈ laꞈ kʼoeˇ, Zahˇ dawˬ kʼoꞈ dawˬ uˬ moˆ jawˇ mawꞈ-eu deuˬ-ahˇ ngaˇ heu loꞈ-ehˇ naˇ haˬ mawꞈ-eu ma. Zahˇ dawˬ kʼoꞈ dawˬ naw maꞈ-ahˇ aˬ joˆ-ehˇ ehˇ luꞈ-eu naw maꞈ-ahˇ gaˬ laˇ miˇ-a loˇ.

²²Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ-aˬ, Aˬbyaˬhaˬ aˬ li nyiˬ li jawˇ-eu meh. Tiˬ li-aˬ, zaˬ kʼaˆ pyeuꞈ-eu miˬ zaˬ gʼaˬ o neh dehꞈ le-awˇ, tiˬ li-aˬ, zaˬ kʼaˆ maˬ ngeuˇ-eu miˬ zaˬ gʼaˬ o neh dehꞈ le-euˬ meh.

²³Zaˬ kʼaˆ gʼaˬ o neh dehꞈ le-euˬ aˬ li kʼoeˇ li-aˬ, aˬ cawˬ kʼaˇ dehꞈ le-euˬ loꞈ-ehˇ dehꞈ le-euˬ meh. Ehˇ kʼawꞈ, zaˬ kʼaˆ maˬ ngeuˇ-eu gʼaˬ o neh dehꞈ le-euˬ kʼoeˇ li-aˬ, Miˬyehˇ neh saˇ jaˇ dzaˬ taˬ-euˬ baˬ da neh dehꞈ le-euˬ meh.

²⁴Gaˇ kawˆ heu-aˬ, dawˬ tsuiꞈ naꞈ-awˇ dzaw geuꞈ paˬ-ehˇ gʼeh-eu gaˇ kawˆ tiˬ hmˬ meh. Zaˬ miˬ zaˬ kʼoeˇ nyiˬ gʼaˬ-aˬ, dawˬ ma saˇ jaˇ nyiˬ jeˬ-ahˇ ehˇ mawꞈ-eu meh. Zaˬ kʼaˆ bi geuꞈ-eu zaˬ deuˬ baw-euˬ gʼaˬ-aˬ, Haˬgaˬlaˇ meh. Aˬ yawꞈ-aˬ, Siˇnaˆ gawˬ jawˬ-ahˇ dzaˬ-euˬ dawˬ ma saˇ jaˇ-euˬ dah zaˇ pyeuꞈ-eu meh.

²⁵Aˬleˬbyaˇ miˇ kʼahˬ-ahˇ jaˆ-eu Siˇnaˆ gawˬ jawˬ-euˬ dah zaˇ pyeuꞈ-eu Haˬgaˬlaˇ-aˬ, iˬ nah jaˆ luꞈ-eu Yeˬluˇsaˬlehˬ meuˬ kʼoeˇ meh. Meuˬ kʼoeˇ meuˬ hawˇ-eu kʼoeˇ gaˇ jawˇ-eu tsawˇ haˬ dawˬ tawˆ luꞈ, zaˬ kʼaˆ pyeuꞈ luꞈ-eu meh.

²⁶Ehˇ kʼawꞈ, mˬ taˆ-euˬ Yeˬluˇsaˬlehˬ meuˬ-aˬ, buˬ-iˇ-euˬ meuˬ pyeuꞈ-eu meh. Meuˬ kʼoeˇ meuˬ-aˬ, aˬ dui-euˬ aˬ ma pyeuꞈ-eu meh.

²⁷Aˬ jeˬ miˇ neh ehˇ naˇ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Zaˬ maˬ jawˇ-eu aˬ ma deuˬ-oˇ, naw maꞈ laˬ kʼaˬ cehˇ dui dui-awˬ. Zaˬ baw-eu uˬ maˆ naˇ naˇ-ehˇ, maˬ shaˬ haw-euˬ aˬ ma deuˬ-oˇ, laˬ kʼaˬ cehˇ-awˇ guˇ dui dui-awˬ. Aˬ jeˬ miˇ neh ehˇ naˇ, kʼaˬ dzeˇ zaˬ neh bi kʼoꞈ-euˬ deuˬ, kʼaˬ dzeˇ zaˬ baw-eu deuˬ maˬ tseˇ, zaˬ gʼawˬ mya ni jawˇ le tehꞈ-a.”

²⁸Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, Iˇtsaˆ loꞈ-ehˇ Miˬyehˇ neh saˇ jaˇ dzaˬ taˬ-euˬ miˇ neh dehꞈ le-euˬ Miˬyehˇ-euˬ zaˬ deuˬ pyeuꞈ-eu meh.

²⁹Kʼoeˇ ngeh yamˬ-ahˇ, aˬ cawˬ kʼaˇ dehꞈ le-eu loꞈ-ehˇ dehꞈ le-euˬ gʼaˬ-aˬ, Miˬyehˇ-euˬ Yaw sahˇ baˬ da neh dehꞈ le-euˬ gʼaˬ-ahˇ kʼehˬ-euˬ meh. Nymˬ-mˇ kʼawꞈ, kʼoeˇ loꞈ-ehˇ pyeuꞈ luꞈ-eu meh.

³⁰Ehˇ kʼawꞈ, Jaˇliꞈ laꞈ kʼoeˇ ehˇ taˬ-euˬ heu loꞈ-ehˇ jaˆ-eu meh. “Zaˬ miˬ zaˬ zaˬ kʼaˆ kʼoeˇ gʼaˬ hawˇ-eu aˬ yawꞈ-euˬ aˬ li-ahˇ teh dzeh-awˬ. Aˬ jeˬ miˇ neh ehˇ naˇ, zaˬ miˬ zaˬ zaˬ kʼaˆ o neh dehꞈ le-euˬ aˬ li-aˬ, zaˬ kʼaˆ maˬ ngeuˇ-eu zaˬ miˬ zaˬ gʼaˬ o neh dehꞈ le-euˬ aˬ li loꞈ-ehˇ jeˬ biˇ maˬ oꞈ-a.”

³¹Aˬ yuiꞈ aˬ nyiˇ Ka li zaˬ deuˬ-oˇ, aˬ dui-aˬ, zaˬ miˬ zaˬ zaˬ kʼaˆ o neh dehꞈ le-euˬ zaˬ deuˬ maˬ ngeuˇ. Zaˬ kʼaˆ maˬ ngeuˇ-eu zaˬ miˬ zaˬ gʼaˬ o neh dehꞈ le-euˬ zaˬ deuˬ ma.