Read Akha Gaˬlaˬtiˆ 5 Bible Online

Gaˬlaˬtiˆ 5 - Akha bible

Gaˬlaˬtiˆ 5

¹Aˬ dui buˬ-iˇ-euˬ tsawˇ haˬ pyeuꞈ laˇ ni, Ka li neh aˬ dui-ahˇ bi buˬ-iˇ laꞈ-euˬ meh. Kʼoeˇ miˇ neh, buˬ-iˇ-euˬ tsawˇ haˬ loꞈ-ehˇ ziꞈ dah ni jawˇ-awˬ. Zaˬ kʼaˆ taˬ paˇ geuꞈ.

²Ngaˇ Pawˇluˆ heu loꞈ-ehˇ ehˇ-eu ma. Naw maꞈ baˆ kʼoˆ mehˬ dzaˬ yehˬ naˇ, naw maꞈ gʼaˇ duˬ Ka li gaˇ dahˇ maˬ paˇ tsoeˬ meh.

³Ngaˇ tiˬ poˆ paˇ ehˇ nehˬ nyaˇ. Baˆ kʼoˆ mehˬ dzaˬ kʼaˇ yehˬ-euˬ tsawˇ haˬ-aˬ, Zahˇ dawˬ kʼoꞈ dawˬ dawˬ tawˆ luꞈ-ahˇ ya mˇ byah meh.

⁴Naw maꞈ Zahˇ dawˬ kʼoꞈ dawˬ-ahˇ mˇ byah-eu laꞈ kʼoeˇ Miˬyehˇ-ahˇ tsaˬ leˇ tsahˇ leˇ ni leh jeh-eu tsawˇ haˬ deuˬ-aˬ, Ka li-ahˇ maˬ paˇ taꞈ-ehˇ, Miˬyehˇ gʼawˬ shaˬ gaˬ-eu guiˬ lahˬ-euˬ laꞈ nyiˇ paw jawˇ-eu tsawˇ haˬ deuˬ pyeuꞈ-eu meh.

⁵Nga maꞈ law nmˇ-aˬ, nga maꞈ-euˬ jah-eu jeˬ laꞈ kʼoeˇ Yaw sahˇ Miˬyehˇ-euˬ baoˬ gaˇ mˇ-eu baˬ da neh Miˬyehˇ-ahˇ tsaˬ leˇ tsahˇ leˇ nya gaˇ noeˬ tmˬ kʼaˇ za ma.

⁶Aˬ jeˬ miˇ neh ehˇ naˇ, Yeˬsuˇ Ka li laꞈ kʼoeˇ jawˇ-eu tsawˇ haˬ deuˬ gʼaˇ duˬ, baˆ kʼoˆ mehˬ dzaˬ yehˬ-euˬ hawˇ-eu maˬ yehˬ-euˬ tiˬ pawꞈ-iˬ beu gaˇ duˬ maˬ jaˆ-a. Gʼoeˇ-eu gaˬ-eu jeˬ mˇ doˆ shaˇ doˆ laꞈ nya-eu jah-eu kʼoeˇ tiˬ jeˬ tehꞈ-ehˇ gaˇ dahˇ tsoeˬ-eu jeˬ pyeuꞈ-eu meh.

⁷Dzeuˇ laˇ ngeh naw maꞈ yaw muiˬ paˬ-ehˇ mˇ luꞈ shaˇ luꞈ-eu meh. Yaw tsaˬ yaw dawˇ jeˬ-ahˇ naw maꞈ maˬ naˇ haˬ geuꞈ ni aˬ suˇ gʼaˬ laˆ tsoeˬ-euˬ ta.

⁸Kʼoeˇ-aˬ, naw maꞈ-ahˇ kuˇ-euˬ gʼaˬ pyeuꞈ-eu Miˬyehˇ neh mˇ-euˬ jeˬ maˬ ngeuˇ-a.

⁹“Cehˇ meu tiˬ tsmˇ tsmˇ lah-ehˇ bi poˬ laˇ-eu gʼaˇ duˬ dehˬ tseˬ ui cuiˆ tehꞈ-ehˇ ya dawˆ-eu meh” lehˇ ehˇ taˬ-euˬ meh.

¹⁰Ehˇ kʼawꞈ, naw maꞈ-ahˇ ngaˇ jah coeˇ-eu nui ma ahˇ te siˬ. Aˬ dui-aˬ, Sahˬpaˬ Yeˬsuˇ laꞈ kʼoeˇ jawˇ luꞈ-eu miˇ neh, ngaˇ jah-eu jeˬ-ahˇ naw maꞈ maˬ jah ni yawˬ paw yawˬ maˬ iˇ pyawˇ-aˇ lehˇ ngaˇ siˬ nya ma. Ehˇ kʼawꞈ, naw maꞈ-ahˇ laˆ shaˬ-eu tsawˇ haˬ aˬ geu gʼaˬ maˬ kaˬ, Miˬyehˇ neh kʼehˬ nehˬ kʼaˆ nehˬ-euˬ jeˬ-ahˇ ya daˬ tehꞈ-a.

¹¹Ehˇ kʼawꞈ aˬ yuiꞈ aˬ nyiˇ Ka li zaˬ deuˬ-oˇ, baˆ kʼoˆ mehˬ dzaˬ ya yehˬ meh lehˇ ngaˇ mehˬ-euˬ law nmˇ-aˬ, kʼehˬ-eu kʼaˆ-eu jeˬ-ahˇ ya daˬ nmˇ loˇ. Ngaˇ kʼoeˇ loꞈ-ehˇ mehˬ-euˬ law nmˇ-aˬ, Ka li-euˬ laꞈ yaꞈ gaˇ kawˆ mehˬ-eu jeˬ-ahˇ taꞈ leˇ-awˇ aˬ cawˬ sahˬ tiꞈ tiꞈ paˬ-ehˇ gʼeh-eu jeˬ maˬ paˇ jaˆ-aˇ.

¹²Naw maꞈ-ahˇ laˆ shaˬ-eu tsawˇ haˬ kʼoeˇ deuˬ bi iˇ byoˆ jiˇ mawꞈ miˇ-a. Aˬ yawꞈ maꞈ yawˬ haˇ yawˬ ha shawꞈ luꞈ-uˇ.

¹³Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, bi buˬ-iˇ-eu gʼaˇ duˬ kuˇ doˆ gʼaˬ-euˬ tsawˇ haˬ meh. Ehˇ kʼawꞈ, buˬ-iˇ-euˬ kʼoeˇ-aˬ, naw maꞈ-euˬ shiˬ shaˬ jiˇ nui loˆ mˇ-eu gʼaˇ duˬ taˬ bi pyeuꞈ. Gʼoeˇ-eu gaˬ-eu laꞈ kʼoeˇ tiˬ gʼaˬ tiˇ gʼaˬ ngehˬ gʼeh-awˬ.

¹⁴Aˬ jeˬ miˇ neh ehˇ naˇ, Zahˇ dawˬ kʼoꞈ dawˬ dawˬ tawˆ luꞈ, “Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ” lehˇ ehˇ-eu dawˬ kʼoeˇ dawˬ laꞈ kʼoeˇ byah laˇ jiˇ-euˬ meh.

¹⁵Ehˇ kʼawꞈ, naw maꞈ bawˇ tsahˬ jeˬ zaˬ yaw haiˬ deuˬ loꞈ-ehˇ tiˬ gʼaˬ tiˇ gʼaˬ coeˬ leˇ naˇ leˇ-eu jeˬ jahˇ luꞈ naˇ, haw taˬ-awˬ, tiˬ gʼaˬ tiˇ gʼaˬ puiˆ byoˆ leꞈ tehꞈ-a.

¹⁶Ngaˇ ehˇ mawꞈ-eu-aˬ, heu loꞈ-ehˇ ma. Yaw sahˇ Miˬyehˇ sheuˬ gʼeh-eu mehˬ nah caw teh-awˬ. Shiˬ shaˬ jiˇ nui kʼahˇ mehˬ nah taˬ iˇ.

¹⁷Aˬ jeˬ miˇ neh ehˇ naˇ, shiˬ shaˬ jiˇ nui kʼahˇ-aˬ, Yaw sahˇ Miˬyehˇ-ahˇ maˬ tsaˬ leˇ-ehˇ, Yaw sahˇ Miˬyehˇ kʼawꞈ, shiˬ shaˬ jiˇ nui kʼahˇ-ahˇ maˬ tsaˬ leˇ-a. Heu nyiˬ jeˬ-aˬ, tiˬ jeˬ tiˇ jeˬ muiˇ-eu miˇ neh, naw maꞈ yawˬ ha mˇ mawꞈ-eu jeˬ maˬ mˇ nya-a.

¹⁸Yaw sahˇ Miˬyehˇ sheuˬ gʼeh-eu mehˬ nah naw maꞈ caw teh naˇ, Zahˇ dawˬ kʼoꞈ dawˬ-euˬ uˬ moˆ naw maꞈ maˬ paˇ jawˇ meh.

¹⁹Shiˬ shaˬ jiˇ nui kʼahˇ neh mˇ-euˬ gaˇ deuˬ-aˬ, heu loꞈ-ehˇ bya cehˆ ni mawˇ laˇ-eu meh. Kʼaˬ miˬ sheu-eu, maˬ muiˬ maˬ shawˇ-eu, maˬ tsaˬ maˬ dawˇ-eu laꞈ kʼoeˇ yuꞈ taꞈ joe taꞈ-eu,

²⁰tahˬ pahˬ aˬ ma mawˇ kawˇ-ahˇ uˬ duˬ tahˬ-eu, maw loˬ ja maw-ahˇ gʼoe-eu, tiˬ gʼaˬ tiˇ gʼaˬ muiˇ-eu, dawꞈ-eu ceh-eu, mehˇ juiˇ juiˇ-eu, nui ma pehˇ-eu, yawˬ ha gʼaˇ duˬ tehꞈ-ehˇ shaˇ noeˬ-eu, gʼawˬ-iˇ gʼehˇ-iˇ-eu, aˇ muˇ muˇ paˆ-eu nui ma ahˇ-eu,

²¹myaˆ naˆ-eu, dzaˬ yehꞈ dawˇ yehꞈ-eu, maˬ tsaˬ maˬ dawˇ-eu bawˬ-iˬ gʼeh-eu, heu loꞈ-ehˇ gʼeh-eu deuˬ mˇ doˆ laꞈ-eu meh. Kʼoeˇ loꞈ-ehˇ dehꞈ-eu tsawˇ haˬ deuˬ-aˬ, Miˬyehˇ Miˇ kʼahˬ-ahˇ maˬ ya uˇ lehˇ-a lehˇ dzeuˇ laˇ ngeh ngaˬ neh naw maꞈ-ahˇ ehˇ-euˬ loꞈ-ehˇ, nymˬ-mˇ kʼawꞈ tiˬ poˆ paˇ ehˇ-eu ma.

²²Ehˇ kʼawꞈ, Yaw sahˇ Miˬyehˇ laꞈ kʼoeˇ siˬ le-eu aˇ siˬ deuˬ-aˬ, gʼoeˇ-eu gaˬ-eu, laˬ kʼaˬ cehˇ-eu, nui saˇ oꞈ-eu, nui ma gʼawˬ mahˇ ni taˬ-eu, gʼawˬ shaˬ gaˬ-eu nui ma ahˇ-eu, yaw muiˬ jeˬ mˇ-eu, saˇ jaˇ ziꞈ-eu,

²³nui nahˬ nui yu ahˇ-eu, yawˬ ha-euˬ nui ma-ahˇ gʼaˬ leˇ-eu, heu deuˬ meh. Heu deuˬ-ahˇ laˆ tsoeˬ-eu zahˇ dawˬ kʼoꞈ dawˬ tiˬ dawˬ-iˬ maˬ jaˆ-a.

²⁴Yeˬsuˇ Ka li-ahˇ taꞈ-eu tsawˇ haˬ deuˬ-aˬ, shiˬ shaˬ jiˇ nui kʼahˇ hawˇ-eu shiˬ shaˬ jiˇ-euˬ nui noeˬ nui loˆ dawˬ tawˆ luꞈ-ahˇ laˆ sehꞈ jiˇ-euˬ meh.

²⁵Aˬ dui Yaw sahˇ Miˬyehˇ-ahˇ gʼoe-awˇ dehꞈ luꞈ-eu ngeuˇ naˇ, Yaw sahˇ Miˬyehˇ-ahˇ gʼoe-awˇ mehˬ hu paw cah gʼeh kaˇ-euˇ.

²⁶Nui ma huiˬ-eu jeˬ, tiˬ gʼaˬ tiˇ gʼaˬ ceh cawˬ cawˬ-eu jeˬ hawˇ-eu, tiˬ gʼaˬ tiˇ gʼaˬ myaˆ naˆ-eu jeˬ-ahˇ byehˇ dzeh jiˇ kaˇ-euˇ.