Read Akha Eˇpeˇsu 4 Bible Online

Eˇpeˇsu 4 - Akha bible

Eˇpeˇsu 4

¹Sahˬpaˬ Yeˬsuˇ-euˬ gaˇ mˇ-eu miˇ neh tawˬ-ahˇ ya uˇ-euˬ tsawˇ haˬ pyeuꞈ-eu ngaˇ, naw maꞈ-ahˇ heu loꞈ-ehˇ shaˇ-eu ma. Miˬyehˇ naw maꞈ-ahˇ kuˇ ngeh aˬ yawꞈ neh noeˬ taˬ-euˬ aˇ tiˆ kʼoeˇ tiˆ-ahˇ dehꞈ keuˆ-awˬ.

²Aˬ myah luꞈ nui nahˬ nui yu ahˇ-awˇ laꞈ oꞈ awꞈ-eu laꞈ kʼoeˇ, nui ma gʼawˬ mahˇ ni taˬ-awˬ. Goeˇ-eu gaˬ-eu laꞈ kʼoeˇ tiˬ gʼaˬ tiˇ gʼaˬ oˇ-awˬ.

³Naw maꞈ-ahˇ tsaˬ leˇ dzoeˇ leˇ-eu jeˬ neh gahˇ dzahˬ-eu laꞈ kʼoeˇ, Yaw sahˇ Miˬyehˇ neh biꞈ-euˬ nui ma tiˬ siˬ tehꞈ-ehˇ taˬ-eu jeˬ-ahˇ kʼaˇ gʼeh nya-eu loꞈ-ehˇ jeˬ hmˬ geuꞈ-awˬ.

⁴Miˬyehˇ naw maꞈ-ahˇ kuˇ-euˬ kʼoeˇ noeˬ tmˬ duˬ tiˬ jeˬ tehꞈ-ehˇ jaˆ-eu loꞈ-ehˇ, gʼawˇ mawˇ tiˬ mawˇ tehꞈ-ehˇ baw-awˇ, Yaw sahˇ Miˬyehˇ tiˬ gʼaˬ tehꞈ-ehˇ jawˇ-eu meh.

⁵Sahˬpaˬ Miˬyehˇ tiˬ gʼaˬ tehꞈ-ehˇ jawˇ-awˇ, jah-eu tiˬ jeˬ tehꞈ-ehˇ jaˆ-awˇ, iˇ cuꞈ shawˇ-eu tiˬ jeˬ tehꞈ-ehˇ jaˆ-eu meh.

⁶Tsawˇ jeuˬ dawˬ tawˆ luꞈ-euˬ Aˬda pyeuꞈ-eu Miˬyehˇ tiˬ gʼaˬ tehꞈ-ehˇ jawˇ-eu meh. Aˬ yawꞈ-aˬ, dawˬ tawˆ luꞈ kʼoeˇ taˆ Sahˬpaˬ pyeuꞈ-awˇ, dawˬ tawˆ luꞈ laꞈ kʼoeˇ gaˇ mˇ-awˇ, dawˬ tawˆ luꞈ laꞈ kʼoeˇ jawˇ-eu meh.

⁷Aˬ dui yawˬ gʼaˬ na luꞈ aˬ cawˬ-ahˇ maˬ duˇ-eu laꞈ sawˬ za taˬ-euˬ ma. Kʼoeˇ-aˬ, yawˬ ha-ahˇ kʼaˇ geuˇ-eu loꞈ-ehˇ Ka li neh biꞈ laꞈ-euˬ meh.

⁸Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jaˆ-eu meh. “Aˬ yawꞈ yaw goˇ-ahˇ daˆ leˇ ngeh, tsawˇ haˬ gʼawˬ mya ni nyehꞈ gʼeh-awˇ, miˇ tsaˬ tsawˇ haˬ zaˬ-ahˇ, laꞈ sawˬ biꞈ nehˬ-euˬ meh.”

⁹“Aˬ yawꞈ daˆ leˇ-euˬ” lehˇ ehˇ-eu kʼoeˇ, aˬ jeˬ-ahˇ ehˇ mawꞈ ta. Heu loꞈ-ehˇ ehˇ mawꞈ-eu meh. Yaw beh miˇ tsaˬ heu-euˬ naꞈ dui dui-eu tsahˇ-ahˇ aˬ yawꞈ oe ka-euˬ meh.

¹⁰Zaꞈ ka le-euˬ gʼaˬ hawˇ-eu, mˬ miˇ dawˬ tawꞈ luꞈ-ahˇ jawˇ byah jiˇ-eu gʼaˇ duˬ mˬ le dzeuˇ gaˇ keuˆ ni gʼoꞈ daˇ leˇ-euˬ gʼaˬ-aˬ, aˬ yawꞈ tiˬ gʼaˬ meh.

¹¹“Miˇ tsaˬ zaˬ-ahˇ laꞈ sawˬ biˬ-euˬ” gʼaˬ-aˬ, aˬ yawꞈ meh. Tiˬ paˆ na deuˬ-ahˇ gʼaˬ kʼehˇ bi geuꞈ-awˇ, tiˬ paˆ na deuˬ-ahˇ Miˬyehˇ gʼaˇ duˬ ngehˬ dah-eu tsawˇ haˬ bi geuꞈ-eu gʼaˇ duˬ maˬ ehˇ, tiˬ paˆ na deuˬ-ahˇ Laˬ kʼaˬ cehˇ-eu Guiˬ lahˬ dawˬ mehˬ-eu tsawˇ haˬ bi geuꞈ-eu gʼaˇ duˬ maˬ ehˇ, tiˬ paˆ na deuˬ-ahˇ Ka li zaˬ aˇ muˇ-ahˇ sheuˬ gʼeh-eu saˬ laˬ bi geuꞈ-eu gʼaˇ duˬ maˬ ehˇ, mehˬ-eu tsoˆ-eu saˬ laˬ bi geuꞈ-eu gʼaˇ duˬ maˬ ehˇ, aˬ yawꞈ laꞈ sawˬ biꞈ-euˬ meh.

¹²Ka li-euˬ gʼawˇ mawˇ huiˬ laˇ mahˇ laˇ ni Miˬyehˇ-euˬ gaˇ bi mˇ-eu gʼaˇ duˬ, Miˬyehˇ-euˬ tsawˇ haˬ dawˬ tawˆ luꞈ-ahˇ lehˬ hmˬ laˆ saˆ dah nehˬ-eu lehˇ aˬ yawꞈ kʼoeˇ loꞈ-ehˇ laꞈ sawˬ biꞈ-euˬ meh.

¹³Aˬ dui dawˬ tawˆ luꞈ, jah-eu jeˬ laꞈ kʼoeˇ maˬ ehˇ, Miˬyehˇ-euˬ Zaˬmaˇ-ahˇ siˬ nya-eu jeˬ laꞈ kʼoeˇ maˬ ehˇ, nui ma tiˬ siˬ tehꞈ-ehˇ taˬ nya laˇ tehꞈ-a. Jah-eu jeˬ laꞈ kʼoeˇ aˬ dui tsawˇ kʼaˆ kʼaˆ laˇ-awˇ, Ka li byah-eu loꞈ-ehˇ aˬ dui kʼawꞈ byah laˇ tehꞈ-a.

¹⁴Kʼoeˇ ngeh jawˇ aˬ dui-aˬ, jah-eu jeˬ laꞈ kʼoeˇ zaˬ loꞈ-ehˇ maˬ paˇ pyeuꞈ-ehˇ, aˬ cawˬ-ahˇ tsawˇ gahˇ gahˇ-awˇ gaˇ ma sheuˬ bahˬ nehˬ-eu tsawˇ haˬ deuˬ-euˬ mehˇ shuiˇ jaˬ lehˇ baw laˇ ngeh, aˬ dui-ahˇ maˬ baw poˆ maˬ baw laˆ nya-aˇ.

¹⁵Gʼoeˇ-eu gaˬ-eu nui ma ahˇ-eu laꞈ kʼoeˇ yaw tsaˬ yaw dawˇ jeˬ ngehˬ-awˇ, aˬ dui-euˬ uˬ duˬ pyeuꞈ-eu Ka li laꞈ kʼoeˇ yawˬ jeˬ na luꞈ ya bi huiˬ ya bi mahˇ laˇ tehꞈ-a.

¹⁶Uˬ duˬ kʼoeˇ siˬ uˆ lahˇ-eu uˬ moˆ gʼawˇ mawˇ aˇ sehˇ dawˬ tawˆ luꞈ tiˬ gaˇ tsaˬ leˇ-awˇ, uˬ duˬ-ahˇ gʼaˬ yuˇ taˬ-euˬ yoeˬ tsuiꞈ yoeˬ laꞈ deuˬ neh tiˬ sehˇ tiˇ sehˇ tsoꞈ tsaꞈ jiˇ taˬ-euˬ meh. Aˇ sehˇ aˬ yawꞈ sehˇ yawꞈ yawˬ ha-euˬ gaˇ mˇ ngeh, gʼawˇ mawˇ mawˇ lah-ehˇ huiˬ laˇ-awˇ, gʼoeˇ-eu gaˬ-eu jeˬ laꞈ kʼoeˇ gʼaˬ kʼaˆ dzehˬ laˇ-eu meh.

¹⁷Lawˇ ciꞈ zaˬ loꞈ-ehˇ taˬ paˇ dehꞈ lehˇ, Sahˬ paˬ Yeˬsuˇ-euˬ tsawˇ myahˇ uˬ moˆ ngaˇ naw maꞈ-ahˇ yaw kʼaˆ kʼaˆ-ehˇ ehˇ-eu ma. Aˬ yawꞈ maꞈ-euˬ nui noeˬ gaˇ dahˇ maˬ tsoeˬ-a.

¹⁸Aˬ yawꞈ maꞈ-euˬ nui ma zahˇ tsui ni gʼeh-eu meh. Aˬ yawꞈ maꞈ tiˬ jeˬ-iˬ maˬ siˬ nya-eu uˬ taꞈ, nui ma gʼahˇ-eu miˇ neh, Miˬyehˇ neh biꞈ-euˬ yaw dehꞈ dehꞈ-eu jeˬ-ahˇ tiˬ pawꞈ-iˬ maˬ taꞈ-a.

¹⁹Aˬ yawꞈ maꞈ shaꞈ dawˇ nya-eu nui ma byoˆ-iˇ jiˇ-awˇ, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu jeˬ mˇ-eu gʼaˇ duˬ gʼawˇ mawˇ a nehˬ gʼaˬ-awˇ, jawꞈ dui dui-eu jeˬ dawˬ tawˆ luꞈ-ahˇ nui kʼahˇ tiˬ shiˇ mˇ-eu meh.

²⁰Naw maꞈ Ka li-ahˇ dzaw geuꞈ-euˬ-aˬ, kʼoeˇ loꞈ-ehˇ mˇ-eu gʼaˇ duˬ maˬ ngeuˇ-a.

²¹Naw maꞈ aˬ yawꞈ gaˇ Kawˆ ya gaˬ duˬ gʼaˬ-awˇ, aˬ yawꞈ-euˬ mehˬ nah caw teh-eu tsawˇ haˬ pyeuꞈ-eu loꞈ-ehˇ, Yeˬsuˇ laꞈ kʼoeˇ ahˇ-eu yaw tsaˬ yaw dawˇ jeˬ gaˇ kawˆ aˬ cawˬ naw maꞈ-ahˇ mehˬ gʼaˬ-euˬ meh.

²²Nawˬ-ahˇ gaˇ ma bi dehꞈ bahˬ-eu jeˬ-ahˇ mˇ mawꞈ-eu nui kʼahˇ jaˆ ni nawˬ-ahˇ mehˇ shuiˇ shuiˇ-eu yaw dehꞈ dehꞈ-eu yaw oeˇ kʼoeˇ hmˬ-ahˇ lehˆ dzeh-awˬ.

²³Guiˬ lahˬ saꞈ laˇ paw naw maꞈ-euˬ nui ma yaw shuiꞈ bi paˇ laˇ-awˬ.

²⁴Maˇ maˇ ni gʼeh-eu yaw tsaˬ yaw dawˇ hawˇ-eu yaw muiˬ yaw shawˇ laꞈ kʼoeˇ Miˬyehˇ-euˬ aˇ gʼeh-ahˇ duˇ leˇ ni beh taˬ-euˬ yaw dehꞈ dehꞈ-eu yaw shuiꞈ jeˬ-ahˇ dm-awˬ.

²⁵Kʼoeˇ miˇ neh, jaˬ myawꞈ taˬ paˇ mawꞈ. Ka li zaˬ cawˬ cawˬ yawˬ gʼaˬ na luꞈ yaw tsaˬ yaw dawˇ jeˬ ngehˬ-awˬ tmˇ-awˬ. Aˬ jeˬ miˇ neh ehˇ naˇ, aˬ dui dawˬ tawˆ luꞈ Ka li-euˬ gʼawˇ mawˇ laꞈ kʼoeˇ tiˬ gaˇ taꞈ-eu ma.

²⁶Naw maꞈ nui ma pehˇ laˇ ngeh, iˬ baˇ mˇ gaˇ maˬ bi keuˆ leˇ-eu uꞈ taꞈ, nahˇ ma ga ahˇ ngeh keuˆ ni nui ma pehˇ-eu jeˬ taˬ bi pyeuꞈ.

²⁷Nehꞈ sahˬ paˬ neh muˇ juˇ taˬ bi juˇ gʼaˬ.

²⁸Smˇ kʼoeˬ kʼoeˬ-eu tsawˇ haˬ maˬ kʼoeˬ ni byehˇ-awˇ, yawˬ ha dehꞈ nya jawˇ nya-eu uˬ taꞈ shaˬ zaˬ zahˬ zaˬ deuˬ-ahˇ caw ba nya ni, yaw sui yaw dawˇ laꞈ kʼoeˇ pyuˇ poˆ-eu gʼaˇ duˬ gaˇ mˇ-awˬ.

²⁹Aˬ cawˬ-ahˇ bi coeˬ leˇ-eu dawˬ taˬ ngehˬ. Ehˇ kʼawꞈ, nawˬ neh ngehˬ-euˬ dawˬ aˬ cawˬ gʼaˇ duˬ muiˬ ni, loˬ-eu jeˬ-ahˇ caw ba nya-awˇ bi huiˬ bi mahˇ laˇ nya-eu gaˇ dahˇ tsoeˬ-eu dawˬ ngehˬ-awˬ.

³⁰Miˬyehˇ-euˬ Muiˬ-eu Shawˇ-eu Yaw sahˇ-ahˇ bi noeˬ shaˬ-eu jeˬ taˬ mˇ. Aˬ jeˬ miˇ neh ehˇ naˇ, ka kʼoꞈ-eu aˇ nah keuˆ le ngeh naw maꞈ Miˬyehˇ-euˬ tsawˇ haˬ pyeuꞈ-eu duˬ laˇ ni, Yaw sahˇ Miˬyehˇ laꞈ kʼoeˇ naw maꞈ-ahˇ juˬ diˬ taˬ-euˬ meh.

³¹Aˬ cawˬ-ahˇ nui ma naˇ-eu jeˬ maˬ ehˇ, nui ma nymˇ-eu jeˬ maˬ ehˇ, nui ma pehˇ-eu jeˬ maˬ ehˇ, byehˇ dzeh jiˇ-awˬ. Aˬ cawˬ-ahˇ guˇ guˇ-ehˇ ceh-awˇ yaˬ kʼehˇ yaˬ-eu jeˬ hawˇ-eu, aˬ cawˬ-ahˇ bye-eu jeˬ taˬ paˇ mˇ.

³²Ka li laꞈ kʼoeˇ Miˬyehˇ naw maꞈ-ahˇ iˬ baˇ pyehˬ nehˬ laꞈ-euˬ loꞈ-ehˇ, naw maꞈ kʼawꞈ nui nahˬ nui yu ahˇ-eu laꞈ kʼoeˇ tiˬ gʼaˬ tiˇ gʼaˬ gʼawˬ shaˬ gaˬ-awˇ iˬ baˇ pyehˬ-awˬ.