Read Akha Eˇpeˇsu 5 Bible Online

Eˇpeˇsu 5 - Akha bible

Eˇpeˇsu 5

¹Naw maꞈ-aˬ, Miˬyehˇ gaˬ dui dui-eu zaˬ deuˬ pyeuꞈ-eu loꞈ-ehˇ, aˬ yawꞈ-ahˇ duˇ laˇ ni leh jeh-awˬ.

²Ka li aˬ dui-ahˇ gaˬ-eu miˇ neh, Miˬyehˇ nui kʼahˇ shiˇ-eu saw dui dui-eu lawˇ-eu jeˬ loꞈ-ehˇ aˬ yawꞈ-euˬ gʼawˇ mawˇ aˬ dui gʼaˇ duˬ lawˇ nehˬ-euˬ gaˇ duˇ ni, gʼoeˇ-eu gaˬ-eu jeˬ laꞈ kʼoeˇ dehꞈ gʼeh-awˬ.

³Naw maꞈ-aˬ, Miˬyehˇ-euˬ tsawˇ haˬ pyeuꞈ-eu miˇ neh, maˬ tsaˬ maˬ dawˇ-eu jeˬ laꞈ kʼoeˇ kʼaˬ miˬ sheu-eu, jawꞈ dui dui-eu jeˬ mˇ-eu, aˬ cawˬ-euˬ myawˬ-ahˇ mehˇ juiˇ juiˇ-eu, heu loꞈ-ehˇ gʼeh-eu gaˇ kawˆ deuˬ-ahˇ mˇ-eu taˬ ehˇ siˬ. Ja-eu kʼawꞈ maˬ tsaˬ-a.

⁴Jawꞈ dui dui-eu dawˬ, gaˇ dahˇ maˬ tsoeˬ-eu dawˬ hawˇ-eu, yaw jawꞈ jeˬ gaˇ kawˆ cehꞈ lehꞈ ka niˇ gʼa-eu dawˬ heu deuˬ-ahˇ naw maꞈ tiˬ pawꞈ-iˬ ngehˬ-eu maˬ tsaˬ-a.

⁵Maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu tsawˇ haˬ, jawꞈ dui dui-eu jeˬ mˇ-eu tsawˇ haˬ hawˇ-eu, aˬ cawˬ-euˬ myawˬ-ahˇ mehˇ juiˇ juiˇ-eu tsawˇ haˬ-aˬ, Ka li-euˬ miˇkʼahˬ hawˇ-eu Miˬyehˇ Miˇkʼahˬ-ahˇ maˬ ya uˇ leˇ-a lehˇ naw maꞈ siˬ duˬ-awˬ. (Aˬ cawˬ-euˬ myawˬ-ahˇ mehˇ juiˇ juiˇ-eu tsawˇ haˬ-aˬ, pyuˇ shuiˇ myawˬ gahˬ-ahˇ uˬ duˬ tahˬ gaˇ duˇ-eu meh.)

⁶Gaˇ dahˇ maˬ tsoeˬ-eu dawˬ neh tsawˇ haˬ tiˬ gʼaˬ-iˬ naw maꞈ-ahˇ mehˇ shuiˇ taˬ bi shuiˇ tawˆ. Aˬ jeˬ miˇ neh ehˇ naˇ, kʼoeˇ loꞈ-ehˇ gʼeh-eu jeˬ baˬ da neh Miˬyehˇ ehˇ dawˬ maˬ naˇ haˬ-eu deuˬ kʼoeˇtaˆ Miˬyehˇ nui ma pehˇ-eu jeˬ keuˆ le tehꞈ-a.

⁷Kʼoeˇ miˇ neh, kʼoeˇ loꞈ-ehˇ gʼeh-eu tsawˇ haˬ deuˬ-ahˇ gʼawˬ tsehˆ tsehˆ-awˬ.

⁸Naw maꞈ kʼawꞈ, yaw zahˇ laꞈ kʼoeˇ dehꞈ haw-euˬ tsawˇ haˬ deuˬ meh. Ehˇ kʼawꞈ, Sahˬpaˬ Yeˬsuˇ-euˬ tsawˇ haˬ pyeuꞈ laˇ gʼaˬ-euˬ miˇ neh, yaw shehꞈ laꞈ kʼoeˇ naw maꞈ jawˇ luꞈ-eu meh. Kʼoeˇ miˇ neh, yaw shehꞈ-euˬ zaˬ deuˬ loꞈ-ehˇ dehꞈ gʼeh-awˬ.

⁹Aˬ jeˬ miˇ neh ehˇ naˇ, yaw muiˬ yawˬ jeˬ na luꞈ, yaw tsaˬ yaw dawˇ yawˬ jeˬ na luꞈ hawˇ-eu, maˇ jawˆ ni gʼeh-eu yawˬ jeˬ na luꞈ, yaw shehꞈ laꞈ kʼoeˇ neh doˆ le-euˬ tehꞈ meh.

¹⁰Sahˬpaˬ Yeˬsuˇ nui ma tsaˬ-eu jeˬ-ahˇ mˇ nya laˇ ni leh jeh-awˬ.

¹¹A cawˬ mˇ luꞈ-eu yaw zahˇ-ahˇ taꞈ leˇ-eu gaˇ dahˇ maˬ tsoeˬ-eu jeˬ-ahˇ tiˬ pawꞈ-iˬ maˬ mˇ ni, yaw shehꞈ laꞈ kʼoeˇ yuˇ doˆ laꞈ-awˬ.

¹²(Aˬ yawꞈ maꞈ baˇ zaꞈ-ahˇ mˇ kʼoeˬ kʼoeˬ luꞈ-eu gaˇ kʼoeˇ deuˬ-ahˇ ja doˆ-eu tehꞈ-ehˇ kʼawꞈ shaꞈ dawˇ dui dui paˬ-ehˇ gʼeh-eu meh.)

¹³Dawˬ tawˆ luꞈ yaw shehꞈ laꞈ kʼoeˇ yuˇ doˆ laꞈ jiˇ ngeh, aˬ yawꞈ maꞈ aˬ joˆ-ehˇ gʼeh-eu tsawˇ haˬ pyeuꞈ-eu bya cehˆ ni mawˇ duˬ laˇ tehꞈ-a.

¹⁴Aˬ jeˬ miˇ neh ehˇ naˇ, bya cehˆ ni bi mawˇ duˬ laˇ-eu yawˬ jeˬ na luꞈ yaw shehꞈ pyeuꞈ-eu meh. Kʼoeˇ miˇ neh, heu loꞈ-ehˇ ehˇ taˬ-euˬ jaˆ-eu meh. “Yuꞈ kʼaˆ taˬ-euˬ deuˬ noeˬ laˇ-awˇ, shiˇ-euˬ gʼoꞈ dehꞈ laˇ-awˬ. Ka li yaw shehꞈ biꞈ laꞈ tehꞈ-a.” lehˇ ehˇ taˬ-euˬ jaˆ-eu meh.

¹⁵Kʼoeˇ miˇ neh, naw maꞈ aˬ joˆ-ehˇ dehꞈ luꞈ-eu gaˇ kawˆ yahˇ-awˬ. Zaˬ siˬ tsawˇ gahˇ maˬ ahˇ-eu tsawˇ haˬ loꞈ-ehˇ taˬ dehꞈ. Zaˬ siˬ tsawˇ gahˇ ahˇ-eu tsawˇ haˬ loꞈ-ehˇ dehꞈ-awˬ.

¹⁶Naw maꞈ za-euˬ muiˬ-eu aˇ yamˬ-ahˇ gaˇ dahˇ tsoeˬ ni zmˬ-awˬ. Aˬ jeˬ miˇ neh ehˇ naˇ, aˇ nah aˇ yamˬ heu yamˬ-aˬ, haiˬ-eu aˇ yamˬ pyeuꞈ-eu meh.

¹⁷Dawˇ ga maˬ paˇ ga ni, Sahˬpaˬ Yeˬsuˇ naw maꞈ-ahˇ bi mˇ mawꞈ-eu jeˬ-ahˇ siˬ nya-awˬ.

¹⁸Jiˇ baˬ taˬ dawˇ yehꞈ. Kʼoeˇ-aˬ, naw maꞈ-ahˇ bi cawˆ-iˇ-eu tehꞈ meh. Ehˇ kʼawꞈ, Yaw sahˇ Miˬyehˇ naw maꞈ laꞈ kʼoeˇ bi byah laˇ-awˬ.

¹⁹Ja ceuˬ-eu sahˬ boꞈ gaˇ kawˆ, Miˬyehˇ-ahˇ ja ceuˬ-eu caˇ dawˬ gaˇ kawˆ hawˇ-eu, guiˬ lahˬ saꞈ laˇ paw-euˬ caˇ dawˬ gaˇ kawˆ tiˬ gʼaˬ tiˇ gʼaˬ ja uˇ-awˬ. Nui ma laꞈ kʼoeˇ Sahˬpaˬ Yeˬsuˇ-ahˇ ja ceuˬ-awˇ, ja ceuˬ-eu caˇ dawˬ deuˬ-ahˇ caˇ-awˬ.

²⁰A dui-euˬ Sahˬpaˬ Yeˬsuˇ Ka li-euˬ tsawˇ myahˇ laꞈ kʼoeˇ yawˬ jeˬ na luꞈ gʼaˇ duˬ Aˬda Miˬyehˇ-euˬ guiˬ lahˬ-ahˇ ja ceuˬ-awˬ.

²¹La li-ahˇ yaw zeu baw-eu laꞈ kʼoeˇ, tiˬ gʼaˬ-euˬ laꞈ oˆ tiˬ gʼaˬ yaw muiˬ-ehˇ jawˇ-awˬ.

²²Miˬ zaˬ deuˬ-oˇ, Sahˬpaˬ Yeˬsuˇ-euˬ ehˇ dawˬ naˇ haˬ-eu loꞈ-ehˇ, yawˬ ha kʼaˬ dzeˇ zaˬ-euˬ ehˇ dawˬ naˇ haˬ-awˬ.

²³Aˬ jeˬ miˇ neh ehˇ naˇ, Ka li zaˬ aˇ muˇ kʼoeˇ taˆ Ka li uˆ lahˇ-eu baoˬ jaˆ-eu loꞈ-ehˇ, miˬ zaˬ kʼoeˇ taˆ kʼaˬ dzeˇ zaˬ uˆ lahˇ-eu baoˬ jaˆ meh. Ka li-aˬ, Ka li zaˬ aˇ muˇ pyeuꞈ-eu aˬ yawꞈ-euˬ gʼawˇ mawˇ-ahˇ Ka kʼoꞈ-eu yaw sahˇ pyeuꞈ-eu meh.

²⁴Kʼoeˇ miˇ neh, Ka li-euˬ dawˬ-ahˇ Ka li zaˬ aˇ muˇ tiˬ byah ni naˇ haˬ geuꞈ-eu loꞈ-ehˇ, kʼaˬ dzeˇ zaˬ-euˬ dawˬ-ahˇ miˬ zaˬ gʼaˬ tiˬ byah ni ya naˇ haˬ geuꞈ-eu meh.

²⁵Kʼaˬ dzeˇ zaˬ deuˬ-oˇ, Ka li zaˬ aˇ muˇ-ahˇ Ka li gaˬ-eu miˇ neh gʼawˇ mawˇ lawˇ nehˬ-euˬ gaˇ duˇ ni, yawˬ ha-euˬ miˬ zaˬ-ahˇ gaˬ-awˬ.

²⁶Aˬ yawꞈ-euˬ gʼawˇ mawˇ lawˇ nehˬ-euˬ kʼoeˇ-aˬ, Ka li zaˬ aˇ muˇ-ahˇ aˬ yawꞈ-euˬ dawˬ neh iˇ cuꞈ laꞈ kʼoeˇ tsiˬ shawˇ-awˇ, Miˬyehˇ-ahˇ a nehˬ-eu gʼaˇ duˬ pyeuꞈ-eu meh.

²⁷Iˇ cuꞈ neh tsiˬ shawˇ-euˬ kʼoeˇ-aˬ, maˇ byawꞈ maˇ naˇ maˬ baw-ehˇ, ehˇ kʼaˇ maˬ za-eu uˬ taꞈ, shawˇ jehˆ ni gʼeh-awˇ iˬ baˇ taˬ kʼaˇ maˬ za-eu aˇ gʼehˇ muiˬ dui dui-eu Ka li zaˬ aˇ muˇ-ahˇ, aˬ yawꞈ-euˬ bi pyeuꞈ laˇ-eu gʼaˇ duˬ mˇ-euˬ jeˬ pyeuꞈ-eu meh.

²⁸Kʼaˬ dzeˇ zaˬ deuˬ-aˬ, yawˬ ha-euˬ gʼawˇ mawˇ-ahˇ gaˬ-eu loꞈ-ehˇ, yawˬ haˬ-euˬ miˬ zaˬ-ahˇ gaˬ-eu tsaˬ meh. Yawˬ ha-euˬ miˬ zaˬ-ahˇ gaˬ-eu kʼaˬ dzeˇ zaˬ-aˬ, yawˬ haˇ yawˬ ha gaˬ gaˇ duˇ-eu meh.

²⁹Tsawˇ haˬ tiˬ gʼaˬ-iˬ yawˬ ha-euˬ gʼawˇ mawˇ-ahˇ yawˬ ha maˬ bye-a. Ka li zaˬ aˇ muˇ-ahˇ Ka li bi dzaˬ bi dawˇ-awˇ bo saˆ-eu loꞈ-ehˇ, tsawˇ haˬ yawˬ gʼaˬ na luꞈ yawˬ haˬ-euˬ gʼawˇ mawˇ-ahˇ yawˬ ha bi dzaˬ bi dawˇ-awˇ bo saˆ-eu meh.

³⁰Aˬ dui-aˬ, Ka li-euˬ gʼawˇ mawˇ-ahˇ tsoꞈ-eu aˇ sehˇ deuˬ pyeuꞈ-eu ma.

³¹“Kʼoeˇ miˇ neh, kʼaˬ dzeˇ zaˬ-aˬ, yawˬ ha-euˬ aˬ da aˬ ma-ahˇ gʼawˬ-iˇ-awˇ, yawˬ haˬ-euˬ miˬ zaˬ-ahˇ dehꞈ taꞈ-eu laꞈ kʼoeˇ, nyiˬ gʼaˬ-euˬ tiˬ shiˬ tiˬ shaˬ tehꞈ-ehˇ pyeuꞈ laˇ-euˬ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

³²Jaˇliꞈ aˇ deuˆ heu deuˆ laꞈ kʼoeˇ, naꞈ dui dui-eu zaꞈ taˬ-euˬ jeˬ pah mehˬ luꞈ-eu meh. Kʼoeˇ-aˬ, Ka li hawˇ-eu Ka li zaˬ aˇ muˇ-ahˇ ehˇ mawꞈ-eu meh lehˇ ngaˇ gʼoˆ shaw-eu ma.

³³Jaˇliꞈ heu deuˆ naw maꞈ-ahˇ kʼawꞈ taꞈ leˇ-eu meh. Kʼaˬ dzeˇ zaˬ yawˬ gʼaˬ na luꞈ yawˬ ha-euˬ gʼawˇ mawˇ-ahˇ gaˬ-eu loꞈ-ehˇ yawˬ ha-euˬ miˬ zaˬ-ahˇ ya gaˬ-awˇ, miˬ zaˬ yawˬ gʼaˬ na luꞈ yawˬ ha-euˬ kʼaˬ dzeˇ zaˬ-ahˇ yaw zeu ya baw-eu meh.