Read Akha Piˇliˇpiˆ 1 Bible Online

Piˇliˇpiˆ 1 - Akha bible

Piˇliˇpiˆ 1

¹Yeˬsuˇ Ka li-euˬ zaˬ kʼaˆ pyeuꞈ-eu Pawˇluˆ hawˇ-eu Tiˆmoˇseˬ nga nyaꞈ, Yeˬsuˇ Ka li laꞈ kʼoeˇ Piˇliˇpiˆ meuˬ-ahˇ jawˇ luꞈ-eu Ka li zaˬ aˇ muˇ-ahˇ sheuˬ gʼeh-eu deuˬ, caw dehˬ caw toˆ-eu deuˬ hawˇ-eu, Miˬyehˇ-euˬ tsawˇ haˬ dawˬ tawˆ luꞈ-ahˇ sahˬ boꞈ boꞈ ahˇ laꞈ-eu ma.

²Aˬ dui-euˬ Aˬ da Miˬyehˇ hawˇ-eu Sahˬpaˬ Yeˬsuˇ Ka li-euˬ gʼawˬ shaˬ gaˬ-eu guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ jaˆ luꞈ-uˇ.

³Naw maꞈ-ahˇ ngaˇ kʼaˇ noeˬ mawˇ ngeh, naw maꞈ gʼaˇ duˬ ngaˬ-euˬ Miˬyehˇ-euˬ guiˬ lahˬ-ahˇ ja ceuˬ-eu ma.

⁴Naw maꞈ dawˬ tawˆ luꞈ gʼaˇ duˬ ngaˇ guiˬ lahˬ kʼaˇ shaˇ ngeh, laˬ kʼaˬ cehˇ-eu laꞈ kʼoeˇ shaˇ-eu ma.

⁵Aˬ jeˬ miˇ neh ehˇ naˇ, Laˬ kʼaˬ cehˇ-eu Guiˬ lahˬ dawˬ mehˬ-eu gaˇ laꞈ kʼoeˇ, aˇ dahˬ beh ngeh neh iˬ nah keuˆ ni naw maꞈ ngaˬ-ahˇ caw ba nehˬ laꞈ-euˬ meh.

⁶Muiˬ-eu gaˇ heu hmˬ-ahˇ naw maꞈ laꞈ kʼoeˇ aˇ dahˬ beh le-euˬ gʼaˬ pyeuꞈ-eu Miˬyehˇ-aˬ, gaˇ heu hmˬ mˇ jiˇ-eu aˇ nah pyeuꞈ-eu Yeˬsuˇ Ka li zaꞈ le-eu Aˇ nah-ahˇ keuˆ ni mˇ daˆ gʼeh leꞈ tehꞈ-a lehˇ ngaˇ jah duˬ taˬ-euˬ ma.

⁷Ngaˬ-euˬ nui ma laꞈ kʼoeˇ naw maꞈ-ahˇ aˬ myah luꞈ noeˬ keuˆ luꞈ-eu ma. Naw maꞈ-euˬ gaˇ kawˆ ngaˬ-euˬ nui ma laꞈ kʼoeˇ heu loꞈ-ehˇ noeˬ mawˇ luꞈ-eu heu-aˬ, tsaˬ dui dui-eu ma. Aˬ jeˬ miˇ neh ehˇ naˇ, nymˬ-mˇ ngaˇ tawˬ-ahˇ uˇ luꞈ ngeh maˬ ehˇ, maˬ ya uˇ leˇ mi naˆ-ehˇ, Laˬ kʼaˬ cehˇ-eu Guiˬ lahˬ dawˬ heu ziꞈ dah ni bi pyeuꞈ laˇ-eu gʼaˇ duˬ yaˇ kʼaˬ daˇ-eu deuˬ mehˬ shi ja leˇ ngeh maˬ ehˇ, Miˬyehˇ neh ngaˬ-ahˇ bi mˇ laꞈ-euˬ muiˬ-eu gaˇ heu hmˬ laꞈ kʼoeˇ naw maꞈ ngaˬ-ahˇ aˬ myah luꞈ caw ba nehˬ laꞈ-euˬ meh.

⁸Ngaˇ naw maꞈ-ahˇ gaˬ dui dui-eu heu-aˬ, Yeˬsuˇ Ka li-euˬ nui ma-ahˇ neh doˆ le-euˬ gʼoeˇ-eu gaˬ-eu jeˬ neh gaˬ-eu ma lehˇ ngaˇ ehˇ-eu heu tsaˬ-eu gaˇ kawˆ, Miˬyehˇ ngaˬ-euˬ gʼaˇ duˬ saˇ kiˇ pyeuꞈ-eu ma.

⁹Naw maꞈ-euˬ gʼoeˇ-eu gaˬ-eu jeˬ tiˬ jawˇ saˇ-iˬ tiˬ jawˇ huiˬ laˇ mahˇ laˇ-eu laꞈ kʼoeˇ, yaw tsaˬ yaw dawˇ jeˬ-ahˇ siˬ duˬ mawˇ duˬ nya laˇ-awˇ, yaw muiˬ yaw doeˇ tseˇ paˆ geuꞈ nya laˇ ni ngaˇ guiˬ lahˬ shaˇ-eu ma.

¹⁰Dawˬ tawˆ luꞈ laꞈ kʼoeˇ muiˬ dzehˬ-eu jeˬ-ahˇ naw maꞈ tseˇ geuꞈ nya laˇ ni shaˇ luꞈ-eu ma. Kʼoeˇ miˇ neh, Ka li zaꞈ le-eu Aˇ nah-ahˇ naw maꞈ laꞈ kʼoeˇ maˬ muiˬ-eu jeˬ maˬ paˇ ahˇ-ehˇ, iˬ baˇ taˬ kʼaˇ maˬ za ni pyeuꞈ laˇ tehꞈ-a.

¹¹Miˬyehˇ-euˬ yaw shehꞈ kʼahˬ sehˇ-ahˇ aˬ cawˬ taˬ huiˬ-awˇ Miˬyehˇ-ahˇ ja ceuˬ laˇ gaˇ keuˆ ni Yeˬsuˇ Ka li tehꞈ-ehˇ jahˇ nehˬ nya-eu maˇ maˇ ni muiˬ-eu jeˬ kʼoeˇ, naw maꞈ yaw dehꞈ dehꞈ-eu laꞈ kʼoeˇ byah laˇ tehꞈ-a.

¹²Aˬ yuiꞈ aˬ nyiˇ Ka li zaˬ deuˬ-oˇ, ngaˇ ya daˬ luꞈ-eu heu-aˬ, Laˬ kʼaˬ cehˇ-eu Guiˬ lahˬ dawˬ bi gaˬ doe-iˇ-eu gʼaˇ duˬ gaˇ dahˇ tsoeˬ-eu gaˇ kawˆ naw maꞈ bi siˬ nya mawꞈ miˇ-a.

¹³Kʼoeˇ loꞈ-ehˇ pyeuꞈ laˇ-euˬ miˇ neh, sahˬ paˬ-euˬ hawˇ nymˇ-ahˇ loꞈ piˇ-eu yehˇ dawˬ tawˆ luꞈ hawˇ-eu heu gaˇ kʼaˇ jawˇ-eu tsawˇ haˬ dawˬ tawˆ luꞈ, ngaˇ Ka li-euˬ zaˬ kʼaˆ geuꞈ-eu miˇ neh tawˬ-ahˇ ya uˇ luꞈ-eu meh lehˇ siˬ nya meh.

¹⁴Ngaˇ tawˬ-ahˇ uˇ-eu baˬ da neh aˬ yuiꞈ aˬ nyiˇ Ka li zaˬ deuˬ myaˬ tiˬ paˆ Sahˬpaˬ Yeˬsuˇ laꞈ kʼoeˇ nui ma ziꞈ dzehˬ laˇ-awˇ, guˆ-eu nui ma tiˬ jawˇ-iˬ maˬ ahˇ ni Miˬyehˇ dawˬ kawˬ mehˬ-eu gʼaˇ duˬ nui ma kʼaˬ dzehˬ laˇ-euˬ meh.

¹⁵Maˇ maˇ ni ehˇ naˇ, tiˬ paˆ na deuˬ-aˬ, aˬ cawˬ-ahˇ myaˆ naˆ-awˇ ceh dzaˬ mawꞈ-eu nui ma ahˇ-eu miˇ neh Ka li gaˇ kawˆ mehˬ-eu jeˬ pyeuꞈ-eu meh. Ehˇ kʼawꞈ, tiˬ paˆ na deuˬ-aˬ, maˇ maˇ ni nui ma keuˆ-eu laꞈ kʼoeˇ mehˬ-eu meh.

¹⁶Kʼoeˇ deuˬ-aˬ, gʼoeˇ-eu gaˬ-eu laꞈ kʼoeˇ mˇ-eu meh. Aˬ jeˬ miˇ neh ehˇ naˇ, Laˬ kʼaˬ cehˇ-eu Guiˬ lahˬ dawˬ mehˬ-eu heu maˇ maˇ ni tsaˬ-eu jeˬ pyeuꞈ-eu gaˇ kawˆ bi doˆ laˇ ni mˇ-eu gʼaˇ duˬ, Miˬyehˇ ngaˬ-ahˇ kʼehˇ-euˬ meh lehˇ aˬ yawꞈ maꞈ siˬ nya meh.

¹⁷Yawˬ deuˬ yawˬ-aˬ, nui ma dawˇ coe ni taˬ-awˇ Ka li gaˇ kawˆ mehˬ-eu maˬ ngeuˇ-a. Yawˬ ha gʼaˇ duˬ shaˇ noeˬ-awˇ mˇ-eu tehꞈ meh. Ngaˇ heu gaˇ tawˬ-ahˇ uˇ luꞈ ngeh aˬ yawꞈ maꞈ ngaˬ-ahˇ heu naˆ maˬ tseˇ laˆ shaˬ nehˬ laꞈ mawꞈ-eu meh.

¹⁸Ehˇ kʼawꞈ, tiˬ jeˬ-iˬ maˬ ngeuˇ-aˇ. Nui ma dawˇ coe ni taˬ-awˇ mehˬ-eu maˬ kaˬ, nui ma laꞈ gʼoꞈ baw-awˇ mehˬ-eu maˬ kaˬ, Ka li gaˇ kawˆ kʼaˇ mehˬ nya-eu loꞈ-ehˇ mehˬ naˇ, ngaˇ laˬ kʼaˬ cehˇ ma.

¹⁹Aˬ jeˬ miˇ neh ehˇ naˇ, naw maꞈ guiˬ lahˬ shaˇ nehˬ laꞈ-euˬ baˬ da neh maˬ ehˇ, Yeˬsuˇ Ka li-euˬ Yaw sahˇ Miˬyehˇ caw ba nehˬlaꞈ-eu baˬ da neh maˬ ehˇ, tawˬ heu laꞈ kʼoeˇ neh ngaˇ ya buˬ-iˇ-eu yaw duˬ baw ma lehˇ siˬ duˬ taˬ-euˬ ma.

²⁰Ngaˇ geuꞈ mawꞈ dui dui-awˇ noeˬ tmˬ taˬ-euˬ jeˬ-aˬ, ngaˇ mˇ paˬ-ehˇ gʼeh-eu gaˇ deuˬ-ahˇ aˬ myah luꞈ mˇ-eu uˬ taꞈ, hehˬ nymˬ-mˇ ngaˇ dehꞈ-eu maˬ ehˇ, shiˇ-eu maˬ ehˇ, kʼaˇ mˇ kʼaˇ shaˇ-eu jeˬ dawˬ tawˆ luꞈ laꞈ kʼoeˇ Ka li-ahˇ aˬ cawˬ yaw zeu baw laˇ-eu gʼaˇ duˬ nui ma kʼaˬ duˬ ni taˬ nya-eu jeˬ-ahˇ geuꞈ mawꞈ-eu ma.

²¹Tsawˇ haˬ zaˬ yaw dehꞈ dehꞈ-eu aˬ jeˬ gʼaˇ duˬ-a. Ngaˇ dehꞈ luꞈ-eu-aˬ, Ka li gʼaˇ duˬ ma. Shiˇ naˇ, ngaˬ-euˬ gʼaˇ duˬ jiˇ jeuˬ ma.

²²Ehˇ kʼawꞈ, ngaˇ mehˬ hu paw ya dehꞈ daˆ leꞈ lawˬ naˇ, gaˇ dahˇ tsoeˬ-eu gaˇ gʼawˬ mya jeˬ mˇ nya-eu ma. Kʼoeˇ miˇ neh, dehꞈ-eu hawˇ-eu shiˇ-eu heu nyiˬ jeˬ-ahˇ ngaˇ tseˇ geuꞈ tsaˬ maˬ siˬ nya.

²³Heu nyiˬ jeˬ luꞈ ngaˬ-ahˇ gʼeu taw taˬ-euˬ meh. Ngaˇ geuꞈ mawꞈ-eu-aˬ, miˇ tsaˬ kʼoeˇ taˆ dehꞈ-eu heu-ahˇ byehˇ dzeh yaꞈ-awˇ Ka li nehˬ-ehˇ jawˇ leˇ mawꞈ-eu kʼoeˇ hmˬ ma. Aˬ jeˬ miˇ neh ehˇ naˇ, kʼoeˇ-aˬ, ngaˬ-euˬ gʼaˇ duˬ muiˬ dzehˬ-eu meh.

²⁴Ehˇ kʼawꞈ, naw maꞈ gʼaˇ duˬ shaˇ noeˬ leꞈ naˇ, ngaˇ dehꞈ-eu muiˬ dzehˬ meh.

²⁵Ngaˇ kʼoeˇ loꞈ-ehˇ jah duˬ taˬ-euˬ miˇ neh, ngaˇ ya dehꞈ meh lehˇ ngaˇ siˬ nya ma. Naw maꞈ huiˬ laˇ mahˇ laˇ luꞈ-eu jeˬ gʼaˬ bi kʼaˆ dzehˬ laˇ-awˇ, jah-eu jeˬ laꞈ kʼoeˇ laˬ kʼaˬ ya cehˇ ni, naw maꞈ dawˬ tawˆ luꞈ nehˬ-ehˇ ngaˇ dehꞈ daˆ leꞈ ma.

²⁶Kʼoeˇ miˇ neh, ngaˇ naw maꞈ jawˇ gaˇ paˇ laˇ keuˆ ngeh, ngaˬ neh mˇ-euˬ shaˇ-euˬ jeˬ baˬ da neh, Yeˬsuˇ Ka li laꞈ kʼoeˇ naw maꞈ yaw dehꞈ dehꞈ-eu jeˬ yaw beh naˆ maˬ tseˇ kʼahˬ sehˇ jehˆ kʼaˇ za tehꞈ-a.

²⁷Huiˬ-eu tiˬ jeˬ-aˬ, ngaˇ naw maꞈ-ahˇ haw keuˆ laˇ-eu maˬ kaˬ, maˬ haw keuˆ laˇ-eu maˬ kaˬ, naw maꞈ nui ma tiˬ siˬ tehꞈ-ehˇ taˬ-awˇ ziꞈ dah ni jawˇ luꞈ-eu gaˇ kawˆ hawˇ-eu, La kʼaˬ cehˇ-eu Guiˬ lahˬ dawˬ-ahˇ taꞈ-eu jah-eu jeˬ gʼaˇ duˬ naw maꞈ nui ma gm-awˇ deuˆ ceh ceh luꞈ-eu gaˇ kawˆ-ahˇ ngaˇ ya gaˬ ni, Ka li-euˬ Laˬ kʼaˬ cehˇ-eu Guiˬ lahˬ dawˬ-ahˇ tsaˬ ni dehꞈ gʼeh jawˇ gʼeh-awˬ.

²⁸Naw maꞈ ya shaˬ ya zahˬ ni mˇ luꞈ-eu tsawˇ haˬ deuˬ-ahˇ taˬ guˆ. Aˬ myah luꞈ nui ma kʼaˬ duˬ ni jawˇ-awˬ. Kʼoeˇ loꞈ-ehˇ jawˇ naˇ, naw maꞈ gʼaˬ leˇ-awˇ aˬ yawꞈ maꞈ smˬ-iˇ-eu yaw duˬ baw-eu ngaˇ lehˇ siˬ duˬ leˇ tehꞈ-a. Naw maꞈ gʼaˬ leˇ nya ni mˇ-eu gʼaˬ-aˬ, Miˬyehˇ meh.

²⁹Aˬ jeˬ miˇ neh ehˇ naˇ, Ka li neh naw maꞈ-ahˇ biꞈ taˬ-euˬ muiˬ dui dui-eu guiˬ lahˬ kʼoeˇ-aˬ, aˬ yawꞈ-ahˇ jah-eu jeˬ tehꞈ-ehˇ maˬ ngeuˇ-ehˇ, aˬ yawꞈ gʼaˇ duˬ shaˬ zahˬ ya mˇ-eu jeˬ kʼawꞈ ahˇ-eu meh.

³⁰Nymˬ-mˇ naw maꞈ ngaˬ nehˬ-ehˇ tiˬ kawˆ loꞈ-ehˇ guiˇ deuˆ leˇ nya meh. Guiˇ heu-aˬ, dzeuˇ laˇ ngeh ngaˇ deuˆ luꞈ-eu naw maꞈ mawˇ-euˬ kʼoeˇ meh. Nymˬ-mˇ kʼawꞈ, naw maꞈ ya gaˬ-euˬ loꞈ-ehˇ, guiˇ kʼoeˇ ngaˇ deuˆ luꞈ te siˬ. TBS CATP 15-06-00