Read Akha Piˇliˇpiˆ 2 Bible Online

Piˇliˇpiˆ 2 - Akha bible

Piˇliˇpiˆ 2

¹Naw maꞈ Ka li laꞈ kʼoeˇ dehꞈ-eu baˬ da neh, gʼaˬ kʼaˆ laˇ-awˇ, aˬ yawꞈ-euˬ gʼoeˇ-eu gaˬ-eu jeˬ naw maꞈ-ahˇ nui saˇ bi za-eu meh. Naw maꞈ Ka li-euˬ Yaw sahˇ Miˬyehˇ nehˬ-ehˇ cawˬ cawˬ-eu baˬ da neh, tiˬ gʼaˬ tiˇ gʼaˬ gʼawˬ shaˬ gaˬ nya laˇ-awˇ, tiˬ gʼaˬ gʼaˇ duˬ tiˬ gʼaˬ shaˇ noeˬ nya laˇ-eu meh.

²Kʼoeˇ miˇ neh, ngaˇ laˬ kʼaˬ cehˇ-eu jeˬ byah laˇ ni, naw maꞈ nui noeˬ tiˬ gaˇ taꞈ-awˇ, gʼoeˇ-eu gaˬ-eu jeˬ tiˬ kawˆ loꞈ-ehˇ ahˇ-awˇ, nui ma tiˬ siˬ tehꞈ-ehˇ taˬ-eu gʼaˇ duˬ, ngaˇ naw maꞈ-ahˇ shaˇ-eu ma.

³Yawˬ ha-euˬ nui kʼahˇ gʼaˇ duˬ tehꞈ-ehˇ shaˇ noeˬ-eu jeˬ maˬ ehˇ, yawˬ ha-ahˇ aˬ cawˬ bi noeˬ huiˬ-eu gʼaˇ duˬ kʼahˬ sehˇ jehˆ-eu jeˬ maˬ ehˇ, tiˬ pawꞈ-iˬ taˬ mˇ. Ehˇ kʼawꞈ, tiˬ gʼaˬ tiˇ gʼaˬ nui ma nahˬ yu ni taˬ-awˬ. Aˬ cawˬ naˆ maˬ tseˇ maˬ gaˇ ma lehˇ noeˬ-eu nui ma taˬ bi ahˇ.

⁴Yawˬ ha gʼaˇ duˬ tehꞈ-ehˇ maˬ shaˇ noeˬ ni, aˬ cawˬ gʼaˇ duˬ shaˇ noeˬ-awˬ.

⁵Yeˬsuˇ Ka li loꞈ-ehˇ nui ma taˬ-awˬ.

⁶Aˬ yawꞈ Miˬyehˇ-ahˇ duˇ-eu kʼawꞈ, Miˬyehˇ nehˬ-ehˇ tiˬ kawˆ ma lehˇ, yawˬ haˇ yawˬ ha maˬ tsaˬ geuꞈ-a.

⁷Dawˬ tawˆ luꞈ byehˇ dzeh yaꞈ jiˇ-awˇ, zaˬ kʼaˆ tiˬ gʼaˬ loꞈ-ehˇ oe-awˇ, tsawˇ haˬ loꞈ-ehˇ dehꞈ le-euˬ meh.

⁸Yawˬ ha-ahˇ taˬ nyiˇ dui dui-awˇ, laꞈ yaꞈ kʼoeˇ taˆ shiˇ gaˇ keuˆ ni, Miˬyehˇ ehˇ dawˬ naˇ haˬ-euˬ meh.

⁹Kʼoeˇ miˇ neh aˬ yawꞈ-ahˇ Miˬyehˇ, huiˬ dui dui-eu tsawˇ myahˇ biꞈ-awˇ, goˇ dui dui gaˇ ciˬ nuiˇ-euˬ meh.

¹⁰Mˬ miˇ hawˇ-eu miˇ oˆ keuˆ ni, pawˬ tsuiꞈ dawˬ tawˆ pawˬ dmˬ dmˬ-awˇ, Yeˬsuˇ tsawˇ myahˇ ciˬ huiˬ tehꞈ-a.

¹¹Aˬda Miˬyehˇ kʼahˬ sehˇ jaˆ ni, Yeˬsuˇ Ka li Sahˬpaˬ meh lehˇ, mehˬ luˬ kʼaˇ tsoꞈ-eu guˇ tehꞈ-a.

¹²Kʼoeˇ miˇ neh ngaˇ gaˬ-eu cawˬ deuˬ-oˇ, ngaˇ naw maꞈ nehˬ-ehˇ jawˇ ngeh ngaˬ-euˬ dawˬ-ahˇ naw maꞈ aˬ myah luꞈ naˇ haˬ geuꞈ-euˬ meh. Nymˬ-mˇ ngaˇ naw maꞈ nehˬ-ehˇ maˬ jawˇ ngeh kʼawꞈ, ngaˬ-euˬ dawˬ-ahˇ kʼoeˇ naˆ maˬ tseˇ naˇ haˬ geuꞈ-awˬ. Naw maꞈ ka kʼoꞈ-eu jeˬ-ahˇ za nya ni, Miˬyehˇ-ahˇ guˆ-awˇ yaw dzuˬ dzuˬ-eu laꞈ kʼoeˇ leh jeh dui dui-awˬ.

¹³Aˬ jeˬ miˇ neh ehˇ naˇ, naw maꞈ nui ma keuˆ ni maˬ ehˇ, Miˬyehˇ-euˬ nui kʼahˇ mˇ nya ni maˬ ehˇ, naw maꞈ laꞈ kʼoeˇ Miˬyehˇ aˬ myah luꞈ gaˇ mˇ luꞈ meh.

¹⁴Kʼaˇ mˇ kʼaˇ shaˇ-eu jeˬ laꞈ kʼoeˇ, tiˬ gʼaˬ tiˇ gʼaˬ dawˬ gʼoꞈ maˬ doˆ-ehˇ, tsawˇ pyehˇ maˬ pyehˇ ni mˇ-awˬ.

¹⁵Kʼoeˇ loꞈ-ehˇ mˇ naˇ, iˬ baˇ mˇ-awˇ bahˬ-eu muˆ-eu tsawˇ haˬ deuˬ jawˇ-eu miˇ tsaˬ heu kʼoeˇ taˆ, naw maꞈ-aˬ, iˬ baˇ taˬ kʼaˇ maˬ za ni muiˬ dui dui-eu Miˬyehˇ-euˬ zaˬ deuˬ pyeuꞈ laˇ tehꞈ-a. Mˬ kʼoeˇ taˆ tsehˬ-eu aˬ guiˇ loꞈ-ehˇ aˬ yawꞈ maꞈ-ahˇ yaw shehꞈ bya nehˬ-awˬ.

¹⁶Saꞈ laˇ bi dehꞈ-eu dawˬ aˬ yawꞈ maꞈ-ahˇ biꞈ-awˬ. Kʼoeˇ loꞈ-ehˇ mˇ naˇ, Ka li zaꞈ le-eu Aˇ nah-ahˇ naw maꞈ gʼaˇ duˬ ngaˇ kʼahˬ sehˇ jehˆ kʼaˇ za tehꞈ-a. Aˬ jeˬ miˇ neh ehˇ naˇ, kʼoeˇ-aˬ, ngaˬ neh leh jeh-awˇ mˇ-euˬ gaˇ heu yawꞈ ngehꞈ maˬ ngeuˇ-eu gaˇ kawˆ bya cehˆ ni bi doˆ laˇ tehꞈ-a.

¹⁷Naw maꞈ-euˬ jah-eu jeˬ Miˬyehˇ-ahˇ lawˇ nehˬ-euˬ kʼoeˇ taˆ, ngaˬ-euˬ shiˬ ya shehˆ daˆ nehˬ law hawˇ kʼawꞈ, ngaˇ nui kʼahˇ shiˇ-awˇ, naw maꞈ dawˬ tawˆ luꞈ nehˬ-ehˇ tiˬ kawˆ loꞈ-ehˇ laˬ kʼaˬ caw cehˇ-eu ma.

¹⁸Kʼoeˇ gaˇ duˇ ni, naw maꞈ kʼawꞈ nui kʼahˇ shiˇ-awˇ ngaˬ nehˬ-ehˇ laˬ kʼaˬ caw cehˇ-eu tsaˬ meh.

¹⁹Naw maꞈ-euˬ gaˇ kawˆ ya gaˬ-awˇ ngaˬ-euˬ nui ma gʼaˬ tiˬ tiˆ paˇ ahˇ laˇ ni, Sahˬpaˬ Yeˬsuˇ nui ma tsaˬ naˇ gʼawˬ myahˇ maˬ gʼeh-ehˇ Tiˆmoˇseˬ-ahˇ naw maꞈ jawˇ gaˇ bi laˇ ma lehˇ ngaˇ noeˬ tmˬ taˬ-euˬ ma.

²⁰Ngaˬ nehˬ-ehˇ nui ma tiˬ gaˇ taꞈ-awˇ, naw maꞈ gʼaˇ duˬ maˇ maˇ ni nui ma keuˆ-eu aˬ yawꞈ tiˬ gʼaˬ jawˇ-eu tehꞈ meh.

²¹Yawˬ gʼaˬ na luꞈ yawˬ ha gʼaˇ duˬ shaˇ noeˬ-eu tehꞈ meh. Yeˬsuˇ Ka li gʼaˇ duˬ maˬ shaˇ noeˬ-a.

²²Aˬ yawꞈ aˇ naˆ ni gaˇ dahˇ tsoeˬ-eu gaˇ kawˆ maˬ ehˇ, Laˬ kʼaˬ cehˇ-eu Guiˬ lahˬ dawˬ gʼaˇ duˬ aˬ yawꞈ ngaˬ nehˬ-ehˇ aˬ da hawˇ-eu zaˬ loꞈ-ehˇ mˇ daˆ shaˇ daˆ laꞈ-euˬ gaˇ kawˆ maˬ ehˇ, naw maꞈ siˬ nya meh.

²³Ngaˬ-ahˇ aˬ cawˬ aˬ joˆ-ehˇ daˇ tsehˆ nehˬ laꞈ-eu gaˇ kawˆ duˬ laˇ-eu nehˬ-ehˇ, aˬ yawꞈ-ahˇ naw maꞈ jawˇ gaˇ yaw kawˇ-ehˇ bi laˇ ma lehˇ noeˬ taˬ-euˬ ma.

²⁴Sahˬpaˬ Yeˬsuˇ nui ma tsaˬ naˇ, gʼawˬ myahˇ maˬ gʼeh-ehˇ ngaˬ-euˬ gʼawˇ mawˇ kʼawꞈ naw maꞈ jawˇ gaˇ laˇ keuˆ nya-eu duˇ lehˇ jah-eu ma.

²⁵Laˬ kʼaˬ cehˇ-eu Guiˬ lahˬ dawˬ gʼaˇ duˬ, ngaˬ nehˬ-ehˇ mˇ caw shaˇ caw-awˇ guiˇ deuˆ caw luꞈ-eu tsawˇ haˬ tiˬ gʼaˬ pyeuꞈ-eu ngaˇ loˬ-eu jeˬ-ahˇ bi caw ba-eu lehˇ naw maꞈ neh kʼehˇ gʼeh leꞈ-euˬ aˬ dui-euˬ aˬ nyiˇ Iˬbaˬpawˬdiˇ-ahˇ kʼawꞈ, naw maꞈ jawˇ gaˇ ya bi laˇ meh lehˇ ngaˇ noeˬ-eu ma.

²⁶Aˬ yawꞈ naw maꞈ yawˬ gʼaˬ na luꞈ-ahˇ gʼoꞈ haw mawˇ laˇ mawꞈ dui dui meh. Aˬ yawꞈ naˇ-eu gaˇ kawˆ naw maꞈ jawˇ gaˇ gaˬ keuˆ leˇ-euˬ miˇ neh nui ma tiˬ pawꞈ-iˬ maˬ saˇ-a.

²⁷Aˬ yawꞈ shiˇ taw tehˬ ni naˇ dui dui-euˬ meh. Ehˇ kʼawꞈ, Miˬyehˇ aˬ yawꞈ-ahˇ gʼawˬ shaˬ gaˬ nehˬ-euˬ meh. Aˬyawꞈ-ahˇ tehꞈ-ehˇ maˬ ngeuˇ ni, ngaˬ-ahˇ kʼawꞈ gʼawˬ shaˬ gaˬ nehˬ laꞈ-awˇ, aˬ yawꞈ baˬ da neh ngaˬ-euˬ nui ma shaˬ zahˬ maˬ ya naꞈ dzehˬ-iˇ ni bi dzeuˇ-iˇ laꞈ-euˬ meh.

²⁸Kʼoeˇ miˇ neh, naw maꞈ aˬ yawꞈ-ahˇ ya mawˇ-awˇ laˬ kʼaˬ paˇ ya cehˇ ni maˬ ehˇ, ngaˇ nui noeˬ shaˬ luꞈ-eu pyaˇ laˇ ni maˬ ehˇ, aˬ yawꞈ-ahˇ naw maꞈ jawˇ gaˇ yaw kawˇ-ehˇ bi laˇ mawꞈ dui dui-eu ma.

²⁹Sahˬpaˬ Yeˬsuˇ laꞈ kʼoeˇ aˬ yuiꞈ aˬ nyiˇ tiˬ gʼaˬ loꞈ-ehˇ aˬ yawꞈ-ahˇ laˬ kʼaˬ tiˬ cehˇ ha nehˬ-awˬ. Aˬ yawꞈ loꞈ-ehˇ gʼeh-eu tsawˇ haˬ deuˬ-ahˇ yaw zeu baw-eu tsaˬ meh.

³⁰Aˬ jeˬ miˇ neh ehˇ naˇ, naw maꞈ maˬ caw ba nehˬ laꞈ nya-eu jeˬ aˬ yawꞈ ngaˬ-ahˇ caw ba-eu gʼaˇ duˬ, Ka li-euˬ gaˇ mˇ-eu laꞈ kʼoeˇ shiˇ taw tehˬ ni aˬ yawꞈ leh jeh dui dui-euˬ meh.