Read Akha Gawˇlawˇsehˇ 2 Bible Online

Gawˇlawˇsehˇ 2 - Akha bible

Gawˇlawˇsehˇ 2

¹Naw maꞈ-euˬ gʼaˇ duˬ maˬ ehˇ, Lawˬdiˬciˆ meuˬ-ahˇ jawˇ-eu tsawˇ haˬ deuˬ gʼaˇ duˬ maˬ ehˇ, ngaˬ-ahˇ maˬ mawˇ haw-euˬ tsawˇ haˬ dawˬ tawˆ luꞈ gʼaˇ duˬ maˬ ehˇ, ngaˇ aˇ naˆ ni leh jeh-awˇ gaˇ mˇ luꞈ-eu gaˇ kawˆ naw maꞈ-ahˇ bi siˬ mawꞈ miˇ-a.

²Aˬ yawꞈ maꞈ-euˬ nui ma kʼaˬ duˬ ni pyeuꞈ laˇ-awˇ, gʼoeˇ-eu gaˬ-eu jeˬ laꞈ kʼoeˇ nui ma tiˬ siˬ tehꞈ-ehˇ taˬ nya laˇ-awˇ, yaw muiˬ paˬ-ehˇ gʼoˆ siˬ gʼoˆ shaw nya-eu baˬ da neh yaw duˬ yaw ciˇ baw laˇ ni, ngaˇ kʼoeˇ loꞈ-ehˇ mˇ luꞈ-eu ma. Kʼoeˇ loꞈ-ehˇ mˇ-eu baˬ da neh, Miˬyehˇ neh zaꞈ taˬ-eu jeˬ pyeuꞈ-eu Ka li-ahˇ aˬ yawꞈ maꞈ siˬ nya laˇ tehꞈ-a.

³Aˬ yawꞈ-aˬ, zaꞈ taˬ-euˬ pyuˇ pahˬ shuiˇ pahˬ-ahˇ duˇ-eu Miˬyehˇ-euˬ zaˬ siˬ tsawˇ gahˇ deuˬ-ahˇ pah dzeh-eu mawˬ tawꞈ kahˬ pyeuꞈ-eu meh.

⁴Tsawˇ haˬ tiˬ gʼaˬ naw maꞈ mehˬ shi aˇ naˆ ni muiˬ gaˇ duˇ kʼawꞈ, naw maꞈ-ahˇ mehˇ shuiˇ shuiˇ tawˆ-awˇ gaˇ ma taˬ bi sheuˬ bahˬ lehˇ ngaˇ ehˇ-eu ma.

⁵Ngaˬ-euˬ gʼawˇ mawˇ naw maꞈ nehˬ-ehˇ maˬ jawˇ kʼawꞈ, ngaˬ-euˬ nui ma naw maꞈ nehˬ-ehˇ jawˇ luꞈ-awˇ, naw maꞈ Ka li-ahˇ jah-eu jeˬ laꞈ kʼoeˇ tiˬ kawˆ loꞈ-ehˇ ziꞈ dah ni jawˇ luꞈ gaˇ ya mawˇ-eu miˇ neh, laˬ kʼaˬ cehˇ dui dui nya.

⁶Naw maꞈ-aˬ, Yeˬsuˇ Ka li-ahˇ naw maꞈ-euˬ Sahˬpaˬ loꞈ-ehˇ ha geuꞈ gʼaˬ-euˬ miˇ neh, aˬ yawꞈ-euˬ laꞈ kʼoeˇ dehꞈ gʼeh-awˬ.

⁷Naw maꞈ-ahˇ mehˬ nehˬ tsoˆ nehˬ taˬ-euˬ loꞈ-ehˇ, aˬ yawꞈ laꞈ kʼoeˇ ciˇ ka bi naꞈ-awˇ, naw maꞈ yaw dehꞈ dehꞈ-eu jeˬ aˬ yawꞈ kʼoeˇ taˆ gawˬ daˆ leꞈ-awˇ, jah-eu jeˬ laꞈ kʼoeˇ gʼaˬ kʼaˆ dzehˬ laˇ-awˇ, Miˬyehˇ guiˬ lahˬ-ahˇ ja ceuˬ-eu jeˬ tiˬ byah ni bi ahˇ-awˬ.

⁸Tsawˇ haˬ zaˬ-euˬ zaˬ siˬ tsawˇ gahˇ-ahˇ gʼoe-awˇ mehˇ shuiˇ shuiˇ luꞈ-eu gaˇ dahˇ maˬ tsoeˬ-eu jaˬ myawꞈ kʼoeˇ deuˬ-euˬ zaˬ kʼaˆ maˬ ya geuꞈ ni yahˇ-awˬ. Kʼoeˇ-aˬ, Yeˬsuˇ Ka li laꞈ kʼoeˇ doˆ le-euˬ jeˬ maˬ ngeuˇ-a. Mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ deuˬ-euˬ laꞈ-ahˇ neh, tsawˇ haˬ zaˬ neh tiˬ ziˇ saˇ-iˬ tiˬ ziˇ tawˬ ka leꞈ-euˬ mehˬ-eu tsoˆ-eu jeˬ pyeuꞈ-eu meh.

⁹Miˬyehˇ laꞈ kʼoeˇ kʼaˇ ahˇ-eu jeˬ dawˬ tawˆ luꞈ, Ka li laꞈ kʼoeˇ tiˬ byah ni ahˇ-eu meh.

¹⁰Naw maꞈ-ahˇ aˬ yawꞈ laꞈ kʼoeˇ tiˬ byah tiˬ loꞈ ya jawˇ-eu jeˬ biꞈ taˬ-euˬ meh. Mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ deuˬ hawˇ-eu baoˬ deuˬ kʼoeˇ taˆ aˬ yawꞈ huiˬ dzehˬ-eu meh.

¹¹Ka li laꞈ kʼoeˇ naw maꞈ baˆ kʼoˆ mehˬ dzaˬ yehˬ gʼaˬ-euˬ meh. Kʼoeˇ-aˬ, tsawˇ haˬ zaˬ neh baˆ kʼoˆ mehˬ dzaˬ yehˬ-euˬ gaˇ maˬ duˇ-a. Ka li laꞈ kʼoeˇ baˆ kʼoˆ mehˬ dzaˬ yehˬ-euˬ kʼoeˇ-aˬ, iˬ baˇ ahˇ-eu gʼawˇ mawˇ heu-euˬ laꞈ kʼoeˇ neh bi buˬ-iˇ nya-eu baoˬ ahˇ-eu meh.

¹²A jeˬ miˇ neh ehˇ naˇ, naw maꞈ iˇ cuꞈ shawˇ ngeh Ka li nehˬ-ehˇ tiˬ kawˆ loꞈ-ehˇ bi baꞈ pahˬ-awˇ, tiˬ kawˆ loꞈ-ehˇ paˇ gʼoꞈ dehꞈ laˇ-euˬ jeˬ pyeuꞈ-eu meh. Ka li-ahˇ bi gʼoꞈ dehꞈ laˇ-euˬ Miˬyehˇ-euˬ dehꞈ luꞈ-eu baoˬ-ahˇ naw maꞈ jah-eu laꞈ kʼoeˇ gʼoꞈ dehꞈ laˇ-euˬ jeˬ pyeuꞈ-eu meh.

¹³Yaw beh naw maꞈ Yuˇdaˆ tsawˇ haˬ maˬ ngeuˇ-eu uˬ taꞈ, Zahˇ dawˬ kʼoꞈ dawˬ maˬ jaˆ-eu baˬ da neh maˬ ehˇ, naw maꞈ-euˬ iˬ baˇ baˬ da neh maˬ ehˇ, saꞈ laˇ shiˇ taˬ-euˬ gaˇ duˇ-eu meh. Ehˇ kʼawꞈ, nymˬ-mˇ-aˬ, Miˬyehˇ neh naw maꞈ-ahˇ Ka li nehˬ-ehˇ bi dehꞈ laˇ-euˬ meh. Aˬ dui-euˬ iˬ baˇ dawˬ tawˆ luꞈ-ahˇ Miˬyehˇ pyehˬ nehˬ laꞈ-euˬ meh.

¹⁴Aˬ dui-euˬ dziˇ dzoˆ boꞈ ahˇ taˬ-euˬ sahˬ gʼaˬ hawˇ-eu dziˇ dzoˆ ya tsoeˬ-eu zahˇ sahˇ kʼoꞈ dawˬ tawˆ luꞈ-ahˇ laꞈ yaꞈ kʼoeˇ taˆ taꞈ tehˬ-awˇ, aˬ duiˬ-euˬ dziˇ dzoˆ aˬ yawꞈ laˆ byoˆ nehˬ laꞈ-euˬ meh.

¹⁵Laꞈ yaꞈ kʼoeˇ-euˬ kʼoeˇ taˆ, mˬ hawˇ-eu miˇ yaw kaˬ-ahˇ uˆ lahˇ luꞈ-eu yaw sahˇ deuˬ hawˇ-eu baoˬ deuˬ-euˬ aˬ laꞈ laꞈ kʼoeˇ, Ka li yawˬ haˇ yawˬ ha bi buˬ-iˇ-euˬ meh. Aˬ yawꞈ gʼaˬ leˇ-euˬ bawˬ-iˬ gʼeh ngeh miˇ kʼahˬ zaˬ deuˬ bi haw-eu gʼaˇ duˬ, aˬ yawꞈ maꞈ-ahˇ paꞈ-awˇ tsahˇ tsahˇ-ehˇ cah-euˬ meh.

¹⁶Kʼoeˇ miˇ neh, naw maꞈ dzaˬ-eu dawˇ-eu gaˇ kawˆ maˬ ehˇ, nah lah lah-eu gaˇ kawˆ maˬ ehˇ, la loˆ la tsehˆ lah-eu gaˇ kawˆ maˬ ehˇ, Jawˇ nah tawˬ-eu gaˇ kawˆ maˬ ehˇ, tsawˇ haˬ tiˬ gʼaˬ neh-iˬ naw maꞈ gʼaˇ duˬ zahˇ sahˇ kʼoꞈ taˬ bi taˬ.

¹⁷Heu deuˬ dawˬ tawˆ Luꞈ aˬ kaˇ pyeuꞈ laˇ-eu gaˇ kawˆ-euˬ aˇ baˇ naˇ shmˇ loˆ ni tehꞈ meh. Maˇ maˇ ni gʼeh-eu jeˬ-aˬ, Ka li meh.

¹⁸Tsawˇ haˬ tiˬ paˆ na deuˬ yawˬ ha aˬ cawˬ-ahˇ maˬ duˇ-eu yaw sahˇ laꞈ kʼoeˇ ya siˬ ya mawˇ-eu jeˬ za taˬ-euˬ miˇ neh, aˬ cawˬ naˆ maˬ tseˇ huiˬ dzehˬ mahˇ dzehˬ ma lehˇ ehˇ-awˇ, yawˬ ha-euˬ gʼawˇ mawˇ-ahˇ taˬ nyiˇ-eu gaˇ kawˆ maˬ tsaˬ-eu jeˬ-ehˇ mehˬ-awˇ, mˬ taˆ gʼaˬ kʼehˇ-ahˇ uˬ duˬ ya tahˬ meh lehˇ ehˇ-eu meh. Kʼoeˇ loꞈ-ehˇ gʼeh-eu tsawˇ haˬ deuˬ neh naw maꞈ za paˬ-ehˇ gʼeh-eu laꞈ sawˬ deuˬ maˬ ya bi yuˇ doˆ geuꞈ ni yahˇ-awˬ. Kʼoeˇ loꞈ-ehˇ gʼeh-eu tsawˇ haˬ-aˬ, miˇ tsaˬ zaˬ deuˬ noeˬ-eu loꞈ-ehˇ noeˬ-awˇ, hawˬ haˇ yawˬ ha nui ma huiˬ luꞈ meh. Ehˇ kʼawꞈ, aˬ yawꞈ maꞈ kʼoeˇ loꞈ-ehˇ nui ma huiˬ-eu-aˬ, yawꞈ ngehꞈ meh.

¹⁹Aˬ yawꞈ maꞈ-aˬ, Ka li zaˬ aˇ muˇ-euˬ uˬ duˬ pyeuꞈ-eu Ka li-ahˇ maˬ paˇ tsoꞈ taꞈ ni byehˇ-euˬ meh. Uˬ duˬ pyeuꞈ-eu Ka li uˆ lahˇ-eu uˬ moˆ gʼawˇ mawˇ mawˇ lah-ehˇ gʼaˬ tiˬ byah ni ahˇ-awˇ, yoeˬ tsuiꞈ yoeˬ laꞈ hawˇ-eu shaˬ guˬ shaˬ caˆ deuˬ neh tiˬ gaˇ gʼeu tawꞈ jiˇ taˬ-euˬ miˇ neh, Miˬyehˇ nui ma tsaˬ-eu loꞈ-ehˇ huiˬ laˇ-eu meh.

²⁰Naw maꞈ Ka li nehˬ-ehˇ shiˇ-awˇ, mˬ hawˇ-eu miˇ yaw kaˬ-ahˇ uˆ lahˇ luꞈ-eu yaw sahˇ deuˬ-euˬ laꞈ-ahˇ ya buˬ ya law-iˇ-euˬ meh. Toˆ-ehˇ ngeuˇ naˇ, aˬ jeˬ miˇ neh naw maꞈ miˇ tsaˬ heu-ahˇ taꞈ-eu tsawˇ haˬ loꞈ-ehˇ dehꞈ te. Aˬ jeˬ miˇ neh naw maꞈ zahˇ sahˇ kʼoꞈ heu deuˬ-ahˇ caw teh-awˇ,

²¹“Dzaˇ heu jeˬ-ahˇ taˬ yuˇ,” “Dzaˇ heu jeˬ-ahˇ taˬ myeuꞈ haw,” “Dzaˇ kʼoeˇ jeˬ-ahˇ toeˬ-eu tehꞈ-ehˇ kʼawꞈ taˬ toeˬ ciˆ” lehˇ ehˇ gaˇ naw maꞈ naˇ haˬ te.

²²Zahˇ sahˇ kʼoꞈ kʼoeˇ deuˬ-aˬ, tiˬ poˆ zmˬ shaw naˇ gaˇ dahˇ tiˬ pawꞈ-iˬ maˬ paˇ tsoeˬ-eu jeˬ loꞈ-ehˇ tehꞈ meh. Kʼoeˇ-aˬ, tsawˇ haˬ zaˬ neh taˬ taˬ-euˬ mehˬ-eu tsoˆ-eu zahˇ sahˇ kʼoꞈ tehꞈ meh.

²³Tsawˇ haˬ zaˬ deuˬ mˬ taˆ gʼaˬ kʼehˇ-ahˇ uˬ duˬ ya tahˬ meh lehˇ aˬ yawꞈ maꞈ ehˇ-eu, yawˬ haˇ yawˬ ha taˬ nyiˇ-eu jahˇ geuꞈ-eu, guiˬ lahˬ saꞈ laˇ paw nui ma keuˆ dui dui-eu jahˇ geuꞈ-eu, yawˬ ha-euˬ gʼawˇ mawˇ-ahˇ yawˬ ha kʼehˬ-eu, heu deuˬ-ahˇ haw naˇ, zahˇ sahˇ kʼoꞈ kʼoeˇ deuˬ taˬ-euˬ tsawˇ haˬ deuˬ zaˬ siˬ tsawˇ gahˇ ahˇ ngaˇ lehˇ noeˬ paˬ-ehˇ gʼeh-eu meh. Ehˇ kʼawꞈ, zahˇ sahˇ Kʼoꞈ kʼoeˇ deuˬ-aˬ, shiˬ shaˬ jiˇ-euˬ nui kʼahˇ-ahˇ zuiˆ gʼaˬ nya-eu zahˇ sahˇ kʼoꞈ maˬ ngeuˇ-a.