Read Akha Gawˇlawˇsehˇ 3 Bible Online

Gawˇlawˇsehˇ 3 - Akha bible

Gawˇlawˇsehˇ 3

¹Naw maꞈ-ahˇ Ka li nehˬ-ehˇ bi gʼoꞈ dehꞈ laˇ-euˬ meh. Kʼoeˇ miˇ neh, mˬ kʼoeˇ taˆ Miˬyehˇ neh naw maꞈ gʼaˇ duˬ lehˬ hmˬ taˬ-euˬ jeˬ-ahˇ nui kʼahˇ jaˆ-awˬ. Kʼoeˇ gaˇ, Miˬyehˇ-euˬ aˇ maˇ paw jaˆ-eu dzoeˬ dzaˬ nuiˇ mahˬ kʼoeˇ taˆ Ka li nuiˇ luꞈ-eu meh.

²Mˬ kʼoeˇ taˆ jaˆ-eu jeˬ-ahˇ naw maꞈ-euˬ nui ma noeˬ tsoˆ taˬ-awˬ. Miˇ tsaˬ kʼoeˇ taˆ jaˆ-eu jeˬ-ahˇ taˬ noeˬ tsoˆ taˬ.

³Aˬ jeˬ miˇ neh ehˇ naˇ, naw maꞈ shiˇ-euˬ tsawˇ haˬ pyeuꞈ-awˇ, naw maꞈ maˇ maˇ ni ya dehꞈ-eu jeˬ-aˬ, Ka li dehꞈ-eu jeˬ nehˬ-ehˇ tiˬ kawˆ loꞈ-ehˇ Miˬyehˇ laꞈ kʼoeˇ zaꞈ taˬ-awˇ jaˆ-a siˬ.

⁴Maˇ maˇ ni gʼeh-eu naw maꞈ-euˬ dehꞈ-eu jeˬ-aˬ, Ka li-euˬ gaˇ mˇ-eu gʼaˇ duˬ pyeuꞈ-awˇ, aˬ yawꞈ miˇ tsaˬ kʼoeˇ taˆ doˆ le ngeh naw maꞈ kʼawꞈ aˬ yawꞈ nehˬ-ehˇ doˆ le-awˇ, aˬ yawꞈ yaw shehꞈ kʼahˬ sehˇ ahˇ-eu loꞈ-ehˇ naw maꞈ kʼawꞈ yaw shehꞈ kʼahˬ sehˇ ahˇ tehꞈ-a.

⁵Naw maꞈ laꞈ kʼoeˇ gaˇ mˇ luꞈ-eu jeˬ pyeuꞈ-eu, miˇ tsaˬ shiˬ shaˬ jiˇ-ahˇ nui kʼahˇ jaˆ-eu laꞈ kʼoeˇ jawꞈ dui dui-eu kʼaˬ miˬ sheu-eu gʼawˬ mya jeˬ mˇ-eu, yaw haiˬ jeˬ mˇ-eu, nui kʼahˇ huiˬ-eu, heu deuˬ-ahˇ naw maꞈ ya laˆ sehꞈ jiˇ meh. (Nui kʼahˇ huiˬ-eu jeˬ-aˬ, tahˬ pahˬ aˬ ma mawˇ kawˇ-ahˇ uˬ duˬ tahˬ gaˇ duˇ-eu meh.)

⁶Kʼoeˇ loꞈ-ehˇ mˇ-awˇ Miˬyehˇ ehˇ dawˬ maˬ naˇ haˬ-eu deuˬ kʼoeˇ taˆ Miˬyehˇ nui ma pehˇ-eu jeˬ keuˆ le tehꞈ-a.

⁷Dzeuˇ laˇ ngeh, nui kʼahˇ kʼoeˇ deuˬ naw maꞈ-ahˇ uˆ gʼaˬ taˬ ngeh, naw maꞈ kʼoeˇ loꞈ-ehˇ dehꞈ dzeuˇ jawˇ dzeuˇ yaꞈ-euˬ meh.

⁸Nui ma pehˇ-eu, nui ma daˆ-eu, aˬ cawˬ-ahˇ yaw doeˇ jahˇ mawꞈ-eu, heu deuˬ-ahˇ naw maꞈ nymˬ-mˇ byehˇ tsehˆ tsehˆ-awˬ. Aˬ cawˬ-ahˇ dawˬ doeˇ ngehˬ daˆ-eu jeˬ hawˇ-eu jawꞈ dui dui-eu dawˬ ngehˬ-eu jeˬ, naw maꞈ-euˬ kʼaˬ meh-ahˇ taˬ paˇ bi doˆ laˇ.

⁹Tiˬ gʼaˬ tiˇ gʼaˬ jaˬ myawꞈ taˬ paˇ myawꞈ. Aˬ jeˬ miˇ neh ehˇ naˇ, nui ma yaw oeˇ hawˇ-eu mˇ-eu shaˇ-eu yaw oeˇ jeˬ-ahˇ naw maꞈ lehˆ dzeh gʼaˬ-euˬ meh.

¹⁰Nui ma yaw shuiꞈ-ahˇ naw maꞈ dm paˇ gʼaˬ-euˬ meh. Heu-aˬ, Beh-euˬ yaw sahˇ pyeuꞈ-eu Miˬyehˇ-ahˇ naw maꞈ tiˬ byah tiˬ loꞈ bi siˬ nya laˇ-eu gʼaˇ duˬ, aˬ yawꞈ-euˬ aˇ gʼehˇ-ahˇ duˇ laˇ ni aˬ myah luꞈ yaw shuiꞈ bi paˇ laˇ luꞈ-eu tsawˇ haˬ yaw shuiꞈ pyeuꞈ-eu meh.

¹¹Kʼoeˇ miˇ neh, Yuˇdaˆ tsawˇ haˬ maˬ ngeuˇ-eu deuˬ hawˇ-eu Yuˇdaˆ tsawˇ haˬ yaw kaˬ maˬ ehˇ, baˆ kʼoˆ mehˬ dzaˬ yehˬ-euˬ deuˬ hawˇ-eu maˬ yehˬ-euˬ deuˬ yaw kaˬ maˬ ehˇ, yawˬ kʼahˬ yaw miˇ yawˬ-ahˇ-euˬ tsawˇ haˬ deuˬ maˬ ehˇ, zahˇ sahˇ kʼoꞈ maˬ baw-eu tsawˇ haˬ deuˬ maˬ ehˇ, zaˬ kʼaˆ maˬ ehˇ, zaˬ kʼaˆ maˬ ngeuˇ-eu deuˬ maˬ ehˇ, beu gaˇ duˬ tiˬ pawꞈ-iˬ maˬ paˇ jaˆ meh. Dawˬ tawˆ luꞈ Ka li-ahˇ uˬ duˬ duˬ leˇ-awˇ, dawˬ tawˆ luꞈ Ka li laꞈ kʼoeˇ jawˇ-eu meh.

¹²Naw maꞈ-aˬ, Miˬyehˇ-euˬ tsawˇ haˬ meh. Aˬ yawꞈ naw maꞈ-ahˇ gaˬ-awˇ, aˬ yawꞈ-euˬ tsawˇ haˬ bi pyeuꞈ laˇ-eu gʼaˇ duˬ tseˇ doˆ taˬ-euˬ meh. Kʼoeˇ miˇ neh, aˬ cawˬ-ahˇ gʼawˬ shaˬ gaˬ-eu, aˬ cawˬ-ahˇ ngehˬ gʼeh mawꞈ-eu, yawˬ haˇ yawˬ ha taˬ nyiˇ-eu, nui nahˬ nui yu ahˇ-eu, nui ma gʼawˬ mahˇ ni taˬ-eu, heu deuˬ-ahˇ naw maꞈ dm tsahˬ taˬ-awˬ.

¹³Tiˬ gʼaˬ tiˇ gʼaˬ oˇ-awˬ. Iˬ baˇ taˬ kʼaˇ za laˇ ngeh, tiˬ gʼaˬ tiˇ gʼaˬ iˬ baˇ pyehˬ-awˬ. Sahˬpaˬ Yeˬsuˇ naw maꞈ-ahˇ iˬ baˇ pyehˬ nehˬ laꞈ-euˬ loꞈ-ehˇ, tiˬ gʼaˬ tiˇ gʼaˬ iˬ baˇ pyehˬ-awˬ.

¹⁴Heu deuˬ dawˬ tawˆ luꞈ mˇ-euˬ kʼoeˇ taˆ gʼoeˇ-eu gaˬ-eu jeˬ bi jaˆ-awˬ. Gʼoeˇ-eu gaˬ-eu jeˬ-aˬ, dawˬ tawˆ luꞈ tiˬ gaˇ taꞈ leˇ jiˇ ni gahˇ dzahˬ-eu meh.

¹⁵Ka li neh biꞈ-euˬ tsaˬ leˇ dzoeˇ leˇ-eu jeˬ kʼoeˇ-aˬ, naw maꞈ tiˬ jeˬ paˬ mˇ-eu lehˇ noeˬ tsehˆ ngeh naw maꞈ-ahˇ gaˇ ma sheuˬ mehˬ-eu gʼaˇ duˬ pyeuꞈ-eu meh. Aˬ jeˬ miˇ neh ehˇ naˇ, naw maꞈ kʼoeˇ loꞈ-ehˇ tsaˬ leˇ dzoeˇ leˇ-awˇ gʼawˇ mawˇ tiˬ mawˇ tehꞈ-ehˇ pyeuꞈ laˇ-eu gʼaˇ duˬ, Miˬyehˇ neh naw maꞈ-ahˇ kuˇ taˬ-euˬ meh. Naw maꞈ Miˬyehˇ-euˬ guiˬ lahˬ-ahˇ ngehˇ-eu maˬ tsaˬ-a.

¹⁶Byah dui dui-eu Ka li-euˬ dawˬ kʼoeˇ, naw maꞈ-euˬ nui ma laꞈ kʼoeˇ bi ahˇ-eu tsaˬ meh. Zaˬ siˬ tsawˇ gahˇ dawˬ tawˆ luꞈ zmˬ-awˇ tiˬ gʼaˬ tiˇ gʼaˬ mehˬ-awˬ tsoˆ-awˬ. Jaˇliꞈ laꞈ kʼoeˇ ahˇ-eu ja ceuˬ-eu caˇ dawˬ deuˬ, Yeˬsuˇ gaˇ kawˆ caˇ-eu caˇ dawˬ deuˬ hawˇ-eu, guiˬ lahˬ saꞈ laˇ paw taꞈ leˇ-eu caˇ dawˬ deuˬ caˇ caˇ-ehˇ, nui ma laꞈ kʼoeˇ Miˬyehˇ-euˬ guiˬ lahˬ-ahˇ ja ceuˬ-awˬ.

¹⁷Naw maꞈ kʼaˇ mˇ kʼaˇ shaˇ kʼaˇ ngehˬ kʼaˇ tmˇ-eu jeˬ laꞈ kʼoeˇ, Sahˬ paˬ Yeˬsuˇ-euˬ tsawˇ myahˇ uˬ moˆ Aˬ da Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ mˇ-awˬ.

¹⁸Miˬ zaˬ deuˬ-oˇ, yawˬ ha-euˬ kʼaˬ dzeˇ zaˬ uˆ lahˇ-eu uˬ moˆ dehꞈ-awˬ. Aˬ jeˬ miˇ neh ehˇ naˇ, naw maꞈ Ka li zaˬ pyeuꞈ-eu miˇ neh kʼoeˇ loꞈ-ehˇ dehꞈ-eu tsaˬ meh.

¹⁹Kʼaˬ dzeˇ zaˬ deuˬ-oˇ, yawˬ ha-euˬ miˬ zaˬ-ahˇ gaˬ-awˬ. Yehˬ bawˬ sehˇ lu-ehˇ taˬ gʼeh.

²⁰Zaˬ deuˬ-oˇ, naw maꞈ Ka li zaˬ pyeuꞈ-eu loꞈ-ehˇ, yawˬ ha-euˬ aˬ ma aˬ da ehˇ dawˬ-ahˇ yawˬ jawˇ na luꞈ naˇ haˬ geuꞈ-awˬ. Aˬ jeˬ miˇ neh ehˇ naˇ, kʼoeˇ loꞈ-ehˇ mˇ gaˇ Miˬyehˇ nui ma tsaˬ-eu meh.

²¹Aˬ da aˬ ma deuˬ-oˇ, yawˬ ha-euˬ zaˬ deuˬ nui ma pehˇ ni taˬ jahˇ. Kʼoeˇ loꞈ-ehˇ jahˇ nehˬ naˇ, yawˬ jeˬ na luꞈ laꞈ kʼoeˇ aˬ yawꞈ maꞈ nui ma baˬ-iˇ tehꞈ-a.

²²Zaˬ kʼaˆ deuˬ-oˇ, yawˬ jeˬ na luꞈ laꞈ kʼoeˇ yawˬ ha-euˬ baw leˬ ehˇ dawˬ naˇ haˬ-awˬ. Baw leˬ deuˬ neh bi ja ceuˬ-eu lehˇ baw leˬ mawˇ gaˇ tehꞈ-ehˇ dawˬ gʼoˆ gʼoˆ-eu jeˬ maˬ bi pyeuꞈ ni, Sahˬpaˬ Yeˬsuˇ-ahˇ yaw zeu baw-eu miˇ neh nui ma laꞈ kʼoeˇ keuˆ ni dawˬ gʼoˆ gʼoˆ-eu jeˬ bi pyeuꞈ-awˬ.

²³Aˬ geu jeˬ mˇ-eu maˬ kaˬ, tsawˇ haˬ zaˬ gʼaˇ duˬ mˇ-eu loꞈ-ehˇ maˬ ngeuˇ ni, Sahˬpaˬ Yeˬsuˇ gʼaˇ duˬ mˇ-eu loꞈ-ehˇ nui ma keuˆ-awˇ mˇ-awˬ.

²⁴Sahˬpaˬ Yeˬsuˇ neh aˬ yawꞈ-euˬ tsawˇ haˬ deuˬ gʼaˇ duˬ lehˬ hmˬ taˬ-euˬ laꞈ sawˬ-ahˇ naw maꞈ za tehꞈ-a lehˇ nui ma laꞈ kʼoeˇ noeˬ taˬ-awˬ. Aˬ jeˬ miˇ neh ehˇ naˇ, naw maꞈ gaˇ mˇ nehˬ luꞈ-eu Baw leˬ maˇ maˇ ni gʼeh-eu gʼaˬ-aˬ, Ka li meh.

²⁵Maˬ muiˬ-eu jeˬ mˇ-eu tsawˇ haˬ-aˬ, yawˬ ha neh kʼaˇ mˇ-euˬ loꞈ-ehˇ kʼehˬ nehˬ kʼaˆ nehˬ gaˇ ya daˬ tehꞈ-a. Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬzaˬ-ahˇ myaˆ pyawˬ huiˬ nyiˇ maˬ tseˇ ni yaˇ kʼaˬ daˇ-eu meh.