Read Akha 1 Teˇsaˬloˇni 1 Bible Online

1 Teˇsaˬloˇni 1 - Akha bible

1 Teˇsaˬloˇni 1

¹Ngaˇ Pawˇluˆ, Siˬlaˆ, Tiˆmoˇseˬ ngaˬ ha smˇ gʼaˬ, Aˬda Miˬyehˇ hawˇ-eu Sahˬpaˬ Yeˬsuˇ Ka li-ahˇ taꞈ-eu tsawˇ haˬ deuˬ pyeuꞈ-eu, Teˇsaˬloˇni meuˬ-ahˇ jaˆ-eu Ka li zaˬ aˇ muˇ laꞈ kʼoeˇ jawˇ-eu tsawˇ haˬ deuˬ-ahˇ, sahˬ boꞈ heu taꞈ boꞈ ahˇ laꞈ-eu ma. Guiˬ lahˬyaw dzahˇ hawˇ-eu nui saˇ oꞈ-eu jeˬ naw maꞈ kʼoeˇ taˆ jaˆ luꞈ-uˇ.

²Naw maꞈ dawˬ tawˆ luꞈ gʼaˇ duˬ nga maꞈ Miˬyehˇ-ahˇ aˬ myah luꞈ ja ceuˬluꞈ-awˇ, guiˬ lahˬ kʼaˇ shaˇ ngeh naw maꞈ gʼaˇ duˬ shaˇ luꞈ ma.

³Aˬ jeˬ miˇ neh ehˇ naˇ, jah-eu baˬ da neh naw maꞈ aˬ joˆ-ehˇ mˇ doˆ shaˇ doˆ laꞈ luꞈ-eu gaˇ kawˆ maˬ ehˇ, gʼoeˇ-eu gaˬ-eu jeˬ baˬ da neh naw maꞈ aˇ naˆ ni leh jeh-awˇ mˇ luꞈ-eu gaˇ kawˆ maˬ ehˇ, aˬ dui-euˬ Sahˬpaˬ Yeˬsuˇ Ka li-ahˇ naw maꞈ noeˬ tmˬ taˬ-euˬ jeˬ aˇ naˆ ni ziꞈ luꞈ-eu gaˇ kawˆ maˬ ehˇ, aˬ dui-euˬ Aˬda pyeuꞈ-eu Miˬyehˇ mehˬ shi nga maꞈ noeˬ keuˆ luꞈ-eu ma.

⁴Aˬ yuiꞈ aꞈ nyiˇ Ka li zaˬ deuˬ-oˇ, Miˬyehˇ naw maꞈ-ahˇ gaˬ-awˇ aˬ yawꞈ-euˬ tsawˇ haˬ bi pyeuꞈ laˇ-eu gʼaˇ duˬ tseˇ doˆ taˬ-euˬ gaˇ kawˆ nga maꞈ siˬ nya-eu ma.

⁵Aˬ jeˬ miˇ neh ehˇ naˇ, naw maꞈ jawˇ gaˇ nga maꞈ Laˬ kʼaˬ cehˇ-eu Guiˬ lahˬ dawˬ hehˇ leꞈ ngeh, kʼaˬ meh mehˬ boeˬ neh tehꞈ-ehˇ hehˇ leꞈ-euˬ maˬ ngeuˇ. Baoˬ hawˇ-eu Muiˬ-eu shawˇ-eu Yaw sahˇ Miˬyehˇ laꞈ kʼoeˇ maˬ ehˇ, maˇ maˇ ni ngeuˇ meh lehˇ siˬ duˬ jah duˬ-eu laꞈ kʼoeˇ maˬ ehˇ, hehˇ leꞈ-euˬ jeˬ pyeuꞈ-eu ma. Naw maꞈ nehˬ-ehˇ jawˇ-euˬ aˇ yamˬ laꞈ kʼoeˇ nga maꞈ aˬ joˆ-ehˇ dehꞈ yaꞈ jawˇ yaꞈ-euˬ gaˇ kawˆ naw maꞈ siˬ nya meh. Kʼoeˇ-aˬ, naw maꞈ-euˬ gʼaˇ duˬ pyeuꞈ-eu ma.

⁶Nga maꞈ-ahˇ maˬ ehˇ, Sahˬpaˬ Yeˬsuˇ-ahˇ maˬ ehˇ, naw maꞈ dzaw geuꞈ-euˬ meh. Shaˬ-eu zahˬ-eu jeˬ-ahˇ naw maꞈ ya daˬ dui dui-euˬ kʼawꞈ, Muiˬ-eu shawˇ-eu Yaw sahˇ Miˬyehˇ neh biꞈ-euˬ laˬ kʼaˬ cehˇ-eu jeˬtiˬ byah ni ahˇ-eu laꞈ kʼoeˇ, guiˬ lahˬ dawˬ-ahˇ naw maꞈ ha geuꞈ-euˬ meh.

⁷Kʼoeˇ miˇ neh naw maꞈ-aˬ, Maˬgeˬdawˇniˆ miˇ kʼahˬ hawˇ-eu Aˬgaˬyaˇ miˇ kʼahˬ-ahˇ jawˇ-eu tsawˇ haˬ deuˬ gʼaˇ duˬ dzaw geuꞈ duˬ pyeuꞈ laˇ-euˬ meh.

⁸Aˬ jeˬ miˇ neh ehˇ naˇ, Maˬgeˬdawˇniˆ miˇ kʼahˬ hawˇ-eu Aˬgaˬyaˇ miˇ kʼahˬ doe ni, Sahˬpaˬ Yeˬsuˇ gaˇ kawˆ guiˬ lahˬ dawˬ gaˬ keuˆ-iˇ-euˬ kʼoeˇ-aˬ, naw maꞈ baˬ da neh gaˬ keuˆ-iˇ-euˬ uˬ jeˬ pyeuꞈ-eu uˬ taꞈ, naw maꞈ Miˬyehˇ-ahˇ jah-eu gaˇ kawˆ yawˬ gaˇ na luꞈ gaˬ doe-iˇ-euˬ meh. Kʼoeˇ miˇ neh, nga maꞈ tiˬ jeˬ-iˬ ehˇ kʼaˇ maˬ paˇ za miˇ-a.

⁹Nga maꞈ naw maꞈ jawˇ gaˇ oe ngeh naw maꞈ neh nga maꞈ-ahˇ aˬ joˆ-ehˇ ha geuꞈ nehˬ laꞈ-euˬ gaˇ kawˆ hawˇ-eu, maˇ maˇ ni gʼeh-eu dehꞈ luꞈ-eu Miˬyehˇ-ahˇ uˬ duˬ tahˬ-eu gʼaˇ duˬ, tahˬ pahˬ aˬ ma mawˇ kawˇ deuˬ-ahˇ naw maꞈ aˬ joˆ-ehˇ byehˇ dzeh-euˬ gaˇ kawˆ, tsawˇ haˬ kʼoeˇ deuˬ dawˬ tawˆ luꞈ ja luꞈ-eu meh.

¹⁰Miˬyehˇ neh shiˇ-euˬ gaˇ bi gʼoꞈ dehꞈ laˇ-euˬ gʼaˬ pyeuꞈ-awˇ, aˬ dui kʼoeˇ taˆ keuˆ le-eu lehˇ gʼeh-eu Miˬyehˇ-euˬ nui ma pehˇ-eu jeˬ laꞈ kʼoeˇ aˬ dui-ahˇ ka kʼoꞈ nehˬ laꞈ-euˬ gʼaˬ pyeuꞈ-eu aˬ yawꞈ -euˬ Zaˬmaˇ Yeˬsuˇ mˬ kʼoeˇ taˆ neh zaꞈ ka le gaˇ naw maꞈ aˬ joˆ-ehˇ noeˬ tmˬ luꞈ-eu gaˇ kawˆ, aꞈ yawꞈ maꞈ ja luꞈ-eu meh.