Read Akha 1 Teˇsaˬloˇni 5 Bible Online

1 Teˇsaˬloˇni 5 - Akha bible

1 Teˇsaˬloˇni 5

¹Aˬ yuiꞈ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ zaꞈ le-eu aˇ yamˬ aˇ law gaˇ kawˆ naw maꞈ-ahˇ boꞈ nehˬ-eu maˬ paˇ loˬ meh.

²Aˬ jeˬ miˇ neh ehˇ naˇ, Sahˬpaˬ Yeˬsuˇ-euˬ Aˇ nah-aˬ, uˬ ciꞈ sehˇ gʼahˇ smˇ kʼoeˬ tahˇ joe oe-eu loꞈ-ehˇ maˬ noeˬ maˬ duˇ-ehˇ jawˇ ngeh keuˆ le tehꞈ-a lehˇ naw maꞈ siˬ duˬ taˬ-euˬ meh.

³Miˇ kʼahˬ saˇ-awˇ guˆ kʼaˇ maˬ za-a lehˇ aˬ cawˬ ja luꞈ ngeh, luˬ-iˇ seˇ-iˇ-eu jeˬ aˬ yawꞈ maꞈ kʼoeˇ taˆ keuˆ le tehꞈ-a. Zaˬ ciˬ deˇ le-euˬ aˬ ma tiˬ gʼaˬ uˬ maˆ naˇ doˆ laˇ-eu loꞈ-ehˇ ja pyuˬ ni ga keuˆ le-awˇ, aˬ yawꞈ maꞈ maˬ dzeuˇ-i nya-aˇ.

⁴Ehˇ kʼawꞈ aˬ yuiꞈ aˬ nyiˇ deuˬ-oˇ, naw maꞈ-aˬ, yaw zahˇ laꞈ kʼoeˇ jawˇ luꞈ-eu maˬ ngeuˇ-eu miˇ neh, Aˇ nah kʼoeˇ nah naw maꞈ kʼoeˇ taˆ smˇ kʼoeˬ tahˇ joe oe-eu loꞈ-ehˇ ja pyuˬ ni maˬ ga keuˆ le-aˇ.

⁵Aˬ jeˬ miˇ neh ehˇ naˇ, naw maꞈ dawˬ tawˆ luꞈ yaw shehꞈ-euˬ zaˬ meh. Nah gʼahˇ-euˬ zaˬ meh. Aˬ dui-aˬ, uˬ ciꞈ-euˬ zaˬ maˬ ngeuˇ. Yaw zahˇ-euˬ zaˬ maˬ ngeuˇ.

⁶Kʼoeˇ miˇ neh, aˬ cawˬ yuꞈ kʼaˆ-eu loꞈ-ehˇ maˬ yuꞈ kʼaˆ ni jawˇ kaˇ-euˇ.

⁷Yuꞈ kʼaˆ-eu tsawˇ haˬ deuˬ uˬ ciꞈ paw yuꞈ kʼaˆ-awˇ, jiˇ baˬ dawˇ yehꞈ-eu tsawˇ haˬ deuˬ kʼawꞈ, uˬ ciꞈ paw dawˇ yehꞈ-eu meh.

⁸Ehˇ kʼawꞈ, aˬ dui-aˬ, nah gʼahˇ-euˬ zaˬ pyeuꞈ-eu miˇ neh, yawˬ ha-euˬ nui ma-ahˇ nyehꞈ tehˬ taˬ-eu tsaˬ meh. Jah-eu jeˬ hawˇ-eu gʼoeˇ-eu gaˬ-eu jeˬ-ahˇ guiˇ deuˆ ngeh kʼahˬ-ahˇ dehˬ daˬ-eu shmˇ byaˆ dm-eu loꞈ-ehˇ dm-awˇ, noeˬ tmˬ-eu jeˬ-ahˇ uˬ duˬ-ahˇ tsahˬ-eu shmˇ uˬ kʼoˆ loꞈ-ehˇ tsahˬ kaˇ-euˇ.

⁹Miˬyehˇ aˬ dui-ahˇ tseˇ doˆ-euˬ-aˬ, aˬ yawꞈ-euˬ nui ma pehˇ-eu jeˬ-ahˇ bi daˬ-eu gʼaˇ duˬ maˬ ngeuˇ-a. Aˬ dui-euˬ Sahˬpaˬ Yeˬsuˇ Ka li baˬ da neh ka kʼoꞈ-eu jeˬ bi za-eu lehˇ tseˇ doˆ-euˬ meh.

¹⁰Aˬ yawꞈ zaꞈ leh ngeh, aˬ dui dehꞈ-eu maˬ kaˬ, shiˇ-euˬ maˬ kaˬ, aˬ yawꞈ nehˬ-ehˇ tiˬ kawˆ loꞈ-ehˇ ya jawˇ ni aˬ dui gʼaˇ duˬ aˬ yawꞈ shiˇ dah-euˬ meh.

¹¹Kʼoeˇ miˇ neh, nymˬ-mˇ naw maꞈ tiˬ gʼaˬ tiˇ gʼaˬ gʼaˬ biꞈ-awˇ caw dehˬ caw toˆ luꞈ-eu loꞈ-ehˇ, mehˬ hu paw kʼawꞈ kʼoeˇ loꞈ-ehˇ dehꞈ daˆ le-awˬ.

¹²Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-ahˇ Ka li zaˬ-euˬ dehꞈ jeˬ dehꞈ kawˆ laꞈ kʼoeˇ sheuˬ gʼeh-awˇ mehˬ nehˬ tsoˆ nehˬ luꞈ-eu naw maꞈ nehˬ-ehˇ Miˬyehˇ gaˇ mˇ luꞈ-eu tsawˇ haˬ deuˬ-ahˇ yaw zeu baw-awˬ lehˇ, naw maꞈ-ahˇ nga maꞈ shaˇ-eu ma.

¹³Aˬ yawꞈ maꞈ Miˬyehˇgaˇ mˇ-eu baˬ da neh gʼoeˇ-eu gaˬ-eu laꞈ kʼoeˇ taˬ huiˬ taˬ mahˇ nehˬ-awˬ. Naw maꞈ yaw kaˬ kʼawꞈ, tsaˬ leˇ dzoeˇ leˇ-eu jeˬ bi jaˆ-awˬ.

¹⁴Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-ahˇ nga maꞈ heu loꞈ-ehˇ gʼaˬ biꞈ-eu ma. Maˬ mˇ maˬ shaˇ nahˇ-eu tsawˇ haˬ-ahˇ yaw kʼaˆ kʼaˆ-ehˇ mehˬ nehˬ tsoˆ nehˬ-awˬ. Nui ma baˬ-eu tsawˇ haˬ-ahˇ gʼaˬ biꞈ nehˬ-awˬ. Gʼaˬ byehˆ byehˆ-eu tsawˇ haˬ-ahˇ caw ba nehˬ-awˬ. Tsawˇ haˬ yawˬ gʼaˬ na luꞈ kʼoeˇ taˆ nui ma gʼawˬ mahˇ ni taˬ-awˬ.

¹⁵Naw maꞈ tiˬ gʼaˬ-iˬ aˬ cawˬ yaw doeˇ jahˇ laˇ gaˇ yaw doeˇ maˬ ya jahˇ kʼoꞈ nehˬ ni yahˇ-awˬ. Ehˇ kʼawꞈ, tiˬ gʼaˬ tiˇ gʼaˬ yaw muiˬ jeˬ mˇ nehˬ-eu uˬ taꞈ, tsawˇ haˬ dawˬ tawˆ luꞈ-ahˇ yaw muiˬ jeˬ mˇ nehˬ-eu gʼaˇ duˬ, aˬ myah luꞈ noeˬ gahˇ taˬ-awˬ.

¹⁶Aˬ myah luꞈ laˬ kʼaˬ cehˇ-awˬ.

¹⁷Maˬ tsehˆ leˇ ni guiˬ lahˬ shaˇ-awˬ.

¹⁸Aˬ geu jeˬ keuˆ le-eu maˬ kaˬ, Miˬyehˇ-euˬ guiˬ lahˬ-ahˇ ja ceuˬ-awˬ. Yeˬsuˇ Ka li laꞈ kʼoeˇ naw maꞈ kʼoeˇ loꞈ-ehˇ dehꞈ gaˇ Miˬyehˇ geuꞈ mawꞈ-eu meh.

¹⁹Muiˬ-eu shawˇ-eu Yaw sahˇ Miˬyehˇ-ahˇ taˬ laˆ tsoeˬ.

²⁰Miˬyehˇ neh bi mehˬ-euˬ loꞈ-ehˇ dawˬ mehˬ mehˬ gaˇ yehˬ bawˬ sehˇ lu-ehˇ taˬ ehˇ.

²¹Dawˬ mehˬ kʼaˇ mehˬ nehˬ laꞈ-euˬ dawˬ tawˆ luꞈ-ahˇ pyehˆ tseˇ haw-awˬ.

²²Yaw muiˬ deuˬ-ahˇ jeˬ hmˬ geuꞈ-awˬ. Maˬ muiˬ-eu yawˬ jeˬ na luꞈ-ahˇ gaˇ jaw jaw-awˬ.

²³Aˬ dui-ahˇ nui saˇ oꞈ-eu jeˬ biꞈ nehˬ laꞈ-eu Miˬyehˇ naw maꞈ-ahˇ tiˬ byah tiˬ loꞈ bi muiˬ bi shawˇ laˇ-awˇ, aˬ dui-euˬ Sahˬpaˬ Yeˬsuˇ Ka li zaꞈ le ngeh, naw maꞈ-euˬ nui ma, gʼawˇ mawˇ, saꞈ laˇ dawˬ tawˆ luꞈ, iˬ baˇ taˬ kʼaˇ maˬ bi za ni Miˬyehˇ bo saˆ luꞈ-uˇ.

²⁴Naw maꞈ-ahˇ kuˇ-euˬ gʼaˬ pyeuꞈ-eu Miˬyehˇ-aˬ, naw maꞈ-ahˇ kʼoeˇ loꞈ-ehˇ bo saˆ nehˬ laꞈ tehꞈ-a. Aˬ jeˬ miˇ neh ehˇ naˇ, aˬ yawꞈ-aˬ, saˇ jaˇ ziꞈ-eu gʼaˬ pyeuꞈ-eu meh.

²⁵Aˬ yuiꞈ aˬ nyiˇ Ka li zaˬ deuˬ-oˇ, nga maꞈ gʼaˇ duˬ kʼawꞈ guiˬ lahˬ shaˇ nehˬ laꞈ-awˬ.

²⁶Aˬ yuiꞈ aˬ nyiˇ Ka li zaˬ dawˬ tawˆ luꞈ-ahˇ muiˬ-eu shawˇ-eu laꞈ kʼoeˇ mehˬ cuˇ cuˇ-awˇ ha-awˬ.

²⁷Aˬ yuiꞈ aˬ nyiˇ Ka li zaˬ dawˬ tawˆ luꞈ-ahˇ sahˬ boꞈ heu taꞈ gui mehˬ-eu gʼaˇ duˬ, Sahˬpaˬ Yeˬsuˇ-euˬ baoˬ-ahˇ gʼoe-awˇ naw maꞈ-ahˇ ngaˇ yaw kʼaˆ kʼaˆ-ehˇ gʼaˬ biꞈ-eu ma.

²⁸Aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw maꞈ kʼoeˇ taˆ jaˆ luꞈ-uˇ.