Read Akha Yawˇshuˆ 1 Bible Online

Yawˇshuˆ 1 - Akha bible

Yawˇshuˆ 1

¹Sahˬpaˬ Miˬyehˇ-euˬ zaˬ kʼaˆ Moˇseˬ shiˇ dzeuˇ ngeh, Moˇseˬ-ahˇ caw ba-eu gʼaˬ pyeuꞈ-eu Nuˬ-euˬ aˬ li Yawˇ shuˆ-ahˇ Sahˬpaˬ Miˬyehˇ dawˬ ngehˬ cawˬ-euˬ meh.

²Aˬ yawꞈ ehˇ-eu, “Ngaˬ-euˬ zaˬ kʼaˆ Moˇseˬ shiˇ dzeuˇ gʼaˬ-euˬ meh. Nawˇ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ nymˬ-mˇ lehˬ hmˬ-awˇ, Yawˇdaˬ lawˇ baˬ tsehˆ doˆ-awˇ, aˬ yawꞈ maꞈ-ahˇ ngaˬ neh biꞈ taˬ-euˬ miˇ kʼahˬ-ahˇ uˇ leˇ-awˬ.

³Moˇseˬ-ahˇ ngaˇ ehˇ nehˬ taˬ-euˬ loꞈ-ehˇ, naw maꞈ le uˇ-eu lehˇ gʼeh-eu miˇ kʼahˬ kʼoeˇ kʼahˬ kʼahˬ lah ni, nawˇ hawˇ-eu ngaˬ-euˬ tsawˇ haˬ dawˬ tawˆ luꞈ-ahˇ ngaˇ biꞈ-eu ma.

⁴Naw maꞈ-euˬ miˇ kʼahˬ miˇ kaˬ-aˬ, laꞈ oˆ paw pyawˬ-ahˇ jaˆ-eu bawˇ tsahˬ bawˇ dahˇ-ahˇ neh, laꞈ taˆ paw pyawˬ-ahˇ jaˆ-eu Leˬbaˬnoˬ gawˬ jawˬ deuˬ-ahˇ keuˆ ni pyeuꞈ-awˇ, nahˇ ma doˆ kʼehˬ paw jaˆ-eu Uˇpaˬlaˇ lawˇ baˬ-ahˇ neh Heˬtaˆ miˇ kʼahˬ nyiˬ tsehˆ-ehˇ, nahˇ ma ga kʼehˬ paw pyawˬ-ahˇ jaˆ-eu Gʼahˇ ceh-euˬ iˬ ma laˆ shaˆ-ahˇ keuˆ ni meh.

⁵Yawˇshuˆ-oˇ, nawˇ yaw dehꞈ kʼaˇ dehꞈ kʼoeˇ keuˆ ni tsawˇ haˬ tiˬ gʼaˬ-iˬ nawˬ-ahˇ maˬ gʼaˬ laˇ-aˇ. Moˇseˬ nehˬ-ehˇ ngaˇ jawˇ-euˬ loꞈ-ehˇ, nawˬ nehˬ-ehˇ ngaˇ jawˇ ma. Aˬ myah luꞈ nawˬ nehˬ-ehˇ ngaˇ jawˇ-awˇ, nawˬ-ahˇ ngaˇ maˬ byehˇ dzeh.

⁶Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˬ. Aˬ jeˬ miˇ neh ehˇ naˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh saˇ jaˇ dzaˬ taˬ-euˬ miˇ kʼahˬ-ahˇ tsawˇ haˬ heu deuˬ jawˇ leˇ ngeh, aˬ yawꞈ maꞈ kʼoeˇ taˆ nawˇ aˬ yuiꞈ ya geuˬ tehꞈ-a.

⁷Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˇ, ngaˬ-euˬ zaˬ kʼaˆ Moˇseˬ neh nawˬ-ahˇ biꞈ-euˬ Zahˇ dawˬ kʼoꞈ dawˬ dawˬ tawˆ luꞈ-ahˇ, maˬ ngehˇ ni caw teh-awˬ.

⁸Nawˇ uˬ duˬ kʼaˇ tahˬ ngeh, Zahˇ dawˬ kʼoꞈ dawˬ sahˬ boꞈ-ahˇ maˬ ngehˇ ni gui-awˬ. Uˬ ciꞈ nah gʼahˇ maˬ ehˇ, maˬ byehˇ ni gui-eu laꞈ kʼoeˇ, kʼoeˇ gaˇ kʼaˇ boꞈ taˬ-euˬ yawˬ jeˬ na luꞈ-ahˇ naˇ haˬ geuꞈ-awˬ. Kʼoeˇ loꞈ-ehˇ jahˇ naˇ, nawˇ baw le za le-awˇ, mˇ-eu shaˇ-eu yawˬ jeˬ na luꞈ laꞈ kʼoeˇ, guiˬ lahˬ baw tehꞈ-a.

⁹Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˬ lehˇ, ngaˇ nawˬ-ahˇ ehˇ-eu dawˬ heu dawˬ-ahˇ taˬ ngehˇ. Guˆ-eu jeˬ maˬ ehˇ, gʼaˬ baˬ-eu jeˬ maˬ ehˇ, nawˬ-euˬ nui ma laꞈ kʼoeˇ taˬ bi pyeuꞈ doˆ laˇ. Aˬ jeˬ miˇ neh ehˇ naˇ, nawˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ gʼaˬ, nawˇ kʼaˇ iˇ kʼaˇ laˇ gaˇ nawˬ nehˬ-ehˇ jawˇ ma.”

¹⁰Kʼoeˇ naˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-ahˇ Yawˇshuˆ heu loꞈ-ehˇ dawˬ biꞈ-euˬ meh.

¹¹“Dzaˬ dzaˬ dawˇ dawˇ lehˬ hmˬ taˬ-awˬ. Aˬ jeˬ miˇ neh ehˇ naˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ taˬ-euˬ miˇ kʼahˬ-ahˇ jawˇ uˇ leˇ-eu gʼaˇ duˬ, smˬ nah laꞈ kʼoeˇ naw maꞈ Yawˇdaˬ lawˇ baˬ ya tsehˆ tehꞈ-a.”

¹²Luˇbeˬ tsawˇ jeuˬ, Gaˆ tsawˇ jeuˬ hawˇ-eu, Maˬnaˇseˬ tsawˇ jeuˬ tiˬ paˆ-ahˇ, Yawˇshuˆ heu loꞈ-ehˇ ehˇ nehˬ-euˬ meh.

¹³“Yawˇdaˬ lawˇ baˬ nahˇ ma doˆ kʼehˬ paw jaˆ-eu miˇ kʼahˬ heu kʼahˬ laꞈ kʼoeˇ naw maꞈ ya jawˇ ni, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ biꞈ nehˬ laꞈ tehꞈ-a lehˇ, Sahˬpaˬ Miˬyehˇ-eu zaˬ kʼaˆ Moˇseˬ neh ehˇ taˬ yaꞈ-euˬ dawˬ kʼoeˇ dawˬ-ahˇ naw maꞈ noeˬ keuˆ-awˬ.

¹⁴Naw maꞈ-euˬ miˬ sawˇ zaˬ deuˬ hawˇ-eu naw maꞈ-euˬ jeˬ zaˬ deuˬ-ahˇ, heu gaˇ bi jawˇ yaꞈ-awˬ. Ehˇ kʼawꞈ, guiˇ deuˆ-eu keu ka baꞈ luꞈ-eu naw maꞈ-euˬ tsawˇ haˬ deuˬ-aˬ, naw maꞈ-euˬ aˬ yuiꞈ aˬ nyiˇ pyeuꞈ-eu Iˇsaˬleˬlaˆ tsawˇ jeuˬ deuˬ-euˬ mehˬ hu Yawˇdaˬ lawˇ baˬ tsehˆ doˆ-awˇ, aˬ yawꞈ maꞈ-ahˇ ya caw ba nehˬ-iˇ meh.

¹⁵Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh Iˇsaˬleˬlaˆ tsawˇ haˬ kʼoeˇ deuˬ-ahˇ biꞈ taˬ-euˬ Yawˇdaˬ lawˇ baˬ nahˇ ma ga kʼehˬ paw jaˆ-eu miˇ kʼahˬ kʼoeˇ kʼahˬ-ahˇ aˬ yawꞈ maꞈ za gʼaˬ ngeh keuˆ ni, aˬ yawꞈ maꞈ-ahˇ ya caw ba meh. Iˇsaˬleˬlaˆ tsawˇ jeuˬ dawˬ tawˆ luꞈ jawˇ duˬ dah leˇ gʼaˬ jiˇ naˇ, Sahˬpaˬ Miˬyehˇ-euˬ zaˬ kʼaˆ Moˇseˬ neh naw maꞈ-ahˇ biꞈ-euˬ, Yawˇdaˬ lawˇ baˬ nahˇ ma doˆ kʼehˬ paw jaˆ-eu naw maꞈ-euˬ miˇ kʼahˬ heu kʼahˬ-ahˇ gʼoꞈ le-awˇ jawˇ-awˬ.”

¹⁶Aˬ yawꞈ maꞈ Yawˇshuˆ-ahˇ ehˇ kʼoꞈ nehˬ-eu, “Nawˬ neh kʼaˇ ehˇ nehˬ laꞈ-euˬ loꞈ-ehˇ nga maꞈ mˇ-awˇ, nawˇ kʼaˇ bi iˇ laꞈ gaˇ nga maꞈ iˇ ma.

¹⁷Moˇseˬ-euˬ ehˇ dawˬ-ahˇ nga maꞈ aˬ myah luꞈ naˇ haˬ geuꞈ-euˬ loꞈ-ehˇ, nawˬ-euˬ ehˇ dawˬ-ahˇ kʼawꞈ, naˇ haˬ geuꞈ ma. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ Moˇseˬ nehˬ-ehˇ jawˇ-euˬ loꞈ-ehˇ, nawˬ nehˬ-ehˇ kʼawꞈ jawˇ luꞈ-uˇ.

¹⁸Nawˇ uˆ lahˇ-eu uˬ moˆ maˬ jawˇ mawꞈ-ehˇ, nawˬ-euˬ ehˇ dawˬ-ahˇ maˬ naˇ haˬ geuꞈ-eu tsawˇ haˬ aˬ geu gʼaˬ maˬ kaˬ, sehꞈ gaˇ ya daˬ tehꞈ-a.Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˬ.”