Read Akha Yawˇshuˆ 14 Bible Online

Yawˇshuˆ 14 - Akha bible

Yawˇshuˆ 14

¹Heu-aˬ, Iˇsaˬleˬlaˆ tsawˇ jeuˬ-ahˇ Yawˇ daˬ lawˇ baˬ nahˇ ma ga kʼehˬ paw jaˆ-eu miˇ kʼahˬ biˇ nehˬ-euˬ gaˇ kawˆ meh. Piˇ ma Eˇlaˬzaˬ, Nuˬ-euˬ aˬ li Yawˇshuˆ hawˇ-eu, Iˇsaˬleˬlaˆ tsawˇ jeuˬ deuˬ-euˬ aˬ yuiꞈ aˬ tsu deuˬ, Iˇsaˬleˬlaˆ tsawˇ jeuˬ deuˬ-ahˇ, tsawˇ haˬ yaw cuiˆ yaw myaˬ-ahˇ haw-awˇ, miˇ kʼahˬ kʼoeˇ kʼahˬ biˇ nehˬ-euˬ meh.

²Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, Iˇsaˬleˬlaˆ tsawˇ jeuˬ gʼoeˬ jeuˬ uˬ taꞈ tiˬ paˆ-ahˇ, Yawˇdaˬ lawˇ baˬ nahˇ ma ga kʼehˬ paw jaˆ-eu miˇ kʼahˬ deuˬ-ahˇ, shehˆ tsaˬ bi tsaˬ geuꞈ-euˬ meh.

³Iˇsaˬleˬlaˆ tsawˇ jeuˬ nyiˬ jeuˬ uˬ taꞈ tiˬ paˆ-ahˇ, Yawˇdaˬ lawˇ baˬ nahˇ ma doˆ kʼehˬ paw jaˆ-eu miˇ kʼahˬ Moˇseˬ biꞈ nehˬ gʼaˬ-euˬ meh. Ehˇ kʼawꞈ, tsawˇ jeuˬ kʼoeˇ deuˬ-ahˇ miˇ kʼahˬ biˇ nehˬ-euˬ loꞈ-ehˇ, Leˬbiˇ tsawˇ jeuˬ-ahˇ aˬ yawꞈ miˇ kʼahˬ maˬ biˇ nehˬ-a.

⁴Yoˇsehˆ-euˬ zaˬ deuˬ uˆ deuˬ laꞈ kʼoeˇ, Maˬnaˇseˬ tsawˇ jeuˬ hawˇ-eu Eˇpaˬleˬ tsawˇ jeuˬ heu nyiˬ jeuˬ jawˇ-eu miˇ neh, Leˬbiˇ tsawˇ jeuˬ-ahˇ miˇ kʼahˬ maˬ biˇ nehˬ-ehˇ, aˬ yawꞈ maꞈ jawˇ-eu gʼaˇ duˬ meuˬ deuˬ, jeˬ zaˬ gaˆ kʼahˬ deuˬ hawˇ-eu, myawˬ taˬ duˬ tehꞈ-ehˇ biꞈ taˬ-euˬ meh.

⁵Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ miˇ kʼahˬ biˇ geuꞈ-euˬ meh.

⁶Tiˬ nah-aˬ, Yuˇdaˆ tsawˇ haˬ tiˬ deuˬ Giˇlaˇgaˬlaˇ-ahˇ Yawˇshuˆ jawˇ gaˇ laˇ-euˬ meh. Tsawˇ haˬ kʼoeˇ deuˬ nehˬ-ehˇ laˇ-euˬ Gaˬnaˆ aˇ jeuˬ Yeˬpuˬnehˇ-euˬ aˬ li Gaˬlehˆ gʼaˬ, Yawˇshuˆ-ahˇ ehˇ-eu, “Kaˬdeˬshaˇbaˬneˬ lehˇ kuˇ-eu jawˇ duˬ-ahˇ, aˇ nyaꞈ-euˬ gaˇ kawˆ Moˇseˬ-ahˇ Sahˬpaˬ Miˬyehˇ ehˇ nehˬ-euˬ nawˇ siˬ nya meh.

⁷Miˇ kʼahˬ heu kʼahˬ-ahˇ kʼoeˬ sho haw laˇ-eu gʼaˇ duˬ, Kaˬdeˬshaˇ meuˬ-ahˇ neh, Sahˬpaˬ Miˬyehˇ-euˬ zaˬ kʼaˆ pyeuꞈ-eu Moˇseˬ ngaˬ-ahˇ pyehˬ gʼeh laꞈ ngeh, ngaˇ oeˬ tseˇ kʼoꞈ byah-eu ma. Ya siˬ ya mawˇ-euˬ gaˇ kawˆ dawˬ tawˆ luꞈ, aˬ yawꞈ-ahˇ ngaˇ paˇ dzawˇ poˆ nehˬ-iˇ-euˬ ma.

⁸Ngaˬ nehˬ-ehˇ tiˬ kawˆ loꞈ-ehˇ kʼoeˬ sho haw laˇ-euˬ tsawˇ haˬ deuˬ-aˬ, aˬ dui-euˬ tsawˇ haˬ deuˬ guˆ ni, ja guˆ-euˬ meh. Ehˇ kʼawꞈ, ngaˇ gʼaˬ-aˬ, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ-ahˇ saˇ jaˇ ziꞈ-awˇ, aˬ yawꞈ-euˬ dawˬ-ahˇ naˇ haˬ geuꞈ-euˬ ma.

⁹Ngaˇ kʼoeˇ loꞈ-ehˇ mˇ-euˬ miˇ neh, ngaˬ neh cah tsehˆ-euˬ miˇ kʼahˬ-ahˇ, ngaˇ hawˇ-eu ngaˬ-euˬ zaˬ deuˬ-ahˇ biꞈ ma lehˇ Moˇseˬ ngaˬ-ahˇ saˇ jaˇ dzaˬ-euˬ meh.

¹⁰Ehˇ kʼawꞈ, nymˬ-mˇ haw sheˇ. Moˇseˬ-ahˇ Sahˬpaˬ Miˬyehˇ kʼoeˇ loꞈ-ehˇ ehˇ nehˬ-euˬ oeˬ tseˇ kʼoꞈ byah laˇ-euˬ meh. Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ-ahˇ cah luꞈ ngeh kʼoeˇ loꞈ-ehˇ ehˇ-euˬ meh. Ehˇ kʼawꞈ, Sahˬpaˬ Miˬyehˇ-aˬ, aˬ yawꞈ neh saˇ jaˇ dzaˬ taˬ-euˬ jaˆ-eu loꞈ-ehˇ, iˬ nah keuˆ ni ngaˬ-ahˇ bi dehꞈ laꞈ-euˬ meh. Ngaˬ-ahˇ haw sheˇ. Ngaˬ-euˬ aˇ kʼoꞈ yehꞈ tseˇ ngaˬ kʼoꞈ byah laˇ-euˬ ma.

¹¹Ehˇ kʼawꞈ, Moˇseˬ ngaˬ-ahˇ pyehˬ gʼeh ngeh loꞈ-ehˇ, nymˬ-mˇ keuˆ ni gʼaˬ kʼaˆ gʼaˬ loeˇ soeˇ-i jaˆ-eu ma. Guiˇ deuˆ-eu gʼaˇ duˬ maˬ ehˇ, aˬ geu jeˬ mˇ-eu gʼaˇ duˬ maˬ ehˇ, ngaˇ gʼaˬ tiˬ loꞈ ahˇ te siˬ.

¹²Ngaˇ hawˇ-eu ngaˬ-euˬ tsawˇ haˬ deuˬ kʼoeˬ sho haw leˇ-euˬ gaˇ kawˆ paˇ dzawˇ poˆ nehˬ ngeh nah, Sahˬpaˬ Miˬyehˇ ngaˬ-ahˇ saˇ jaˇ dzaˬ-euˬ loꞈ-ehˇ, gawˬ jawˬ gawˬ duˇ gahˬ kaˬ kʼoeˇ ngaˬ-ahˇ biꞈ nehˬ laꞈ-awˬ. Huiˬ dui goˇ dui dui-eu tsawˇ jeuˬ pyeuꞈ-eu Aˬnaˬkaˆ tsawˇ haˬ deuˬ, goˇ dui dui-eu meuˬ lahˇ laꞈ kʼoeˇ jawˇ luꞈ meh lehˇ naw maꞈ-ahˇ nga maꞈ ehˇ nehˬ-euˬ ma. Sahˬpaˬ Miˬyehˇ neh ehˇ taˬ-euˬ loꞈ-ehˇ, ngaˬ nehˬ-ehˇ Sahˬpaˬ Miˬyehˇ jawˇ-awˇ, aˬ yawꞈ maꞈ-ahˇ ngaˇ teh doˆ nya-eu duˇ.”

¹³Yeˬpuˬnehˇ-euˬ aˬ li Gaˬlehˆ-ahˇ Yawˇshuˆ dawˬ ngehˬ gʼeh nehˬ-awˇ, Heˬbyoˬ meuˬ biꞈ tsehˆ tsehˆ nehˬ-euˬ meh.

¹⁴Heˬbyoˬ meuˬ-aˬ, iˬ nah keuˆ ni, Gaˬnaˆ aˇ jeuˬ Yeˬpuˬnehˇ-euˬ aˬ li Gaˬlehˆ-euˬ zaˬ deuˬ uˆ deuˬ-euˬ meuˬ pyeuꞈ-eu meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ saˇ jaˇ ziꞈ-eu laꞈ kʼoeˇ naˇ haˬ geuꞈ-euˬ meh.

¹⁵Aˇ yamˬ kʼoeˇ yamˬ maˬ keuˆ laˇ-euˬ kʼoeˇ, Heˬbyoˬ meuˬ-ahˇ Aˬbaˬ meuˬ lehˇ kuˇ-euˬ meh. (Aˬbaˬ-aˬ, Aˬnaˬkaˆ tsawˇ haˬ deuˬ laꞈ kʼoeˇ aˬ cawˬ naˆ maˬ tseˇ huiˬ dzehˬ-eu gʼaˬ pyeuꞈ-eu meh.) Kʼoeˇ naˇ, miˇ kʼahˬ kʼoeˇ kʼahˬ laꞈ kʼoeˇ, guiˇ maˬ deuˆ ni coꞈ ngehˇ ni jaˆ-euˬ meh.