Read Akha Yawˇshuˆ 17 Bible Online

Yawˇshuˆ 17 - Akha bible

Yawˇshuˆ 17

¹Yoˇsehˆ-euˬ aˬ li aˬ yuiꞈ gʼaˬ pyeuꞈ-eu Maˬnaˇseˬ-euˬ zaˬ deuˬ uˆ deuˬ-ahˇ, Yawˇdaˬ lawˇ baˬ nahˇ ma ga kʼehˬ paw miˇ kʼahˬ biˇ nehˬ-euˬ meh. Giˇlaˆ-euˬ aˬ da Maˬkiˬlaˇ-aˬ, Maˬnaˇseˬ-euˬ aˬ li aˬ yuiꞈ yuiꞈ saˬ gʼaˬ pyeuꞈ-awˇ, guiˇ deuˆ-eu kʼaˆ dui dui-eu tsawˇ haˬ pyeuꞈ-eu miˇ neh, Yawˇdaˬ lawˇ baˬ nahˇ ma doˆ kʼehˬ paw jaˆ-eu Giˇlaˆ hawˇ-euˬ Baˬshaˬ meuˬ aˬ yawꞈ-ahˇ biˇ oꞈ nehˬ-euˬ meh.

²Yawˇdaˬ lawˇ baˬ nahˇ ma ga kʼehˬ paw jaˆ-eu miˇ kʼahˬ-aˬ, Maˬnaˇseˬ tsawˇ haˬ nui deuˬ pyeuꞈ-eu Aˬbyeˇzaˬ, Heˬleˇ, Aˬsaˬliˇlaˆ, Sheˬkmˬ, Heˬpaˬ, Sheˬmiˇdaˬ aˬ ha maꞈ-ahˇ biˇ nehˬ-euˬ meh. Heu-aˬ, Yoˇsehˆ-euˬ aˬ li Maˬnaˇseˬ o neh jeuˬ le o le-euˬ aˬ li deuˬ pyeuꞈ-eu meh. Aˬ yawꞈ maꞈ-aˬ, yawˬ ha aˇ jeuˬ kʼoeˇ taˆ aˬ yuiꞈ geuꞈ-eu deuˬ meh.

³Maˬnaˇseˬ-euˬ aˬ li Maˬkiˬlaˇ, Maˬkiˬlaˇ-euˬ aˬ li Giˇlaˆ, Giˇlaˆ-euˬ aˬ li Heˬpaˬ, Heˬpaˬ-euˬ aˬ li Zeˬloˇpeˬhaˇ meh. Zeˬloˇpeˬhaˇ-aˬ, aˬ li maˬ jawˇ-ehˇ aˬ buˇ tehꞈ-ehˇ jawˇ-eu meh. Aˬ buˇ kʼoeˇ deuˬ-euˬ tsawˇ myahˇ-aˬ, Maˬhaˬlahˬ, Noˇaˬ, Hawˇgaˬlaˇ, Miˇlaˬkah hawˇ-eu, Teuˇzaˬ meh.

⁴Piˇ ma Eˇlaˬzaˬ hawˇ-eu Nuˬ-euˬ aˬ li Yawˇshuˆ hawˇ-eu, aˬ yawꞈ aˬ tsu deuˬ jawˇ gaˇ aˬ yawꞈ maꞈ le-awˇ, “Nga maꞈ-ahˇ maˬ ehˇ, nga maꞈ-euˬ aˬ yuiꞈ aˬ nyiˇ pyeuꞈ-eu kʼaˬ dzeˇ zaˬ deuˬ-ahˇ maˬ ehˇ, miˇ kʼahˬ bi biꞈ-eu gʼaˇ duˬ, Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ meh” lehˇ ehˇ nehˬ leˇ-euˬ meh. Kʼoeˇ miˇ neh, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, aˬ yawꞈ maꞈ hawˇ-eu aˬ yawꞈ maꞈ-euˬ aˬ yuiꞈ aˬ nyiˇ deuˬ-ahˇ miˇ kʼahˬ biˇ nehˬ-euˬ meh.

⁵Kʼoeˇ miˇ neh, Maˬnaˇseˬ tsawˇ jeuˬ-aˬ, Yawˇdaˬ lawˇ baˬ nahˇ ma doˆ kʼehˬ paw za taˬ-euˬ Giˇlaˆ hawˇ-eu Baˬshaˬ meuˬ uˬ taꞈ, tseˇ bymˇ paˇ za dzehˬ-euˬ meh.

⁶Aˬ jeˬ miˇ neh ehˇ naˇ, Maˬnaˇseˬ-euˬ zaˬ deuˬ uˆ deuˬ laꞈ kʼoeˇ, kʼaˬ dzeˇ zaˬ deuˬ maˬ ehˇ, zaˬ miˬ zaˬ deuˬ maˬ ehˇ, miˇ kʼahˬ jeˬ biˇ za-euˬ meh. Giˇlaˆ miˇ kʼahˬ-aˬ, dzeˇ-eu Maˬnaˇseˬ-euˬ zaˬ deuˬ uˆ deuˬ-ahˇ biꞈ-euˬ meh.

⁷Maˬnaˇseˬ miˇ kʼahˬ-aˬ, Aˬshaˬ meuˬ-ahˇ neh, Sheˬkmˬ meuˬ-euˬ nahˇ ma doˆ kʼehˬ paw jaˆ-eu Miˇkaˬmeˬdaˆ meuˬ-ahˇ keuˆ ni meh. Kʼoeˇ naˇ, Eˬtaˬpahˇ meuˬ-ahˇ jawˇ-eu tsawˇ haˬ deuˬ kʼawꞈ, miˇ kʼahˬ kʼoeˇ kʼahˬ laꞈ kʼoeˇ ahˇ leˇ-euˬ meh.

⁸Taˬpahˇ meuˬ-euˬ gahˬ kaˬ-aˬ, Maˬnaˇseˬ miˇ kʼahˬ laꞈ kʼoeˇ ahˇ-eu meh. Ehˇ kʼawꞈ, miˇ kaˬ nyiˬ paˆ-ehˇ jaˆ-eu Taˬpahˇ meuˬ-aˬ, Eˇ paˬ leˬ miˇ kʼahˬ-ahˇ taꞈ-eu meh.

⁹Kʼoeˇ naˇ, miˇ kaˬ kʼoeˇ Kaˬnahˬ lawˇ gawˆ paw iˇ ka gʼeh-euˬ meh. Lawˇ gawˆ kʼoeˇ gawˆ-euˬ laꞈ oˆ paw pyawˬ-ahˇ jaˆ-eu meuˬ deuˬ-aˬ, Maˬnaˇseˬ miˇ kʼahˬ laꞈ kʼoeˇ jaˆ-eu meuˬ deuˬ pyeuꞈ kʼawꞈ, Eˇpaˬleˬ miˇ kʼahˬ-ahˇ taꞈ-eu meh. Maˬnaˇseˬ miˇ kʼahˬ-euˬ miˇ kaˬ-aˬ, lawˇ gawˆ kʼoeˇ gawˆ-euˬ laꞈ taˆ paw baˬ caw caw-ehˇ iˇ gʼeh-awˇ, Gʼahˇ ceh-euˬ iˬ ma laˆ shaˆ-ahˇ iˇ dahˬ-euˬ meh.

¹⁰Eˇpaˬleˬ miˇ kʼahˬ-aˬ, laꞈ oˆ paw jaˆ-awˇ, Maˬnaˇseˬ miˇ kʼahˬ-aˬ, laꞈ taˆ paw jaˆ-eu meh. Miˇ kʼahˬ kʼoeˇ nyiˬ kʼahˬ-euˬ nahˇ ma ga kʼehˬ paw Gʼahˇ ceh-euˬ iˬ ma laˆ shaˆ jaˆ luꞈ-eu meh. Aˬshaˬ miˇ kʼahˬ-aˬ, laꞈ taˆ paw nahˇ ma ga kʼehˬ paw pyawˬ-ahˇ jaˆ-awˇ, Iˇsaˬkaˬ miˇ kʼahˬ-aˬ, laꞈ taˆ paw nahˇ ma doˆ kʼehˬ paw pyawˬ-ahˇ jaˆ-eu meh.

¹¹Aˬshaˬ hawˇ-eu Iˇsaˬkaˬ miˇ kʼahˬ laꞈ kʼoeˇ jaˆ-eu Behˬshahˬ meuˬ, Iˇbaˬleˬ meuˬ hawˇ-eu, meuˬ kʼoeˇ nyiˬ meuˬ-euˬ tahˬ gʼoꞈ tahˬ jawˇ jaˆ-eu meuˬ meuˬ meuˬ zaˬ deuˬ maˬ ehˇ, (iˬ ma laˆ shaˆ lawˇ deh-ahˇ jaˆ-eu) Dawˇlaˆ meuˬ, Eˬdawˇlaˆ meuˬ, Taˬnehˇ meuˬ, Meˬgiˇdoˬ meuˬ hawˇ-eu, kʼoeˇ deuˬ-euˬ tahˬ gʼoꞈ tahˬ jawˇ jaˆ-eu meuˬ meuˬ zaˬ deuˬ maˬ ehˇ, Maˬnaˇseˬ miˇ kʼahˬ-ahˇ taꞈ-eu meh.

¹²Ehˇ kʼawꞈ, Maˬnaˇseˬ tsawˇ haˬ deuˬ-aˬ, meuˬ kʼoeˇ deuˬ-ahˇ jawˇ-eu Kaˬnaˬ tsawˇ haˬ deuˬ-ahˇ maˬ teh doˆ nya-ehˇ, tiˬ kawˆ loꞈ-ehˇ jawˇ daˆ leꞈ-euˬ meh.

¹³Iˇsaˬleˬlaˆ tsawˇ haˬ deuˬ myaˬ dzehˬ laˇ-awˇ, gʼaˬ kʼaˆ dzehˬ laˇ-euˬ kʼawꞈ, Kaˬnaˬ tsawˇ haˬ deuˬ dawˬ tawˆ luꞈ-ahˇ maˬ teh doˆ-ehˇ, zaˬ kʼaˆ kʼawꞈ maˬ bi geuꞈ ni bi jawˇ-euˬ meh.

¹⁴Yoˇsehˆ-euˬ zaˬ deuˬ uˆ deuˬ Yawˇshuˆ-ahˇ ehˇ nehˬ-eu, “Aˬ jeˬ miˇ neh nga maꞈ-ahˇ nawˇ miˇ kʼahˬ tiˬ tsahˇ tehꞈ-ehˇ biꞈ nehˬ laꞈ te. Sahˬpaˬ Miˬyehˇ nga maꞈ-ahˇ guiˬ lahˬ biꞈ laꞈ-euˬ miˇ neh, nga maꞈ tsawˇ haˬ myaˬ dui dui-eu ma.”

¹⁵Yawˇshuˆ ehˇ-eu, “Naw maꞈ tsawˇ haˬ aˇ dzehˬ-ehˇ myaˬ-eu miˇ neh, Eˇpaˬleˬ gawˬ jawˬ gawˬ duˇ miˇ kʼahˬ kʼoeˇ naw maꞈ gʼaˇ duˬ yaw suꞈ naˇ, Paˬyehˆ tsawˇ jeuˬ hawˇ-eu Leˬpeˬ tsawˇ jeuˬ deuˬ jawˇ-eu miˇ kʼahˬ-ahˇ iˇ-awˇ, aˇ bawˇ sahˬ kʼaˆ tuˇ deˬ-awˇ jawˇ-iˇ-awˬ.”

¹⁶Aˬ yawꞈ maꞈ ehˇ-eu, “Gawˬ jawˬ gawˬ duˇ miˇ kʼahˬ kʼoeˇ nga maꞈ gʼaˇ duˬ yaw suꞈ meh. Deh saˇ-ahˇ jawˇ-eu Kaˬnaˬ tsawˇ haˬ deuˬ shmˇ mahˬ laˆ lawˬ jaˆ-eu meh. Behˬshahˬ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jawˇ-eu tsawˇ haˬ deuˬ maˬ ehˇ, Yeˬzaˬleˬlaˇ deh kʼawꞈ-ahˇ jawˇ-eu deuˬ maˬ ehˇ, shmˇ mahˬ laˆ lawˬ jaˆ-eu meh.”

¹⁷Eˇpaˬleˬ tsawˇ jeuˬ hawˇ-eu nahˇ ma ga kʼehˬ paw jawˇ-eu Maˬnaˇseˬ tsawˇ jeuˬ-ahˇ Yawˇshuˆ ehˇ nehˬ-eu, “Naw maꞈ tsawˇ haˬ aˬ diˇ aˬ maˇ myaˬ dui dui-awˇ, gʼaˬ kʼaˆ-eu meh. Miˇ kʼahˬ tiˬ tsahˇ tehꞈ-ehˇ naw maꞈ za-eu maˬ geuˇ-a.

¹⁸Gawˬ jawˬ gawˬ duˇ miˇ kʼahˬ kʼoeˇ naw maꞈ za tehꞈ-a. Kʼoeˇ-aˬ, aˇ bawˇ sahˬ kʼaˆ tehꞈ-ehˇ pyeuꞈ kʼawꞈ, heu dzeˇ kʼoeˇ dzeˇ doˆ ni naw maꞈ tuˇ deˬ geuꞈ-awˬ. Kaˬnaˬ tsawˇ haˬ deuˬ-aˬ, shmˇ mahˬ laˆ lawˬ deuˬ jaˆ-awˇ, gʼaˬ kʼaˆ-eu tsawˇ jeuˬ pyeuꞈ kʼawꞈ, aˬ yawꞈ maꞈ-ahˇ naw maꞈ teh doˆ nya tehꞈ-a.”