Read Akha Yawˇshuˆ 18 Bible Online

Yawˇshuˆ 18 - Akha bible

Yawˇshuˆ 18

¹Miˇ kʼahˬ kʼoeˇ kʼahˬ-ahˇ aˬ yawꞈ maꞈ deuˆ za gʼaˬ ngeh, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ Shiˇloˬ meuˬ-ahˇ uiˬ leˇ-awˇ, Sahˬpaˬ Miˬyehˇ-euˬ Sehˬ gʼawˆ tsoˆ-euˬ meh.

²Iˇsaˬleˬlaˆ tsawˇ haˬ deuˬ laꞈ kʼoeˇ, miˇ kʼahˬ jeˬ biˇ maˬ za-euˬ tsawˇ jeuˬ shiꞈ jeuˬ jawˇ luꞈ-eu meh.

³Kʼoeˇ ngeh, Iˇsaˬleˬlaˆ tsawˇ haˬ deuˬ-ahˇ Yawˇshuˆ ehˇ nehˬ-eu, “Naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ miˇ kʼahˬ-ahˇ naw maꞈ maˬ jawˇ uˇ leˇ ni aˬ jeˬ gʼeh nyi naˬ te.

⁴Tsawˇ jeuˬ aˬ yawꞈ jeuˬ yawꞈ laꞈ kʼoeˇ tsawˇ haˬ smˇ gʼaˬ tseˇ doˆ nehˬ laꞈ-awˬ. Aˬ yawꞈ maꞈ geuꞈ mawꞈ-eu miˇ kʼahˬ aˇ baˇ aˇ kawˆ bi kawˆ doˆ-eu gʼaˇ duˬ, aˬ yawꞈ maꞈ-ahˇ ngaˇ pyehˬ gʼeh ma. Kʼoeˇ naˇ, aˬ yawꞈ maꞈ ngaˇ jawˇ gaˇ gʼoꞈ le tehꞈ-a.

⁵Miˇ kʼahˬ kʼoeˇ kʼahˬ-ahˇ, aˬ yawꞈ maꞈ gʼaˇ duˬ shiꞈ paˆ ya paˆ tehꞈ-a. Yuˇdaˆ tsawˇ jeuˬ-aˬ, laꞈ oˆ paw jaˆ-eu aˬ yawꞈ maꞈ-euˬ miˇ kʼahˬ-ahˇ ya jawˇ-awˇ, Yoˇsehˆ tsawˇ jeuˬ deuˬ-aˬ, laꞈ taˆ paw jaˆ-eu aˬ yawꞈ maꞈ-euˬ miˇ kʼahˬ-ahˇ ya jawˇ tehꞈ-a.

⁶Miˇ kʼahˬ shiꞈ paˆ paˆ-euˬ gaˇ kawˆ aˇ baˇ boꞈ doˆ-awˇ, ngaˇ jawˇ gaˇ yuˇ laꞈ-awˬ. Naw maꞈ gʼaˇ duˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngaˇ mehˬ bawˬ mˇ-awˇ, shehˆ tsaˬ tsaˬ-eu laꞈ kʼoeˇ, naw maꞈ-ahˇ miˇ kʼahˬ biˇ nehˬ ma.

⁷Ehˇ kʼawꞈ, Leˬbiˇ tsawˇ jeuˬ-aˬ, naw maꞈ loꞈ-ehˇ miˇ kʼahˬ jeˬ biˇ maˬ oꞈ-a. Aˬ jeˬ miˇ neh ehˇ naˇ, aˬ yawꞈ maꞈ-euˬ jeˬ biˇ-aˬ, Sahˬpaˬ Miˬyehˇ-euˬ piˇ ma geuꞈ-eu kʼoeˇ meh. Gaˆ tsawˇ jeuˬ, Luˇbeˬ tsawˇ jeuˬ hawˇ-eu nahˇ ma doˆ kʼehˬ paw jawˇ-eu Maˬnaˇseˬ tsawˇ jeuˬ deuˬ-aˬ, Sahˬpaˬ Miˬyehˇ-euˬ zaˬ kʼaˆ Moˇseˬ neh aˬ yawꞈ maꞈ-ahˇ biꞈ taˬ-euˬ Yawˇdaˬ lawˇ baˬ nahˇ ma doˆ kʼehˬ paw jaˆ-eu miˇ kʼahˬ za gʼaˬ-euˬ meh.”

⁸Kʼoeˇ naˇ, miˇ kʼahˬ aˇ baˇ kawˆ boꞈ leˇ-eu tsawˇ haˬ deuˬ doˆ le-euˬ meh. Aˬ yawꞈ maꞈ-ahˇ Yawˇshuˆ mehˬ nehˬ tsoˆ nehˬ-eu, “Miˇ kʼahˬ kʼahˬ lah ni cah doe leˇ-awˇ, miˇ kʼahˬ aˇ baˇ boꞈ-awˇ ngaˇ jawˇ gaˇ gʼoꞈ le-awˬ. Kʼoeˇ naˇ, heu gaˇ Shiˇloˬ meuˬ-ahˇ, Sahˬpaˬ Miˬyehˇ-ahˇ ngaˇ mehˬ bawˬ mˇ-awˇ, shehˆ tsaˬ tsaˬ-eu laꞈ kʼoeˇ, naw maꞈ-ahˇ miˇ kʼahˬ biˇ nehˬ ma.”

⁹Tsawˇ haˬ kʼoeˇ deuˬ miˇ kʼahˬ kʼahˬ lah ni cah doe-awˇ, meuˬ deuˬ-euˬ tsawˇ myahˇ boꞈ ahˇ jiˇ-awˇ, miˇ kʼahˬ aˬ joˆ-ehˇ biˇ paˆ-eu gaˇ kawˆ boꞈ doˆ-euˬ meh. Kʼoeˇ naˇ, Shiˇloˬ taˆ-ahˇ Yawˇshuˆ jawˇ gaˇ gʼoꞈ le-euˬ meh.

¹⁰Kʼoeˇ naˇ, Yawˇshuˆ shehˆ tsaˬ tsaˬ-eu laꞈ kʼoeˇ, Sahˬpaˬ Miˬyehˇ nehˬ-ehˇ mehˬ bawˬ mˇ-awˇ, dzeˇ luꞈ-eu tsawˇ jeuˬ aˬ yawꞈ jeuˬ yawꞈ-ahˇ miˇ kʼahˬ biˇ nehˬ-euˬ meh.

¹¹Beˬyaˬmiˬ tsawˇ jeuˬ-ahˇ oꞈ-eu miˇ kʼahˬ-ahˇ aˬ cawˬ jeˬ hu biˇ nehˬ-euˬ meh. Miˇ kʼahˬ kʼoeˇ-aˬ, Yuˇdaˆ miˇ kʼahˬ hawˇ-eu, Yoˇsehˆ tsawˇ jeuˬ-euˬ miˇ kʼahˬ yaw kaˬ-ahˇ tsaˬ-eu meh.

¹²Aˬ yawꞈ maꞈ-euˬ miˇ kaˬ laꞈ taˆ paw pyawˬ-aˬ, Yawˇdaˬ lawˇ baˬ-ahˇ neh aˇ dahˬ beh-awˇ, Yeˬliˇkoˇ meuˬ-euˬ laꞈ taˆ, baˬ gʼa caw caw-ehˇ le daˆ gʼeh leꞈ-awˇ, nahˇ ma ga kʼehˬ paw gawˬ jawˬ gawˬ duˇ nyiˬ tsehˆ-ehˇ, Behˬdaˬbeˬ meuˬ-ahˇ keuˆ ni paˇ iˇ gʼeh-euˬ meh.

¹³Kʼoeˇ gaˇ neh naˇ (Behˬdaˬbeˬ meuˬ lehˇ kʼawꞈ kuˇ-eu) Luˇzaˆ meuˬ-euˬ laꞈ oˆ paw pyawˬ-ahˇ baˬ gʼa caw caw-ehˇ paˇ zaꞈ ka le-awˇ, Behˬhawˇleuˬ meuˬ-euˬ laꞈ oˆ gawˬ jawˬ-ahˇ jaˆ-eu Aˬtaˬyoˆaˬdaˬlaˆ meuˬ-ahˇ le-euˬ meh.

¹⁴Kʼoeˇ gaˇ neh naˇ, yawˬ paw yawˬ paˇ iˇ pyawˇ gʼeh-awˇ, gawˬ jawˬ kʼoeˇ jawˬ-euˬ nahˇ ma ga kʼehˬ paw dzeˇ neh laꞈ oˆ paw oe ka-awˇ, Yuˇdaˆ tsawˇ jeuˬ-ahˇ taꞈ-eu (Giˇliˇyaˆyeˬlmˬ lehˇ kʼawꞈ kuˇ-eu) Giˇliˇyaˆbaˬlaˇ meuˬ-ahˇ keuˆ ni meh. Heu-aˬ, nahˇ ma ga kʼehˬ paw-euˬ miˇ kaˬ meh.

¹⁵Laˬ oˆ paw pyawˬ miˇ kaˬ-aˬ, Giˇliˇyaˆyeˬlmˬ-euˬ mehˬ dzaˬ-ahˇ neh aˇ dahˬ beh-awˇ, Neˬpaˬtahˇ lawˇ kʼawꞈ paw iˇ gʼeh-euˬ meh.

¹⁶Kʼoeˇ gaˇ neh naˇ, Leˬpeˬ deh kʼawꞈ-euˬ uˬ gʼmˬ-ahˇ Hiˬnoˬ deh kʼawꞈ kʼoeˇ taˆ jaˆ-eu gawˬ jawˬ-euˬ dawˬ dahˬ paw iˇ gʼeh-euˬ meh. Kʼoeˇ naˇ, Yeˬbuˇ gawˬ jawˬ dahˇ teˇ laꞈ oˆ jaˆ-eu Hiˬnoˬ deh kʼawꞈ caw caw-ehˇ, laꞈ oˆ paw jaˆ-eu Eˬloˇgeˬ meuˬ-ahˇ iˇ-euˬ meh.

¹⁷Kʼoeˇ naˇ, laꞈ taˆ paw jaˆ-eu Eˬsheˬmehˇ meuˬ-ahˇ paˇ le leꞈ-awˇ, Aˬduˬmiˬ gʼaˬ lahˇ kʼoeˇ paw paˆ jaˆ-eu Geˬliˇlawˆ meuˬ-ahˇ le-euˬ meh. Kʼoeˇ naˇ, Luˇbeˬ-euˬ aˬ li Boˬhaˬ-euˬ Kʼaˬ lo lehˇ kuˇ-eu jawˇ duˬ-ahˇ iˇ-euˬ meh.

¹⁸Kʼoeˇ naˇ, Yawˇdaˬ deh kʼawꞈ kʼoeˇ taˆ jaˆ-eu gawˬ jawˬ dahˇ teˇ nyiˬ tsehˆ-ehˇ laꞈ taˆ paw le daˆ-awˇ, deh kʼawꞈ-ahˇ paˇ iˇ uˇ gʼeh-euˬ meh.

¹⁹Kʼoeˇ gaˇ neh naˇ, Behˬhawˇgaˬlaˇ meuˬ-euˬ laꞈ taˆ paw gawˬ jawˬ dahˇ teˇ nyiˬ tsehˆ-ehˇ, Yawˇdaˬ lawˇ baˬ yoeˇ uˇ duˬ pyeuꞈ-eu Shiˇ-eu iˬ ma laˆ shaˆ lah gʼmˬ-ahˇ iˇ dahˬ-euˬ meh.

²⁰Yawˇdaˬ lawˇ baˬ-aˬ, nahˇ ma doˆ kʼehˬ paw-euˬ miˇ kaˬ meh. Heu-aˬ, Beˬyaˬmiˬ tsawˇ jeuˬ za-euˬ miˇ kʼahˬ kʼoeˇ kʼahˬ-euˬ miˇ kaˬ meh.

²¹Beˬyaˬmiˬ tsawˇ jeuˬ deuˬ za-euˬ meuˬ deuˬ-aˬ, Yeˬliˇkoˇ meuˬ, Behˬhawˇgaˬlaˇ meuˬ, Eˬmehˇkeˬziˇ meuˬ,

²²Behˬaˬlaˬbahˬ meuˬ, Zeˬmaˬleˬ meuˬ, Beˬdeˬlaˇ meuˬ,

²³Aˬbymˬ meuˬ, Paˬlahˬ meuˬ, Awˇpaˬlaˇ meuˬ,

²⁴Sheˬpaˬlaˬmoˇniˇ meuˬ, Awˇpaˬniˇ meuˬ, Geˬbaˬ meuˬ, heu tseˇ nyiꞈ meuˬ hawˇ-eu, meuˬ heu deuˬ-euˬ tahˬ gʼoꞈ tahˬ jawˇ jaˆ-eu meuˬ meuˬ zaˬ deuˬ meh.

²⁵Kʼoeˇ naˇ, Giˇbyoˬ meuˬ, Laˬmahˇ meuˬ, Biˇyoˆ meuˬ,

²⁶Miˇzaˬpaˬ meuˬ, Sheˬpiˇlaˬ meuˬ, Mawˇzahˇ meuˬ,

²⁷Leˬkmˬ meuˬ, Iˇlaˬpeˬlaˇ meuˬ, Taˬlaˬlahˬ meuˬ,

²⁸Zeˬlaˬ meuˬ, Haˬeˇlehˆ meuˬ, (Yeˬluˇsaˬlehˬ lehˇ kʼawꞈ kuˇ-eu) Yeˬbuˇ meuˬ, Giˇbyaˬ meuˬ, Giˇliˇyaˆyeˬlmˬ meuˬ, heu tseˇ oeˬ meuˬ hawˇ-eu, meuˬ heu deuˬ-euˬ tahˬ gʼoꞈ tahˬ jawˇ jaˆ-eu meuˬ meuˬ zaˬ deuˬ meh. Heu-aˬ, Beˬyaˬmiˬ tsawˇ jeuˬ deuˬ za-euˬ miˇ kʼahˬ pyeuꞈ-eu meh.