Read Akha Yawˇshuˆ 24 Bible Online

Yawˇshuˆ 24 - Akha bible

Yawˇshuˆ 24

¹Iˇsaˬleˬlaˆ tsawˇ jeuˬ dawˬ tawˆ luꞈ-ahˇ, Sheˬkmˬ meuˬ-ahˇ Yawˇshuˆ kuˇ uiˬ-euˬ meh. Iˇsaˬleˬlaˆ tsawˇ haˬ aˬ yuiꞈ aˬ tsu deuˬ, yaˇ kʼaˬ daˇ-euˬ deuˬ hawˇ-eu, yaw huiˬ yaw mahˇ deuˬ-ahˇ aˬ yawꞈ kuˇ-awˇ, Sahˬpaˬ Miˬyehˇ jawˇ gaˇ bi uiˬ laˇ-euˬ meh.

²Iˇsaˬleˬlaˆ tsawˇ haˬ dawˬ tawˆ luꞈ-ahˇ Yawˇshuˆ ehˇ nehˬ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Aˇ hu ba naw maꞈ-euˬ aˬ poeˬ aˬ bawˇ deuˬ Uˇpaˬlaˇ lawˇ baˬ nui baˬ paw jawˇ-awˇ, miˬ yehˇ nui deuˬ-ahˇ uˬ duˬ tahˬ-euˬ meh. Aˬ poeˬ aˬ bawˇ kʼoeˇ deuˬ laꞈ kʼoeˇ, Aˬbyaˬhaˬ hawˇ-eu Naˬkawˬ aˬ nyaꞈ nmˇ-euˬ aˬ da kʼawꞈ ahˇ-eu meh.

³Kʼoeˇ naˇ, naw maꞈ-euˬ aˬ poeˬ pyeuꞈ-eu Aˬbyaˬhaˬ-ahˇ Uˇpaˬlaˇ lawˇ baˬ nui baˬ-ahˇ jaˆ-eu miˇ kʼahˬ-ahˇ neh ngaˇ sheuˬ doˆ laꞈ-awˇ, Kaˬnaˬ miˇ kʼahˬ nyiˬ tsehˆ-ehˇ sheuˬ doˆ gʼeh-euˬ ma. Aˬ yawꞈ-euˬ zaˬ deuˬ uˆ deuˬ gʼawˬ mya ni bi jeuˬ bi o le-euˬ ma. Aˬ yawꞈ-ahˇ ngaˇ Iˇtsaˆ biꞈ-euˬ ma.

⁴Iˇtsaˆ-ahˇ, Yaˬkoˆ hawˇ-eu Iˇsawˇ biꞈ-euˬ ma. Ehˇ kʼawꞈ, naw maꞈ-euˬ aˬ poeˬ Yaˬkoˆ hawˇ-eu aˬ yawꞈ-euˬ zaˬ deuˬ Iˇjiˇtuˆ miˇ kʼahˬ-ahˇ pawˇ-iˇ-euˬ meh.

⁵Aˇ nah, Moˇseˬ hawˇ-eu Aˬloˬ-ahˇ ngaˇ pyehˬ gʼeh-awˇ, Iˇjiˇtuˆ miˇ kʼahˬ kʼoeˇ taˆ shaˬ dui zahˬ dui dui-eu jeˬ bi keuˆ le-euˬ ma. Ehˇ kʼawꞈ, naw maꞈ-ahˇ ngaˇ sheuˬ doˆ laꞈ-euˬ ma.

⁶Naw maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ sheuˬ doˆ laꞈ ngeh, Iˇjiˇtuˆ tsawˇ haˬ deuˬ mahˬ laˆ lawˬ hawˇ-eu mahˬ dziˬ-awˇ, Iˬ ma laˆ shaˆ Yaw neˇ-ahˇ keuˆ ni teh keuˆ le-euˬ meh.

⁷Caw ba nehˬ laꞈ-awˬ lehˇ naw maꞈ-euˬ aˬ poeˬ aˬ bawˇ deuˬ ngaˬ-ahˇ guˇ ngeh, Iˇjiˇtuˆ tsawˇ haˬ hawˇ-eu aˬ yawꞈ maꞈ-euˬ yaw kaˬ-ahˇ, zahˇ tsui ni gʼeh-eu jeˬ ngaˇ bi keuˆ le-euˬ ma. Iˬ ma laˆ shaˆ iˇ cuꞈ bi dahˬ daˆ laˇ-awˇ, Iˇjiˇtuˆ tsawˇ haˬ deuˬ-ahˇ bi dah pymˬ sehꞈ-euˬ ma. Iˇjiˇtuˆ tsawˇ haˬ-ahˇ ngaˬ neh jahˇ nehˬ-eu gaˇ kawˆ naw maꞈ siˬ nya meh. “Bawˇ tsahˬ bawˇ dahˇ laꞈ kʼoeˇ aˇ yamˬ gʼawˬ myahˇ ni naw maꞈ jawˇ-euˬ meh.

⁸Kʼoeˇ naˇ, Yawˇdaˬ lawˇ baˬ-euˬ nahˇ ma doˆ kʼehˬ paw jawˇ-eu Aˬmawˇliˆ tsawˇ haˬ-euˬ miˇ kʼahˬ-ahˇ, naw maꞈ-ahˇ ngaˇ sheuˬ gʼeh-euˬ ma. Aˬ yawꞈ maꞈ naw maꞈ-ahˇ guiˇ deuˆ-euˬ kʼawꞈ, naw maꞈ neh bi gʼaˬ leˇ-euˬ ma. Aˬ yawꞈ maꞈ miˇ kʼahˬ-ahˇ naw maꞈ yuˇ-awˇ, naw maꞈ mehˬ hu paw le gʼeh leꞈ ngeh, aˬ yawꞈ maꞈ-ahˇ ngaˇ laˆ luˬ laˆ seˇ nehˬ-euˬ ma.

⁹Kʼoeˇ naˇ, Ziˇpoˬ-euˬ aˬ li pyeuꞈ-eu Mawˇbaˆ sahˬ paˬ Baˬlehˇ naw maꞈ-ahˇ guiˇ deuˆ le-euˬ meh. Beˬyoˇ-euˬ aˬ li Baˬlamˬ jawˇ gaˇ aˬ yawꞈ tsawˇ haˬ pyehˬ gʼeh-awˇ, naw maꞈ-ahˇ yaˬ kʼehˇ yaˬ-awˬ lehˇ bi ehˇ gaˬ-iˇ-euˬ meh.

¹⁰Ehˇ kʼawꞈ, Baˬlamˬ-euˬ dawˬ-ahˇ ngaˇ maˬ naˇ haˬ nehˬ-euˬ miˇ neh, aˬ yawꞈ naw maꞈ-ahˇ dawˬ ngehˬ gʼeh nehˬ-euˬ laꞈ kʼoeˇ guiˬ lahˬ biꞈ-euˬ meh. Kʼoeˇ loꞈ-ehˇ jahˇ-awˇ, Baˬlehˇ-euˬ aˬ laꞈ laꞈ kʼoeˇ naw maꞈ-ahˇ ngaˇ ka kʼoꞈ-euˬ ma.

¹¹Kʼoeˇ naˇ, naw maꞈ Yawˇdaˬ lawˇ baˬ tsehˆ doˆ-awˇ, Yeˬliˇkoˇ meuˬ-ahˇ laˇ-euˬ meh. Kʼoeˇ ngeh, Yeˬliˇkoˇ meuˬ-ahˇ jawˇ-eu tsawˇ haˬ deuˬ naw maꞈ-ahˇ guˆ dui dui-eu meh. Kʼoeˇ loꞈ-ehˇ duˇ ni, Aˬmawˇliˆ tsawˇ jeuˬ, Paˬyehˆ tsawˇ jeuˬ, Kaˬnaˬ tsawˇ jeuˬ, Heˬtaˆ tsawˇ jeuˬ, Geuˬgaˬshaˆ tsawˇ jeuˬ, Hiˇbiˇ tsawˇ jeuˬ hawˇ-eu, Yeˬbuˇ tsawˇ jeuˬ deuˬ kʼawꞈ, naw maꞈ-ahˇ guˆ dui dui-euˬ meh. Ehˇ kʼawꞈ, naw maꞈ-ahˇ aˬ yawꞈ maꞈ dawˬ tawˆ luꞈ kʼoeˇ taˆ bi gʼaˬ leˇ-euˬ ma.

¹²Naw maꞈ le gʼeh leꞈ-eu nehˬ-ehˇ, naw maꞈ-euˬ mehˬ shi ngaˇ byaˬ duˇ pyehˬ gʼeh-awˇ, Aˬmawˇliˆ sahˬ paˬ kʼoeˇ nyiˬ gʼaˬ-ahˇ teh doˆ-euˬ ma. Naw maꞈ-euˬ mi cehˇ hawˇ-eu kaˆ deuˬ, kʼoeˇ gaˇ tiˬ jeˬ-iˬ maˬ mˇ-aˬ.

¹³Naw maꞈ tiˬ jawˇ-iˬ maˬ duˬ maˬ ka haw-ehˇ, naw maꞈ neh meuˬ maˬ teˬ pu maˬ tsoˆ-euˬ miˇ kʼahˬ naw maꞈ-ahˇ ngaˇ biꞈ-euˬ ma. Nymˬ-mˇ naw maꞈ kʼoeˇ gaˇ jawˇ-awˇ, naw maꞈ neh maˬ ka-euˬ aˬ gaꞈ baw duˆ-ahˇ aˬ gaꞈ aˇ siˬ pyaˆ dzaˬ luꞈ-awˇ, naw maꞈ neh maˬ ka-euˬ saˬ loˬ aˇ bawˇ-ahˇ saˬ loˬ aˇ siˬ za luꞈ meh’ lehˇ Sahˬpaˬ Miˬyehˇ ehˇ-eu meh.”

¹⁴Kʼoeˇ naˇ, Yawˇshuˆ paˇ ehˇ-eu, “Teu miˇ neh nymˬ-mˇ Sahˬpaˬ Miˬyehˇ-ahˇ taˬ huiˬ taˬ mahˇ-awˇ, yaw tsaˬ yaw dawˇ hawˇ-eu saˇ jaˇ ziꞈ-euˬ laꞈ kʼoeˇ aˬ yawꞈ-ahˇ uˬ duˬ tahˬ-awˬ. Maˬsoˬpoˬtaˬmiˇ miˇ kʼahˬ hawˇ-eu Iˇjiˇtuˆ miˇ kʼahˬ laꞈ kʼoeˇ naw maꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ miˬ yehˇ kʼoeˇ deuˬ-ahˇ byehˇ dzeh-awˇ, Sahˬpaˬ Miˬyehˇ-ahˇ tehꞈ-ehˇ uˬ duˬ tahˬ-awˬ.

¹⁵Aˬ yawꞈ-ahˇ naw maꞈ uˬ duˬ maˬ tahˬ mawꞈ te lehˇ ngeuˇ naˇ, aˬ geu gʼaˬ-ahˇ uˬ duˬ tahˬ nmˇ lehˇ iˬ nah noeˬ tsehˆ-awˬ. Maˬsoˬpoˬtaˬmiˇ miˇ kʼahˬ-ahˇ naw maꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ miˬ yehˇ deuˬ-ahˇ uˬ duˬ tahˬ nmˇ loˇ. Maˬ ngeuˇ naˇ, iˬ nah naw maꞈ jawˇ luꞈ-eu miˇ kʼahˬ-ahˇ jawˇ-eu Aˬ mawˇ liˆ tsawˇ haˬ deuˬ-euˬ miˬ yehˇ deuˬ-ahˇ uˬ duˬ tahˬ nmˇ loˇ lehˇ noeˬ tsehˆ-awˬ. Ngaˇ hawˇ-eu ngaˬ-eu miˬ sawˇ zaˬ deuˬ law nmˇ-aˬ, Sahˬpaˬ Miˬyehˇ-ahˇ uˬ duˬ tahˬ ma.”

¹⁶Iˇsaˬleˬlaˆ tsawˇ haˬ deuˬ ehˇ-eu, “Sahˬpaˬ Miˬyehˇ-ahˇ byehˇ dzeh-awˇ, miˬ yehˇ nui deuˬ-ahˇ nga maꞈ tiˬ jawˇ-iˬ uˬ duˬ maˬ tahˬ,

¹⁷Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, nga maꞈ-euˬ aˬ poeˬ aˬ bawˇ deuˬ hawˇ-eu nga maꞈ-ahˇ, Iˇjiˇtuˆ miˇ kʼahˬ laꞈ kʼoeˇ aˬ cawˬ zaˬ kʼaˆ geuꞈ luꞈ gaˇ neh sheuˬ doˆ nehˬ laꞈ-awˇ, aˬ yawꞈ neh mˇ-euˬ zahˬ leˇ paˬ-ehˇ gʼeh-eu gaˇ deuˬ-ahˇ nga maꞈ ya mawˇ-euˬ ma. Nga maꞈ laˇ tsehˆ laꞈ-euˬ miˇ kʼahˬ yawˬ kʼahˬ na luꞈ laꞈ kʼoeˇ, nga maꞈ-ahˇ aˬ yawꞈ haw piˇ nehˬ laꞈ-euˬ meh.

¹⁸Miˇ kʼahˬ heu kʼahˬ-ahˇ nga maꞈ laˇ uˇ laꞈ ngeh, heu gaˇ jawˇ-eu Aˬmawˇliˆ tsawˇ haˬ dawˬ tawˆ luꞈ-ahˇ aˬ yawꞈ teh doˆ-euˬ meh. Kʼoeˇ miˇ neh, nga maꞈ kʼawꞈ Sahˬpaˬ Miˬyehˇ-ahˇ uˬ duˬ tahˬ ma. Aˬ yawꞈ-aˬ, Miˬyehˇ pyeuꞈ-eu meh.”

¹⁹Iˇsaˬleˬlaˆ tsawˇ haˬ deuˬ-ahˇ Yawˇshuˆ ehˇ nehˬ-eu, “Ehˇ kʼawꞈ, Sahˬpaˬ Miˬyehˇ-ahˇ naw maꞈ uˬ duˬ maˬ tahˬ nya-eu paˬ. Aˬ yawꞈ-aˬ, muiˬ-eu shawˇ-eu Miˬyehˇ pyeuꞈ-awˇ, naw maꞈ-euˬ iˬ baˇ-ahˇ maˬ pyehˬ nehˬ-a. Miˬ yehˇ nui gʼaˬ-ahˇ uˬ duˬ tahˬ-eu jeˬ-ahˇ aˬ yawꞈ iˬ baˇ maˬ pyehˬ nehˬ nya-a.

²⁰Naw maꞈ aˬ yawꞈ-ahˇ byehˇ dzeh-awˇ, boeˇ miˬ shiˬ kʼaˬ deuˬ-euˬ miˬ yehˇ deuˬ-ahˇ uˬ duˬ tahˬ naˇ, aˬ yawꞈ naw maꞈ-ahˇ nui ma pehˇ-awˇ, kʼehˬ nehˬ kʼaˆ nehˬ laꞈ tehꞈ-a. Dzeuˇ laˇ ngeh, naw maꞈ kʼoeˇ taˆ aˬ yawꞈ aˇ naˆ ni muiˬ-eu ehˇ kʼawꞈ, naw maꞈ-ahˇ aˬ yawꞈ laˆ luˬ laˆ seˇ nehˬ laꞈ tehꞈ-a.”

²¹Iˇsaˬleˬlaˆ tsawˇ haˬ deuˬ ehˇ-eu, “Kʼoeˇ loꞈ-ehˇ maˬ ngeuˇ. Sahˬpaˬ Miˬyehˇ-ahˇ nga maꞈ uˬ duˬ tahˬ ma.”

²²Aˬ yawꞈ maꞈ-ahˇ Yawˇshuˆ ehˇ nehˬ-eu, “Sahˬpaˬ Miˬyehˇ-ahˇ naw maꞈ uˬ duˬ tahˬ ma lehˇ noeˬ tsehˆ-euˬ gaˇ kawˆ, naw maꞈ yawˬ haˇ yawˬ ha saˇ kiˇ pyeuꞈ-eu meh.” Aˬ yawꞈ maꞈ ehˇ-eu, “Ngeuˇ ma. Nga maꞈ saˇ kiˇ pyeuꞈ-eu ma.”

²³Yawˇshuˆ ehˇ-eu, “Toˆ-ehˇ maˇ-iˬ, naw maꞈ nehˬ-ehˇ jaˆ luꞈ-eu boeˇ miˬ shiˬ kʼaˬ-euˬ miˬ yehˇ deuˬ-ahˇ byehˇ dzeh-awˇ, Iˇsaˬleˬlaˆ tsawˇ haˬ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ saˇ jaˇ ziꞈ ma lehˇ kamˬ-awˬ.”

²⁴Iˇsaˬleˬlaˆ tsawˇ haˬ deuˬ ehˇ-eu, “Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nga maꞈ uˬ duˬ tahˬ ma. Aˬ yawꞈ-euˬ dawˬ-ahˇ nga maꞈ naˇ haˬ geuꞈ ma.”

²⁵Kʼoeˇ ngeh nah, Iˇsaˬleˬlaˆ tsawˇ haˬ deuˬ gʼaˇ duˬ, dawˬ ma saˇ jaˇ tiˬ hmˬ Yawˇshuˆ dzaˬ-awˇ, aˬ yawꞈ maꞈ ya caw teh-eu zahˇ dawˬ kʼoꞈ dawˬ deuˬ hawˇ-eu zahˇ sahˇ kʼoꞈ deuˬ, Sheˬkmˬ meuˬ-ahˇ aˬ yawꞈ maꞈ-ahˇ biꞈ nehˬ-euˬ meh.

²⁶Zahˇ dawˬ kʼoꞈ dawˬ kʼoeˇ deuˬ-ahˇ, Miˬyehˇ-euˬ Zahˇ dawˬ kʼoꞈ dawˬ sahˬ boꞈ laꞈ kʼoeˇ aˬ yawꞈ boꞈ ahˇ-euˬ meh. Kʼoeˇ naˇ, huiˬ dui dui-eu kʼaˬ lo tiˬ siˬ yuˇ-awˇ, Sahˬpaˬ Miˬyehˇ-euˬ muiˬ-eu shawˇ-eu jawˇ duˬ-ahˇ, tsuiꞈ kaˆ aˇ bawˇ dawˬ pehˬ-ahˇ ka tuˇ-euˬ meh.

²⁷Iˇsaˬleˬlaˆ tsawˇ haˬ dawˬ tawˆ luꞈ-ahˇ aˬ yawꞈ ehˇ nehˬ-eu, “Kʼaˬ lo heu siˬ-aˬ, aˬ dui gʼaˇ duˬ saˇ kiˇ pyeuꞈ tehꞈ-a. Sahˬpaˬ Miˬyehˇ neh aˬ dui-ahˇ kʼaˇ ehˇ nehˬ laꞈ-euˬ jeˬ-ahˇ kʼaˬ lo heu siˬ ya gaˬ-euˬ meh. Kʼoeˇ miˇ neh, kʼoeˇ-aˬ, naw maꞈ-euˬ Miˬyeh-ahˇ naw maꞈ maˬ ya puiˬ-eu gʼaˇ duˬ saˇ kiˇ pyeuꞈ tehꞈ-a.”

²⁸Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ Yawˇshuˆ bi gʼoꞈ-iˇ-awˇ, aˬ yawꞈ gʼaˬ yawꞈ, yawˬ ha-euˬ miˇ kʼahˬ-ahˇ gʼoꞈ-iˇ-euˬ meh.

²⁹Kʼoeˇ naˇ, Sahˬpaˬ Miˬyehˇ-euˬ zaˬ kʼaˆ pyeuꞈ-eu Nuˬ-euˬ aˬ li Yawˇshuˆ shiˇ-euˬ meh. Aˬ yawꞈ shiˇ ngeh, aˬ yawꞈ-euˬ aˇ kʼoꞈ yaˇ tseˇ byah-eu meh.

³⁰Gaˬshaˆ gawˬ jawˬ-euˬ laꞈ taˆ paw, Eˇpaˬleˬ miˇ kʼahˬ-euˬ gawˬ jawˬ gawˬ duˇ-ahˇ jaˆ-eu aˬ yawꞈ-euˬ miˇ tsaˬ pyeuꞈ-eu Tmˇnaˆseˬlahˬ meuˬ-ahˇ, aˬ yawꞈ-ahˇ baꞈ pahˬ-euˬ meh.

³¹Yawˇshuˆ yaw dehꞈ kʼaˇ dehꞈ kʼoeˇ keuˆ ni, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ uˬ duˬ tahˬ-euˬ meh. Aˬ yawꞈ shiˇ dzeuˇ ngeh kʼawꞈ, Iˇsaˬleˬlaˆ tsawˇ haˬ deuˬ gʼaˇ duˬ Sahˬpaˬ Miˬyehˇ neh mˇ-euˬ yawˬ jeˬ na luꞈ-ahˇ ya mawˇ-euˬ aˬ yuiꞈ aˬ tsu kʼoeˇ deuˬ kʼaˇ dehꞈ kʼoeˇ keuˆ ni, Sahˬpaˬ Miˬyehˇ-ahˇ aˬ yawꞈ maꞈ uˬ duˬ tahˬ-euˬ meh.

³²Iˇjiˇtuˆ miˇ kʼahˬ-ahˇ neh, Iˇsaˬleˬlaˆ tsawˇ haˬ deuˬ neh baꞈ laꞈ-euˬ Yoˇsehˆ-euˬ gʼawˇ mawˇ-ahˇ, Sheˬkmˬ-euˬ aˬ da Haˬmawˬ-euˬ aˬ li deuˬ-euˬ laꞈ-ahˇ neh, pyuˇ maˇ byaˆ tiˬ yaˇ byaˆ biꞈ-awˇ Yaˬkoˆ neh zeuˇ-euˬ Sheˬkmˬ meuˬ-ahˇ jaˆ-eu miˇ tsaˬ kʼoeˇ tsahˇ-ahˇ baꞈ pahˬ-euˬ meh. Miˇ tsaˬ kʼoeˇ tsahˇ-aˬ, Yoˇsehˆ-euˬ zaˬ deuˬ uˆ deuˬ za-euˬ jeˬ biˇ pyeuꞈ-eu meh.

³³Aˬloˬ-euˬ aˬ li Eˇlaˬzaˬ shiˇ-awˇ, Eˇpaˬleˬ miˇ kʼahˬ gawˬ jawˬ gawˬ duˇ-ahˇ jaˆ-eu aˬ yawꞈ-euˬ aˬ li-ahˇ biꞈ-euˬ Giˇbyoˬ meuˬ-ahˇ baꞈ pahˬ-euˬ meh.