Read Akha 2 Teˇsaˬloˇni 3 Bible Online

2 Teˇsaˬloˇni 3 - Akha bible

2 Teˇsaˬloˇni 3

¹Aˬ yuiꞈ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ-aˬ, heu loꞈ-ehˇ ma. Sahˬpaˬ Yeˬsuˇ-euˬ guiˬ lahˬ dawˬ naw maꞈ jawˇ gaˇ yaw kawˇ-ehˇ gaˬ doe-iˇ-awˇ taˬ huiˬ taˬ mahˇ-eu laꞈ kʼoeˇ ha geuꞈ-eu loꞈ-ehˇ, nui gaˇ kʼawꞈ kʼoeˇ loꞈ-ehˇ gaˬ doe-iˇ-awˇ ha geuꞈ ni guiˬ lahˬ shaˇ nehˬ laꞈ-awˬ.

²Maˬ muiˬ maˬ jaˬ-eu tsawˇ haˬ deuˬ hawˇ-eu haiˬ-eu tsawˇ haˬ deuˬ-euˬ laꞈ-ahˇ, Miˬyehˇ nga maꞈ-ahˇ haw piˇ nehˬ laꞈ ni guiˬ lahˬ shaˇ nehˬ laꞈ-awˬ. Aˬ jeˬ miˇ neh ehˇ naˇ, tsawˇ haˬ yawˬ gʼaˬ na luꞈ guiˬ lah dawˬ-ahˇ ha geuꞈ-eu maˬ ngeuˇ-a.

³Ehˇ kʼawꞈ, Sahˬpaˬ Yeˬsuˇ saˇ jaˇ ziꞈ-eu meh. Aˬ yawꞈ naw maꞈ-ahˇ gʼaˬ biꞈ nehˬ laꞈ-awˇ, Haiˬ dui dui-eu Gʼaˬ-euˬ aˬ laꞈ laꞈ kʼoeˇ haw piˇ nehˬ laꞈ tehꞈ-a.

⁴Nga maꞈ naw maꞈ-ahˇ nui ma taˬ coeˇ ni Sahˬpaˬ Yeˬsuˇ caw ba nehˬ laꞈ-awˇ, nga maꞈ neh kʼaˇ ehˇ nehˬ-euˬ loꞈ-ehˇ naw maꞈ mˇ daˆ shaˇ daˆ leꞈ tehꞈ-a lehˇ jah-eu ma.

⁵Miˬyehˇ-euˬ gʼoeˇ-eu gaˬ-eu jeˬ-ahˇ naw maꞈ siˬ duˬ mawˇ duˬ dzehˬ laˇ gaˇ maˬ ehˇ, Ka li neh biꞈ-euˬ daˬ coeˇ oˇ coeˇ-eu jeˬ laꞈ kʼoeˇ maˬ ehˇ, Sahˬpaˬ Yeˬsuˇ naw maꞈ-ahˇ sheuˬ uˇ nehˬ laꞈ luꞈ-uˇ.

⁶Aˬ yuiꞈ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ Ka li-euˬ tsawˇ myahˇ uˬ moˆ, nga maꞈ naw maꞈ-ahˇ heu loꞈ-ehˇ dawˬ biꞈ-eu ma. Aˬ yuiꞈ aˬ nyiˇ Ka li zaˬ deuˬ laꞈ kʼoeˇ, maˬ mˇ maˬ shaˇ nahˇ-eu deuˬ hawˇ-eu nga maꞈ neh mehˬ-euˬ tsoˆ-euˬ dawˬ-ahˇ maˬ caw teh-eu deuˬ nehˬ-ehˇ cawˬ taˬ cawˬ.

⁷Nga maꞈ kʼaˇ mˇ-euˬ loꞈ-ehˇ naw maꞈ kʼawꞈ ya mˇ meh lehˇ naw maꞈ siˬ duˬ luꞈ meh. Nga maꞈ naw maꞈ nehˬ-ehˇ jawˇ ngeh yaw doeˇ maˬ doeˇ-aˬ.

⁸Nga maꞈ-ahˇ kʼaˇ caw ba nehˬ laꞈ-euˬ jeˬ, aˇ poeˬ maˬ biꞈ ni nga maꞈ maˬ ha geuꞈ-aˬ. Nga maꞈ leh jeh dui dui-eu laꞈ kʼoeˇ gaˇ mˇ-euˬ ma. Nga maꞈ gʼaˇ duˬ naw maꞈ pyuˇ maˬ bi jiˇ mawꞈ-eu miˇneh, uˬ ciꞈ nah gʼahˇ maˬ ehˇ nga maꞈ gaˇ mˇ-euˬ ma.

⁹Naw maꞈ neh caw ba nehˬ laꞈ-euˬ jeˬ-ahˇ nga maꞈ maˬ ha geuꞈ kʼmˬ-eu miˇ neh kʼoeˇ loꞈ-ehˇ mˇ-euˬ maˬ ngeuˇ. Naw maꞈ dzaw geuꞈ kʼaˇ za ni mˇ-euˬ jeˬ pyeuꞈ-eu ma.

¹⁰Nga maꞈ naw maꞈ nehˬ-ehˇ jawˇ ngeh, “Maˬ mˇ nahˇ-eu tsawˇ haˬ-ahˇ hawˬ taˬ bi dzaˬ” lehˇ ehˇ-euˬ ma.

¹¹Naw maꞈ laꞈ kʼoeˇ tsawˇ haˬ tiˬ paˆ na deuˬ yaw doeˇ doeˇ-awˇ, yawˬ ha ya dzaˬ ya dawˇ ni maˬ mˇ-eu uˬ taꞈ, aˬ cawˬ mˇ dzaˬ kʼawꞈ dawˇ gaˇ teh kawˆ luꞈ-eu meh lehˇ nga maꞈ ya gaˬ taˬ-euˬ miˇ neh heu loꞈ-ehˇ ehˇ-eu ma.

¹²Tsawˇ haˬ kʼoeˇ deuˬ yaw muiˬ muiˬ-ehˇ dehꞈ-awˇ yawˬ ha ya dzaˬ ya dawˇ laˇ ni mˇ-eu shaˇ-eu gʼaˇ duˬ, Sahˬpaˬ Yeˬsuˇ Ka li-euˬ tsawˇ myahˇ uˬ moˆ nga maꞈ dawˬ biꞈ-eu ma.

¹³Ehˇ kʼawꞈ aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, yaw muiˬ jeˬ mˇ-eu gʼaˬ byehˆ maˬ ya byehˆ-a.

¹⁴Naw maꞈ jawˇ gaˇ boꞈ ahˇ laꞈ-euˬ sahˬ boꞈ heu taꞈ laꞈ kʼoeˇ, nga maꞈ neh mehˬ-euˬ dawˬ heu deuˬ-ahˇ maˬ naˇ haˬ geuꞈ-eu tsawˇ haˬ kʼawꞈ jawˇ-eu baw tehꞈ-a. Kʼoeˇ loꞈ-ehˇ gʼeh-eu tsawˇ haˬ-ahˇ noeˬ taˬ-awˇ, cawˬ maˬ cawˬ nehˬ ni bi shaꞈ dawˇ-awˬ.

¹⁵Ehˇ kʼawꞈ, naw maꞈ-ahˇ muiˇ-eu tsawˇ haˬ loꞈ-ehˇ maˇ diˇ-aˬ maˬ sawˇ dzeh nehˬ ni, mehˇ nmˇ tiˬ gʼaˬ loꞈ-ehˇ sawˇ-awˇ yaw kʼaˆ kʼaˆ-ehˇ mehˬ nehˬ-awˬ.

¹⁶Aˬ dui-ahˇ nui saˇ oꞈ-eu jeˬ biꞈ nehˬ laꞈ-eu gʼaˬ pyeuꞈ-eu Sahˬpaˬ Yeˬsuˇ-aˬ, naw maꞈ kʼoeˇ taˆ aˬ geu ngeh yamˬ-ahˇ maˬ kaˬ, aˬ geu jeˬ keuˆ le-eu maˬ kaˬ, nui saˇ oꞈ-eu jeˬ biꞈ luꞈ-uˇ. Naw maꞈ dawˬ tawˆ luꞈ nehˬ-ehˇ Sahˬpaˬ Yeˬsuˇ jawˇ luꞈ-uˇ.

¹⁷Ngaˬ-euˬ aˬ laꞈ neh heu loꞈ-ehˇ boꞈ-eu ma. Ngaˇ Pawˇluˆ naw maꞈ-ahˇ dawˬ cawˬ puˬ ahˇ laꞈ-eu ma. Ngaˬ neh kʼaˇ boꞈ-euˬ sahˬ boꞈ aˬ yawꞈ taꞈ yawꞈ laꞈ kʼoeˇ, ngaˬ-euˬ tsawˇ myahˇ heu loꞈ-ehˇ boꞈ-eu ma.

¹⁸Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw maꞈ dawˬ tawˆ luꞈ kʼoeˇ taˆ jaˆ luꞈ-uˇ.