Read Akha Tiˇtuˆ 2 Bible Online

Tiˇtuˆ 2 - Akha bible

Tiˇtuˆ 2

¹Ehˇ kʼawꞈ, nawˇ-aˬ, tsaˬ-eu muiˬ-eu jah-eu jeˬ-ahˇ tsaˬ leˇ-eu jeˬ ya mehˬ ya tsoˆ meh.

²Tsawˇ mawˬ tsawˇ kʼaˆ deuˬ-ahˇ, nui ma taˬ nya ni maˬ ehˇ, aˬ cawˬ yaw zeu baw paˬ-ehˇ dehꞈ nya ni maˬ ehˇ, yawˬ ha-euˬ nui ma-ahˇ gʼaˬ leˇ ni maˬ ehˇ, tsaˬ-eu muiˬ-eu jah-eu jeˬ ahˇ laˇ ni maˬ ehˇ, gʼoeˇ-eu gaˬ-eu jeˬ ahˇ laˇ ni maˬ ehˇ, daˬ coeˇ oˇ coeˇ-eu nui ma ahˇ laˇ ni maˬ ehˇ, mehˬ nehˬ-awˬ.

³Kʼoeˇ loꞈ-ehˇ duˇ ni, tsawˇ kʼaˆ kʼaˆ laˇ-euˬ zaˬ miˬ zaˬ deuˬ-ahˇ kʼawꞈ, muiˬ-eu shawˇ-eu zaˬ miˬ zaˬ deuˬ loꞈ-ehˇ dehꞈ nya jawˇ nya ni mehˬ nehˬ-awˬ. A cawˬ gaˇ kawˆ ja bu ja doeˇ-eu tsawˇ haˬ hawˇ-eu aˬ gaꞈ dzaˇ uiˇ-euˬ zaˬ kʼaˆ maˬ ya bi pyeuꞈ ni, yaw muiˬ jeˬ mehˬ-eu tsoˆ-eu tsawˇ haˬ ya bi pyeuꞈ meh.

⁴Aˬ yawꞈ maꞈ-aˬ, aˇ kʼoꞈ maˬ kʼawˆ laˇ-euˬ zaˬ miˬ zaˬ deuˬ yawˬ ha-euˬ kʼaˬ dzeˇ zaˬ hawˇ-eu zaˬ deuˬ-ahˇ gaˬ nya laˇ ni mehˬ-eu tsoˆ-eu tsawˇ haˬ ya bi pyeuꞈ meh.

⁵Aˇ kʼoꞈ maˬ kʼawˆ laˇ-euˬ zaˬ miˬ zaˬ kʼoeˇ deuˬ yawˬ ha-euˬ nui ma-ahˇ gʼaˬ leˇ-awˇ, muiˬ-eu nymˇ sahˇ aˬ ma deuˬ pyeuꞈ laˇ-eu laꞈ kʼoeˇ kʼaˬ dzeˇ zaˬ-euˬ laꞈ oꞈ awꞈ nya laˇ-eu miˇ neh, Miˬyehˇ-euˬ guiˬ lah dawˬ-ahˇ aˬ cawˬ ja bu ja doeˇ kʼaˇ maˬ za-ehˇ pyeuꞈ laˇ ni aˬ yawꞈ maꞈ ya mehˬ ya tsoˆ-eu meh.

⁶Kʼoeˇ loꞈ-ehˇ duˇ ni, aˇ kʼoꞈ maˬ kʼawˆ laˇ-euˬ aˬ da da kʼaˇ deuˬ-ahˇ kʼawꞈ, yawˬ ha-euˬ nui ma-ahˇ gʼaˬ leˇ nya ni gʼaˬ biꞈ nehˬ-awˬ.

⁷Yawˬ jeˬ na luꞈ laꞈ kʼoeˇ, nawˬ-ahˇ aˬ cawˬ yaw muiˬ jeˬ dzaw geuꞈ paˬ-ehˇ dehꞈ mehˬ jawˇ mehˬ nehˬ-awˬ. Nawˇ mehˬ nehˬ tsoˆ nehˬ ngeh, nui ma keuˆ-eu laꞈ kʼoeˇ dawˇ coe ni mehˬ nehˬ-awˬ.

⁸Nawˬ-ahˇ muiˇ-eu tsawˇ haˬ deuˬ aˬ dui-ahˇ ja bu ja doeˇ kʼaˇ maˬ za ni bi shaꞈ dawˇ-iˇ pa-ehˇ, yaw lehˬ maˬ poˆ doˆ nya-eu tsaˬ-eu muiˬ-eu dawˬ deuˬ zmˬ-awˇ mehˬ-awˬ tsoˆ-awˬ.

⁹Zaˬ kʼaˆ deuˬ yawˬ ha-euˬ baw leˬ ehˇ dawˬ naˇ haˬ-awˇ, yawˬ jeˬ na luꞈ laꞈ kʼoeˇ baw leˬ deuˬ nui kʼahˇ shiˇ ni ya dehꞈ-awˇ, dawˬ poˆ maˬ ya poˆ-a lehˇ mehˬ nehˬ-awˬ.

¹⁰Kʼoeˇ uˬ taꞈ, baw leˬ deuˬ-euˬ myawˬ maˬ ya kʼoeˬ-eu uꞈ taꞈ, aˬ myah luꞈ muiˬ-awˇ saˇ jaˇ ziꞈ-eu gaˆ kawˆ ya dehꞈ mehˬ nehˬ meh lehˇ mehˬ nehˬ-awˬ. Aˬ yawꞈ maꞈ kʼaˇ mˇ kʼaˇ shaˇ-eu jeˬ laꞈ kʼoeˇ , aˬ dui-euˬ Ka kʼoꞈ-eu gʼaˬ pyeuꞈ-eu Miˬyehˇ-euˬ gaˇ kawˆ mehˬ-eu tsoˆ-eu heu aˇ naˆ ni muiˬ-eu jeˬ pyeuꞈ-eu gaˇ kawˆ aˬ cawˬ mawˇ nya ni, kʼoeˇ loꞈ-ehˇ mehˬ nehˬ tsoˆ nehˬ-awˬ.

¹¹Aˬ jeˬ miˇ neh ehˇ naˇ, tsawˇ haˬ zaˬ dawˬ tawˆ luꞈ-ahˇ ka kʼoꞈ-eu gʼaˇ duˬ, Miˬyehˇ aˬ yawꞈ-euˬ guiˬ lahˬ yaw dzahˇ pah mehˬ laꞈ-euˬ meh.

¹²Guiˬ lahˬ yaw dzahˇ kʼoeˇ aˬ dui-ahˇ heu loꞈ-ehˇ mehˬ nehˬ tsoˆ nehˬ laꞈ-euˬ meh. Miˬyehˇ-ahˇ yaw zeu maˬ baw-eu yaw dehꞈ dehꞈ-eu jeˬ hawˇ-eu shiˬ shaˬ jiˇ-euˬ nui noeˬ nui loˆ-ahˇ byehˇ dzeh-eu gʼaˇ duˬ maˬ ehˇ, miˇ tsaˬ heu kʼoeˇ taˆ dehꞈ ngeh yawˬ ha-euˬ nui ma-ahˇ gʼaˬ leˇ-awˇ, nui ma yaw dawˇ dawˇ-ehˇ dehꞈ-eu laꞈ kʼoeˇ Miˬyehˇ-ahˇ yaw zeu baw-awˇ,

¹³aˬ dui-euˬ huiˬ dui dui-eu Miˬyehˇ hawˇ-eu Ka kʼoꞈ-eu gʼaˬ pyeuꞈ-eu Yeˬsuˇ Ka li-euˬ yaw shehꞈ kʼahˬ sehˇ doˆ le-eu Aˇ nah kʼoeˇ nah-ahˇ noeˬ tmˬ-awˇ dawˬ-eu gʼaˇ duˬ mehˬ nehˬ laꞈ-euˬ meh.

¹⁴Maˬ muiˬ maˬ jaˬ-eu jeˬ dawˬ tawˆ luꞈ laꞈ kʼoeˇ aˬ dui-ahˇ aˬ yawꞈ ka kʼoꞈ-awˇ, aˬ yawꞈ-ahˇ tehꞈ-ehˇ taꞈ-eu muiˬ-eu shawˇ-eu tsawˇ haˬ hawˇ-eu, yaw muiˬ jeˬ mˇ mawꞈ-eu nui ma ahˇ-eu tsawˇ haˬ bi pyeuꞈ laˇ-eu gʼaˇ duˬ, aˬ yawꞈ-euˬ gʼawˇ mawˇ aˬ dui-ahˇ biꞈ nehˬ laꞈ-euˬ meh.

¹⁵Gaˇ kawˆ heu deuˬ mehˬ nehˬ tsoˆ nehˬ-awˬ. Gʼaˬ biꞈ ngeh maˬ ehˇ, dehˬ dehˬ-ehˇ mehˬ paˇ tsoˆ paˇ ngeh maˬ ehˇ, baoˬ tiˬ byah ni zmˬ-awˬ. Aˬ cawˬ tiˬ gʼaˬ-iˬ nawˬ-ahˇ ta bi taˬ nyiˇ.