Read Akha Piˇleˇmoˬ 1 Bible Online

Piˇleˇmoˬ 1 - Akha bible

Piˇleˇmoˬ 1

¹Yeˬsuˇ Ka li gʼaˇ duˬ tawˬ-ahˇ uˇ luꞈ-eu ngaˇ Pawˇluˆ hawˇ-eu, aˬ nyiˇ Tiˆmoˇseˬ nga nyaꞈ, Tiˬ kawˆ loꞈ-ehˇ gaˇ mˇ cawˬ pyeuꞈ-eu Piˇleˇmoˬ jawˇ gaˇ maˬ ehˇ,

²nawˬ-euˬ nymˇ-ahˇ tahˬ dzoeˇ-awˇ uˬ duˬ tahˬ luꞈ-eu Ka li zaˬ aˇ muˇ-ahˇ maˬ ehˇ, nga nyaꞈ-euˬ dmˇ ma loꞈ-ehˇ gʼeh-eu Aˬbiˇ-ahˇ maˬ ehˇ, yehˇ tiˬ gʼaˬ loꞈ-ehˇ Ka li gʼaˇ duˬ gaˇ mˇ-eu nga nyaꞈ-euˬ cawˬ Aˬgiˇpuˆ jawˇ gaˇ maˬ ehˇ, sahˬ boꞈ heu taꞈ boꞈ ahˇ laꞈ-eu ma.

³Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ jaˆ luꞈ-uˇ.

⁴Aˬ nyiˇ Piˇleˇmoˬ-oˇ, ngaˇ guiˬ lahˬ kʼaˇ shaˇ ngeh nawˬ-ahˇ noeˬ keuˆ-awˇ ngaˬ-euˬ Miˬyehˇ-euˬ guiˬ lahˬ-ahˇ ja ceuˬ-eu ma.

⁵Aˬ jeˬ miˇ neh ehˇ naˇ, Miˬyehˇ-euˬ tsawˇ haˬ dawˬ tawˆ luꞈ-ahˇ nawˇ gaˬ-eu gaˇ kawˆ hawˇ-eu, Sahˬpaˬ Yeˬsuˇ-ahˇ nawˇ jah-eu jeˬ-euˬ gaˇ kawˆ ngaˇ ya gaˬ-euˬ ma.

⁶Nawˇ hawˇ-eu nga maꞈ yaw kaˬ jah-eu laꞈ kʼoeˇ cawˬ cawˬ taꞈ-eu heu-aˬ, Ka li laꞈ kʼoeˇ za-euˬ guiˬ lahˬ yawˬ jeˬ na luꞈ-ahˇ aˬ dui siˬ nya dzehˬ laˇ-eu gʼaˇ duˬ pyeuꞈ ni ngaˇ guiˬ lahˬ shaˇ-eu ma.

⁷Gaˬ-eu aˬ nyiˇ Piˇleˇmoˬ-oˇ, nawˬ-euˬ gʼoeˇ-eu gaˬ-eu jeˬ baˬ da neh, ngaˇ laˬ kʼaˬ cehˇ dui dui-awˇ, nui ma laꞈkʼoeˇ gʼaˬ paˇ ahˇ dzehˬ laˇ-eu miˇ-a. Nawˇ baˬ da neh Miˬyehˇ-euˬ tsawˇ haˬ dawˬ tawˆ luꞈ laˬ kʼaˬ cehˇ-eu meh.

⁸Miˬyehˇ-euˬ tsawˇ haˬ deuˬ-ahˇ nawˇ kʼoeˇ loꞈ-ehˇ gaˬ-eu miˇ neh, Ka li laꞈ kʼoeˇ ngaˇ nawˬ-euˬ aˇ doˆ pyeuꞈ-eu loꞈ-ehˇ, mˇ paˬ-ehˇ gʼeh-eu jeˬ-ahˇ nawˇ mˇ-eu gʼaˇ duˬ, kʼaˬ duˬ ni dawˬ biꞈ nya-eu tsawˇ haˬ ma.

⁹Ehˇ kʼawꞈ, ngaˇ nawˬ-ahˇ gaˬ-eu miˇ neh, dawˬ biꞈ-eu jeˬ-ehˇ maˬ ngeuˇ ni, nahˬ yu ni shaˇ ju-eu ma. Ngaˇ-aˬ, Yeˬsuˇ Ka li-euˬ dah zaˇ ngehˬ zaˬ tmˇ zaˬ geuꞈ luꞈ-eu Pawˇluˆ pyeuꞈ-eu uˬ taꞈ, aˬ yawꞈ-euˬ gʼaˇ duˬ nymˬ-mˇ tawˬ-ahˇ uˇ luꞈ-eu tsawˇ haˬ pyeuꞈ kʼawꞈ, nawˬ-ahˇ dawˬ maˬ biꞈ ni shaˇ ju-eu jeˬ pyeuꞈ-eu ma.

¹⁰Kʼoeˇ miˇ neh, Ka li laꞈ kʼoeˇ ngaˬ-euˬ aˬ li pyeuꞈ-eu Awˬneˬsiˬmuˇ gʼaˇ duˬ nawˬ-ahˇ heu loꞈ-ehˇ shaˇ-eu ma. Ngaˇ tawˬ-ahˇ uˇ luꞈ ngeh guiˬ lahˬ saꞈ laˇ paw aˬ yawꞈ-euˬ aˬ da pyeuꞈ laˇ-euˬ ma lehˇ ehˇ nya ma.

¹¹Dzeuˇ laˇ ngeh, aˬ yawꞈ nawˬ-euˬ gʼaˇ duˬ gaˇ dahˇ maˬ tsoeˬ-a. Ehˇ kʼawꞈ nymˬ-mˇ-aˬ, nawˬ-euˬ gʼaˇ duˬ maˬ ehˇ, ngaˬ-euˬ gʼaˇ duˬ maˬ ehˇ, gaˇ dahˇ tsoeˬ-eu tsawˇ haˬ tiˬ gʼaˬ pyeuꞈ laˇ-euˬ meh.

¹²Nymˬ-mˇ ngaˇ aˬ yawꞈ-ahˇ nawˇ jawˇ gaˇ bi gʼoꞈ laˇ-eu ma. Aˬ yawꞈ-ahˇ ngaˇ gaˬ dui dui-eu ma.

¹³Laˬ kʼaˬ cehˇ-eu Guiˬ lahˬ dawˬ gʼaˇ duˬ ngaˇ tawˬ-ahˇ uˇ luꞈ ngeh nawˬ-euˬ dah zaˇ ngaˬ-ahˇ bi caw ba-eu gʼaˇ duˬ, aˬ yawꞈ-ahˇ ngaˬ nehˬ-ehˇ bi jawˇ mawꞈ dui dui ya.

¹⁴Ehˇ kʼawꞈ, ngaˬ-ahˇ caw ba nehˬ laꞈ lehˇ nawˬ-ahˇ ngaˇ maˬ kaˬ naˬ mawꞈ nya. Nawˇ nui ma keuˆ-awˇ caw ba nehˬ laꞈ-eu jeˬ-ahˇ tehꞈ-ehˇ ngaˇ geuꞈ mawꞈ-eu ma. Kʼoeˇ miˇ neh, nawˇ nui ma maˬ tsaˬ gaˇ ngaˇ tiˬ jeˬ-iˬ maˬ mˇ.

¹⁵Awˬneˬsiˬmuˇ nawˬ nehˬ-ehˇ tiˬ kʼehˬ tiˬ yamˬ maˬ jawˇ ni cehˆ-euˬ miˇ neh, nawˬ nehˬ-ehˇ aˬ myah luꞈ paˇ bi jawˇ kʼoꞈ mawꞈ-eu maˬ siˬ.

¹⁶Nymˬ-mˇ-aˬ, aˬ yawꞈ zaˬ kʼaˆ tiˬ gʼaˬ loˆ ni tehꞈ maˬ paˇ ngeuˇ meh. Ka li laꞈ kʼoeˇ aˬ yuiꞈ aꞈ nyiˇ tiˬ gʼaˬ loꞈ-ehˇ pyeuꞈ laˇ-euˬ meh. Aˬ yawꞈ-aˬ, ngaˬ-euˬ gʼaˇ duˬ gaˇ dahˇ tsoeˬ dui dui-eu meh. Ngaˬ-euˬ gʼaˇ duˬ gaˇ dahˇ tsoeˬ-eu naˆ maˬ tseˇ, nawˬ-euˬ gʼaˇ duˬ zaˬ kʼaˆ tiˬ gʼaˬ loꞈ-ehˇ maˬ ehˇ, Sahˬpaˬ Yeˬsuˇ laꞈ kʼoeˇ aˬ yuiꞈ aꞈ nyiˇ tiˬ gʼaˬ loꞈ-ehˇ maˬ ehˇ, gaˇ dahˇ tsoeˬ dzehˬ tehꞈ-a.

¹⁷Kʼoeˇ miˇ neh, nawˇ ngaˬ-ahˇ nawˬ-euˬ gaˇ mˇ cawˬ ma lehˇ sawˇ naˇ, ngaˬ-ahˇ ha geuꞈ-eu loꞈ-ehˇ aˬ yawꞈ-ahˇ ha geuꞈ-awˬ.

¹⁸Aˬ yawꞈ nawˬ-ahˇ tiˬ jeˬ paˬ mˇ lehˬ-euˬ maˬ kaˬ, tiˬ jeˬ paˬ yuˇ naꞈ taˬ-euˬ maˬ kaˬ, dawˬ tawˆ luꞈ ngaˇ pi jiˇ ma.

¹⁹Ngaˬ-euˬ aˬ laꞈ neh ngaˇ heu loꞈ-ehˇ boꞈ-eu ma. Ngaˇ Pawˇluˆ nawˬ-ahˇ tsoeˬ kʼoꞈ nehˬ ma. (Nawˬ-euˬ mawˇ do do lah-ehˇ ngaˬ-ahˇ dziˇ dzoˆ naꞈ luꞈ-eu gaˇ kawˆ ngaˇ maˬ paˇ ehˇ ma.)

²⁰Kʼoeˇ miˇ neh, ngaˬ-euˬ aˬ nyiˇ-oˇ, Sahˬpaˬ Yeˬsuˇ-euˬ myaˆ pyawˬ-ahˇ haw-awˇ, ngaˇ nui ma saˇ ni tiˬ poˆ mˇ nehˬ laꞈ sheˇ.

²¹Ngaˇ sahˬ boꞈ heu taꞈ boꞈ-awˇ shaˇ-eu loꞈ-ehˇ nawˇ mˇ nehˬ laꞈ tehꞈ-a lehˇ jah-eu ma. Kʼoeˇ naˆ maˬ tseˇ kʼawꞈ mˇ nehˬ laꞈ tehꞈ-a lehˇ ngaˇ siˬ nya ma.

²²Kʼoeˇ uˬ taꞈ, ngaˇ jawˇ-eu gʼaˇ duˬ kuˆ lawˆ tiˬ lawˆ lehˬ hmˬ nehˬ laꞈ-awˬ. Aˬ jeˬ miˇ neh ehˇ naˇ, naw maꞈ-euˬ guiˬ lahˬ shaˇ dawˬ-ahˇ naˇ haˬ-eu laꞈ kʼoeˇ, Miˬyehˇ ngaˬ-ahˇ naw maꞈ jawˇ gaˇ bi gʼoꞈ laˇ tehꞈ-a lehˇ ngaˇ noeˬ tmˬ-eu ma.

²³Yeˬsuˇ Ka li gʼaˇ duˬ ngaˬ nehˬ-ehˇ tawˬ-ahˇ uˇ luꞈ-eu Iˇbaˬpaˬlaˇ naw maꞈ-ahˇ dawˬ cawˬ puˬ ahˇ laꞈ-euˬ meh.

²⁴Kʼoeˇ loꞈ-ehˇ duˇ ni, ngaˬ-euˬ gaˇ mˇ cawˬ deuˬ pyeuꞈ-eu Maˬkuˆ, Aˬliˬdaˬguˇ, Deˬmaˆ, Luˇkaꞈ aˬ ha oeˬ gʼaˬ kʼawꞈ, naw maꞈ-ahˇ dawˬ cawˬ puˬ-ahˇ laꞈ-euˬ meh.

²⁵Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw maꞈ yawˬ gʼaˬ na luꞈ kʼoeˇ taˆ jaˆ luꞈ-uˇ.