Read Akha HeˬByehˇ 2 Bible Online

HeˬByehˇ 2 - Akha bible

HeˬByehˇ 2

¹Kʼoeˇ miˇ neh, aˬ dui-ahˇ yawˬ paw yawˬ maˬ bi tsahˇ jiˆ gʼeh-eu gʼaˇ duˬ, aˬ dui ya gaˬ taˬ-euˬ yaw tsaˬ yaw dawˇ jeˬ-ahˇ heu naˆ maˬ tseˇ ziꞈ dah ni ya tuˆ tehˬ taˬ meh.

²Aˬ dui-euˬ aˬ poeˬ aˬ bawˇ deuˬ-ahˇ mˬ taˆ gʼaˬ kʼehˇ deuˬ neh biꞈ nehˬ-euˬ dawˬ deuˬ-aˬ, tsaˬ-eu dawˇ-eu dawˬ pyeuꞈ-awˇ, maˬ naˇ haˬ geuꞈ-eu tsawˇ haˬ deuˬ-aˬ, yawˬ ha-ahˇ geuˇ-eu loꞈ-ehˇ kʼehˬ nehˬ kʼaˆ nehˬ gaˇ ya daˬ-eu meh.

³Toˆ-ehˇ ngeuˇ naˇ, heu naˆ naˆ-ehˇ huiˬ-eu ka kʼoꞈ-eu jeˬ heu-ahˇ aˬ dui myaˆ haw maˬ cawˬ naˇ, kʼehˬ-eu kʼaˆ-eu jeˬ-ahˇ aˬ joˆ-ehˇ dzeuˇ-iˇ nya nmˇ. Ka kʼoꞈ-eu gaˇ kawˆ heu, Sahˬpaˬ Yeˬsuˇ neh jeˬ huˬ ehˇ naˬ laꞈ-awˇ, kʼaˇ ya gaˬ-euˬ tsawˇ haˬ deuˬ tsaˬ meh lehˇ saˇ kiˇ kamˬ-eu meh.

⁴Miˬyehˇ aˬ yawꞈ kʼawꞈ, aˬ yawꞈ nui ma kʼaˇ tsaˬ-eu loꞈ-ehˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu gʼawˬ mya jeˬ mˇ-eu uˬ taꞈ, Yaw sahˇ Miˬyehˇ neh biꞈ-euˬ laꞈ sawˬ deuˬ-ahˇ bi za-eu laꞈ kʼoeˇ, aˬ yawꞈ maꞈ nehˬ-ehˇ saˇ kiˇ caw kamˬ luꞈ-eu meh.

⁵Miˬyehˇ-aˬ, nymˬ-mˇ aˬ dui ja luꞈ-eu, aˬ kaˇ keuˆ le-eu lehˇ gʼeh-eu miˇ tsaˬ tahˬ kʼawˇ yaw shuiꞈ kʼoeˇ-ahˇ, mˬ taˆ gʼaˬ kʼehˇ deuˬ neh bi uˆ lahˇ-eu lehˇ gʼeh-eu maˬ ngeuˇ-a.

⁶Ehˇ kʼawꞈ, Jaˇliꞈ laꞈ kʼoeˇ heu loꞈ-ehˇ tiˬ tsahˇ ehˇ taˬ-euˬ meh. “Miˬyehˇ-oˇ tsawˇ haˬ zaˬ gʼaˇ duˬ, nawˇ shaˇ noeˬ shaˇ sawˇ nehˬ paˬ-ehˇ, tsawˇ haˬ zaˬ aˬ jeˬ-a. Yawꞈ maꞈ gʼaˇ duˬ kʼahˇ kʼoꞈ paˬ-ehˇ, tsawˇ haˬ zaˬ aˬ jeˬ-a.

⁷Tiˬ kʼehˬ tiˬ yamˬ laꞈ kʼoeˇ nawˬ neh, mˬ taˆ gʼaˬ kʼehˇ deuˬ-euˬ laꞈ oˆ, aˬ yawꞈ-ahˇ yuˇ awˆ nehˬ-euˬ meh. Yaw shehꞈ kʼahˬ sehˇ huiˬ dui dui-eu, ciˬ huiˬ ciˬ mahˇ-eu shuiˇ uˬ kʼoˆ, aˬ yawꞈ-ahˇ nawˇ nyehꞈ kʼoˆ nehˬ-awˇ,

⁸Kʼaˇ jawˇ kʼaˇ jaˆ-eu jeˬ kʼoeˇ taˆ, uˆ lahˇ-eu gʼaˬ bi geuꞈ-euˬ meh.” Miˬyehˇ neh tsawˇ haˬ zaˬ-ahˇ, “kʼaˇ jawˇ kʼaˇ jaˆ-eu jeˬ dawˬ tawˆ luꞈ kʼoeˇ taˆ uˆ lahˇ-eu gʼaˬ” bi geuꞈ-euˬ meh lehˇ ehˇ taˬ-euˬ meh. Heu-aˬ, kʼaˇ jawˇ kʼaˇ jaˆ-eu yawˬ jeˬ na luꞈ ahˇ leˇ jiˇ-eu meh lehˇ, bya cehˆ ni ehˇ mawꞈ-eu meh. Ehˇ kʼawꞈ, kʼaˇ jawˇ kʼaˇ jaˆ-eu jeˬ dawˬ tawˆ luꞈ kʼoeˇ taˆ tsawˇ haˬ zaˬ uˆ lahˇ luꞈ gaˇ aˬ dui maˬ ya mawˇ-aˬ siˬ.

⁹Ehˇ kʼawꞈ, Miˬyehˇ-euˬ guiˬ lahˬ yaw dzahˇ baˬ da neh, tsawˇ haˬ yawˬ gʼaˬ na luꞈ gʼaˇ duˬ bi shiˇ dah-eu lehˇ, tiˬ kʼehˬ tiˬ yamˬ laꞈ kʼoeˇ mˬ taˆ gʼaˬ kʼehˇ deuˬ-euˬ laꞈ oˆ bi jawˇ-euˬ gʼaˬ pyeuꞈ-eu Yeˬsuˇ-ahˇ aˬ dui mawˇ-euˬ ma. Shiˇ gaˇ keuˆ ni aˬ yawꞈ ya daˬ gʼaˬ-euˬ miˇ neh, nymˬ-mˇ aˬ yawꞈ-ahˇ yaw shehꞈ kʼahˬ sehˇ huiˬ-eu ciˬ huiˬ ciˬ mahˇ-eu shuiˇ uˬ kʼoˆ bi kʼoˆ-euˬ gaˇ aˬ dui ya mawˇ luꞈ ma.

¹⁰Yawˬ jeˬ na luꞈ-ahˇ beh-awˇ bo saˆ haw piˇ luꞈ-eu gʼaˬ pyeuꞈ-eu Miˬyehˇ neh, aˬ yawꞈ-euˬ zaˬ gʼawˬ mya ni-ahˇ aˬ yawꞈ-euˬ yaw shehꞈ kʼahˬ sehˇ za ni bi sheuˬ laꞈ-eu gʼaˇ duˬ, Yeˬsuˇ-ahˇ shaˬ-eu zahˬ-eu jeˬ bi daˬ-eu laꞈ kʼoeˇ byah laˇ ni jahˇ-euˬ kʼoeˇ-aˬ, tsaˬ dui dui meh. Aˬ jeˬ miˇ neh ehˇ naˇ, aˬ yawꞈ maꞈ ka kʼoꞈ-eu jeˬ za ni sheuˬ gʼeh-eu gʼaˬ-aˬ, Yeˬsuˇ meh.

¹¹Aˬ yawꞈ-aˬ, tsawˇ haˬ zaˬ-ahˇ iˬ baˇ shawˇ nehˬ-eu gʼaˬ pyeuꞈ-eu meh. Aˬ yawꞈ hawˇ-eu aˬ yawꞈ neh iˬ baˇ shawˇ nehˬ-euˬ tsawˇ haˬ dawˬ tawˆ luꞈ, Aˬ da tiˬ da-ahˇ taꞈ-eu tehꞈ meh. Kʼoeˇ miˇ neh, aˬ yawꞈ maꞈ-ahˇ aˬ yawꞈ-euˬ mehˇ nmˇ lehˇ ya kuˇ gaˇ aˬ yawꞈ maˬ shaꞈ dawˇ-a.

¹²Aˬ yawꞈ Miˬyehˇ-ahˇ ehˇ-eu, “Nawˬneh mˇtaˬ-euˬ gaˇ kʼoeˇdeuˬ, ngaˬ-euˬ mehˇ nmˇ-ahˇ dzawˇ nehˬ ma. Aˬ yawꞈ maꞈ uiˬ leˇ-awˇ jawˇ gaˇ, nawˬ-ahˇ ngaˇ ja ceuˬ ma.”

¹³“Ngaˇ Miˬyehˇ-ahˇ gʼoe-awˇ jah ma” lehˇ aˬ yawꞈ ehˇ-eu meh. “Miˬyehˇ neh ngaˬ-ahˇ biꞈ laꞈ-euˬ zaˬ deuˬ nehˬ-ehˇ ngaˇ jawˇ luꞈ ma” lehˇ kʼawꞈ ehˇ-eu meh.

¹⁴Aˬ yawꞈ neh aˬ yawꞈ-euˬ zaˬ deuˬ lehˇ kuˇ-euˬ kʼoeˇ deuˬ-aˬ, shiˬ shaˬ jiˇ pi luꞈ-eu tsawˇ haˬ pyeuꞈ-eu loꞈ-ehˇ, Yeˬsuˇ kʼawꞈ aˬ yawꞈ maꞈ-ahˇ duˇ leˇ-awˇ, aˬ yawꞈ maꞈ loꞈ-ehˇ shiˬ shaˬ jiˇ pi luꞈ-eu tsawˇ haˬ pyeuꞈ-eu meh. Aˬ yawꞈ kamˇ shiˇ-eu laꞈ kʼoeˇ, tsawˇ haˬ zaˬ-ahˇ bi shiˇ nya-eu baoˬ jaˆ-eu Nehꞈ sahˬ paˬ-ahˇ laˆ luꞈ laˆ seˇ-eu gʼaˇ duˬ, aˬ yawꞈ kʼoeˇ loꞈ-ehˇ pyeuꞈ le-euˬ meh.

¹⁵Kʼoeˇ loꞈ-ehˇ mˇ-eu laꞈ kʼoeˇ, tiˬ ziˇ jiˇ tiˬ yehˆ juˬ ni shiˇ gaˇ guˆ-eu jeˬ-euˬ zaˬ kʼaˆ ya geuꞈ luꞈ-eu tsawˇ haˬ zaˬ deuˬ-ahˇ, aˬ yawꞈ bi buˬ bi law-iˇ-euˬ meh.

¹⁶Aˬ yawꞈ caw ba nehˬ luꞈ-eu kʼoeˇ-aˬ, mˬ taˆ gʼaˬ kʼehˇ deuˬ-ahˇ maˬ ngeuˇ-a lehˇ bya cehˆ ni siˬ duˬ mawˇ duˬ laˇ-eu meh. Ehˇ kʼawꞈ, Aˬbyaˬhaˬ-euˬ zaˬ deuˬ uˆ deuˬ-ahˇ aˬ yawꞈ caw ba-eu meh.

¹⁷Ehˇ mawꞈ-eu dawˬ tsuiꞈ-aˬ, tsawˇ haˬ zaˬ-ahˇ Miˬyehˇ iˬ baˇ pyehˬ nehˬ nya ni, saˇ jaˇ ziꞈ-awˇ gʼawˬ shaˬ gaˬ-eu nui ma ahˇ-eu Miˬyehˇ-euˬ gaˇ mˇ-eu Piˇma Yaw huiˬ gʼaˬ geuꞈ-eu gʼaˇ duˬ, yawˬ jeˬ na luꞈ laꞈ kʼoeˇ aˬ yawꞈ-euˬ mehˇ nmˇ pyeuꞈ-eu tsawˇ haˬ zaˬ deuˬ loꞈ-ehˇ maˇ maˇ ni tsawˇ haˬ zaˬ ya pyeuꞈ tsehˆ-euˬ meh.

¹⁸Nymˬ-mˇ, iˬ baˇ muˇ juˇ juˇ gaˇ ya daˬ luꞈ-eu tsawˇ haˬ-ahˇ aˬ yawꞈ ngehˬ gʼeh nehˬ nya-eu meh. Aˬ jeˬ miˇ neh ehˇ naˇ, aˬ yawꞈ-euˬ mawˇ do kʼawꞈ, iˬ baˇ muˇ juˇ juˇ-eu jeˬ hawˇ-eu kʼehˬ-eu kʼaˆ-eu jeˬ-ahˇ ya daˬ dzeuˇ yaꞈ-euˬ meh.