Read Akha HeˬByehˇ 6 Bible Online

HeˬByehˇ 6 - Akha bible

HeˬByehˇ 6

¹Ka li-euˬ gaˇ kawˆ aˇ dahˬ beh gaˇ tehꞈ-ehˇ aˬ dui dzaw dzaw-ehˇ maˬ paˇ jawˇ ni, jah-eu laꞈ kʼoeˇ huiˬ loˆ laˇ-euˬ tsawˇ haˬ deuˬ loꞈ-ehˇ mehˬ hu paw dzaw daˆ leꞈ kaˇ-euˇ. Gaˇ dahˇ maˬ tsoeˬ-eu jeˬ-ahˇ maˬ mˇ ni byehˇ dzeh-eu hawˇ-eu, Miˬyehˇ-ahˇ jah-eu jeˬ-ahˇ aˇ dahˬ beh poˆ beh poˆ-ehˇ jawˇ yamˬ maˬ paˇ ngeuˇ meh.

²Iˇ cuꞈ shawˇ-eu gaˇ kawˆ maˬ ehˇ, aˬ laꞈ cawˬ daˆ-awˇ aˇ yaˬ biꞈ-eu gaˇ kawˆ maˬ ehˇ, shiˇ-euˬ tsawˇ haˬ deuˬ-ahˇ bi gʼoꞈ dehꞈ laˇ-eu gaˇ kawˆ maˬ ehˇ, Miˬyehˇ neh yaˇ kʼaˬ daˇ-euˬ jeˬ mˬ maˬ maˬ byaˆ zaˇ ziˇ ziꞈ-eu gaˇ kawˆ maˬ ehˇ, aˬ dui dzaw poˆ dzaw poˆ-ehˇ jawˇ yamˬ maˬ paˇ ngeuˇ meh.

³Aˬ dui mehˬ hu paw le kaˇ-euˇ. Miˬyehˇ nui ma tsaˬ naˇ, aˬ dui heu loꞈ-ehˇ mˇ daˆ leꞈ kaˇ-euˇ.

⁴Aˬ jeˬ miˇ neh ehˇ naˇ, jah-eu jeˬ-ahˇ byehˇ dzeh dzeuˇ-euˬ tsawˇ haˬ deuˬ-ahˇ, iˬ baˇ noeˬ poˆ-eu tsahˇ-ahˇ aˬ joˆ-ehˇ paˇ bi gʼoꞈ kʼoꞈ keuˆ laˇ nya nmˇ. Aˬ yawꞈ maꞈ-aˬ, Miˬyehˇ-euˬ yaw shehꞈ laꞈ kʼoeˇ jawˇ haw-awˇ, mˬ kʼoeˇ taˆ neh oe-euˬ Miˬyehˇ neh biꞈ-euˬ laꞈ sawˬ-euˬ yaw kuiˇ ya myeuꞈ haw-awˇ, aˬ cawˬ loꞈ-ehˇ Muiˬ-eu shawˇ-eu Yaw sahˇ Miˬyehˇ za haw-euˬ tsawˇ haˬ pyeuꞈ-eu meh.

⁵Miˬyehˇ-euˬ dawˬ kawˬ aˇ naˆ ni muiˬ-eu gaˇ kawˆ aˬ yawꞈ maꞈ-euˬ nui maˬ laꞈ kʼoeˇ ya siˬ ya mawˇ duˬ-awˇ, Miˬyehˇ uˆ lahˇ le-eu aˇ yamˬ-ahˇ taꞈ leˇ-eu baoˬ kʼoeˇ-ahˇ aˬ yawꞈ maꞈ ya siˬ duˬ gʼaˬ-euˬ meh.

⁶Kʼoeˇ sawˇ miˇ tsa, jah-eu jeˬ-ahˇ aˬ yawꞈ maꞈ byehˇ dzeh-euˬ meh. Iˬ baˇ noeˬ poˆ-eu tsahˇ-ahˇ aˬ yawꞈ maꞈ-ahˇ paˇ bi gʼoꞈ poˆ laˇ-eu gʼaˇ duˬ maˬ paˇ awˬ meh. Aˬ jeˬ miˇ neh ehˇ naˇ, aˬ yawꞈ maꞈ Miˬyehˇ-euˬ Zaˬmaˇ-ahˇ laꞈ yaꞈ kʼoeˇ taˆ paˇ taꞈ tehˬ poˆ-awˇ, miˇ kʼahˬ zaˬ mehˬ shi paˇ bi shaꞈ dawˇ poˆ-eu jeˬ mˇ luꞈ-eu meh.

⁷Uˬ yehˇ uiˇ dawˇ-awˇ mˇ dzaˬ kʼawꞈ dawˇ-eu deuˬ gʼaˇ duˬ gaˇ dahˇ tsoeˬ-eu sahˬ lahˬ bi dehꞈ laˇ-eu miˇ tsaˬ-ahˇ Miˬyehˇ guiˬ lahˬ biꞈ-eu meh.

⁸Ehˇ kawꞈ, aˬ gah baw duˆ hawˇ-eu yaˇ moꞈ tehꞈ-ehˇ bi dehꞈ laˇ naˇ, tiˬ jeˬ-iˬ gaˇ dahˇ maˬ tsoeˬ-a. Kʼoeˇ-aˬ, Miˬyehˇ neh yaˬ kʼehˇ bi yaˬ-awˇ, miˬ dzaˬ bi puiˆ byoˆ mawꞈ laˇ-euˬ miˇ tsaˬ pyeuꞈ-eu meh.

⁹Gaˬ-eu cawˬ deuˬ-oˇ, nga maꞈ heu loꞈ-ehˇ ehˇ-eu kʼawꞈ, naw maꞈ-euˬ gʼaˇ duˬ nga maꞈ kʼahˬ lahˇ kʼaˇ maˬ za. Ka kʼoꞈ-eu jeˬ-ahˇ taꞈ leˇ-awˇ, muiˬ dzehˬ-eu guiˬ lahˬ yaw dzahˇ-ahˇ naw maꞈ za taˬ-euˬ meh lehˇ nga maꞈ siˬ nya ma.

¹⁰Miˬyehˇ-aˬ, dawˇ coe ni yaˇ kʼaˬ daˇ-eu gʼaˬ meh. Naw maꞈ neh mˇ-euˬ gaˇ deuˬ-ahˇ aˬ yawꞈ maˬ ngehˇ-a. Naw maꞈ neh Ka li zaˬ cawˬ cawˬ caw ba dzeuˇ-euˬ laꞈ kʼoeˇ maˬ ehˇ, nymˬ-mˇ caw ba luꞈ-eu laꞈ kʼoeˇ maˬ ehˇ, aˬ yawꞈ-euˬ gʼoeˇ-eu gaˬ-eu jeˬ aˬ cawˬ mawˇ nya ni naw maꞈ neh mˇ-euˬ jeˬ-ahˇ maˬ ngehˇ-a.

¹¹Naw maꞈ neh noeˬ tmˬ taˬ-euˬ jeˬ keuˆ le ni, naw maꞈ yawˬ gʼaˬ na luꞈ aˇ saˬ saˬ ngeh keuˆ ni nui ma keuˆ gaˇ nga maꞈ geuꞈ mawꞈ dui dui-eu ma.

¹²Naw maꞈ yaw doeˇ doeˇ-eu tsawˇ haˬ maˬ bi pyeuꞈ mawꞈ nya. Ehˇ kʼawꞈ, jah-eu laꞈ kʼoeˇ nui ma gʼawˬ mahˇ ni taˬ-eu baˬ da neh, Miˬyehˇ neh saˇ jaˇ dzaˬ taˬ-euˬ jeˬ-ahˇ za-eu tsawˇ haˬ bi pyeuꞈ mawꞈ-eu ma.

¹³Aˬbyaˬhaˬ-ahˇ Miˬyehˇ saˇ jaˇ dzaˬ ngeh, aˬ yawꞈ neh kʼaˇ ehˇ-euˬ loꞈ-ehˇ mˇ ma lehˇ kamˬ tsehˆ-euˬ meh. Aˬ yawꞈ naˆ maˬ tseˇ huiˬ dzehˬ mahˇ dzehˬ-eu tiˬ gʼaˬ-iˬ maˬ jawˇ-eu baˬ da neh, aˬ yawꞈ-euˬ tsawˇ myahˇ-ahˇ gʼoe-awˇ aˬ yawꞈ kamˬ-euˬ meh.

¹⁴“Nawˬ-euˬ zaˬ deuˬ jeuˬ le o le ni ngaˇ nawˬ-ahˇ guiˬ lahˬ biꞈ-eu ma” lehˇ aˬ yawꞈ ehˇ-euˬ meh.

¹⁵Aˬbyaˬhaˬ nui ma gʼawˬ mahˇ ni taˬ-euˬ baˬ da neh, Miˬyehˇ neh saˇ jaˇ dzaˬ-euˬ jeˬ-ahˇ za-euˬ meh.

¹⁶Tsawˇ haˬ tiˬ gʼaˬ na tiˬ jeˬ paˬ gaˇ kawˆ kamˬ ngeh, yawˬ ha naˆ maˬ tseˇ huiˬ dzehˬ mahˇ dzehˬ-eu tsawˇ haˬ tiˬ gʼa-euˬ tsawˇ myahˇ-ahˇ gʼoe-awˇ kamˬ-eu meh. Kʼoeˇ loꞈ-ehˇ kamˬ-eu baˬ da neh, gaˇ kawˆ kʼoeˇ-ahˇ tiˬ gʼaˬ-iˬ maˬ laˆ pyawˆ nya-a.

¹⁷Miˬyehˇ neh saˇ jaˇ dzaˬ taˬ-euˬ tsawˇ haˬ deuˬ-ahˇ Miˬyehˇ aˬ yawꞈ neh noeˬ taˬ-euˬ jeˬ tiˬ jawˇ-iˬ maˬ poˆ maˬ paˇ-eu gaˇ kawˆ bi siˬ duˬ mawꞈ-eu meh. Kʼoeˇ miˇ neh, aˬ yawꞈ saˇ jaˇ dzaˬ ngeh, dzaˬ-euˬ loꞈ-ehˇ maˇ maˇ ni bi pyeuꞈ laˇ-eu gʼaˇ duˬ kamˬ tsehˆ-eu meh.

¹⁸Miˬyehˇ neh saˇ jaˇ dzaˬ-euˬ jeˬ hawˇ-eu aˬ yawꞈ neh kamˬ-euˬ heu nyiˬ jeˬ-aˬ, tiˬ jawˇ-iˬ maˬ poˆ maˬ paˇ laˇ nya-eu, Miˬyehˇ jaˬ myawꞈ maˬ myawꞈ kʼmˬ-eu jeˬ pyeuꞈ-eu meh. Kʼoeˇ miˇ neh, guˆ-eu gaˆ-eu jeˬ-ahˇ dzeuˇ-awˇ Miˬyehˇ laꞈ kʼoeˇ ya jawˇ luꞈ-eu aˬ dui-aˬ, aˬ dui mehˬ shi jaˆ-eu noeˬ tmˬ duˬ-ahˇ ziꞈ dah ni tuˆ tehˬ taˬ-eu gʼaˇ duˬ nui ma ziꞈ dah ni jaˆ-eu ma.

¹⁹Saˇ baoˬ maˬ bi luˆ-iˇ nya ni shmˇ kuˆ seuˬ seuˬ ma neh gʼeu tehˬ taˬ-euˬ loꞈ-ehˇ, aˬ dui dehꞈ-eu jeˬ maˬ poˆ maˬ paˇ laˇ nya ni, aˬ dui-euˬ noeˬ tmˬ-eu jeˬ kʼoeˇ aˬ dui-ahˇ ziꞈ dah ni bi jaˆ-eu meh. Noeˬ tmˬ-eu jeˬ kʼoeˇ aˬ dui-euˬ nui ma-ahˇ ziꞈ dah ni bi pyeuꞈ laˇ-awˇ, aˬ dui noeˬ tmˬ taˬ-euˬ gʼaˬ pyeuꞈ-eu Yeˬsuˇ-aˬ, mˬ kʼoeˇ taˆ jaˆ-eu uˬ duˬ tahˬ nymˇ nymˇ ma-ahˇ taw taˬ-euˬ saˬ paˇ lawˆ kaˬ le dzeuˇ-awˇ, muiˬ-eu shawˇ-eu jawˇ duˬ-ahˇ uˇ keuˆ leˇ-eu meh.

²⁰Aˬ dui-euˬ mehˬ hu, muiˬ-eu shawˇ-eu jawˇ duˬ kʼoeˇ tsahˇ-ahˇ aˬ dui-euˬ dah zaˇ Yeˬsuˇ le uˇ-awˇ, Maˬlaˬkiˇsaˬdehˇ neh tawˬ dzeuˇ yaꞈ-euˬ gaˇ-ahˇ tawˬ-eu mˬ maˬ maˬ byaˆ zaˇ ziˇ piˇ ma yaw huiˬ gʼaˬ pyeuꞈ laˇ-euˬ meh.