Read Akha 1 Beˬtuˆluˆ 4 Bible Online

1 Beˬtuˆluˆ 4 - Akha bible

1 Beˬtuˆluˆ 4

¹Ka li-euˬ shiˬ shaˬ jiˇ gʼawˇ mawˇ kʼehˬ-eu kʼaˆ-eu jeˬ-ahˇ ya daˬ-euˬ-aˬ, naw maꞈ kʼawꞈ aˬ yawꞈ noeˬ-eu loꞈ-ehˇ noeˬ nya ni lehˬ hmˬ taˬ-awˬ. Aˬ jeˬ miˇ neh ehˇ naˇ, shiˬ shaˬ jiˇ gʼawˇ mawˇ kʼehˬ-eu kʼaˆ-eu jeˬ-ahˇ ya daˬ-euˬ tsawˇ haˬ-aˬ, iˬ baˇ-ahˇ ziˇ tsehˆ-euˬ meh.

²Naw maꞈ mehˬ hu paw dehꞈ daˆ leꞈ-eu tiˬ ziˇ, shiˬ shaˬ jiˇ-euˬ nui loˆ maˬ geuꞈ-ehˇ Miˬyehˇ-euˬ nui kʼahˇ geuꞈ-awˬ.

³Miˬyehˇ-ahˇ maˬ siˬ nya-eu tsawˇ haˬ deuˬ mˇ-eu jeˬ-ahˇ , dzeuˇ laˇ ngeh naw maꞈ mˇ dehˆ shaˇ dehˆ gʼaˬ-euˬ meh. Kaˬ miˬ sheu-eu, shiˬ shaˬ jiˇ nui loˆ geuꞈ-eu, jiˇ baˬ yehꞈ-eu, byawˬ gʼaˬ mo gʼa-eu, dzaˬ yehꞈ dawˇ yehꞈ dzaˬ boˆ dawˇ boˆ boˆ-eu, tahˬ paˬ aˬ ma mawˇ kawˇ-ahˇ uˬ duˬ tahˬ-eu, heu deuˬ laꞈ kʼoeˇ naw maꞈ dehꞈ dzeuˇ jawˇ dzeuˇ yaꞈ-euˬ meh.

⁴Ehˇ kʼawꞈ, Miˬyehˇ-ahˇ maˬ siˬ nya-eu tsawˇ haˬ kʼoeˇ deuˬ kʼaˇ dehꞈ mawꞈ-eu dehꞈ gaˇ nymˬ-mˇ naw maꞈ maˬ keuˬ leˇ-eu miˇ neh, aˬ yawꞈ maꞈ zahˬ leˇ-awˇ naw maꞈ-ahˇ yehˬ bawˬ sehˇ lu-ehˇ ehˇ-eu meh.

⁵Ehˇ kʼawꞈ, dehꞈ luꞈ-eu deuˬ-ahˇ maˬ ehˇ, shiˇ dzeuˇ-euˬ deuˬ-ahˇ maˬ ehˇ, yaˇ kʼaˬ daˇ nehˬ-eu lehˇ lehˬ hmˬ taˬ-euˬ gʼaˬ pyeuꞈ-eu Miˬyehˇ mehˬ shi, yawˬ ha neh kʼaˇ mˇ kʼaˇ shaˇ-euˬ gaˇ kawˆ deuˬ aˬ yawꞈ maꞈ ya dzawˇ mehˬ tehꞈ-a.

⁶Kʼoeˇ miˇ neh, dehꞈ luꞈ ngeh aˬ cawˬ-ahˇ yaˇ kʼaˬ kʼaˇ daˇ nehˬ-euˬ loꞈ-ehˇ bi daˇ nehˬ-euˬ deuˬ pyeuꞈ-eu shiˇ dzeuˇ-euˬ tsawˇ haˬ deuˬ-ahˇ, Ka li aˬ yawꞈ Laˬ kʼaˬ cehˇ-eu Guiˬ lahˬ dawˬ mehˬ-iˇ-euˬ meh. Aˬ yawꞈ maꞈ saꞈ laˇ laꞈ kʼoeˇ dehꞈ luꞈ ngeh, Miˬyehˇ kʼaˇ dehꞈ-eu loꞈ-ehˇ dehꞈ nya ni mehˬ nehˬ-iˇ-euˬ jeˬ pyeuꞈ-eu meh.

⁷Yawˬ jeˬ na luꞈ laꞈ kʼoeˇ aˇ saˬ saˬ-eu aˇ yamˬ peh le-euˬ meh. Kʼoeˇ miˇ neh, naw maꞈ guiˬ lahˬ shaˇ nya-eu gʼaˇ duˬ yawˬ ha-euˬ nui ma-ahˇ gʼaˬ leˇ ni nyehꞈ tehˬ-awˇ, yaw beuˇ beuˇ-ehˇ dehꞈ-awˬ.

⁸Dawˬ tawˆ luꞈ kʼoeˇ taˆ huiˬ dzehˬ-eu jeˬ-aˬ, naw maꞈ tiˬ gʼaˬ tiˇ gʼaˬ ziꞈ dah ni gaˬ-eu jeˬ pyeuꞈ-eu meh. Aˬ jeˬ miˇ neh ehˇ naˇ, gʼoeˇ-eu gaˬ-eu jeˬ-aˬ, myaˬ dui dui-eu iˬ baˇ-ahˇ dehˬ kaˬ zaꞈ nya-eu meh.

⁹Tiˬ gʼaˬ tiˇ gʼaˬ iˇ kahˇ-ahˇ ha ahˇ-awˬ. Dawˬ gʼoꞈ maˬ doˆ ni ha ahˇ-awˬ.

¹⁰Tiˬ gʼaˬ tiˇ gʼaˬ za taˬ-euˬ Miˬyehˇ neh biꞈ laꞈ-euˬ laꞈ sawˬ deuˬ-ahˇ yaw muiˬ paˬ-ehˇ jeˬ hmˬ-awˇ, aˬ cawˬ gʼaˇ duˬ gaˇ dahˇ tsoeˬ ni zmˬ-awˬ.

¹¹Mˬ maˬ maˬ byaˆ zaˇ ziˇ yaw shehꞈ kʼahˬ sehˇ hawˇ-eu baoˬ ahˇ-eu gʼaˬ pyeuꞈ-eu Miˬyehˇ-ahˇ, yawˬ jeˬ na luꞈ laꞈ kʼoeˇ Yeˬsuˇ Ka li-ahˇgʼoe-awˇ aˬ cawˬ ja ceuˬ ni, dawˬ mehˬ mehˬ-eu tsawˇ haˬ deuˬ Miˬyehˇ dawˬ kawˬ mehˬ-awˇ, aˬ cawˬ-ahˇ caw ba-eu tsawˇ haˬ deuˬ kʼawꞈ, Miˬyehˇ neh biꞈ-euˬ baoˬ-ahˇ gʼoe-awˇ caw ba-awˬ. Aˬ miˬ

¹²Gaˬ-eu aˬ yuiꞈ aˬ nyiˇ Ka li zaˬ deuˬ-oˇ, naw maꞈ-ahˇ lawˬ haw-eu shaˬ-eu zahˬ-eu jeˬ keuˆ le ngeh, tiˬ jawˇ-iˬ maˬ puˬ maˬ mawˇ haw-euˬ jeˬ keuˆ le-euˬ loꞈ-ehˇ taˬ zahˬ leˇ.

¹³Ka li ya shaˬ ya zahˬ gaˇ duˇ ni naw maꞈ kʼawꞈ ya shaˬ ya zahˬ-eu miˇ neh laˬ kʼaˬ cehˇ-awˬ. Aˬ jeˬ miˇ neh ehˇ naˇ, aˬ yawꞈ yaw shehꞈ kʼahˬ sehˇ laꞈ kʼoeˇ zaꞈ le ngeh, naw maꞈ laꞈ kʼaˬ ya cehˇ tehꞈ-a.

¹⁴Naw maꞈ Ka li-euˬ mehˬ nah caw teh-eu baˬ da neh aˬ cawˬ naw maꞈ-ahˇ ja bu ja doeˇ naˇ, naw maꞈ guiˬ lahˬ huiˬ-eu meh. Aˬ cawˬ kʼoeˇ loꞈ-ehˇ ehˇ laˇ-eu kʼoeˇ-aˬ, Miˬyehˇ-euˬ Yaw sahˇ pyeuꞈ-eu yaw shehꞈ kʼahˬ sehˇ huiˬ-eu Yaw sahˇ Miˬyehˇ naw maꞈ kʼoeˇ taˆ jawˇ luꞈ-eu saˇ kiˇ meh.

¹⁵Naw maꞈ tiˬ gʼaˬ na kʼehˬ-eu kʼaˆ-eu jeˬ-ahˇ ya daˬ-eu jeˬ-aˬ, aˬ cawˬ-ahˇ sehꞈ-eu, smˇ kʼoeˬ kʼoeˬ-eu, bahˬ dui dui-eu jeˬ mˇ-eu, aˬ cawˬ gaˇ mˇ gaˇ teh kawˆ-eu, heu loꞈ-ehˇ gʼeh-eu jeˬ-ahˇ mˇ-awˇ ya daˬ-eu jeˬ taˬ bi pyeuꞈ.

¹⁶Ehˇ kʼawꞈ, Ka li zaˬ pyeuꞈ-eu miˇ neh kʼehˬ-eu kʼaˆ-eu jeˬ-ahˇ ya daˬ-euˬ jeˬ ngeuˇ naˇ, kʼoeˇ loꞈ-ehˇ ya daˬ-eu baˬ da neh maˬ shaꞈ dawˇ ni, naw maꞈ Ka li-euˬ tsawˇ myahˇ ya pi luꞈ-eu baˬ da neh Miˬyehˇ-ahˇ ja ceuˬ-awˬ.

¹⁷Yaˇ kʼaˬ daˇ-eu aˇ yamˬ peh le-euˬ meh. Miˬyehˇ-euˬ tsawˇ haˬ deuˬ-ahˇ jeˬ huˬ daˇ-eu lehˇ gʼeh-eu meh. Aˬ dui-ahˇ jeˬ huˬ daˇ dahˬ beh naˇ, Miˬyehˇ jawˇ gaˇ neh oe-euˬ Laˬ kʼaˬ cehˇ-eu Guiˬ lahˬ dawˬ-ahˇ maˬ jah-eu tsawˇ haˬ deuˬ gʼaˇ duˬ aˬ joˆ-ehˇ aˇ saˬ saˬ nmˇ.

¹⁸Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Ka kʼoꞈ-eu jeˬ-ahˇ za nya ni, tsawˇ muiˬ deuˬ kʼawꞈ maˬ awˬ-eu-aˬ, Miˬyehˇ ehˇ dawˬ maˬ naˇ haˬ-eu, iˬ baˇ zaˬ deuˬ aˇ naˆ shaˬ nmˇ.”

¹⁹Kʼoeˇ miˇ neh, Miˬyehˇ nui ma tsaˬ-eu laꞈ kʼoeˇ kʼehˬ-eu kʼaˆ-eu jeˬ-ahˇ ya daˬ-eu tsawˇ haˬ deuˬ-aˬ, yawˬ ha neh mˇ-euˬ yaw muiˬ jeˬ-ahˇ gʼoe-eu laꞈ kʼoeˇ, saˇ jaˇ ziꞈ-eu Beh-euˬ Yaw sahˇ-ahˇ aˬ yawꞈ maꞈ-euˬ saꞈ laˇ a nehˬ taˬ-eu tsaˬ meh.