Read Akha 1 Beˬtuˆluˆ 5 Bible Online

1 Beˬtuˆluˆ 5 - Akha bible

1 Beˬtuˆluˆ 5

¹Ka li zaˬ aˇ muˇ-euˬ tsawˇ mawˬ tsawˇ kʼaˆ tiˬ gʼaˬ pyeuꞈ-eu ngaˇ, naw maꞈ-euˬ Ka li zaˬ aˇ muˇ laꞈ kʼoeˇ jawˇ-eu tsawˇ mawˬ tsawˇ kʼaˆ deuˬ-ahˇ heu loꞈ-ehˇ shaˇ-eu ma. Ngaˇ-aˬ, kʼehˬ-eu kʼaˆ-eu jeˬ-ahˇ Ka li ya daˬ-euˬ gaˇ kawˆ saˇ kiˇ kamˬ-eu tsawˇ haˬ pyeuꞈ-eu loꞈ-ehˇ, Miˬyehˇ tsawˇ haˬ zaˬ-ahˇ Ka li-euˬ yaw shehꞈ kʼahˬ sehˇ pah mehˬ le ngeh, ngaˇ kʼawꞈ yaw shehꞈ kʼahˬ sehˇ kʼoeˇ za ma. Ngaˇ naw maꞈ-ahˇ heu loꞈ-ehˇ shaˇ-eu ma.

²Miˬyehˇ neh naw maꞈ-ahˇ a nehˬ taˬ-euˬ yawˇ yawˇ maꞈ-ahˇ bo saˆ-awˬ. Miˬyehˇ geuꞈ mawꞈ-eu loꞈ-ehˇ laˬ kʼaˬ cehˇ-eu laꞈ kʼoeˇ bo saˆ-awˬ. Aˬ cawˬ kʼehˇ-eu miˇ neh bo saˆ-eu jeˬ taˬ bi pyeuꞈ. Aˇ poeˬ za ni tehꞈ-ehˇ mˇ-eu jeˬ kʼawꞈ taˬ bi pyeuꞈ. Nui ma keuˆ-eu laꞈ kʼoeˇ mˇ-eu jeˬ bi pyeuꞈ-awˬ.

³Miˬyehˇ neh nawˬ-ahˇ a nehˬ-awˇ bi bo saˆ-euˬ yawˇ yawˇ maꞈ kʼoeˇ taˆ zuiˆ gʼaˬ-eu taˬ leh jeh. Yawˇ yawˇ maꞈ nawˬ-ahˇ haw-awˇ dzaw geuꞈ paꞈ-ehˇ mˇ mehˬ shaˇ mehˬ mehˬ-awˬ.

⁴Yawˇ bo-eu deuˬ dawˬ tawˆ luꞈ kʼoeˇ taˆ uˆ lahˇ-eu Huiˬ-eu Yawˇ bo-eu gʼaˬ oe ngeh, tiˬ jawˇ-iˬ maˬ cehˇ-iˇ nya-eu yaw shehꞈ kʼahˬ sehˇ huiˬ-eu shuiˇ uˬ kʼoˆ-ahˇ naw maꞈ za tehꞈ-a.

⁵Kʼoeˇ loꞈ-ehˇ duˇ ni, zaˬ guˬ deuˬ gʼeh tsawˇ mawˬ deuˬ-euˬ ehˇ dawˬ naˇ haˬ-awˬ. Naw maꞈ dawˬ tawˆ luꞈ nui nahˬ nui yu ahˇ-eu laꞈ kʼoeˇ tiˬ gʼaˬ tiˇ gʼaˬ caw ba-awˬ. A jeˬ miˇ neh ehˇ naˇ, “Nui ma huiˬ-eu mahˇ-eu deuˬ-ahˇ Miˬyehˇ muiˇ-awˇ, nui nahˬ nui yu ahˇ-eu deuˬ-ahˇ gʼawˬ shaˬ gaˬ nehˬ-eu meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

⁶Miˬyehˇ neh noeˬ taˬ-euˬ aˇ yamˬ tsaˬ laˇ ngeh, aˬ cawˬ kʼoeˇ taˆ naw maꞈ-ahˇ ciˬ huiˬ ciˬ mahˇ nehˬ laꞈ ni, Miˬyehˇ-euˬ baoˬ huiˬ-eu aˬ laꞈ uˬ moˆ naw maꞈ nui ma nahˬ yu ni taˬ-awˬ.

⁷Naw maꞈ noeˬ shaˬ noeˬ zahˬ-eu dawˬ tawˆ luꞈ Miˬyehˇ-ahˇ a nehˬ-awˬ. Aˬ jeˬ miˇ neh ehˇ naˇ, aˬ yawꞈ naw maꞈ-ahˇ ngehˬ gʼeh bo saˆ luꞈ-eu meh.

⁸Yaw beuˇ beuˇ-ehˇ dehꞈ-awˇ, yaw zoˇ zoˇ-ehˇ haw tsoˆ taˬ-awˬ. Naw maꞈ-ahˇmuiˇ-eu Nehꞈ sahˬ paˬ-aˬ, tsawˇ haˬ-ahˇ kawꞈ sehꞈ dzaˬ-eu lehˇ joeˬ joeˬ-ehˇ cah-eu aˇ laˬ jaˬ shiˇ loꞈ-ehˇ naw maꞈ-ahˇ shahˇ luꞈ meh.

⁹Miˇ tsaˬ kʼoeˇ taˆ kʼaˇ jawˇ-eu Ka li-ahˇ jah-eu naw maꞈ-euˬ cawˬ dawˬ tawˆ luꞈ, kʼoeˇ loꞈ-ehˇ ya daˬ luꞈ meh lehˇ siˬ nya-awˇ, jah-eu nui ma ziꞈ dah ni taˬ-eu laꞈ kʼoeˇ, Nehꞈ sahˬ paˬ neh maˬ bi ju lahˇ ni leh jeh-awˬ.

¹⁰Ehˇ kʼawꞈ, naw maꞈ ti kʼehˬ tiˬ yamˬ kʼoeˇ loꞈ-ehˇ ya daˬ gʼaˬ ngeh jawˇ, Ka li laꞈ koeˇ aˬ yawꞈ-euˬ mˬ maˬ maˬ byaˆ zaˇ ziˇ ziꞈ-eu yaw shehꞈ kʼahˬ sehˇ bi za-eu gʼaˇ duˬ naw maꞈ-ahˇ kuˇ-euˬ gʼaˬ pyeuꞈ-eu aˬ dui-ahˇ gaˬ dui dui-eu Miˬyehˇ-aˬ, naw maꞈ-ahˇ bi byah laˇ tehꞈ-a. Aˬ yawꞈ naw maꞈ-ahˇ bi ziꞈ laˇ, bi kʼaˆ laˇ-eu uˬ taꞈ, Ka li-ahˇ jah-eu dawˬ pehˬ ziꞈ dah ni bi pyeuꞈ laˇ tehꞈ-a.

¹¹Uˆ lahˇ-eu baoˬ, Miˬyehˇ-ahˇ mˬ maˬ maˬ byaˆ zaˇ ziˇ jaˆ luꞈ-uˇ. Aˬ miˬ.

¹²Ngaˇ jah coeˇ-eu aˬ nyiˇ Siˬlaˇ-ahˇ gʼoe-awˇ, naw maꞈ-ahˇ sahˬ boꞈ heu taꞈ yaw nymˇ nymˇ-ehˇ boꞈ ahˇ laꞈ-eu ma. Naw maꞈ-ahˇ gʼaˬ biꞈ mawꞈ-eu miˇ neh sahˬboꞈ heu taꞈ ngaˇ boꞈ-euˬ ma. Sahˬ boꞈ heu taꞈ-aˬ, maˇ maˇ ni Miˬyehˇ-euˬ guiˬ lahˬ yaw dzahˇ pyeuꞈ-eu ma. Guiˬ lahˬ yaw dzahˇ heu-euˬ laꞈ kʼoeˇ ziꞈ dah ni jawˇ-awˬ.

¹³Naw maꞈ loꞈ-ehˇ Miˬyehˇ neh tseˇ doˆ taˬ-euˬ Ka li zaˬ aˇ muˇ pyeuꞈ-eu Baˬbuˇloˬ meuˬ-ahˇ jawˇ-eu Ka li zaˬ aˇ muˇ kʼoeˇ muˇ, naw maꞈ-ahˇ dawˬ cawˬ puˬ ahˇ laꞈ-euˬ meh. Ngaˬ li lehˇ ehˇ nya-eu Maˬkuˆ gʼeh naw maꞈ-ahˇ dawˬ cawˬ puˬ ahˇ laꞈ-euˬ meh.

¹⁴Ka li zaˬ cawˬ cawˬ gʼoeˇ-eu gaˬ-eu jeˬ-ahˇ taꞈ-eu shawˇ jehˆ ni gʼeh-eu mehˬ cuˇ cuˇ-eu jeˬ laꞈ kʼoeˇ, tiˬ gʼaˬ tiˇ gʼaˬ dawˬ cawˬ puˬ-awˇ ha-awˬ. Ka li-ahˇ taꞈ-eu tsawˇ haˬ pyeuꞈ-eu naw maꞈ dawˬ tawˆ luꞈ kʼoeˇ taˆ nui saˇ oꞈ-eu jeˬ jaˆ luꞈ-uˇ.