Read Akha 2 Beˬtuˆluˆ 1 Bible Online

2 Beˬtuˆluˆ 1 - Akha bible

2 Beˬtuˆluˆ 1

¹Yeˬsuˇ Ka li-euˬ zaˬ kʼaˆ hawˇ-eu gʼaˬ kʼehˇ pyeuꞈ-eu ngaˇ Siˇmoˬ Beˬtuˆluˆ, Miˬyehˇ hawˇ-eu Ka kʼoꞈ-eu gʼaˬ pyeuꞈ-eu Yeˬsuˇ Ka li-euˬ yaw tsaˬ yaw dawˇ jeˬ baˬ da neh nga maꞈ-euˬ jah-eu jeˬ-ahˇ duˇ-eu aˇ poeˬ kʼaˆ dui dui-eu jah-eu jeˬ za taˬ-euˬ deuˬ jawˇ gaˇ sahˬ boꞈ boꞈ ahˇ laꞈ-eu ma.

²Miˬyehˇ hawˇ-eu aˬ dui-euˬ Sahˬpaˬ Yeˬsuˇ-ahˇ naw maꞈ siˬ nya-eu jeˬ baˬ da neh, guiˬ lahˬ yaw dzahˇ hawˇ-eu nui saˇ oꞈ-eu jeˬ-ahˇ tiˬ byah tiˬ loꞈ za luꞈ-uˇ.

³Aˬ yawꞈ-euˬ yaw shehꞈ kʼahˬ sehˇ hawˇ-eu muiˬ dui byah dui dui-eu jeˬ-ahˇ aˬ dui za nya ni, aˬ dui-ahˇ kuˇ-euˬ gʼaˬ-ahˇ aˬ dui siˬ nya-eu laꞈ kʼoeˇ, Miˬyehˇ-ahˇ yaw zeu baw-awˇ dehꞈ nya-eu gʼaˇ duˬ, aˬ dui kʼaˇ loˬ-eu jeˬ dawˬ tawˆ luꞈ Miˬyehˇ-euˬ muiˬ-eu shawˇ-eu baoˬ aˬ dui-ahˇ biꞈ laꞈ-euˬ meh.

⁴Kʼoeˇ loꞈ-ehˇ mˇ nehˬ laꞈ-eu laꞈ kʼoeˇ, aˬ yawꞈ neh aˬ dui-ahˇ biꞈ ma lehˇ saˇ jaˇ dzaˬ taˬ-euˬ huiˬ dui poeˬ dui dui-eu laꞈ sawˬ aˬ dui-ahˇ biꞈ laꞈ-euˬ meh. Laꞈ sawˬ kʼoeˇ deuˬ-aˬ, miˇ tsaˬ heu kʼoeˇ taˆ jaˆ-eu shiˬ shaˬ jiˇ nui kʼahˇ baˬ da neh luˬ-iˇ seˇ-iˇ-eu jeˬ-ahˇ naw maꞈ buˬ-iˇ law-iˇ-awˇ, Miˬyehˇ-euˬ yaw dehꞈ dehꞈ-eu jeˬ-ahˇ naw maꞈ bi za-eu gʼaˇ duˬ biꞈ laˬ-euˬ laꞈ sawˬ pyeuꞈ-eu meh.

⁵Kʼoeˇ miˇ neh, naw maꞈ leh jeh dui dui-eu laꞈ kʼoeˇ, jah-eu jeˬ kʼoeˇ taˆ muiˬ-eu jaˬ-euˬ jeˬ bi lahˬ laˇ-awˬ. Muiˬ-eu jaˬ-eu jeˬ kʼoeˇ taˆ zaˬ siˬ tsawˇ gahˇ bi lahˬ laˇ-awˬ.

⁶Zaˬ siˬ tsawˇ gahˇ kʼoeˇ taˆ yawˬ ha-euˬ nui ma-ahˇ gʼaˬ leˇ-eu jeˬ bi lahˬ laˇ-awˬ. Yawˬ ha-euˬ nui ma-ahˇ gʼaˬ leˇ-eu jeˬ kʼoeˇ taˆ daˬ coeˇ oˇ coeˇ-eu jeˬ bi lahˬ laˇ-awˬ. Daˬ coeˇ oˇ coeˇ-eu jeˬ kʼoeˇ taˆ Miˬyehˇ-ahˇ yaw zeu baw-eu jeˬ bi lahˬ laˇ-awˬ.

⁷Miˬyehˇ-ahˇ yaw zeu baw-eu jeˬ kʼoe taˆ Ka li zaˬ cawˬ cawˬ gaˬ-eu jeˬ bi lahˬ laˇ-awˬ. Ka li za cawˬ cawˬ gaˬ-euˬ jeˬ kʼoeˇ taˆ gʼoeˇ-eu gaˬ-eu jeˬ bi lahˬ laˇ-awˬ.

⁸Heu deuˬ-aˬ, naw maꞈ loˬ dui dui-eu jeˬ pyeuꞈ-eu meh. Naw maꞈ heu deuˬ tiˬ byah tiˬ loꞈ ahˇ naˇ, gaˇ dahˇ tsoeˬ-eu tsawˇ haˬ pyeuꞈ laˇ-awˇ, aˬ dui-euˬ Sahˬpaˬ Yeˬsuˇ Ka li-ahˇ naw maꞈ siˬ nya-eu jeˬ byah dzehˬ laˇ tehꞈ-a.

⁹Ehˇ kʼawꞈ, heu deuˬ maˬ ahˇ-eu tsawˇ haˬ-aˬ, myaˆ nuiˆ maˬ haw mawˇ nya-ehˇ, dzeuˇ laˇ ngeh aˬ yawꞈ neh mˇ yaꞈ-euˬ iˬ baˇ deuˬ-ahˇ tsiˬ shawˇ nehˬ gʼaˬ-euˬ gaˇ kawˆ ngehˇ jiˇ tehꞈ-a.

¹⁰Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, Miˬyehˇ neh naw maꞈ-ahˇ kuˇ-awˇ tseˇ doˆ nehˬ laꞈ-euˬ jeˬ-ahˇ aˬ myah luꞈ ziꞈ dah ni tuˆ tehˬ taˬ nya ni, yaw kʼaˆ kʼaˆ-ehˇ leh jeh-awˬ. Kʼoeˇ loꞈ-ehˇ mˇ naˇ, jah-eu jeˬ-ahˇ naw maꞈ tiˬ jawˇ-iˬ maˬ byehˇ dzeh-aˇ.

¹¹Kʼoeˇ loꞈ-ehˇ mˇ-eu laꞈ kʼoeˇ, aˬ dui-ahˇ ka kʼoꞈ-eu gʼaˬ pyeuꞈ-eu Sahˬpaˬ Yeˬsuˇ Ka li-euˬ mˬ maˬ maˬ byaˆ zaˇ ziˇ Miˇkʼahˬ laꞈ kʼoeˇ uˇ leˇ-eu aˬ kawˬ-aˬ naw maꞈ tiˬ byah tiˬ loꞈ za tehꞈ-a.

¹²Kʼoeˇ miˇ neh, gaˇ kawˆ heu deuˬ-ahˇ naw maꞈ siˬ nya jiˇ-awˇ, yawˬ ha za taˬ-euˬ yaw tsaˬ yaw dawˇ jeˬ laꞈ kʼoeˇ naw maꞈ ziꞈ dah ni jawˇ luꞈ-eu kʼawꞈ, gaˇ kawˆ heu deuˬ ngaˇ naw maꞈ-ahˇ tiˬ kʼehˬ maˬ taˬ ni ja noeˬ nehˬ ma.

¹³Gaˇ kawˆ heu deuˬ naw maꞈ maˬ bi ngehˇ-eu gʼaˇ duˬ, ngaˇ kʼaˇ dehꞈ kʼoeˇ keuˆ ni naw maꞈ-ahˇ laˆ noeˬ-eu tsaˬ meh lehˇ ngaˇ noeˬ-eu ma.

¹⁴Aˬ dui-euˬ Sahˬpaˬ Yeˬsuˇ Ka li neh ngaˬ-ahˇ bya cehˆ ni ehˇ nehˬ laꞈ-euˬ loꞈ-ehˇ, buꞈ-iˇ cehˇ-iˇ nya-eu ngaˬ-euˬ shiˬ shaˬ jiˇ gʼawˇ mawˇ heu-ahˇ gʼawˬ myahˇ maˬ gʼeh-ehˇ ya lehˆ dzeh yaꞈ meh lehˇ ngaˇ siˬ nya ma.

¹⁵Ngaˇ shiˇ dzeuˇ ngeh jawˇ, gaˇ kawˆ heu deuˬ-ahˇ naw maꞈ maˬ bi ngehˇ ni aˬ myah luꞈ bi noeˬ keuˆ-eu gʼaˇ duˬ, ngaˇ kʼaˇ gʼeh nya-eu loꞈ-ehˇ leh jeh-awˇ ngehˬ gʼeh nehˬ yaꞈ ma.

¹⁶Aˬ dui-euˬ Sahˬpaˬ Yeˬsuˇ Ka li baoˬ tiˬ byah ni zaꞈ le tehꞈ-a lehˇ naw maꞈ-ahˇ nga maꞈ bi siˬ-eu heu-aˬ, aˬ cawˬ neh noeˬ doˆ-awˇ ja-euˬ gaˇ kawˆ yuˇ-awˇ bi siˬ-eu maˬ ngeuˇ. Aˬ yawꞈ-euˬ huiˬ dui mahˇ dui dui-eu baoˬ-ahˇ nga maꞈ myaˆ ya mawˇ duˬ-euˬ ma.

¹⁷Dawˬ tawˆ kʼoeˇ taˆ yaw shehꞈ kʼahˬ sehˇ huiˬ-eu gʼaˬ jawˇ gaˇ neh, “Heu-aˬ, ngaˇ nui kʼahˇ shiˇ-eu, ngaˇ gaˬ dui dui-eu ngaˬ Li ma” lehˇ ehˇ doˆ leꞈ-awˇ, Aˬda Miˬyehˇ neh aˬ yawꞈ-ahˇ taˬ huiˬ taˬ mahˇ-eu jeˬ hawˇ-eu yaw shehꞈ kʼahˬ sehˇ biꞈ nehˬ ngeh, nga maꞈ kʼoeˇ gaˇ jawˇ luꞈ-eu ma.

¹⁸Muiˬ-eu shawˇ-eu gawˬ jawˬ kʼoeˇ taˆ aˬ yawꞈ nehˬ-ehˇ nga maꞈ ya jawˇ luꞈ ngeh, teˇ saˇ kʼoeˇ saˇ mˬ-ahˇ neh mahˇ doˆ le gaˇ nga maꞈ-euˬ naˬ bawˇ neh ya gaˬ-euˬ ma.

¹⁹Kʼoeˇ miˇ neh, Miˬyehˇ gʼaˇ duˬ ngeh dah-eu deuˬ neh ngehˬ yaꞈ tmˇ yaꞈ-euˬ dawˬ deuˬ-ahˇ nga maꞈ jah dzehˬ laˇ-euˬ ma. Dawˬ kʼoeˇ deuˬ-ahˇ naw maꞈ yaw muiˬ paˬ-ehˇ naˇ haˬ geuꞈ-awˬ. Aˬ jeˬ miˇ neh ehˇ naˇ, kʼoeˇ-aˬ, Aˇ nah kʼoeˇ nah uˬ bya bya taw taw laˇ-awˇ naw maꞈ-euˬ nui ma laꞈ kʼoeˇ shawˬ ga shawˬ muiˇ tsehˬ laˇ ngeh keuˆ ni, yaw zahˇ laꞈ kʼoeˇ yaw shehꞈ bya nehˬ laꞈ-eu tsiˇ kʼmˬ-ahˇ duˇ-eu meh.

²⁰Ehˇ kʼawꞈ, dawˬ tawˆ luꞈ kʼoeˇ taˆ heu loꞈ-ehˇ jeˬ hu siˬ nya taˬ-awˬ. Jaˇliꞈ laꞈ kʼoeˇ Miˬyehˇ gʼaˇ duˬ ngehˬ dah taˬ-euˬ dawˬ-ahˇ, tsawˇ haˬ tiˬ gʼaˬ-iˬ yawˬ haˇ yawˬ ha dawˬ tsuiꞈ maˬ yuˇ doˆ mehˬ nya-aˇ lehˇ siˬ nya taˬ-awˬ.

²¹Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-euˬ dawˬ aˬ geu dawˬ maˬ kaˬ, tsawˇ haˬ zaˬ-euˬ nui ma laꞈ kʼoeˇ neh doˆ laˇ-euˬ jeˬ maˬ ngeuˇ-a. Ehˇ kʼawꞈ, Miˬyehˇ jawˇ gaˇ neh doˆ le-euˬ dawˬ deuˬ-ahˇ tsawˇ haˬ zaˬ ngehˬ dah ngeh, aˬ yawꞈ maꞈ-ahˇ Muiˬ-eu shawˇ-eu Yaw sahˇ Miˬyehˇ uˆ lahˇ-awˇ bi ngehˬ-eu meh.