Read Akha 2 Beˬtuˆluˆ 2 Bible Online

2 Beˬtuˆluˆ 2 - Akha bible

2 Beˬtuˆluˆ 2

¹Aˇ hu ba-euˬ tsawˇ haˬ deuˬ jawˇ gaˇ maˬ ngeuˇ-eu Miˬyehˇ gʼaˇ duˬ ngehˬ dah-eu deuˬ doˆ le haw-euˬ loꞈ-ehˇ, naw maꞈ jawˇ gaˇ maˬ ngeuˇ-eu mehˬ-eu tsoˆ-eu saˬ laˬ deuˬ doˆ le tehꞈ-a. Yaw cawˆ jeˬ hawˇ-eu maˬ tsaˬ-eu jah-eu jeˬ aˬ yawꞈ maꞈ hehˇ ahˇ laꞈ-awˇ, aˬ yawꞈ maꞈ-ahˇ ka kʼoꞈ nehˬ-euˬ Sahˬpaˬ-ahˇ maˬ siˬ lehˇ ehˇ tehꞈ-a. Kʼoeˇ miˇ neh, aˬ yawꞈ maꞈ kʼoeˇ taˆ luˬ-iˇ seˇ-iˇ-eu jeˬ yaw kawˇ-ehˇ keuˆ le ni yawˬ haˇ ha mˇ gaˇ duˇ-eu meh.

²Ehˇ kʼawꞈ, aˬ yawꞈ maꞈ maˬ muiˬ maˬ jaˬ-eu jeˬ mˇ-eu mehˬ nah tsawˇ haˬ gʼawˬ mya ni caw teh gʼeh tehꞈ-a. Aˬ yawꞈ maꞈ kʼoeˇ loꞈ-ehˇ mˇ-eu baˬ da neh, yaw tsaˬ yaw dawˇ Gaˇma-ahˇ aˬ cawˬ ja doeˇ tehꞈ-a.

³Maˬ ngeuˇ-eu mehˬ-eu tsoˆ-eu saˬ laˬ kʼoeˇ deuˬ pyuˇ shuiˇ myawˬ gahˬ-ahˇ nui kʼahˇ jaˆ-eu miˇ neh, naw maꞈ-ahˇ maˬ ngeuˇ gaˇ keuˆ ni ja mehˬ-awˇ aˬ yawꞈ maꞈ gʼaˇ duˬ jiˇ jeuˬ ahˇ ni mˇ tehꞈ-a. Aˬ yawꞈ maꞈ-ahˇ Yaˇ kʼaˬ daˇ nehˬ-eu gʼaˬ aˇ hu ba neh lehˬ hmˬ dah taˬ-awˇ, aˬ yawꞈ maꞈ-ahˇ laˆ cawˆ-eu gʼaˬ maˬ yuꞈ kʼaˆ ni yaw noeˬ-ehˇ jawˇ luꞈ meh.

⁴Aˬ jeˬ miˇ neh ehˇ naˇ, iˬ baˇ mˇ-eu mˬ taˆ gʼaˬ kʼehˇ deuˬ-ahˇ keuˆ ni Miˬyehˇ maˬ taˬ nehˬ-ehˇ shiˬ buiˇ lah ma-ahˇ biˬ ahˇ-awˇ, Yaˇ kʼaˬ daˇ-eu Aˇ nah-ahˇ dawˬ luꞈ-eu meh.

⁵Aˇ hu ba miˇ tsaˬ kʼoeˇ taˆ dehꞈ-eu deuˬ-ahˇ kʼawꞈ, Miˬyehˇ maˬ taˬ nehˬ-ehˇ, Miˬyehˇ-ahˇ yaw zeu maˬ baw-eu tsawˇ haˬ deuˬ-ahˇ iˇ cuꞈ bi dahˬ pymˬ-euˬ meh. Yaw tsaˬ yaw dawˇ jeˬ mehˬ-eu gʼaˬ pyeuꞈ-eu Noˇaˬ hawˇ-eu tsawˇ haˬ shiꞈ gʼaˬ-ahˇ tehꞈ-ehˇ aˬ yawꞈ ka kʼoꞈ-euˬ meh.

⁶Sawˇdoˬ meuˬ hawˇ-eu Gawˇmawˇlaˆ meuˬ-ahˇ kʼawꞈ, miˬ dzaˬ bi puiˆ byoˆ-euˬ meh. Kʼoeˇ-aˬ, Miˬyehˇ-ahˇ yaw zeu maˬ baw-eu tsawˇ haˬ deuˬ kʼoeˇ taˆ aˬ joˆ-ehˇ keuˆ le-eu gaˇ kʼawˆ, aˬ yawꞈ maꞈ bi dzaw geuꞈ-eu gʼaˇ duˬ mˇ mehˬ-euˬ jeˬ pyeuꞈ-eu meh.

⁷Haiˬ-eu tsawˇ haˬ kʼoeˇ deuˬ jawꞈ dui dui-eu jeˬ mˇ gaˇ noeˬ shaˬ dui dui-euˬ tsawˇ muiˬ tiˬ gʼaˬ pyeuꞈ-eu Lawˇtaˬ-ahˇ tehꞈ-ehˇ, aˬ yawꞈ ka kʼoꞈ-euˬ meh.

⁸Tsawˇ muiˬ kʼoeˇ gʼaˬ aˬ yawꞈ maꞈ nehˬ-ehˇ jawˇ-awˇ, aˬ yawꞈ maꞈ yaw haiˬ jeˬ mˇ gaˇ ya gaˬ yaw mawˇ-euˬ miˇ neh tiˬ nah saˇ-iˬ tiˬ nah nui ma shaˬ zahˬ mˇ dui dui-euˬ meh.

⁹Kʼoeˇ miˇ neh, Yaˇ kʼaˬ daˇ-eu Aˇ nah gʼaˇ duˬ, Miˬyehˇ-ahˇ yaw zeu baw-eu tsawˇ haˬ deuˬ-ahˇ aˬ joˆ-ehˇ bi buˬ-iˇ-eu gaˇ kawˆ hawˇ-eu, haiˬ-eu tsawˇ haˬ deuˬ-ahˇ aˬ joˆ-ehˇ ya kʼehˬ ya kʼaˆ nehˬ-eu gaˇ kawˆ, Miˬyehˇ siˬ nya meh.

¹⁰Jawꞈ dui dui-eu shiˬ shaˬ jiˇ-euˬ nui kʼahˇ mehˬ nah caw teh-awˇ Miˬyehˇ uˆ lahˇ-eu jeˬ-ahˇ yehˬ bawˬ sehˇ lu-ehˇ ehˇ-eu deuˬ-ahˇ-aˬ, aˬ cawˬ-ahˇ naˆ maˬ tseˇ aˬ joˆ-ehˇ ya kʼehˬ ya kʼaˆ nehˬ-eu gaˇ kawˆ Miˬyehˇ siˬ nya meh. Maˬ ngeuˇ-eu mehˬ-eu tsoˆ-eu saˬ laˬ kʼoeˇ deuˬ-aˬ, guˆ-eu nui ma maˬ ahˇ ni, kʼaˬ duˬ ni mehˬ-eu tsoˆ-eu meh. Mˬ kʼoeˇ taˆ yaw shehꞈ kʼahˬ sehˇ huiˬ-eu deuˬ-ahˇ kʼawꞈ yaw zeu maˬ baw-eu uˬ taꞈ, yehˬ bawˬ sehˇ lu-ehˇ ehˇ-eu meh.

¹¹A yawꞈ maꞈ naˆ maˬ tseˇ gʼaˬ byah dzehˬ-awˇ baoˬ huiˬ dzehˬ-eu deuˬ pyeuꞈ-eu mˬ taˆ gʼaˬ kʼehˇ deuˬ kʼawꞈ, Miˬyehˇ mehˬ shi mˬ kʼoeˇ taˆ yaw shehꞈ kʼahˬ sehˇ huiˬ-eu kʼoeˇ deuˬ-ahˇ yaw lehˬ maˬ poˆ-a.

¹²Ehˇ kʼawꞈ, maˬ ngeuˇ-eu mehˬ-eu tsoˆ-eu saˬ laˬ heu deuˬ-aˬ, nyehꞈ-awˇ bi sehꞈ dzaˬ-eu gʼaˇ duˬ dehꞈ le-euˬ jeˬ zaˬ loꞈ-ehˇ, shaˇ noeˬ shaˇ sawˇ-eu jeˬ maˬ baw ni mˇ-eu shaˇ-eu meh. Yawˬ ha maˬ siˬ nya-eu jeˬ-ahˇ dawˬ doeˇ ngehˬ daˆ-awˇ ceh cawˬ cawˬ-eu meh. Aˬ yawꞈ maꞈ-aˬ, bawˇ tsahˬ jeˬ zaˬ loꞈ-ehˇ laˆ cawˆ nehˬ gaˇ ya daˬ tehꞈ-a.

¹³Aˬ yawꞈ maꞈ neh aˬ cawˬ-ahˇ yaw doeˇ jahˇ-awˇ kʼaˇ bi daˬ-euˬ loꞈ-ehˇ, aˬ yawꞈ maꞈ ya daˬ poˆ tehꞈ-a. Nah gʼahˇ nah gaˆ-ehˇ yawˬ ha-euˬ shiˬ shaˬ jiˇ nui kʼahˇ ya mˇ byah-eu jeˬ-ahˇ laˬ kʼaˬ cehˇ-eu jeˬ lehˇ aˬ yawꞈ maꞈ sawˇ-eu meh. Aˬ yawꞈ maꞈ-aˬ, naw maꞈ nehˬ-ehˇ dzaˬ taꞈ dawˇ taꞈ ngeh daˬ ga-awˇ shaꞈ dawˇ dui dui paˬ-ehˇ gʼeh-eu, aˬ myah luꞈ jaˬ myawꞈ mehˇ shuiˇ-ahˇ laˬ kʼaˬ cehˇ-eu tsawˇ haˬ deuˬ meh.

¹⁴Aˬ yawꞈ maˬ-euˬ myaˆ nuiˆ-aˬ, aˬ cawˬ nehˬ-ehˇ joe mawꞈ-eu nui ma ahˇ-eu zaˬ miˬ zaˬ deuˬ-ahˇ tehꞈ-ehˇ haw mawꞈ-eu meh. Iˬ baˇ mˇ dehˆ-euˬ maˬ baw-a. Gʼaˬ baˬ-eu tsawˇ haˬ deuˬ-ahˇ lahˇ ju-ahˇ teh paꞈ-eu meh. Pyuˇ shuiˇ myawˬ gahˬ-ahˇ mehˇ juiˇ juiˇ dui dui-eu meh. Aˬ yawꞈ maꞈ-aˬ, Miˬyehˇ neh yaˬ kʼehˇ bi yaˬ-euˬ tsawˇ haˬ meh.

¹⁵Gaˇ ma yaw dawˇ-ahˇ byehˇ dzeh-awˇ, gaˇ bahˬ bahˬ-iˇ-euˬ tsawˇ haˬ pyeuꞈ-eu meh. Maˬ tsaˬ-eu jeˬ mˇ-awˇ za-euˬ pyuˇ shuiˇ-ahˇ nui kʼahˇ jaˆ-eu gʼaˬ pyeuꞈ-eu Beˬyoˇ-euˬ aˬ li Baˬlamˬ-euˬ pehˬ zaˇ-ahˇ caw teh luꞈ-eu meh.

¹⁶Aˬ yawꞈ-euˬ iˬ baˇ baˬ da neh aˬ yawꞈ gʼaˇ duˬ shaˬ laˇ-euˬ meh. Aˬ yawꞈ-euˬ mahˬ tahˬ laˆ dawˬ ngehˬ doˆ laˇ-awˇ, Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu Baˬlamˬ neh aˬ yawꞈ yaw uˬ loꞈ-ehˇ mˇ luꞈ shaˇ luꞈ-eu jeˬ-ahˇ laˆ naˬ-euˬ meh.

¹⁷Maˬ ngeuˇ-eu mehˬ-eu tsoˆ-eu saˬ laˬ kʼoeˇ deuˬ-aˬ, iˇ cuꞈ gui-iˇ-euˬ lawˇ gawˆ hawˇ-eu, jaˬ lehˇ lehˇ ma neh bi hehˇ dzaˬ gʼeh-euˬ mˬ dmˇ-ahˇ duˇ-eu meh. Zahˇ dui dui-eu yaw zahˇ laꞈ kʼoeˇ aˬ yawꞈ maꞈ gʼaˇ duˬ Miˬyehˇ jawˇ zaˇ laˆ saˆ taˬ-euˬ meh.

¹⁸Aˬ yawꞈ maꞈ aˬ dzawˬ aˇ gah-euˬ dawˬ ngehˬ-awˇ kʼahˬ sehˇ jehˆ-eu laꞈ kʼoeˇ, yaw lehˬ jeˬ mˇ mˇ-ehˇ dehꞈ-eu tsawˇ haˬ deuˬ-euˬ baꞈ dzah laꞈ kʼoeˇ dzeuˇ-iˇ ni leh jeh dahˬ beh luꞈ-eu tsawˇ haˬ deuˬ-ahˇ, shiˬ shaˬ jiˇ-euˬ nui kʼahˇ mˇ-eu jeˬ-ahˇ gʼoe-awˇ lahˇ ju kʼmˇ-eu meh.

¹⁹Yawˬ ha luˬ-iˇ seˇ-iˇ-eu jeˬ-euˬ zaˬ kʼaˆ geuꞈ geuꞈ-ehˇ shaˬ luꞈ ngeh, aˬ cawˬ-ahˇ bi buˬ-iˇ nya ma lehˇ aˬ yawꞈ maꞈ saˇ jaˇ dzaˬ-eu meh. Aˬ jeˬ miˇ neh ehˇ naˇ, tsawˇ haˬ tiˬ gʼaˬ-aˬ, yawˬ ha-ahˇ kʼaˇ uˆ gʼaˬ taˬ-euˬ jeˬ-euˬ zaˬ kʼaˆ pyeuꞈ-eu meh.

²⁰Tsawˇ haˬ zaˬ-aˬ, ka kʼoꞈ-eu gʼaˬ pyeuꞈ-eu aˬ dui-euˬ Sahˬpaˬ Yeˬsuˇ Ka li-ahˇ siˬ nya-eu baˬ da neh, miˇ tsaˬ heu kʼoeˇ taˆ gʼaˬ kʼaˆ luꞈ-eu jawꞈ dui dui-eu jeˬ mˇ gaˇ ya buˬ-iˇ gʼaˬ miˇ tsa, kʼoeˇ neh tiˬ poˆ paˇ bi gʼaˬ leˇ shaw naˇ, yaw beh poˆ naˆ maˬ tseˇ doeˇ dui dui tehꞈ-a.

²¹Yaw tsaˬ yaw dawˇ gaˇ ma-ahˇ siˬ nya gʼaˬ miˇ tsa, aˬ yawꞈ maꞈ-ahˇ biꞈ taˬ-euˬ muiˬ-eu shawˇ-eu Miˬyehˇ-euˬ dawˬ-ahˇ byehˇ dzeh-euˬ kʼoeˇ-aˬ, yaw tsaˬ yaw dawˇ gaˇ ma-ahˇ tiˬ poˆ-iˬ maˬ siˬ nya-ehˇ dehꞈ ngeh naˆ maˬ tseˇ doeˇ dzehˬ-eu meh.

²²Aˬ yawꞈ maꞈ kʼoeˇ loꞈ-ehˇ pyeuꞈ-eu kʼoeˇ-aˬ, “Aˬ kuiˬ yawˬ ha uˬ pehꞈ dzaˬ poˆ-eu” lehˇ ehˇ-eu dawˬ daˬ hawˇ-eu,“Iˇ cuꞈ dzuiꞈ shawˇ nehˬ-euˬ aˬ zaꞈ lah shiˇ paˇ lah poˆ-eu” lehˇ ehˇ-eu dawˬ daˬ tsaˬ gaˇ duˇ-eu meh.