Read Akha Yaˇ kʼaˬ daˇ 15 Bible Online

Yaˇ kʼaˬ daˇ 15 - Akha bible

Yaˇ kʼaˬ daˇ 15

¹Aˇ yamˬ ui cuiˆ myahˇ laˇ-awˇ, cehˇ laˆ luiˆ yamˬ tsaˬ laˇ ngeh, Saˬsoˬ ciꞈ myehꞈ ciꞈ zaˬ tiˬ mawˇ yuˇ-awˇ, aˬ yawꞈ-euˬ miˬ zaˬ jawˇ gaˇ iˇ-euˬ meh. “Ngaˬ-euˬ miˬ zaˬ yuꞈ-eu lawˆ-ahˇ bi uˇ-iˇ laꞈ” lehˇ, aˬ yawꞈ-euˬ tsawˇ mawˬ-ahˇ aˬ yawꞈ ehˇ nehˬ-euˬ meh. Ehˇ kʼawꞈ, aˬ yawꞈ-euˬ aˬ mawˬ aˬ yawꞈ-ahˇ kuˆ lawˆ laꞈ kʼoeˇ maˬ bi uˇ leˇ-a.

²Saˬsoˬ-ahˇ aˬ yawꞈ ehˇ nehˬ-eu, “Aˬ yawꞈ-ahˇ nawˇ aˬ diˇ aˬ maˇ bye-eu nga lehˇ ngaˇ noeˬ-awˇ, nawˬ-euˬ cawˬ-ahˇ bi mˇ dzaˬ-iˇ-euˬ ma. Ehˇ kʼawꞈ, nawˬ-euˬ ciˇ ma gʼaˬ aˇ gʼehˇ muiˬ dzehˬ meh. Aˬ yawꞈ-ahˇ sheuˬ-awˬ.”

³Saˬsoˬ ehˇ-eu, “Nymˬ-mˇ poˆ jawˇ-aˬ, Piˇliˇtiˆ tsawˇ haˬ deuˬ-ahˇ ngaˇ aˬ joˆ-ehˇ jahˇ nehˬ kʼawꞈ, ngaˬ-ahˇ neh ahˇ-eu maˬ ngeuˇ de.”

⁴Kʼoeˇ naˇ, aˬ yawꞈ iˇ-awˇ, kʼaˬ yehˇ smˬ yaˇ mawˇ nyehꞈ-awˇ, nyiˬ mawˇ tiˬ gaˇ dawˬ miˬ tmˬ tsaꞈ nehˬ-awˇ, dawˬ miˬ-ahˇ miˬ dzaˬ miˬ doꞈ paꞈ tawꞈ nehˬ-euˬ meh.

⁵Kʼoeˇ naˇ, miˬ dzaˬ miˬ doꞈ kʼoeˇ deuˬ-ahˇ miˬ dzaˬ ciˆ doꞈ nehˬ-awˇ, Piˇliˆtiˆ tsawˇ haˬ deuˬ-euˬ deh yaˇ paw pyehˬ gʼeh-euˬ meh. Kʼoeˇ loꞈ-ehˇ jahˇ-awˇ, yehˬ gʼaˬ taˬ-euˬ cehˇ deuˬ maˬ ehˇ, maˬ ya yehˬ dah-euˬ cehˇ deuˬ maˬ ehˇ, saˬ loˬ yaˇ kmˇ deuˬ maˬ ehˇ, bi puiˆ dzaˬ jiˇ-euˬ meh.

⁶Aˬ suˇ gʼaˬ neh kʼoeˇ loꞈ-ehˇ jahˇ-euˬ gaˇ kawˆ, Piˇliˇtiˆ tsawˇ haˬ deuˬ naˇ haˬ ngeh, Tmˇnahˬ meuˬ-ahˇ jawˇ-eu Saˬsoˬ-euˬ aˬ mawˬ neh, Saˬsoˬ-euˬ miˬ zaˬ-ahˇ Saˬsoˬ-euˬ cawˬ-ahˇ bi mˇ dzaˬ iˇ-euˬ miˇ neh, Saˬsoˬ nui ma pehˇ-eu laꞈ kʼoeˇ kʼoeˇ loꞈ-ehˇ jahˇ-euˬ gaˇ kawˆ ya siˬ-euˬ meh. Kʼoeˇ ngeh, Piˇliˇtiˆ tsawˇ haˬ deuˬ iˇ-awˇ, zaˬ miˬ kʼoeˇ gʼaˬ-ahˇ miˬ dzaˬ dzah puiˆ sehꞈ-awˇ, aˬ yawꞈ-euˬ aˬ da-euˬ nymˇ-ahˇ miˬ dzaˬ keuˬ dzeh-euˬ meh.

⁷Aˬ yawꞈ maꞈ-ahˇ Saˬsoˬ ehˇ nehˬ-eu, “Naw maꞈ teu loꞈ-ehˇ jahˇ te loˇ. Toˆ-ehˇ ngeuˇ naˇ, naw maꞈ-ahˇ ngaˇ maˬ ya jahˇ kʼoꞈ kʼoeˇ keuˆ ni maˬ juˬ.”

⁸Aˬ yawꞈ maꞈ-ahˇ aˬ yawꞈ diˬ-awˇ, gʼawˬ mya gʼaˬ bi diˬ sehꞈ-euˬ meh. Kʼoeˇ naˇ, Eˇtamˬ lo guˇ-ahˇ jaˆ-eu lo kʼahˬ-ahˇ Saˬsoˬ jawˇ leˇ-euˬ meh.

⁹Piˇliˇtiˆ tsawˇ haˬ deuˬ laˇ-awˇ, Yuˇdaˆ miˇ kʼahˬ-ahˇ taˆ tsoˆ-awˇ, Leˬhiˇ meuˬ-ahˇ guiˇ deuˆ le-euˬ meh.

¹⁰Yuˇdaˆ tsawˇ haˬ deuˬ aˬ yawꞈ maꞈ-ahˇ naˇ haˬ-eu, “Aˬ jeˬ miˇ neh nga maꞈ-ahˇ guiˇ deuˆ laˇ teˬ.” Aˬ yawꞈ maꞈ ehˇ-eu, “Nga maꞈ Saˬsoˬ-ahˇ nyehꞈ-awˇ, nga maꞈ-ahˇ aˬ yawꞈ neh jahˇ nehˬ laꞈ-euˬ loꞈ-ehˇ, aˬ yawꞈ-ahˇ paˇ jahˇ kʼoꞈ nehˬ-eu lehˇ laˇ-euˬ ma.”

¹¹Kʼoeˇ ngeh, Yuˇdaˆ tsawˇ haˬ smˬ heˇ gʼaˬ Eˇtamˬ lo guˇ-ahˇ jaˆ-eu lo kʼahˬ-ahˇ le-awˇ, Saˬsoˬ-ahˇ ehˇ nehˬ-eu, “Piˇliˇtiˆ tsawˇ haˬ deuˬ aˬ dui-ahˇ uˆ lahˇ luꞈ-eu nawˇ maˬ siˬ nya te loˇ. Nawˇ nga maꞈ-ahˇ aˬ joˆ-ehˇ jahˇ nehˬ laꞈ te.” Saˬsoˬ ehˇ-eu, “Aˬ yawꞈ maꞈ ngaˬ-ahˇ jahˇ nehˬ laꞈ-euˬ loꞈ-ehˇ, aˬ yawꞈ maꞈ-ahˇ ngaˇ paˇ jahˇ kʼoꞈ nehˬ-euˬ ma.”

¹²Aˬ yawꞈ maꞈ ehˇ-eu, “Nawˬ-ahˇ paꞈ-awˇ, Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ a nehˬ-eu lehˇ nga maꞈ laˇ-euˬ ma.” Saˬsoˬ ehˇ-eu,“Naw maꞈ ngaˬ-ahˇ maˬ sehꞈ lehˇ saˇ jaˇ jeˬ hu dzaˬ-awˬ.”

¹³Aˬ yawꞈ maꞈ ehˇ-eu, “Nga maꞈ nawˬ-ahˇ maˬ sehꞈ. Nawˬ-ahˇ paꞈ-awˇ, Piˇliˇtiˆ tsawˇ haˬ deuˬ-ahˇ a nehˬ-eu tehꞈ ma.” Kʼoeˇ naˇ, aˬ yawꞈ maꞈ aˬ yawꞈ-ahˇ aˇ caˆ yaw shuiꞈ nyiˬ caˆ neh paꞈ-awˇ, lo kʼahˬ-ahˇ neh sheuˬ kʼoꞈ laꞈ-euˬ meh.

¹⁴Leˬhiˇ meuˬ-ahˇ aˬ yawꞈ iˇ keuˆ ngeh, Piˇliˇtiˆ tsawˇ haˬ deuˬ guˇ guˇ-ehˇ aˬ yawꞈ jawˇ gaˇ cehˆ gʼeh leꞈ-euˬ meh. Ja pyuˬ ni, Sahˬpaˬ Miˬyehˇ-euˬ baoˬ aˬ yawꞈ-ahˇ gʼaˬ bi kʼaˆ laˇ-awˇ, saˬ kahˇ-ahˇ miˬ dzaˬ puiˆ tsehˆ-eu loꞈ-ehˇ, aˬ yawꞈ-euˬ aˬ laꞈ-ahˇ paꞈ taˬ-euˬ aˇ caˆ-ahˇ aˬ yawꞈ behˇ tsehˆ-euˬ meh.

¹⁵Kʼoeˇ ngeh, shiˇ-euˬ maˬ myahˇ laˇ-euˬ mahˬ tahˬ laˆ tiˬ mawˇ-euˬ mehˬ oꞈ shaˬ yoeˬ tiˬ hmˬ aˬ yawꞈ mawˇ-euˬ meh. Aˬ yawꞈ awˆ kʼoꞈ-awˇ, shaˬ yoeˬ kʼoeˇ yuˇ-awˇ, tsawˇ haˬ tiˬ heˇ gʼaˬ sehꞈ-euˬ meh.

¹⁶Kʼoeˇ naˇ, Saˬsoˬ heu loꞈ-ehˇ caˇ dawˬ caˇ-euˬ meh. “Mahˬ tahˬ laˆ-euˬ mehˬ oꞈ neh, tsawˇ haˬ tiˬ heˇ gʼaˬ sehꞈ-euˬ ma. Mahˬ tahˬ laˆ-euˬ mehˬ oꞈ neh, aˬ yawꞈ maꞈ-ahˇ sehꞈ gahˬ-euˬ ma.”

¹⁷Kʼoeˇ naˇ, mahˬ tahˬ laˆ-euˬ mehˬ oꞈ kʼoeˇ aˬ yawꞈ biˬ dzeh-euˬ meh. Kʼoeˇ loꞈ-ehˇ pyeuꞈ laˇ-euˬ jawˇ duˬ kʼoeˇ tsahˇ-ahˇ, Laˬmaˆleˬhiˇ[6] lehˇ kuˇ-euˬ meh.

¹⁸Saˬsoˬ iˇ cuꞈ mehꞈ dui dui laˇ-awˇ, Sahˬpaˬ Miˬyehˇ-ahˇ kuˇ-awˇ ehˇ-eu, “Heu loꞈ-ehˇ huiˬ-eu gʼaˬ leˇ-eu jeˬ nawˇ ngaˬ-ahˇ biꞈ laꞈ-euˬ meh. Nymˬ-mˇ ngaˇ iˇ cuꞈ mehꞈ-eu shiˇ leˇ-eu keuˆ laˇ-euˬ miˇ neh, lawˇ ciꞈ zaˬ pyeuꞈ-eu Piˇliˇtiˆ tsawˇ haˬ heu deuˬ neh bi nyehꞈ mi-eu lehˇ ma loˇ.”

¹⁹Kʼoeˇ ngeh, Leˬhiˇ meuˬ miˇ tsaˬ-ahˇ Miˬyehˇ maˇ byoe bi dahˇ laˇ-awˇ, kʼoeˇ gaˇ neh iˇ cuꞈ bi doˆ laˇ-euˬ meh. Iˇ cuꞈ kʼoeˇ Saˬsoˬ dawˇ-awˇ, gʼaˬ paˇ kʼoꞈ laˇ-euˬ meh. Kʼoeˇ miˇ neh, iˇ cuꞈ iˇ beuˆ kʼoeˇ beuˆ-ahˇ, Haˬkawˇleˬ[7] lehˇ kuˇ-euˬ meh. Iˇ cuꞈ iˇ beuˆ kʼoeˇ beuˆ iˬ nah keuˆ ni kʼoeˇ gaˇ jaˆ-eu meh.

²⁰Piˇliˇtiˆ tsawˇ haˬ deuˬ miˇ kʼahˬ kʼoeˇ kʼahˬ-ahˇ uˆ lahˇ-eu aˇ nah aˇ yamˬ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ nyiˬ tseˇ kʼoꞈ keuˆ ni Saˬsoˬ sheuˬ gʼeh-euˬ meh.