Read Akha Yaˇ kʼaˬ daˇ 19 Bible Online

Yaˇ kʼaˬ daˇ 19 - Akha bible

Yaˇ kʼaˬ daˇ 19

¹Iˇsaˬleˬlaˆ tsawˇ jeuˬ sahˬ paˬ maˬ baw-eu aˇ nah aˇ yamˬ kʼoeˇ yamˬ laꞈ kʼoeˇ, Eˇpaˬleˬ miˇ kʼahˬ gawˬ jawˬ gawˬ duˇ-ahˇ, Leˬbiˇ tsawˇ haˬ tiˬ gʼaˬ jawˇ-euˬ meh. Yuˇdaˆ miˇ kʼahˬ Behˬlehˬhehˬ meuˬ-ahˇ jawˇ-eu zaˬ miˬ zaˬ tiˬ gʼaˬ-ahˇ aˬ yawꞈ ma nyiˇ laˬ-euˬ meh.

²Ma nyiˇ kʼoeˇ gʼaˬ aˬ yawꞈ-ahˇ nui ma pehˇ-awˇ, Behˬlehˬhehˬ meuˬ-ahˇ jaˆ-eu aˬ yawꞈ aˬ da-euˬ nymˇ-ahˇ cehˆ gʼoꞈ-euˬ meh.

³Tsawˇ haˬ kʼoeˇ gʼaˬ aˬ yawꞈ-euˬ ma nyiˇ jawˇ gaˇ iˇ-awˇ, paˇ sheuˬ kʼoꞈ laˬ-iˇ ma lehˇ noeˬ tsehˆ-awˇ, mahˬ tahˬ laˆ nyiˬ mawˇ tsahˇ-awˇ aˬ yawꞈ-euˬ zaˬ kʼaˆ nehˬ-ehˇ iˇ-euˬ meh. Aˬ yawꞈ-euˬ ma nyiˇ kʼoeˇ gʼaˬ, aˬ yawꞈ-ahˇ iˇ kahˇ laꞈ kʼoeˇ sheuˬ ahˇ-awˇ, aˬ yawꞈ-euˬ aˬ mawˬ aˬ yawꞈ-ahˇ ya mawˇ ngeh, yaw muiˬ paˬ-ehˇ ha nehˬ-euˬ meh.

⁴Kʼoeˇ gaˇ jawˇ-awˬ lehˇ aˬ mawˬ gʼaˬ aˬ yawꞈ-ahˇ ehˇ-eu miˇ neh, smˬ nah keuˆ ni, dzaˬ gʼaˬ naˇ yuꞈ yuꞈ-ehˇ jawˇ-euˬ meh.

⁵Oeˬ nah tiˬ nah uˬ shawˬ yaw naꞈ-ehˇ, aˬ yawꞈ nyaꞈ dzeˇ zaˬ tuˇ-awˇ gʼoꞈ leˇ-eu lehˇ lehˬ hmˬ-euˬ meh. Ehˇ kʼawꞈ, aˬ mawˬ gʼaˬ ehˇ-eu, “Maˬ gʼoꞈ leˇ mi naˆ-ehˇ tiˬ jeˬ paˬ dzaˬ yaꞈ siˬ. Nymˬ-mˇ tiˬ kʼehˬ gʼeh-awˇ neh gʼoꞈ leˇ kʼawꞈ kʼaˇ boe tehꞈ-a.”

⁶Kʼoeˇ naˇ, aˬ nyaꞈ mawˬ zaˬ tiˬ kawˆ loꞈ-ehˇ nuiˇ-awˇ, dzaˬ taꞈ dawˇ taꞈ-euˬ meh. Kʼoeˇ naˇ, “Nymˇ ciꞈ kʼawꞈ laˬ kʼaˬ tiˬ cehˇ heu gaˇ yaꞈ siˬ” lehˇ aˬ mawˬ gʼaˬ paˇ ehˇ-eu meh.

⁷Leˬbiˇ tsawˇ haˬ kʼoeˇ gʼaˬ gʼoꞈ leˇ-eu lehˇ tsawˬ tuˇ-euˬ kʼawꞈ, aˬ mawˬ gʼaˬ jawˇ tawˬ siˬ lehˇ ehˇ-eu miˇ neh, tiˬ miˇ paˇ yaꞈ-euˬ meh.

⁸Ngaˬ nah tiˬ nah uˬ shawˬ yaw naꞈ-ehˇ aˬ yawꞈ gʼoꞈ leˇ-eu lehˇ gʼeh ngeh, “Tiˬ jeˬ paˬ dzaˬ-awˇ uˬ ciꞈ uˬ taw paw keuˆ ni jawˇ siˬ” lehˇ aˬ mawˬ gʼaˬ ehˇ-awˇ, aˬ yawꞈ nyaꞈ paˇ dzaˬ paˇ dawˇ taꞈ-euˬ meh.

⁹Tsawˇ haˬ kʼoeˇ gʼaˬ hawˇ-eu, aˬ yawꞈ-euˬ ma nyiˇ, aˬ yawꞈ-eu zaˬ kʼaˆ, aˬ ha smˇ gʼaˬ gʼoꞈ leˇ-eu lehˇ paˇ lehˬ hmˬ ngeh, aˬ mawˬ gʼaˬ paˇ ehˇ-eu, “Haw sheˇ. Uˬ ciꞈ ciꞈ le mawꞈ laˇ-euˬ ngaˇ. Zahˇ le shaw-iˬ-eu miˇ neh, nymˇ ciꞈ kʼawꞈ laˬ kʼaˬ tiˬ cehˇ heu gaˇ paˇ yaꞈ-awˬ. Ni shawˬ uˬ shawˬ yaw naꞈ-ehˇ tuˇ-awˇ gʼoꞈ leˇ tehꞈ-a.”

¹⁰Ehˇ kʼawꞈ, aˬ zaˬ gʼaˬ tiˬ miˇ maˬ paˇ yaꞈ bya mawꞈ-eu miˇ neh, mahˬ tahˬ laˆ nyiˬ mawˇ-ahˇ kʼaˆ daˬ baꞈ daˆ-awˇ, aˬ yawꞈ-euˬ ma nyiˇ sheuˬ-awˇ, Yeˬluˇsaˬlehˬ meuˬ lehˇ kuˇ-eu Yeˬbuˇ meuˬ paw le gʼeh leꞈ-euˬ meh.

¹¹Aˬ yawꞈ maꞈ Yeˬbuˇ meuˬ dawˬ peh le keuˆ ngeh, uˬ ciꞈ ciꞈ le mawꞈ laˇ-euˬ meh. Kʼoeˇ ngeh, “Yeˬbuˇ tsawˇ haˬ-euˬ meuˬ heu meuˬ-ahˇ yaꞈ leˇ kaˇ beuˇ” lehˇ, aˬ yawꞈ-euˬ zaˬ kʼaˆ aˬ yawꞈ-ahˇ ehˇ-eu meh.

¹²Aˬ yawꞈ ehˇ-eu, “Iˇsaˬleˬlaˆ tsawˇ haˬ deuˬ-euˬ meuˬ maˬ ngeuˇ gaˇ aˬ dui maˬ yaꞈ mawꞈ nya. Ui cuiˆ paˇ le leꞈ-awˇ, Giˇbyaˬ meuˬ-ahˇ maˬ ngeuˇ naˇ, Laˬmahˇ meuˬ-ahˇ yaꞈ leˇ ma.”

¹⁴Kʼoeˇ naˇ, aˬ yawꞈ maꞈ Yeˬbuˇ meuˬ le dzeuˇ leꞈ-awˇ, Beˬyaˬmiˬ miˇ kʼahˬ Giˇbyaˬ meuˬ-ahˇ le keuˆ ngeh, nahˇ ma ga ahˇ-euˬ meh.

¹⁵Meuˬ kʼoeˇ meuˬ-ahˇ uˬ ciꞈ yaꞈ-eu gʼaˇ duˬ aˬ yawꞈ maꞈ le-euˬ meh. Meuˬ laꞈ kʼoeˇ aˬ yawꞈ maꞈ le uˇ-awˇ, pu kaˬ-ahˇ nuiˇ luꞈ kʼawꞈ, “Ngaˬ-eu nymˇ-ahˇ yaꞈ laˇ-awˬ” lehˇ, tsawˇ haˬ tiˬ gʼaˬ-iˬ maˬ ehˇ-a.

¹⁶Aˬ yawꞈ maꞈ kʼoeˇ gaˇ nuiˇ luꞈ ngeh, aˬ bawˇ tsawˇ mawˬ tiˬ gʼaˬ deh yaˇ-ahˇ iˇ-euˬ gʼoꞈ keuˆ laˇ-euˬ meh. Aˬ yawꞈ-aˬ, Eˇpaˬleˬ miˇ kʼahˬ gawˬ jawˬ gawˬ duˇ paw neh pawˇ le-awˇ, Giˇbyaˬ meuˬ-ahˇ jawˇ le-euˬ tsawˇ haˬ pyeuꞈ-eu meh. (Kʼoeˇ gaˇ jawˇ luꞈ-eu tsawˇ haˬ deuˬ-aˬ, Beˬyaˬmiˬ tsawˇ jeuˬ tehꞈ meh.)

¹⁷Pu ka nuiˇ luꞈ-eu daˬ yah kʼoeˇ deuˬ-ahˇ aˬ bawˇ tsawˇ mawˬ kʼoeˇ gʼaˬ haw mawˇ-awˇ, “Aˬ geu gaˇ neh laˇ-awˇ aˬ geu paw iˇ-eu gʼeh te” lehˇ naˇ haˬ-euˬ meh.

¹⁸Leˬbiˇ tsawˇ haˬ kʼoeˇ gʼaˬ ehˇ-eu, “Yuˇdaˆ miˇ kʼahˬ Behˬlehˬhehˬ meuˬ-ahˇ nga maꞈ iˇ-euˬ ma. Nymˬ-mˇ, Eˇpaˬleˬ miˇ kʼahˬ gawˬ jawˬ gawˬ duˇ paw gaˇ mahˇ kaˬ gaˇ jaˆ-eu nga maꞈ-euˬ nymˇ-ahˇ gʼoꞈ leˇ luꞈ-eu ma. Nga maꞈ-ahˇ yaꞈ laˇ-awˬ lehˇ kuˇ-eu tsawˇ haˬ tiˬ gʼaˬ-iˬ maˬ jawˇ-a.

¹⁹Mahˬ tahˬ laˆ gʼaˇ duˬ gʼo yoeˬ hawˇ-eu mahˬ dzaˇ maˬ ehˇ, nga nyaꞈ dzeˇ zaˬ hawˇ-eu ngaˬ-eu zaˬ kʼaˆ gʼaˇ duˬ kaˬ muˇ hawˇ-eu aˬ gaꞈ dzaˇ uiˇ maˬ ehˇ, nga maꞈ tawˬ luꞈ ma. Nga maꞈ kʼaˇ loꞈ-eu jeˬ dawˬ tawˆ luꞈ ahˇ jiˇ ma.”

²⁰Aˬ bawˇ tsawˇ mawˬ kʼoeˇ gʼaˬ ehˇ-eu, “Ngaˬ-euˬ nymˇ-ahˇ daˆ laˇ-awˬ. Naw maꞈ-ahˇ ngaˇ ha-eu ma. Pu kaˬ lehˆ kawˆ-ahˇ ya yaꞈ gaˇ maˬ keuˆ-aˇ.”

²¹Kʼoeˇ naˇ, aˬ yawꞈ maꞈ-ahˇ aˬ yawꞈ-euˬ nymˇ-ahˇ sheuˬ gʼeh-awˇ, mahˬ mahˬ dzaˇ bi dzaˬ-euˬ meh. Aˬ yawꞈ-euˬ daˬ yah deuˬ kʼawꞈ, aˬ kuiˇ dzuiꞈ shawˇ-awˇ, ciꞈ hawˬ dzaˬ-euˬ meh.

²²Aˬ yawꞈ maꞈ laˬ kʼaˬ tiˬ cehˇ jawˇ naˬ mˇ luꞈ ngeh, meuˬ kʼoeˇ meuˬ laꞈ kʼoeˇ jawˇ-eu haiˬ dui dui-eu tsawˇ haˬ tiˬ deuˬ nymˇ kʼoeˇ nymˇ-ahˇ loꞈ jawˬ laˇ-euˬ meh. Tsawˇ haˬ kʼoeˇ deuˬ laˇ gʼoˆ-ahˇ teˇ teˇ-ehˇ, “Nawˬ-eu nymˇ-ahˇ yaꞈ laˇ-euˬ tsawˇ haˬ kʼoeˇ gʼaˬ bi doˆ le-awˬ. Aˬ yawꞈ-ahˇ nga maꞈ kʼaˬ miˬ sheu taꞈ la” lehˇ, nymˇ sahˇ aˬ da aˬ bawˇ tsawˇ mawˬ kʼoeˇ gʼaˬ-ahˇ guˇ-euˬ meh.

²³Aˬ bawˇ tsawˇ mawˬ kʼoeˇ gʼaˬ nymˇ laꞈ nyiˇ doˆ-iˇ-awˇ ehˇ-eu, “Cawˬ deuˬ-oˇ, Heu loꞈ-ehˇ gʼeh-eu maˬ muiˬ maˬ jaˬ-eu haiˬ dui dui-eu jeˬ taˬ mˇ nehˬ laꞈ lehˇ naw maꞈ-ahˇ shaˇ-eu ma. Tsawˇ haˬ heu gʼaˬ-aˬ, ngaˬ-euˬ daˬ yah pyeuꞈ-eu ma.

²⁴Aˬ yawꞈ-euˬ ma nyiˇ hawˇ-eu ngaˬ buˇ miˬ daꞈ daꞈ shuiꞈ tiˬ gʼaˬ jawˇ ma. Aˬ yawꞈ nyaꞈ-ahˇ naw maꞈ jawˇ gaˇ nymˬ-mˇ ngaˇ sheuˬ doˆ nehˬ leꞈ ma. Naw maꞈ kʼaˇ gʼeh mawꞈ-eu jeˬ aˬ yawꞈ nyaꞈ-ahˇ gʼeh nehˬ-awˬ. Ehˇ kʼawꞈ, kʼoeˇ loꞈ-ehˇ gʼeh-eu yaw haiˬ jeˬ mˇ-eu gʼaˇ duˬ, tsawˇ haˬ heu gʼaˬ-ahˇ maˇ diˇ-aˬ taˬ toeˬ ciˆ nehˬ laꞈ lehˇ naw maꞈ-ahˇ shaˇ-eu ma.”

²⁵Ehˇ kʼawꞈ, tsawˇ haˬ kʼoeˇ deuˬ aˬ yawꞈ-euˬ ehˇ dawˬ-ahˇ maˬ naˇ haˬ-a. Kʼoeˇ ngeh, Leˬbiˇ tsawˇ haˬ kʼoeˇ gʼaˬ aˬ yawꞈ-euˬ ma nyiˇ-ahˇ, laꞈ nyiˇ paw tsawˇ haˬ kʼoeˇ deuˬ jawˇ gaˇ bi doˆ-iˇ-euˬ meh. Aˬ yawꞈ maꞈ zaˬ miˬ zaˬ kʼoeˇ gʼaˬ-ahˇ, uˬ ciꞈ uˬ bya bya ni maˬ naˬ leˇ ni kʼaˬ miˬ sheu nehˬ-euˬ meh.

²⁶Uˬ bya bya laˇ mawꞈ laˇ ngeh, zaˬ miˬ zaˬ kʼoeˇ gʼaˬ aˬ yawꞈ-euˬ kʼaˬ dzeˇ zaˬ jawˇ-eu aˬ bawˇ tsawˇ mawˬ kʼoeˇ gʼaˬ-euˬ nymˇ gʼoˆ kʼehˬ-ahˇ gʼoꞈ keuˆ laˇ-awˇ, kʼoeˇ gaˇ coˬ lah-euˬ meh. Uˬ bya bya laˇ ngeh keuˆ ni aˬ yawꞈ kʼoeˇ gaˇ ga-euˬ meh.

²⁷Kʼoeˇ ngeh shawˬ aˬ yawꞈ-euˬ kʼaˬ dzeˇ zaˬ tuˇ-awˇ, gaˇ ma doˆ-iˇ-eu lehˇ laˇ gʼoˆ pah ngeh, aˬ yawꞈ-euˬ ma nyiˇ kʼoeˇ gʼaˬ laˇ gʼoˆ-ahˇ aˬ laꞈ nyehꞈ tehˬ-awˇ, ga gaˇ ya mawˇ-euˬ meh.

²⁸“Tuˇ-awˬ. Gʼoꞈ leˇ ma” lehˇ ehˇ nehˬ kʼawꞈ, dawˬ maˬ tmˇ ni ga-eu meh. Kʼoeˇ ngeh, aˬ yawꞈ-euˬ ma nyiˇ-ahˇ mahˬ tahˬ laˆ kʼoeˇ taˆ baꞈ daˆ-awˇ gʼoꞈ leˇ leꞈ-euˬ meh.

²⁹Iˇ kahˇ gʼoꞈ keuˆ leˇ ngeh, iˇ kahˇ laꞈ kʼoeˇ uˇ leˇ-awˇ, mi cehˇ yuˇ doˆ laˬ leˇ-euˬ meh. Kʼoeˇ naˇ, aˬ yawꞈ-euˬ ma nyiˇ-euˬ gʼawˇ mawˇ-ahˇ, tseˇ nyiꞈ paˆ deuˆ paˆ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-ahˇ, tiˬ jeuˬ jawˇ gaˇ tiˬ paˆ biꞈ ha gʼeh-euˬ meh.

³⁰Kʼoeˇ gaˇ ya mawˇ-euˬ tsawˇ haˬ yawˬ gʼaˬ na luꞈ ehˇ-eu, “Heu loꞈ-ehˇ gʼeh-eu jeˬ nga maꞈ tiˬ jawˇ-iˬ maˬ ya mawˇ haw-aˬ. Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh tiˬ nah neh, heu loꞈ-ehˇ gʼeh-eu jeˬ tiˬ jawˇ-iˬ maˬ pyeuꞈ laˇ haw-aˬ. Aˬ joˆ-ehˇ jahˇ nmˇ lehˇ shaˇ noeˬ haw sheˇ.”