Read Akha Yaˇ kʼaˬ daˇ 20 Bible Online

Yaˇ kʼaˬ daˇ 20 - Akha bible

Yaˇ kʼaˬ daˇ 20

¹Kʼoeˇ ngeh, laꞈ taˆ paw jaˆ-eu Daˬ meuˬ-ahˇ neh, laꞈ oˆ paw jaˆ-eu Beˬlaˇsheˬba meuˬ-ahˇ keuˆ ni jawˇ-eu Iˇsaˬleˬlaˆ tsawˇ haˬ deuˬ maˬ ehˇ, Nahˇ ma doˆ kʼehˬ paw jaˆ-eu Giˇlaˆ miˇ kʼahˬ-ahˇ jawˇ-eu Iˇsaˬleˬlaˆ tsawˇ haˬ deuˬ maˬ ehˇ, dawˬ tawˆ luꞈ nui ma tiˬ siˬ tehꞈ-ehˇ taˬ-awˇ, Miˇzaˬpaˬ meuˬ-ahˇ Sahˬpaˬ Miˬyehˇ-euˬ mehˬ shi uiˬ laˇ-euˬ meh.

²Miˬyehˇ-euˬ tsawˇ haˬ deuˬ kʼoeˇ loꞈ-ehˇ uiˬ leˇ taˬ-euˬ gaˇ, Iˇsaˬleˬlaˆ tsawˇ haˬ dawˬ tawˆ luꞈ-euˬ aˬ yuiꞈ aˬ tsu deuˬ uiˬ laˇ jiˇ-awˇ, kʼoeˇ gaˇ laˇ uiˬ taˬ-euˬ yehˇ dawˬ tawˆ luꞈ oeˬ seh gʼaˬ byah-eu meh.

³Kʼoeˇ ngeh, Iˇsaˬleˬlaˆ tsawˇ jeuˬ nui deuˬ dawˬ tawˆ luꞈ Miˇzaˬpaˬ meuˬ-ahˇ uiˬ leˇ jiˇ taˬ-euˬ gaˇ kawˆ, Beˬyaˬmiˬ tsawˇ jeuˬ ya gaˬ-euˬ meh. “Haiˬ dui dui-eu gaˇ kawˆ aˬ joˆ-ehˇ gʼeh-awˇ pyeuꞈ laˇ-euˬ gaˇ kawˆ nga maꞈ-ahˇ ehˇ nehˬ laꞈ-awˬ” lehˇ, Iˇsaˬleˬlaˆ tsawˇ haˬ deuˬ ehˇ-eu meh.

⁴Aˬ yawꞈ-euˬ ma nyiˇ bi laˆ sehꞈ-euˬ Leˬbiˇ tsawˇ haˬ kʼoeˇ gʼaˬ ehˇ-eu, “Beˬyaˬmiˬ miˇ kʼahˬ laꞈ kʼoeˇ jaˆ-eu Giˇbyaˬ meuˬ-ahˇ uˬ ciꞈ tiˬ miˇ yaꞈ iˇ-eu lehˇ, ngaˇ hawˇ-eu ngaˬ-euˬ ma nyiˇ nga nyaꞈ iˇ-euˬ ma.

⁵Giˇbyaˬ meuˬ-ahˇ jawˇ-eu tsawˇ haˬ deuˬ ngaˬ-ahˇ yehˬ baw sehˇ lu-ehˇ gʼeh-eu lehˇ, nga nyaꞈ dzeˇ zaˬ yaꞈ luꞈ-eu nymˇ-ahˇ uˬ ciꞈ paw loꞈ jawˬ le-euˬ meh. Ngaˬ-ahˇ sehꞈ-eu lehˇ aˬ yawꞈ maꞈ uiˬ laˇ-euˬ jeˬ pyeuꞈ-eu meh. Ehˇ kʼawꞈ, ngaˬ-eu ma nyiˇ-ahˇ aˬ yawꞈ maꞈ kʼaˇ gʼeh mawꞈ-eu gʼeh nehˬ-awˇ bi shiˇ-euˬ meh.

⁶Aˬ yawꞈ-euˬ gʼawˇ mawˇ-ahˇ ngaˇ tseˇ nyiꞈ paˆ deuˆ paˆ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-ahˇ, tiˬ jeuˬ-euˬ tiˬ paˆ biꞈ ha gʼeh-euˬ ma. Tsawˇ haˬ kʼoeˇ deuˬ-aˬ, aˬ dui maꞈ kʼoeˇ taˆ maˬ muiˬ maˬ jaˬ-euˬ haiˬ dui dui-eu jeˬ mˇ nehˬ laꞈ-euˬ meh.

⁷Naw maꞈ dawˬ tawˆ luꞈ Iˇsaˬleˬlaˆ tsawˇ haˬ pyeuꞈ-eu meh. Gaˇ kawˆ heu aˬ dui aˬ joˆ-ehˇ jahˇ nmˇ.”

⁸Kʼoeˇ ngeh, tsawˇ haˬ dawˬ tawˆ luꞈ tuˇ laˇ-awˇ ehˇ-eu, “Nga maꞈ dawˬ tawˆ luꞈ, sehˬ gʼawˆ-ahˇ jawˇ-eu deuˬ maˬ kaˬ, nymˇ laꞈ kʼoeˇ jawˇ-eu deuˬ maˬ kaˬ, tiˬ gʼaˬ-iˬ maˬ gʼoꞈ-iˇ.

⁹Nga maꞈ heu loꞈ-ehˇ jahˇ ma. Shehˆ tsaˬ tsaˬ-awˇ tsawˇ haˬ tseˇ doˆ-eu laꞈ kʼoeˇ, Giˇbyaˬ meuˬ-ahˇ guiˇ deuˆ-iˇ ma.

¹⁰Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ tseˇ bymˇ tiˬ bymˇ-aˬ, dzaˬ dzaˬ dawˇ dawˇ bi sha-awˇ, Dzeˇ-eu deuˬ Giˇbyaˬ meuˬ-ahˇ guiˇ deuˆ-iˇ-awˇ, Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ maꞈ neh mˇ-euˬ yaw haiˬ jeˬ gʼaˇ duˬ, aˬ yawꞈ maꞈ-ahˇ kʼehˬ nehˬ kʼaˆ nehˬ-iˇ ma.”

¹¹Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ nui ma tiˬ siˬ tehꞈ-ehˇ taˬ-awˇ, Giˇbyaˬ meuˬ-ahˇ guiˇ deuˆ-eu gʼaˇ duˬ uiˬ leˇ-euˬ meh.

¹²Iˇsaˬleˬlaˆ tsawˇ haˬ deuˬ Beˬyaˬmiˬ miˇ kʼahˬ doe ni tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ doe-iˇ-euˬ meh. “Aˇ naˆ naˆ-ehˇ gʼeh-eu yaw haiˬ jeˬ naw maꞈ mˇ te.

¹³Giˇbyaˬ meuˬ-ahˇ jawˇ-eu haiˬ-eu tsawˇ haˬ kʼoeˇ deuˬ nymˬ-mˇ sheuˬ laꞈ-awˬ. Iˇsaˬleˬlaˆ tsawˇ jeuˬ laꞈ kʼoeˇ heu loꞈ-ehˇ gʼeh-eu haiˬ-eu jeˬ bi byoˆ-iˇ-eu gʼaˇ duˬ, aˬ yawꞈ maꞈ-ahˇ sehꞈ ma.” Ehˇ kʼawꞈ, Iˇsaˬleˬlaˆ tsawˇ haˬ deuˬ-euˬ dawˬ-ahˇ Beˬyaˬmiˬ tsawˇ haˬ deuˬ maˬ naˇ haˬ ni, maˬ gaˬ-euˬ geuꞈ-awˇ jawˇ-eu meh.

¹⁴Beˬyaˬmiˬ miˇ kʼahˬ laꞈ kʼoeˇ kʼaˇ jaˆ-eu meuˬ-ahˇ jawˇ-eu tsawˇ haˬ deuˬ, Iˇsaˬleˬlaˆ tsawˇ haˬ deuˬ-ahˇ guiˇ deuˆ-eu lehˇ, Giˇbyaˬ meuˬ-ahˇ uiˬ le jiˇ-euˬ meh.

¹⁵Kʼoeˇ ngeh nah, aˬ yawꞈ maꞈ-euˬ meuˬ deuˬ-ahˇ jawˇ-eu yehˇ nyiˬ muiˇ koꞈ heˇ gʼaˬ aˬ yawꞈ maꞈ kuˇ uiˬ-euˬ meh. Kʼoeˇ uˬ taꞈ, Giˇbyaˬ meuˬ-ahˇ jawˇ-eu tsawˇ haˬ deuˬ kʼawꞈ, kʼaˬ lo gʼoˆ-awˇ aˇ caˇ laꞈ neh caˬ oeˬ beuˆ ngeh, uˬ duˬ tsehˇ kahˇ tiˬ kahˇ-ahˇ keuˆ ni maˬ lehˬ-iˇ ni beuˆ taˆ nya-eu, dziˇ dui dui-eu yehˇ shiꞈ yaˇ gʼaˬ kuˇ uiˬ-euˬ meh.

¹⁶

¹⁷Beˬyaˬmiˬ tsawˇ haˬ maˬ ngeuˇ-eu Iˇsaˬleˬlaˆ tsawˇ haˬ deuˬ-aˬ, yaw muiˬ paˬ-ehˇ dzaw taˬ-euˬ yehˇ oeˬ seh gʼaˬ kuˇ uiˬ taˬ-euˬ meh.

¹⁸Beˬdeˬlaˇ meuˬ-ahˇ jaˆ-eu uˬ duˬ tahˬ-eu jawˇ duˬ-ahˇ Iˇsaˬleˬlaˆ tsawˇ haˬ deuˬ le-awˇ, “Beˬyaˬmiˬ tsawˇ jeuˬ-ahˇ tsawˇ jeuˬ aˬ geu jeuˬ guiˇ jeˬ hu ya deuˆ-iˇ nmˇ” lehˇ, Miˬyehˇ-ahˇ naˇ haˬ-euˬ meh. “Yuˇdaˆ tsawˇ haˬ jeˬ hu deuˆ-iˇ-awˬ” lehˇ Sahˬpaˬ Miˬyehˇ ehˇ-eu meh.

¹⁹Kʼoeˇ naˇ, yawˬ shawˬ yawˬ Iˇsaˬleˬlaˆ tsawˇ haˬ deuˬ iˇ-awˇ, Giˇbyaˬ meuˬ-euˬ dawˬ peh taˆ tsoˆ-awˇ jawˇ-euˬ meh.

²⁰Beˬyaˬmiˬ guiˇ maꞈ-ahˇ guiˇ deuˆ-eu gʼaˇ duˬ aˬ yawꞈ maꞈ iˇ-awˇ, aˬ yawꞈ maꞈ-euˬ yehˇ deuˬ-ahˇ meuˬ kʼoeˇ meuˬ-euˬ mehˬ shi guiˇ daˬ daˬ-awˇ bi jawˇ-euˬ meh.

²¹Kʼoeˇ naˇ, Beˬyaˬmiˬ tsawˇ jeuˬ-euˬ guiˇ maꞈ doˆ le-awˇ, kʼoeˇ ngeh nah uˬ ciꞈ maˬ ciꞈ-iˇ dah mi naˆ-ehˇ, Iˇsaˬleˬlaˆ tsawˇ haˬ deuˬ-euˬ yehˇ nyiˬ muiˇ nyiˬ heˇ gʼaˬ bi deuˆ sehꞈ-euˬ meh.

²²Kʼoeˇ naˇ, uˬ duˬ tahˬ-euˬ jawˇ duˬ-ahˇ Iˇsaˬleˬlaˆ tsawˇ haˬ deuˬ le-awˇ, uˬ ciꞈ uˬ taw paw keuˆ ni Sahˬpaˬ Miˬyehˇ mehˬ shi tsawˇ ngoeˇ ngoeˇ-euˬ meh. “Nga maꞈ tiˬ poˆ paˇ iˇ-awˇ, nga maꞈ-euˬ aˬ yuiꞈ aˬ nyiˇ pyeuꞈ-eu Beˬyaˬmiˬ tsawˇ jeuˬ-ahˇ guiˇ paˇ deuˆ iˇ siˬ loˇ” lehˇ, Sahˬpaˬ Miˬyehˇ-ahˇ aˬ yawꞈ maꞈ naˇ haˬ-euˬ meh. Kʼoeˇ ngeh, “Deuˆ-iˇ-awˬ” lehˇ, Sahˬpaˬ Miˬyehˇ aˬ yawꞈ maꞈ-ahˇ ehˇ-eu meh. Kʼoeˇ naˇ, Iˇsaˬleˬlaˆ tsawˇ haˬ deuˬ-ahˇ gʼaˬ biꞈ-awˇ, yaw beh nah guiˇ daˬ daˬ-euˬ tsahˇ-ahˇ guiˇ daˬ paˇ bi daˬ-euˬ meh.

²³

²⁴Beˬyaˬmiˬ tsawˇ jeuˬ-ahˇ nyiˬ poˆ tiˬ poˆ guiˇ paˇ deuˆ-iˇ-eu gʼaˇ duˬ aˬ yawꞈ maꞈ iˇ-euˬ meh.

²⁵Kʼoeˇ naˇ, Beˬyaˬmiˬ tsawˇ haˬ deuˬ Giˇbyaˬ meuˬ-ahˇ neh nyiˬ poˆ tiˬ poˆ paˇ oe doˆ-awˇ, kʼoeˇ ngeh poˆ kʼawꞈ, yaw muiˬ paˬ-ehˇ dzaw taˬ-euˬ Iˇsaˬleˬlaˆ yehˇ tiˬ muiˇ yehꞈ heˇ gʼaˬ deuˆ sehꞈ nehˬ-euˬ meh.

²⁶Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ Beˬdeˬlaˇ meuˬ-ahˇ le-awˇ tsawˇ ngoeˇ ngoeˇ leˇ-euˬ meh. Kʼoeˇ gaˇ, Sahˬpaˬ Miˬyehˇ-euˬ mehˬ shi aˬ yawꞈ maꞈ nuiˇ-awˇ, uˬ ciꞈ paw keuˆ ni maˬ dzaˬ maˬ dawˇ-ehˇ jawˇ-euˬ meh. Cawˬ cawˬ taꞈ-eu lawˇ-eu jeˬ hawˇ-eu, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ heu deuˬ dawˬ tawˆ luꞈ, Sahˬpaˬ Miˬyehˇ-euˬ mehˬ shi aˬ yawꞈ maꞈ lawˇ-euˬ meh.

²⁷Aˇ nah aˇ yamˬ kʼoeˇ yamˬ laꞈ kʼoeˇ, Miˬyehˇ-euˬ Dawˬ ma saˇ jaˇ Bahˬ keuˆ Beˬdeˬlaˇ meuˬ-ahˇ jaˆ-awˇ, Aˬloˬ-euˬ oeˬ paˬ pyeuꞈ-awˇ Eˇlaˬzaˬ-euˬ aˬ li pyeuꞈ-eu Piˇnaˬhaˇ gʼaˬ haw luꞈ pyaˆ luꞈ-eu meh. Kʼoeˇ ngeh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ naˇ haˬ-eu, “Nga maꞈ-euˬ aˬ yuiꞈ aˬ nyiˇ pyeuꞈ-eu Beˬyaˬmiˬ tsawˇ jeuˬ-ahˇ nga maꞈ guiˇ deuˆ-iˇ-awˬ loˇ. Taˬ deuˆ-iˇ loˇ.” Sahˬpaˬ Miˬyehˇ ehˇ-eu, “Deuˆ-iˇ-awˬ. Ni shawˬ nah ngaˇ naw maꞈ-ahˇ bi gʼaˬ leˇ ma.”

²⁸

²⁹Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-euˬ yehˇ tiˬ paˆ na deuˬ-ahˇ, Giˇbyaˬ meuˬ-euˬ jawˬ jawˬ-ehˇ bi dzuˇ zaꞈ-euˬ meh.

³⁰Kʼoeˇ naˇ, Beˬyaˬmiˬ tsawˇ jeuˬ-euˬ guiˇ maꞈ-ahˇ, smˬ nah tiˬ nah guiˇ paˇ deuˆ-eu lehˇ, aˬ yawꞈ maꞈ iˇ-awˇ, aˬ yawꞈ maꞈ-euˬ yehˇ deuˬ-ahˇ yaw beh loꞈ-ehˇ Giˇbyaˬ meuˬ mehˬ shi guiˇ daˬ bi daˬ-euˬ meh.

³¹Beˬyaˬmiˬ tsawˇ haˬ deuˬ guiˇ deuˆ-eu lehˇ doˆ le ngeh, meuˬ-ahˇ gaˇ mahˇ kaˬ gaˇ aˬ yawꞈ maꞈ sheuˬ gʼeh-euˬ meh. Yaw beh poˆ loꞈ-ehˇ, deh ga-ahˇ maˬ ehˇ, Beˬdeˬlaˇ meuˬ-ahˇ le-eu gaˇ ma-ahˇ maˬ ehˇ, Giˇbyaˬ meuˬ-ahˇ iˇ-eu gaˇ ma-ahˇ maˬ ehˇ, Beˬyaˬmiˬ tsawˇ haˬ neh Iˇsaˬleˬlaˆ tsawˇ haˬ tiˬ paˆ na deuˬ-ahˇ deuˆ sehꞈ-euˬ meh. Iˇsaˬleˬlaˆ tsawˇ haˬ smˬ tseˇ gʼaˬ ehˇ gʼaˬ ni aˬ yawꞈ maꞈ deuˆ sehꞈ-euˬ meh.

³²“Dzeuˇ laˇ ngeh loꞈ-ehˇ, aˬ yawꞈ maꞈ-ahˇ aˬ dui maꞈ gʼaˬ leˇ ma” lehˇ Beˬyaˬmiˬ tsawˇ haˬ deuˬ lmˬ-eu meh. Ehˇ kʼawꞈ, Iˇsaˬleˬlaˆ tsawˇ haˬ deuˬ naˇ kʼah paw jiˆ kʼoꞈ nehˬ-awˇ, Beˬyaˬmiˬ tsawˇ haˬ deuˬ yawˬ ha-euˬ meuˬ-ahˇ byehˇ yaꞈ-awˇ aˬ yawꞈ maꞈ-euˬ mehˬ nah gaˇ ma caw caw-ehˇ caw teh laˇ ni tsawˇ gahˇ gahˇ-euˬ meh.

³³Kʼoeˇ naˇ, Iˇsaˬleˬlaˆ guiˇ maꞈ myaˬ dzehˬ-eu maꞈ naˇ kʼah paw jiˆ gʼoꞈ laˇ-awˇ, Baˬlaˇtaˬmaˬ meuˬ-ahˇ dawˬ gm luꞈ ngeh, Giˇbyaˬ meuˬ-euˬ jawˬ jawˬ-ehˇ jaˆ-eu lo guˇ doe ni dzuˇ zaꞈ luꞈ-eu tsawˇ haˬ kʼoeˇ deuˬ tiˬ poˆ tehꞈ-ehˇ coeˬ doˆ leꞈ-euˬ meh.

³⁴Iˇsaˬleˬlaˆ tsawˇ haˬ deuˬ laꞈ kʼoeˇ, yaw muiˬ paˬ-ehˇ tseˇ doˆ taˬ-euˬ tsawˇ haˬ tiˬ muiˇ gʼaˬ Giˇbyaˬ meuˬ-ahˇ deuˆ-iˇ-awˇ, yaw kʼaˆ-ehˇ deuˆ ceh ceh-euˬ meh. Aˬ yawꞈ maꞈ bi laˆ luˬ bi laˆ seˇ-eu aˇ yamˬ keuˆ le taˬ-euˬ Beˬyaˬmiˬ tsawˇ haˬ deuˬ maˬ siˬ nya-a.

³⁵Sahˬpaˬ Miˬyehˇ neh, Iˇsaˬleˬlaˆ tsawˇ haˬ deuˬ-ahˇ Beˬyaˬmiˬ tsawˇ haˬ deuˬ kʼoeˇ taˆ bi gʼaˬ leˇ-euˬ meh. Kʼoeˇ ngeh nah, Iˇsaˬleˬlaˆ tsawˇ haˬ deuˬ neh, Beˬyaˬmiˬ tsawˇ haˬ nyiˬ muiˇ ngaˬ heˇ tiˬ yaˇ gʼaˬ deuˆ sehꞈ-euˬ meh.

³⁶Kʼoeˇ ngeh, aˬ yawꞈ maꞈ sm-iˇ-euˬ gaˇ kawˆ Beˬyaˬmiˬ tsawˇ haˬ deuˬ siˬ duˬ-euˬ meh. Iˇsaˬleˬlaˆ guiˇ maꞈ myaˬ dzehˬ-eu maꞈ, Beˬyaˬmiˬ tsawˇ haˬ deuˬ-euˬ mehˬ shi, naˇ kʼah paw jiˆ kʼoꞈ nehˬ-euˬ meh. Aˬ jeˬ miˇ neh ehˇ naˇ, Giˇbyaˬ meuˬ-euˬ jawˬ jawˬ-ehˇ bi dzuˇ zaꞈ taˬ-euˬ deuˬ-ahˇ aˬ yawꞈ maꞈ nui kʼaˬ tsmˬ-eu meh.

³⁷Dzuˇ zaꞈ taˬ-euˬ tsawˇ haˬ kʼoeˇ deuˬ Giˇbyaˬ meuˬ-ahˇ yaw kawˇ-ehˇ cehˆ gʼeh-awˇ, meuˬ laꞈ kʼoeˇ cehˆ byaˆ-awˇ, kʼoeˇ gaˇ kʼaˇ jawˇ-eu tsawˇ haˬ deuˬ-ahˇ sehꞈ-euˬ meh.

³⁸Iˇsaˬleˬlaˆ guiˇ maꞈ maꞈ ma hawˇ-eu dzuˇ zaꞈ taˬ-euˬ tsawˇ haˬ deuˬ mehˬ bawˬ mˇ taˬ-euˬ jaˆ-euˬ meh. Meuˬ laꞈ kʼoeˇ uˬ kʼoeˬ du doˆ laˇ-eu ya mawˇ naˇ, guiˇ deuˆ duˬ-ahˇ jawˇ luꞈ-eu

³⁹Iˇsaˬleˬlaˆ tsawˇ haˬ deuˬ ya gʼoꞈ poˆ laˇ meh lehˇ ehˇ taˬ-euˬ jaˆ-eu meh. Kʼoeˇ ngeh, Beˬyaˬmiˬ tsawˇ haˬ deuˬ neh Iˇsaˬleˬlaˆ tsawˇ haˬ smˬ tseˇ gʼaˬ deuˆ sehꞈ gʼaˬ-awˇ, “Dzeuˇ laˇ ngeh loꞈ-ehˇ aˬ dui maꞈ gʼaˬ leˇ ma” lehˇ aˬ yawꞈ maꞈ lmˬ luꞈ-eu meh.

⁴⁰Kʼoeˇ ngeh, Iˇsaˬleˬlaˆ tsawˇ haˬ deuˬ mehˬ bawˬ mˇ taˬ-euˬ jaˆ-eu loꞈ-ehˇ, meuˬ laꞈ kʼoeˇ uˬ kʼoeˬ du doˆ laˇ-euˬ meh. Beˬyaˬmiˬ tsawˇ haˬ deuˬ naˇ kʼah nahˇ gʼoꞈ gʼoꞈ haw ngeh, meuˬ meuˬ lah ni miˬ dzaˬ doꞈ luꞈ gaˇ ya mawˇ-awˇ, zahˬ leˇ-euˬ meh.

⁴¹Kʼoeˇ naˇ, Iˇsaˬleˬlaˆ tsawˇ haˬ deuˬ gʼoꞈ poˆ laˇ-awˇ, Beˬyaˬmiˬ tsawˇ haˬ deuˬ guˆ dui dui-iˇ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ kʼoeˇ taˆ ya luˬ ya seˇ-iˇ-eu keuˆ le-euˬ siˬ duˬ leˇ-euˬ meh.

⁴²Iˇsaˬleˬlaˆ tsawˇ haˬ deuˬ jawˇ gaˇ neh aˬ yawꞈ maꞈ jiˆ kʼoꞈ le-awˇ, deh ga doe ni cehˆ-euˬ meh. Ehˇ kʼawꞈ, aˬ yawꞈ maꞈ maˬ cehˆ dzeuˇ nya-a. Iˇsaˬleˬlaˆ guiˇ guiˇ maꞈ maꞈ ma hawˇ-eu, meuˬ-ahˇ neh doˆ le-euˬ guiˇ maꞈ kʼoeˇ maꞈ-euˬ yaw kaˬ-ahˇ aˬ yawꞈ maꞈ tehˬ leˇ-awˇ, laˆ luˬ laˆ seˇ nehˬ gaˇ ya daˬ-euˬ meh.

⁴³Iˇsaˬleˬlaˆ tsawˇ haˬ deuˬ Beˬyaˬmiˬ tsawˇ haˬ deuˬ-ahˇ loꞈ kʼmˬ-awˇ, Giˇbyaˬ meuˬ-euˬ nahˇ ma doˆ kʼehˬ paw jaˆ-eu jawˇ duˬ-ahˇ keuˆ ni sehꞈ sehꞈ-ehˇ teh-euˬ meh.

⁴⁴Aˬ cawˬ naˆ maˬ tseˇ kʼaˆ-eu Beˬyaˬmiˬ tsawˇ jeuˬ-euˬ yehˇ tiˬ muiˇ yehꞈ heˇ gʼaˬ bi deuˆ sehꞈ-euˬ meh.

⁴⁵Tiˬ deuˬ-aˬ, Leˬmoˬ lo guˇ paw ciˬ pyawˇ-awˇ, deh ga caw caw-ehˇ cehˆ-euˬ meh. Kʼoeˇ deuˬ kʼawꞈ, gaˇ pehˇ-ahˇ ngaˬ heˇ gʼaˬ bi sehꞈ-euˬ meh. Dzeˇ-eu deuˬ-aˬ, Giˇdmˬ meuˬ paw cehˆ-awˇ, nyiˬ heˇ gʼaˬ paˇ bi sehꞈ-euˬ meh.

⁴⁶Kʼoeˇ ngeh nah laꞈ kʼoeˇ bi deuˆ sehꞈ-euˬ Beˬyaˬmiˬ tsawˇ haˬ dawˬ tawˆ luꞈ, nyiˬ muiˇ ngaˬ heˇ gʼaˬ byah-eu meh. Kʼoeˇ deuˬ dawˬ tawˆ luꞈ, kʼaˆ dui dui-eu yehˇ deuˬ tehꞈ meh.

⁴⁷Ehˇ kʼawꞈ, deh ga caw caw-ehˇ Leˬmoˬ lo guˇ paw tsawˇ haˬ koꞈ yaˇ gʼaˬ cehˆ-awˇ, cehˆ dzeuˇ-euˬ meh. Ba la oeˬ siˬ byah ni, aˬ yawꞈ maꞈ kʼoeˇ gaˇ jawˇ-euˬ meh.

⁴⁸Dzeˇ yaꞈ-euˬ Beˬyaˬmiˬ tsawˇ haˬ deuˬ jawˇ gaˇ Iˇsaˬleˬlaˆ tsawˇ haˬ deuˬ gʼoꞈ poˆ-iˇ-awˇ, dawˬ tawˆ luꞈ sehꞈ jiˇ-euˬ meh. Kʼaˬ dzeˇ zaˬ, zaˬ miˬ zaˬ hawˇ-eu zaˬ deuˬ dawˬ tawˆ luꞈ maˬ ehˇ, jeˬ zaˬ dawˬ tawˆ luꞈ maˬ ehˇ, sehꞈ jiˇ-euˬ meh. Kʼoeˇ gaˇ kʼaˇ jaˆ-eu meuˬ deuˬ-ahˇ, aˬ yawꞈ maꞈ miˬ dzaˬ keuˬ puiˆ dzeh-euˬ meh.