Read Akha Yaˇ kʼaˬ daˇ 21 Bible Online

Yaˇ kʼaˬ daˇ 21 - Akha bible

Yaˇ kʼaˬ daˇ 21

¹Iˇsaˬleˬlaˆ tsawˇ haˬ deuˬ Miˇzaˬpaˬ meuˬ-ahˇ uiˬ leˇ-awˇ, “Nga maꞈ tiˬ gʼaˬ-iˬ Beˬyaˬmiˬ tsawˇ haˬ deuˬ-ahˇ nga maꞈ-euˬ aˬ buˇ maˬ paˇ bi dahˬ dzaˬ-iˇ ma” lehˇ, Sahˬpaˬ Miˬyehˇ-ahˇ saˇ jaˇ dzaˬ-euˬ meh.

²Kʼoeˇ naˇ, Iˇsaˬleˬlaˆ tsawˇ haˬ deuˬ Beˬdeˬlaˇ meuˬ-ahˇ le-awˇ, Sahˬpaˬ Miˬyehˇ-euˬ mehˬ shi uˬ ciꞈ paw keuˆ ni nuiˇ-awˇ, yaw kʼaˆ-ehˇ guˇ guˇ-ehˇ tsawˇ ngoeˇ ngoeˇ-euˬ meh.

³Aˬ yawꞈ maꞈ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ-oˇ, aˬ jeˬ miˇ neh heu loꞈ-ehˇ pyeuꞈ laˇ taˬ. Aˬ jeˬ miˇ neh Iˇsaˬleˬlaˆ tsawˇ jeuˬ laꞈ kʼoeˇ Beˬyaˬmiˬ tsawˇ jeuˬ byoˆ kʼaꞈ-iˇ-eu lehˇ gʼeh ta.”

⁴Yawˬ nah yawˬ uˬ shawˬ yaw naꞈ-ehˇ, Iˇsaˬleˬlaˆ tsawˇ haˬ deuˬ kʼoeˇ gaˇ lawˇ duˬ tiˬ tsahˇ gawˬ-awˇ, cawˬ cawˬ taꞈ-eu lawˇ-eu jeˬ hawˇ-eu, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ lawˇ-euˬ meh.

⁵Kʼoeˇ naˇ, Iˇsaˬleˬlaˆ tsawˇ jeuˬ dawˬ tawˆ luꞈ Miˇzaˬpaˬ meuˬ-ahˇ Sahˬpaˬ Miˬyehˇ-euˬ mehˬ shi uiˬ leˇ ngeh, “Maˬ laˇ-euˬ Iˇsaˬleˬlaˆ tsawˇ jeuˬ tiˬ jeuˬ na jawˇ ta loˇ” lehˇ aˬ yawꞈ maꞈ naˇ haˬ-euˬ meh. (Miˇzaˬpaˬ-ahˇ maˬ le-euˬ tsawˇ haˬ-ahˇ sehꞈ ma lehˇ aˬ yawꞈ maꞈ neh saˇ jaˇ dzaˬ taˬ-euˬ jaˆ-eu meh.)

⁶Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ aˬ yuiꞈ aˬ nyiˇ pyeuꞈ-eu Beˬyaˬmiˬ tsawˇ jeuˬ gʼaˇ duˬ noeˬ shaˬ dui dui-eu laꞈ kʼoeˇ ehˇ-eu, “Iˬ nah Iˇsaˬleˬlaˆ tsawˇ haˬ deuˬ laꞈ kʼoeˇ tsawˇ jeuˬ tiˬ jeuˬ byoˆ-iˇ-euˬ meh.

⁷Dzeˇ yaꞈ-euˬ Beˬyaˬmiˬ tsawˇ haˬ deuˬ-ahˇ, aˬ dui maꞈ aˬ joˆ-ehˇ jahˇ-awˇ miˬ zaˬ poˆ nehˬ nmˇ. Aˬ dui maꞈ-euˬ aˬ buˇ deuˬ aˬ yawꞈ maꞈ-ahˇ maˬ bi dahˬ dzaˬ-iˇ lehˇ aˬ dui maꞈ saˇ jaˇ dzaˬ gʼaˬ taˬ-euˬ ma.”

⁸Iˇsaˬleˬlaˆ tsawˇ haˬ deuˬ Miˇzaˬpaˬ meuˬ-ahˇ uiˬ leˇ ngeh, maˬ laˇ-euˬ tsawˇ jeuˬ tiˬ jeuˬ na jawˇ ta loˇ lehˇ aˬ yawꞈ maꞈ naˇ haˬ haw ngeh, Giˇlaˆ miˇ kʼahˬ-ahˇ jawˇ-eu Jaˬbehˆ-euˬ aˇ jeuˬ tiˬ gʼaˬ-iˬ maˬ laˇ-euˬ gaˇ kawˆ, aˬ yawꞈ maꞈ ya siˬ-euˬ meh.

⁹Guiˇ guiˇ maꞈ-ahˇ tsawˇ myahˇ kuˇ ngeh, Jaˬbehˆ aˇ jeuˬ tiˬ gʼaˬ-iˬ oˬ maˬ toˬ-a.

¹⁰Kʼoeˇ ngeh, kʼaˆ dui dui-eu yehˇ tiˬ muiˇ nyiˬ heˇ gʼaˬ-ahˇ Iˇsaˬleˬlaˆ tsawˇ haˬ aˇ maꞈ aˇ muˇ deuˬ ehˇ nehˬ-eu, “Naw maꞈ iˇ-awˇ, Jaˬbehˆ aˇ jeuˬ-ahˇ sehꞈ jiˇ-awˬ. Zaˬ miˬ zaˬ hawˇ-eu zaˬ deuˬ kʼawꞈ maˬ bi dzeuˇ-iˇ ni sehꞈ-awˬ.

¹¹Kʼaˬ dzeˇ zaˬ dawˬ tawˆ luꞈ hawˇ-eu miˬ daꞈ daꞈ shuiꞈ maˬ kʼaˇ ngeuˇ-eu zaˬ miˬ zaˬ dawˬ tawˆ luꞈ-ahˇ sehꞈ-awˬ.”

¹²Jaˬbehˆ-euˬ aˇ jeuˬ laꞈ kʼoeˇ, miˬ daꞈ daꞈ shuiꞈ oeˬ yaˇ gʼaˬ aˬ yawꞈ maꞈ mawˇ-awˇ, Kaˬnaˬ miˇ kʼahˬ Shiˇloˬ meuˬ-ahˇ, aˬ yawꞈ maꞈ-euˬ taˆ jaˆ gaˇ sheuˬ kʼoꞈ laꞈ-euˬ meh.

¹³Kʼoeˇ naˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ, Leˬmoˬ lo guˇ-ahˇ jawˇ luꞈ-eu Beˬyaˬmiˬ tsawˇ haˬ deuˬ-ahˇ, Guiˇ maˬ paˇ deuˆ ma lehˇ bi ehˇ gaˬ-iˇ-euˬ meh.

¹⁴Beˬyaˬmiˬ tsawˇ haˬ kʼoeˇ deuˬ gʼoꞈ laˇ-awˇ, maˬ sehꞈ-ehˇ sheuˬ kʼoꞈ laꞈ-euˬ Jaˬbehˆ aˇ jeuˬ miˬ daꞈ kʼoeˇ deuˬ, Beˬyaˬmiˬ tsawˇ haˬ kʼoeˇ deuˬ-ahˇ, Iˇsaˬleˬlaˆ tsawˇ haˬ deuˬ neh biꞈ nehˬ-euˬ meh. Ehˇ kʼawꞈ, dawˬ tawˆ luꞈ-ahˇ maˬ biꞈ loꞈ nehˬ nya-a.

¹⁵Iˇsaˬleˬlaˆ tsawˇ haˬ deuˬ Beˬyaˬmiˬ tsawˇ jeuˬ gʼaˇ duˬ noeˬ shaˬ-eu meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ ceuˆ-iˇ ni Sahˬpaˬ Miˬyehˇ jahˇ nehˬ-euˬ meh.

¹⁶Uiˬ leˇ taˬ-euˬ tsawˇ haˬ aˇ maꞈ aˇ muˇ-euˬ aˬ yuiꞈ aˬ tsu deuˬ ehˇ-eu, “Beˬyaˬmiˬ tsawˇ jeuˬ laꞈ kʼoeˇ zaˬ miˬ zaˬ maˬ paˇ jawˇ meh. Miˬ zaˬ maˬ ya sheuˬ-ehˇ dzeˇ-eu Beˬyaˬmiˬ tsawˇ haˬ deuˬ-ahˇ aˬ joˆ-ehˇ jahˇ nehˬ nmˇ.

¹⁷Iˇsaˬleˬlaˆ tsawˇ jeuˬ tseˇ nyiꞈ jeuˬ laꞈ kʼoeˇ, tiˬ jeuˬ-iˬ maˬ bi byoˆ-iˇ nya-a. Beˬyaˬmiˬ tsawˇ jeuˬ maˬ ya bi byoˆ-iˇ ni aˬ dui tiˬ jeˬ paˬ ya jahˇ meh.

¹⁸Ehˇ kʼawꞈ, aˬ dui maꞈ-euˬ aˬ buˇ deuˬ aˬ yawꞈ maꞈ-ahˇ maˬ bi mˇ dzaˬ-iˇ nya-a. Aˬ jeˬ miˇ neh ehˇ naˇ, yawˬ ha-euˬ aˬ buˇ Beˬyaˬmiˬ tsawˇ jeuˬ-ahˇ bi mˇ dzaˬ-iˇ-eu gʼaˬ kʼoeˇ taˆ, aˬ dui neh yaˬ kʼehˇ yaˬ taˬ-euˬ jeˬ keuˆ le tehꞈ-a.”

¹⁹Kʼoeˇ naˇ, “Tiˬ kʼoꞈ tiˬ poˆ Shiˇloˬ meuˬ-ahˇ Sahˬpaˬ Miˬyehˇ-euˬ bawˬ-iˬ gʼeh-eu aˇ yamˬ dawˬ peh peh laˇ luꞈ meh” lehˇ aˬ yawꞈ maꞈ shaˇ noeˬ luꞈ-eu meh. (Shiˇloˬ meuˬ-aˬ, Beˬdeˬlaˇ meuˬ-euˬ laꞈ taˆ paw hawˇ-eu Leˬboˇnaˬ meuˬ-euˬ laꞈ oˆ paw jaˆ-awˇ, Beˬdeˬlaˇ meuˬ hawˇ-eu Sheˬkmˬ meuˬ yaw kaˬ-ahˇ jaˆ-eu gaˇ ma-euˬ nahˇ ma doˆ kʼehˬ paw jaˆ-eu meh.)

²⁰Beˬyaˬmiˬ tsawˇ haˬ deuˬ-ahˇ aˬ yawꞈ maꞈ ehˇ nehˬ-eu, “Aˬ gaꞈ yaˇ kmˇ-ahˇ dzuˇ zaꞈ-iˇ-awˬ.

²¹Shiˇloˬ meuˬ-ahˇ jawˇ-eu zaˬ miˬ aˬ buˇ deuˬ bawˬ-iˬ-ahˇ gaˇ nyeh nyeh le-eu lehˇ doˆ le-eu ya mawˇ ngeh, naw maꞈ doˆ laˇ-awˇ, aˬ yawꞈ gʼaˬ yawꞈ zaˬ miˬ aˬ buˇ kʼoeˇ deuˬ-ahˇ miˬ zaˬ gʼeu geuꞈ-awˇ, Beˬyaˬmiˬ miˇ kʼahˬ-ahˇ naw maꞈ nehˬ-ehˇ sheuˬ kʼoꞈ gʼeh-awˬ.

²²Aˬ yawꞈ maꞈ-euˬ aˬ da hawˇ-eu aˬ mahˇ aˬ da deuˬ laˆ tsoeˬ laˇ naˇ, Guiˇ deuˆ-eu laꞈ kʼoeˇ naw maꞈ-euˬ laꞈ-ahˇ neh nga maꞈ sheuˬ geuꞈ-euˬ maˬ ngeuˇ-eu miˇ neh, bi sheuˬ nehˬ laꞈ-awˬ. Naw maꞈ neh nga maꞈ-ahˇ biꞈ nehˬ laꞈ-eu kʼawꞈ maˬ ngeuˇ-eu miˇ neh, naw maꞈ neh saˇ jaˇ dzaˬ taˬ-euˬ gaˇ kʼawꞈ maˬ bahˬ-aˇ lehˇ ehˇ nehˬ-awˬ.”

²³Beˬyaˬmiˬ tsawˇ haˬ deuˬ-aˬ, aˬ yawꞈ maꞈ-ahˇ kʼaˇ ehˇ nehˬ-euˬ loꞈ-ehˇ mˇ-awˇ, aˬ yawꞈ gʼaˬ yawꞈ, Shiˇloˬ meuˬ-ahˇ gaˇ nyeh nyeh luꞈ-eu zaˬ miˬ aˬ buˇ deuˬ-ahˇ baˬ tseˇ tseˇ-awˇ, gʼeu byoˆ gʼeh-euˬ meh. Kʼoeˇ naˇ, aˬ yawꞈ maꞈ-euˬ miˇ kʼahˬ-ahˇ gʼoꞈ-iˇ-awˇ, aˬ yawꞈ maꞈ-euˬ meuˬ deuˬ paˇ tsoˆ muiˬ-awˇ jawˇ-euˬ meh.

²⁴Kʼoeˇ ngeh, Iˇsaˬleˬlaˆ tsawˇ haˬ deuˬ kʼawꞈ, yawˬ ha-euˬ myawˬ gahˬ hawˇ-eu nymˇ jiˇ jaˆ gaˇ gʼoꞈ-iˇ jiˇ-euˬ meh.

²⁵Aˇ yamˬ kʼoeˇ yamˬ laꞈ kʼoeˇ, Iˇsaˬleˬlaˆ tsawˇ jeuˬ sahˬ paˬ maˬ baw-a. Tsawˇ haˬ yawˬ gʼaˬ na luꞈ yawˬ ha neh kʼaˇ noeˬ-euˬ loꞈ-ehˇ dehꞈ-euˬ meh.