Read Akha Yaˇ kʼaˬ daˇ 6 Bible Online

Yaˇ kʼaˬ daˇ 6 - Akha bible

Yaˇ kʼaˬ daˇ 6

¹Iˇsaˬleˬlaˆ tsawˇ jeuˬ, Sahˬpaˬ Miˬyehˇ mehˬ shi iˬ baˇ paˇ mˇ-euˬ meh. Kʼoeˇ miˇ neh, Miˇdiˬyaˬ tsawˇ jeuˬ-ahˇ aˬ yawꞈ maꞈ kʼoeˇ taˆ, shiꞈ kʼoꞈ byah ni Sahˬpaˬ Miˬyehˇ neh bi uˆ lahˇ-euˬ meh.

²Miˇdiˬyaˬ tsawˇ haˬ deuˬ-aˬ, Iˇsaˬleˬlaˆ tsawˇ haˬ deuˬ naˆ maˬ tseˇ kʼaˆ dzehˬ-eu miˇ neh, Iˇsaˬleˬlaˆ tsawˇ haˬ deuˬ, lo kʼahˬ deuˬ-ahˇ hawˇ-eu, gawˬ jawˬ gawˬ duˇ doe ni cehˆ yaꞈ-awˇ jawˇ-euˬ meh.

³Iˇsaˬleˬlaˆ tsawˇ haˬ deuˬ siˬ yoeˬ kʼaˇ sehˬ ngeh, Miˇdiˬyaˬ tsawˇ haˬ deuˬ bawˇ tsahˬ bawˇ dahˇ-ahˇ jawˇ-eu Aˬmaˬlehˇ tsawˇ haˬ deuˬ nehˬ-ehˇ oe-awˇ, Iˇsaˬleˬlaˆ tsawˇ haˬ deuˬ-ahˇ guiˇ deuˆ le-euˬ meh.

⁴Miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ maꞈ sehˬ gʼawˆ gʼawˆ-awˇ jawˇ naˬ luꞈ-eu laꞈ kʼoeˇ, laꞈ oˆ paw Gaˬzaˬ gahˬ kaˬ-ahˇ keuˆ ni, dzaˬ la gʼo cehˇ dawˬ tawˆ luꞈ-ahˇ laˆ cawˆ jiˇ nehˬ-euˬ meh. Yawˇ, mawˇ neˇ hawˇ-eu mahˬ tahˬ laˆ dawˬ tawˆ luꞈ aˬ yawꞈ maꞈ teh geuꞈ gʼeh jiˇ-awˇ, Iˇsaˬleˬlaˆ tsawˇ haˬ deuˬ dehꞈ dzaˬ-eu gʼaˇ duˬ tiˬ jeˬ-iˬ maˬ bi jawˇ yaꞈ-a.

⁵Aˬ yawꞈ maꞈ-aˬ, aˬ yawꞈ maꞈ-euˬ jeˬ zaˬ teh-awˇ, aˬ yawꞈ maꞈ-euˬ sehˬ gʼawˆ tawˬ-awˇ oe ngeh, nyehˇ bahˇ baˬ maꞈ loꞈ-ehˇ myaˬ dui dui-eu meh. Aˬ yawꞈ maꞈ hawˇ-eu aˬ yawꞈ maꞈ-euˬ law taw deuˬ maˬ gui jiˇ coeˇ-a. Aˬ yawꞈ maꞈ oe-awˇ miˇ kʼahˬ kʼoeˇ kʼahˬ-ahˇ laˆ luˬ laˆ seˇ-euˬ meh.

⁶Iˇsaˬleˬlaˆ tsawˇ haˬ deuˬ, yawˬ haˇ yawˬ ha ya buˬ-iˇ ni tiˬ jeˬ-iˬ maˬ jahˇ nya-a.

⁷Miˇdiˬyaˬ tsawˇ haˬ deuˬ baˬ da neh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ caw ba le-awˬ lehˇ guˇ guˇ-ehˇ ngoeˇ ngeh,

⁸aˬ yawꞈ gʼaˇ duˬ ngehˬ dah-eu tiˬ gʼaˬ Sahˬpaˬ Miˬyehˇ pyehˬ gʼeh-awˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ, heu loꞈ-ehˇ bi tsaꞈ gaˬ-iˇ-euˬ meh. “Iˇjiˇtuˆ miˇ kʼahˬ-ahˇ aˬ cawˬ zaˬ kʼaˆ ya geuꞈ luꞈ-eu laꞈ kʼoeˇ, naw maꞈ-ahˇ ngaˇ sheuˬ doˆ laꞈ-euˬ ma.

⁹Iˇjiˇtuˆ tsawˇ haˬ-euˬ aˬ laꞈ laꞈ kʼoeˇ maˬ ehˇ, miˇ kʼahˬ heu kʼahˬ laꞈ kʼoeˇ naw maꞈ-ahˇ guiˇ deuˆ le-euˬ tsawˇ haˬ deuˬ-euˬ aˬ laꞈ laꞈ kʼoeˇ maˬ ehˇ, naw maꞈ-ahˇ ngaˇ ka kʼoꞈ nehˬ-euˬ ma. Naw maꞈ laˇ uˇ-eu nehˬ-ehˇ, aˬ yawꞈ maꞈ-ahˇ ngaˇ teh doˆ-awˇ, aˬ yawꞈ maꞈ-euˬ miˇ kʼahˬ naw maꞈ-ahˇ biꞈ-euˬ ma.

¹⁰Ngaˇ-aˬ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-awˇ, iˬ nah naw maꞈ jawˇ luꞈ-eu miˇ kʼahˬ heu kʼahˬ-ahˇ jawˇ-eu Aˬmoˬ tsawˇ haˬ-euˬ miˬ yehˇ deuˬ-ahˇ naw maꞈ uˬ duˬ maˬ ya tahˬ-a lehˇ ngaˇ naw maꞈ-ahˇ ehˇ taˬ-euˬ jaˆ-eu ma. Ehˇ kʼawꞈ, ngaˬ-euˬ ehˇ dawˬ-ahˇ naw maꞈ maˬ naˇ haˬ geuꞈ-a.”

¹¹Kʼoeˇ naˇ, Sahˬpaˬ Miˬyehˇ-euˬ gʼaˬ kʼehˇ Awˇpaˬlaˇ pu-ahˇ oe-awˇ, Aˬbyeˇzaˬ aˇ jeuˬ Yawˇshaˆ-euˬ tsuiꞈ kaˆ aˇ bawˇ dawˬ pehˬ-ahˇ nuiˇ-euˬ meh. Yawˇshaˆ-euˬ aˬ li Giˇdoˬ-aˬ, Miˇdiˬyaˬ tsawˇ haˬ maˬ bi mawˇ-eu gʼaˇ duˬ, aˬ gaꞈ dzaˇ uiˇ lehˬ duˬ-ahˇ cehˇ diˬ diˬ kʼoeˬ luꞈ-eu meh.

¹²Kʼoeˇ naˇ, Sahˬpaˬ Miˬyehˇ-euˬ gʼaˬ kʼehˇ aˬ yawꞈ jawˇ gaˇ doˆ le-awˇ, “Kʼaˬ duˬ ni gʼeh-awˇ gʼaˬ huiˬ-eu gʼaˬ-oˇ, Sahˬpaˬ Miˬyehˇ nawˬ nehˬ-ehˇ jawˇ meh” lehˇ ehˇ le-euˬ meh.

¹³Aˬ yawꞈ-ahˇ Giˇdoˬ ehˇ nehˬ-eu, “Ngaˇ heu loꞈ-ehˇ naˇ haˬ mawꞈ nya. Sahˬpaˬ Miˬyehˇ nga maꞈ nehˬ-ehˇ jawˇ-eu jeˬ maˇ-iˬ, aˬ jeˬ miˇ neh heu loꞈ-ehˇ pyeuꞈ laˇ ta. Aˬ yawꞈ neh nga maꞈ-euˬ aˬ da deuˬ-ahˇ Iˇjiˇtuˆ miˇ kʼahˬ-ahˇ neh sheuˬ doˆ nehˬ laꞈ-euˬ gaˇ kawˆ hawˇ-eu, aˬ yawꞈ neh mˇ mehˬ nehˬ-euˬ zahˬ leˇ paˬ-ehˇ gʼeh-eu gaˇ deuˬ, nga maꞈ-euˬ aˬ da deuˬ nga maꞈ-ahˇ dzawˇ mehˬ nehˬ laꞈ-euˬ gaˇ kawˆ kʼoeˇ deuˬ aˬ gaˇ iˇ byoˆ jiˇ-euˬ ta. Sahˬpaˬ Miˬyehˇ nga maꞈ-ahˇ byehˇ dzeh-awˇ, Miˇdiˬyaˬ tsawˇ haˬ deuˬ-euˬ aˬ laꞈ laꞈ kʼoeˇ a nehˬ-euˬ meh.”

¹⁴Kʼoeˇ ngeh, Sahˬpaˬ Miˬyehˇ dawˬ biꞈ-awˇ ehˇ-eu, “Nawˬ-eu gʼaˬ-ahˇ gʼoe-eu laꞈ kʼoeˇ iˇ-awˇ, Miˇdiˬyaˬ tsawˇ haˬ-euˬ aˬ laꞈ laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ ka kʼoꞈ doˆ-iˇ-awˬ. Ngaˬ-euˬ gʼawˇ mawˇ nawˬ-ahˇ pyehˬ gʼeh-eu ma.”

¹⁵Giˇdoˬ ehˇ-eu, “Iˇsaˬleˬlaˆ tsawˇ haˬ-ahˇ ngaˇ aˬ joˆ-ehˇ ka kʼoꞈ nya nmˇ. Ngaˬ-euˬ aˇ jeuˬ-aˬ, Maˬnaˇseˬ tsawˇ jeuˬ laꞈ kʼoeˇ aˬ cawˬ naˆ maˬ tseˇ nyiˇ teˬ dzehˬ-awˇ, ngaˇ-aˬ, ngaˬ-euˬ nymˇ jiˇ laꞈ kʼoeˇ, aˬ cawˬ taꞈ-ehˇ teˬ-eu gʼaˬ pyeuꞈ-eu ma.”

¹⁶Sahˬpaˬ Miˬyehˇ ehˇ-eu, “Ngaˇ nawˬ-ahˇ caw ba-eu miˇ neh, nawˇ kʼoeˇ loꞈ-ehˇ mˇ nya meh. Tsawˇ haˬ tiˬ gʼaˬ-ahˇ sehꞈ-eu loꞈ-ehˇ, Miˇdiˬyaˬ tsawˇ haˬ deuˬ-ahˇ nawˇ yaw awˇ laꞈ-ehˇ laˆ luˬ laˆ seˇ nehˬ nya tehꞈ-a.”

¹⁷Giˇdoˬ ehˇ-eu, “Nawˇ ngaˬ-ahˇ nui ma tsaˬ-eu ngeuˇ naˇ, nawˇ aˬ diˇ aˬ maˇ Sahˬpaˬ Miˬyehˇ pyeuꞈ-eu gaˇ kawˆ, ngaˬ-ahˇ bi siˬ bi mawˇ laꞈ-awˬ.

¹⁸Ngaˇ dzaˬ dzaˬ dawˇ dawˇ lawˇ-eu jeˬ maˬ yuˇ keuˆ laꞈ kʼoeˇ keuˆ ni, maˬ gʼoꞈ-iˇ ni jawˇ tawˬ-awˬ.” Sahˬpaˬ Miˬyehˇ ehˇ-eu, “Nawˇ maˬ gʼoꞈ keuˆ laˇ kʼoeˇ keuˆ ni ngaˇ heu gaˇ jawˇ tawˬ ma.”

¹⁹Kʼoeˇ naˇ, Giˇdoˬ gʼaˬ iˇ kahˇ-ahˇ gʼoꞈ uˇ-iˇ-awˇ, ciꞈ myehꞈ ciꞈ zaˬ sehꞈ-awˇ dzaˇ jahˇ-euˬ meh. Cehˇ meu koꞈ jawꞈ-i yuˇ-awˇ, dehˬ tseˬ maˬ ahˇ-eu kaˬ muˇ kʼawꞈ jahˇ-euˬ meh. Ciꞈ myehꞈ shaˬ jiˇ kʼoeˇ kʼa puˬ-ahˇ dawˆ ahˇ-awˇ, ciꞈ myehꞈ shaˬ jiˇ jahˇ-euˬ dzaˇ uiˇ-ahˇ oeˬ lahˬ-ahˇ shehˆ ahˇ-awˇ, tsuiꞈ kaˆ aˇ bawˇ dawˬ pehˬ-ahˇ nuiˇ luꞈ-eu Sahˬpaˬ Miˬyehˇ-euˬ gʼaˬ kʼehˇ-ahˇ ciˬ nehˬ leˇ-euˬ meh.

²⁰“Shaˬ jiˇ hawˇ-eu kaˬ muˇ-ahˇ kʼaˬ lo heu siˬ kʼoeˇ taˆ bi jaˆ-awˇ, shaˬ jiˇ dzaˇ uiˇ shehˆ daˆ-awˬ” lehˇ, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ aˬ yawꞈ-ahˇ dawˬ biꞈ ngeh, Giˇdoˬ kʼoeˇ loꞈ-ehˇ jahˇ-euˬ meh.

²¹Kʼoeˇ naˇ, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ aˬ laꞈ cawˬ ja-awˇ, aˬ yawꞈ tuˆ tehˬ luꞈ-eu gawˬ yoeˬ mehˬ dzaˬ neh, shaˬ jiˇ hawˇ-eu kaˬ muˇ-ahˇ toeˬ ciˆ-euˬ meh. Kʼaˬ lo-ahˇ miˬ dzaˬ doꞈ laˇ-awˇ, shaˬ jiˇ hawˇ-eu kaˬ muˇ puiˆ dzaˬ-euˬ meh. Kʼoeˇ naˇ, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ byoˆ-iˇ-euˬ meh.

²²Kʼoeˇ ngeh, aˬ yawꞈ ya mawˇ-euˬ tsawˇ haˬ kʼoeˇ gʼaˬ Sahˬpaˬ Miˬyehˇ-euˬ gʼaˬ kʼehˇ pyeuꞈ-eu Giˇdoˬ siˬ duˬ-awˇ, guˆ-eu laꞈ kʼoeˇ ehˇ-eu, “Sahˬpaˬ Miˬyehˇ-oˇ, nawˬ-euˬ gʼaˬ kʼehˇ-ahˇ ngaˇ bya cehˆ ni ya mawˇ duˬ-euˬ ma.”

²³Ehˇ kʼawꞈ, Sahˬpaˬ Miˬyehˇ aˬ yawꞈ-ahˇ ehˇ-eu, “Taˬ guˆ. Nawˇ maˬ ya shiˇ-aˇ.”

²⁴Sahˬpaˬ Miˬyehˇ gʼaˇ duˬ, Giˇdoˬ kʼoeˇ gaˇ lawˇ duˬ tiˬ hmˬ gawˬ-awˇ, “Sahˬpaˬ Miˬyehˇ-aˬ, nui saˇ oꞈ-eu jeˬ pyeuꞈ-eu meh” lehˇ myahˇ nehˬ-euˬ meh. (Lawˇ duˬ kʼoeˇ hmˬ-aˬ, Aˬbyeˇzaˬ aˇ jeuˬ-euˬ Awˇpaˬlaˇ pu-ahˇ iˬ nah keuˆ ni jaˆ luꞈ meh.)

²⁵Kʼoeˇ ngeh miˇ, Giˇdoˬ-ahˇ Sahˬpaˬ Miˬyehˇ ehˇ nehˬ-eu, “Nawˬ da-euˬ mawˇ neˇ mawˇ gaw hawˇ-eu shiꞈ kʼoꞈ byah laˇ-euˬ mawˇ neˇ mawˇ gaw yawˬ mawˇ yawˬ yuˇ-awˇ, Baˬlaˇ miˬ yehˇ-ahˇ lawˇ nehˬ-euˬ nawˬ da-euˬ lawˇ duˬ deh pyaˆ-awˇ, kʼoeˇ-euˬ dawˬ peh jaˆ-eu Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˆ coˬ-awˬ.

²⁶Kʼaˬ lo heu siˬ kʼoeˇ taˆ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ, ziꞈ dah ni gʼeh-eu lawˇ duˬ tiˬ hmˬ gawˬ-awˬ. Kʼoeˇ naˇ, nawˬ neh deuˆ pyaˆ-euˬ Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ kʼoeˇ miˬ dzaˬ geuꞈ-awˇ, mawˇ neˇ mawˇ gaw nyiˬ mawˇ tiˬ mawˇ yuˇ-awˇ, lawˇ duˬ kʼoeˇ hmˬ kʼoeˇ taˆ mawˇ lah-ehˇ dzah puiˆ-awˇ lawˇ-awˬ.”

²⁷Kʼoeˇ ngeh, Giˇdoˬ-aˬ, aˬ yawꞈ-euˬ zaˬ kʼaˆ tseˇ gʼaˬ sheuˬ-awˇ, Sahˬpaˬ Miˬyehˇ neh aˬ yawꞈ-ahˇ ehˇ nehˬ-euˬ loꞈ-ehˇ mˇ-euˬ meh. Aˬ yawꞈ pehˬ-euˬ nymˇ jiˇ hawˇ-eu, meuˬ kʼoeˇ meuˬ laꞈ kʼoeˇ jawˇ-eu tsawˇ haˬ deuˬ-ahˇ aˬ yawꞈ guˆ-eu miˇ neh, nah gʼahˇ paw maˬ mˇ peuˬ-ehˇ, uˬ ciꞈ paw mˇ-euˬ meh.

²⁸Yawˬ nah yawˬ uˬ shawˬ yaw naꞈ-ehˇ, meuˬ kʼoeˇ meuˬ-ahˇ jawˇ-eu tsawˇ haˬ deuˬ tuˇ ngeh, Baˬlaˇ miˬ yehˇ-ahˇ lawˇ-eu lawˇ duˬ hawˇ-eu, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˆ coˬ taˬ-awˇ, kʼoeˇ gaˇ paˇ tsoˆ taˬ-euˬ lawˇ duˬ kʼoeˇ taˆ mawˇ neˇ mawˇ gaw nyiˬ mawˇ tiˬ mawˇ lawˇ taˬ-euˬ gaˇ ya mawˇ-euˬ meh.

²⁹“Heu aˬ suˇ gʼaˬ neh mˇ taˬ” lehˇ, aˬ yawꞈ maꞈ tiˬ gʼaˬ tiˇ gʼaˬ naˇ haˬ-euˬ meh. Aˬ yawꞈ maꞈ pyehˆ tseˇ haw ngeh, Yawˇshaˆ-euˬ aˬ li Giˇdoˬ neh mˇ-euˬ gaˇ kawˆ pyehˆ tseˇ duˬ-euˬ meh.

³⁰Kʼoeˇ ngeh, aˬ yawꞈ maꞈ Yawˇshaˆ-ahˇ ehˇ nehˬ-eu, “Nawˬ li-ahˇ heu gaˇ sheuˬ doˆ leꞈ-awˬ. Aˬ yawꞈ-ahˇ nga maꞈ sehꞈ ma. Baˬlaˇ miˬ yehˇ-ahˇ lawˇ-eu lawˇ duˬ-ahˇ aˬ yawꞈ deh pyaˆ-awˇ, kʼoeˇ-euˬ dawˬ peh jaˆ-eu Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˆ coˬ taˬ-euˬ nga.”

³¹Ehˇ kʼawꞈ, aˬ yawꞈ-ahˇ kʼaˇ ngehˬ cawˬ laˇ-eu tsawˇ haˬ deuˬ-ahˇ Yawˇshaˆ ehˇ nehˬ-eu, “Naw maꞈ Baˬlaˇ miˬ yehˇ paw pyawˬ te loˇ. Aˬ yawꞈ-ahˇ ka kʼoꞈ-eu gʼeh te loˇ. Aˬ yawꞈ jawˇ paw pyawˬ-eu tsawˇ haˬ aˬ geu gʼaˬ maˬ kaˬ, uˬ shawˬ maˬ buˬ-iˇ mi naˆ-ehˇ ya shiˇ tehꞈ-a. Baˬlaˇ-aˬ, miˬ yehˇ pyeuꞈ-eu ngeuˇ naˇ, aˬ yawꞈ-euˬ lawˇ duˬ bi deh pyaˆ gaˇ keuˆ-eu-aˬ, aˬ yawˆ yawꞈ ka kʼoꞈ tehꞈ-a.”

³²Kʼoeˇ ngeh neh naˇ, Giˇdoˬ-ahˇ Yeˬluˇbaˬlaˇ[3] lehˇ myahˇ nehˬ-euˬ meh. Aˬ jeˬ miˇ neh ehˇ naˇ, “Baˬlaˇ-euˬ lawˇ duˬ bi deh pyaˆ-euˬ miˇ neh, Baˬlaˇ aˬ yawˆ yawꞈ ka kʼoꞈ luꞈ-uˇ” lehˇ Yawˇshaˆ ehˇ-eu meh.

³³Kʼoeˇ naˇ, Miˇdiˬyaˬ tsawˇ haˬ deuˬ, Aˬmaˬlehˇ tsawˇ haˬ deuˬ hawˇ-eu, nahˇ ma doˆ kʼehˬ paw jawˇ-eu tsawˇ jeuˬ dawˬ tawˆ luꞈ uiˬ leˇ-awˇ, Yawˇdaˬ lawˇ baˬ tsehˆ doˆ laꞈ-awˇ, Yeˬzaˬleˬlaˇ deh kʼawꞈ-ahˇ taˆ tsoˆ-awˇ naˬ luꞈ-eu meh.

³⁴Sahˬpaˬ Miˬyehˇ-euˬ yaw sahˇ Giˇdoˬ-ahˇ uˆ lahˇ-awˇ, aˬ yawꞈ daˇ heh baw-awˇ, Aˬbyeˇzaˬ aˇ jeuˬ-ahˇ aˬ yawꞈ-euˬ mehˬ nah caw teh laˇ-eu gʼaˇ duˬ kuˇ-euˬ meh.

³⁵Aˬ yawꞈ tsawˇ haˬ pyehˬ gʼeh-awˇ Yawˇdaˬ lawˇ baˬ kʼoeˇ baˬ heu baˬ-ahˇ jawˇ-eu Maˬnaˇseˬ tsawˇ haˬ nyiˬ muˇ luꞈ-ahˇ, aˬ yawꞈ-euˬ mehˬ nah caw teh laˇ-awˬ lehˇ bi tsaꞈ gaˬ-iˇ-euˬ meh. Aˬshaˬ tsawˇ jeuˬ, Zeˬbuˬluˬ tsawˇ jeuˬ hawˇ-eu, Naˬtaˬliˇ tsawˇ jeuˬ deuˬ jawˇ gaˇ kʼawꞈ, aˬ yawꞈ tsawˇ haˬ pyehˬ gʼeh-awˇ bi tsaꞈ gaˬ-iˇ ngeh, aˬ yawꞈ maꞈ aˬ yawꞈ jawˇ gaˇ uiˬ laˇ-euˬ meh.

³⁶Kʼoeˇ naˇ, Miˬyehˇ-ahˇ Giˇdoˬ ehˇ nehˬ-eu, “Iˇsaˬleˬlaˆ tsawˇ haˬ deuˬ-ahˇ ka kʼoꞈ-eu gʼaˇ duˬ ngaˬ-ahˇ zmˬ ma lehˇ nawˇ noeˬ tsehˆ-euˬ ma lehˇ ehˇ taˬ-euˬ meh.

³⁷Toˆ-ehˇ ngeuˇ naˇ, ngaˇ yawˇ caꞈ hm yuˇ-awˇ, cehˇ diˬ duˬ-ahˇ bi jaˆ ma. Uˬ shawˬ keuˆ laˇ ngeh, yawˇ caꞈ hm-ahˇ tehꞈ-ehˇ ceuˬ ga aˬ taˬ-awˇ, miˇ tsaˬ-ahˇ ceuˬ maˬ ga-ehˇ gui coˇ ni jaˆ naˇ, Iˇsaˬleˬlaˆ tsawˇ jeuˬ-ahˇ ka kʼoꞈ-eu gʼaˇ duˬ ngaˬ-ahˇ nawˇ zmˬ-eu gʼeh-eu nga lehˇ ngaˇ ya siˬ duˬ tehꞈ-a.”

³⁸Aˬ yawꞈ neh kʼaˇ ehˇ-euˬ loꞈ-ehˇ pyeuꞈ laˇ-euˬ meh. Yawˬ nah yawˬ uˬ shawˬ yaw naꞈ-ehˇ tuˇ-awˇ, yawˇ caꞈ hm kʼoeˇ tsuˆ dzeˇ ngeh, ceuˬ naˬ bo tiˬ bo byah ni tsuˆ dzeˇ doˆ-euˬ meh.

³⁹Kʼoeˇ naˇ, Giˇdoˬ Miˬyehˇ-ahˇ ehˇ nehˬ-eu, “Ngaˬ-ahˇ nui ma taˬ pehˇ nehˬ laꞈ. Dawˬ tiˬ dawˬ bi ngehˬ laꞈ siˬ. Yawˇ caꞈ hm heu-ahˇ tiˬ poˆ paˇ bi lawˬ haw laꞈ siˬ. Heu poˆ jawˇ-aˬ, yawˇ caꞈ hm gui coˇ ni bi jaˆ-awˇ, miˇ tsaˬ-ahˇ ceuˬ bi ga aˬ taˬ-awˬ.”

⁴⁰Kʼoeˇ ngeh miˇ kʼawꞈ, Miˬyehˇ kʼoeˇ loꞈ-ehˇ mˇ-euˬ meh. Yawˬ shawˬ yawˬ keuˆ le ngeh, yawˇ caꞈ hm gui coˇ ni jaˆ-awˇ, miˇ tsaˬ-ahˇ ceuˬ ga aˬ taˬ-euˬ meh.