Read Akha Yaˇ kʼaˬ daˇ 7 Bible Online

Yaˇ kʼaˬ daˇ 7 - Akha bible

Yaˇ kʼaˬ daˇ 7

¹Tiˬ nah-aˬ, Giˇdoˬ hawˇ-eu aˬ yawꞈ-euˬ tsawˇ haˬ dawˬ tawˆ luꞈ yaw naꞈ-ehˇ tuˇ-awˇ, Haˬloˆ lawˇ gawˆ dawˬ peh taˆ tsoˆ-awˇ jawˇ-eu meh. Miˇdiˬyaˬ tsawˇ haˬ-euˬ taˆ-aˬ, aˬ yawꞈ maꞈ-euˬ laꞈ taˆ paw jaˆ-eu deh kʼawꞈ-ahˇ, Mawˇleh gawˬ duˇ dawˬ peh jaˆ-eu meh.

²Giˇdoˬ-ahˇ Sahˬpaˬ Miˬyehˇ ehˇ nehˬ-eu, “Nawˬ-euˬ tsawˇ haˬ deuˬ-ahˇ, Miˇdiˬyaˬ tsawˇ haˬ deuˬ-ahˇ ngaˇ bi gʼaˬ leˇ-eu gʼaˇ duˬ, nawˬ-euˬ tsawˇ haˬ deuˬ aˇ dzehˬ myaˬ dzeuˇ-eu meh. Aˬ yawꞈ maꞈ yawˬ haˇ yawˬ ha deuˆ gʼaˬ-euˬ ma lehˇ noeˬ-awˇ, ngaˬ neh mˇ-euˬ jeˬ-ahˇ maˬ mawˇ nya-aˇ.

³‘Kʼaˇ guˆ-eu tsawˇ haˬ deuˬ gʼoꞈ-iˇ-awˬ. Nga maꞈ heu gaˇ Giˇlaˆ gawˬ jawˬ-ahˇ jawˇ yaꞈ ma’ lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.” Kʼoeˇ ngeh, nyiˬ muiˇ gʼaˬ gʼoꞈ-iˇ-awˇ, tiˬ muiˇ gʼaˬ jawˇ yaꞈ-euˬ meh.

⁴Kʼoeˇ naˇ, Giˇdoˬ-ahˇ Sahˬpaˬ Miˬyehˇ ehˇ nehˬ-eu, “Nawˬ-eu tsawˇ haˬ yaw myaˬ nga siˬ. Aˬ yawꞈ maꞈ-ahˇ iˇ cuꞈ jaˆ gaˇ sheuˬ gʼeh-awˬ. Nawˬ-eu gʼaˇ duˬ aˬ yawꞈ maꞈ-ahˇ ngaˇ kʼoeˇ gaˇ tseˇ doˆ ma. Nawˬ nehˬ-ehˇ iˇ-eu geuˇ-eu nga lehˇ ngaˬ neh laꞈ noeˇ toeˬ-euˬ tsawˇ haˬ deuˬ nawˬ nehˬ-ehˇ ya iˇ-awˇ, nawˬ nehˬ-ehˇ iˇ-eu maˬ geuˇ-a lehˇ ngaˬ neh laꞈ noeˇ toeˬ-euˬ deuˬ nawˬ nehˬ-ehˇ maˬ ya iˇ-a.”

⁵Tsawˇ haˬ kʼoeˇ deuˬ-ahˇ, iˇ cuꞈ jaˆ gaˇ Giˇdoˬ sheuˬ keuˆ gʼeh ngeh, “Aˬ kuiˬ loꞈ-ehˇ mehˬ laˇ neh myeuꞈ-awˇ iˇ cuꞈ dawˇ-eu tsawˇ haˬ deuˬ-ahˇ, pawˬ tsuiꞈ pawˬ dmˬ dmˬ-awˇ iˇ cuꞈ dawˇ-eu deuˬ laꞈ kʼoeˇ tseˇ doˆ-awˬ” lehˇ, Sahˬpaˬ Miˬyehˇ aˬ yawꞈ-ahˇ ehˇ-eu meh.

⁶Yawˬ ha-euˬ laꞈ kʼawˆ neh iˇ cuꞈ kʼawꞈ doˆ-awˇ, mehˬ laˇ neh myeuꞈ myeuꞈ-ehˇ dawˇ-eu tsawˇ haˬ smˬ yaˇ gʼaˬ byah-eu meh. Nui deuˬ dawˬ tawˆ luꞈ pawˬ tsuiꞈ pawˬ dmˬ dmˬ-awˇ iˇ cuꞈ dawˇ-eu meh.

⁷Giˇdoˬ-ahˇ Sahˬpaˬ Miˬyehˇ ehˇ nehˬ-eu, “Iˇ cuꞈ-ahˇ mehˬ laˇ neh myeuꞈ myeuꞈ-ehˇ dawˇ-eu tsawˇ haˬ kʼoeˇ smˬ yaˇ gʼaˬ-ahˇ gʼoe-awˇ, Miˇdiˬyaˬ tsawˇ haˬ deuˬ-euˬ aˬ laꞈ laꞈ kʼoeˇ naw maꞈ-ahˇ ngaˇ ka kʼoꞈ-awˇ, naw maꞈ-ahˇ ngaˇ Miˇdiˬyaˬ tsawˇ haˬ deuˬ-ahˇ bi gʼaˬ leˇ ma. ‘Nui deuˬ dawˬ tawˆ luꞈ-ahˇ iˇ kahˇ-ahˇ gʼoꞈ-iˇ-awˬ’ lehˇ ehˇ nehˬ-awˬ.”

⁸Dzaˬ dzaˬ dawˇ dawˇ hawˇ-eu daˇ heh yuˇ luꞈ-eu tsawˇ haˬ kʼoeˇ smˬ yaˇ gʼaˬ-ahˇ neh dzeuˇ naˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ Giˇdoˬ bi gʼoꞈ-iˇ-euˬ meh. Miˇdiˬyaˬ taˆ-aˬ, aˬ yawꞈ maꞈ jawˇ-eu laꞈ oˆ deh kʼawꞈ-ahˇ jaˆ-eu meh.

⁹Kʼoeˇ ngeh miˇ, Giˇdoˬ-ahˇ Sahˬpaˬ Miˬyehˇ dawˬ biꞈ-euˬ meh. “Tuˇ-awˬ, taˆ kʼoeˇ taˆ-ahˇ guiˇ deuˆ-iˇ-awˬ. Nawˬ-ahˇ ngaˇ bi gʼaˬ leˇ ma.

¹⁰Ehˇ kʼawꞈ, nawˇ guiˇ maˬ deuˆ-iˇ peuˬ naˇ, nawˬ-euˬ zaˬ kʼaˆ Puˇlaˬ nehˬ-ehˇ taˆ kʼoeˇ taˆ-ahˇ iˇ haw-awˬ.

¹¹Aˬ yawꞈ maꞈ ja luꞈ-eu gaˇ kawˆ-ahˇ nawˇ ya gaˬ ngeh, nawˇ guiˇ deuˆ peuˬ laˇ tehꞈ-a.” Kʼoeˇ ngeh, Giˇdoˬ hawˇ-eu Puˇlaˬ aˬ nyaꞈ, muiˇ-euˬ deuˬ-euˬ taˆ taˆ dzeˇ keuˆ ni iˇ-euˬ meh.

¹²Miˇdiˬyaˬ tsawˇ haˬ, Aˬmaˬlehˇ tsawˇ haˬ hawˇ-eu, nahˇ ma doˆ kʼehˬ paw jawˇ-eu tsawˇ jeuˬ deuˬ, deh kʼawꞈ kʼawꞈ lah ni nyehˇ bahˇ baˬ maꞈ uiˬ leˇ taˬ-euˬ loꞈ-ehˇ jawˇ byah taˬ-awˇ, aˬ yawꞈ maꞈ-euˬ law taw deuˬ kʼawꞈ, iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ loꞈ-ehˇ myaˬ-eu meh.

¹³Giˇdoˬ iˇ keuˆ ngeh, tsawˇ haˬ tiˬ gʼaˬ, aˬ yawꞈ neh yuꞈ maˆ maˆ-euˬ gaˇ kawˆ aˬ yawꞈ-euˬ cawˬ deuˬ-ahˇ dzawˇ nehˬ luꞈ gaˇ ya gaˬ-euˬ meh. Aˬ yawꞈ ehˇ-eu, “Ngaˇ yuꞈ maˆ maˆ-eu laꞈ kʼoeˇ, lawˬ loeˇ kaˬ muˇ tiˬ siˬ aˬ dui maꞈ-euˬ taˆ laꞈ kʼoeˇ coˬ luˇ luˇ ka leꞈ-awˇ, sehˬ gʼawˆ tiˬ gʼawˆ-ahˇ coeˬ tahˬ ngeh, sehˬ gʼawˆ kʼoeˇ gʼawˆ coˬ pyaˆ coˬ shaˆ jiˇ-euˬ meh.”

¹⁴Aˬ yawꞈ-euˬ cawˬ ehˇ-eu, “Kaˬ muˇ kʼoeˇ siˬ-aˬ, nui jeˬ-ahˇ ehˇ mawꞈ-eu maˬ ngeuˇ-a. Yawˇshaˆ-euˬ aˬ li pyeuꞈ-eu Iˇsaˬleˬlaˆ tsawˇ haˬ Giˇdoˬ-euˬ mi cehˇ-ahˇ ehˇ mawꞈ-eu meh. Miˇdiˬyaˬ tsawˇ haˬ hawˇ-eu aˬ dui-euˬ guiˇ maꞈ maꞈ lah ni-ahˇ gʼaˬ leˇ-eu jeˬ, Miˬyehˇ aˬ yawꞈ-ahˇ biꞈ taˬ-eu meh.”

¹⁵Tsawˇ haˬ kʼoeˇ gʼaˬ-euˬ yuꞈ maˆ hawˇ-eu yuꞈ maˆ dawˬ tsuiꞈ kʼoeˇ-ahˇ Giˇdoˬ ya gaˬ ngeh, pawˬ tsuiꞈ paw dmˬ dmˬ-awˇ, Miˬyehˇ-ahˇ uˬ duˬ tahˬ-euˬ meh. Kʼoeˇ naˇ, Iˇsaˬleˬlaˆ taˆ-ahˇ aˬ yawꞈ paˇ gʼoꞈ le-awˇ, “Tuˇ-awˬ. Miˇdiˬyaˬ tsawˇ haˬ-euˬ taˆ-ahˇ gʼaˬ leˇ-eu jeˬ, naw maꞈ-ahˇ Sahˬpaˬ Miˬyehˇ biꞈ laꞈ gʼaˬ-euˬ meh” lehˇ ehˇ nehˬ-euˬ meh.

¹⁶Aˬ yawꞈ-euˬ tsawˇ haˬ smˬ yaˇ gʼaˬ-ahˇ, smˬ muˇ muˇ-awˇ, aˬ yawꞈ gʼaˬ yawꞈ-ahˇ daˇ heh tiˬ hmˬ hawˇ-eu tsiˇ kʼmˬ ciˬ ahˇ taˬ-euˬ ciˬ cuˇ tiˬ siˬ biꞈ nehˬ-euˬ meh.

¹⁷Aˬ yawꞈ maꞈ-ahˇ aˬ yawꞈ ehˇ nehˬ-eu, “Taˆ kʼoeˇ taˆ-euˬ gaˇ dzeˇ ngaˇ iˇ keuˆ ngeh, ngaˬ-ahˇ haw-awˇ ngaˇ kʼaˇ mˇ-eu loꞈ-ehˇ mˇ-awˬ.

¹⁸Ngaˇ hawˇ-eu ngaˬ-eu aˇ muˇ daˇ heh baw ngeh, naw maꞈ kʼawꞈ taˆ jawˬ jawˬ-ehˇ naw maꞈ yuˇ luꞈ-eu daˇ heh baw-awˇ, Sahˬpaˬ Miˬyehˇ gʼaˇ duˬ hawˇ-eu Giˇdoˬ gʼaˇ duˬ lehˇ guˇ-awˬ.”

¹⁹Sehˇ gʼahˇ ceh laˇ mawꞈ-awˇ, taˆ-ahˇ loꞈ-eu tsawˇ haˬ deuˬ dzeˇ paˇ paˇ gʼaˬ-eu nehˬ-ehˇ, Giˇdoˬ hawˇ-eu aˬ yawꞈ-euˬ aˇ muˇ tiˬ yaˇ gʼaˬ, taˆ gaˇ dzeˇ oe keuˆ-euˬ meh. Kʼoeˇ ngeh, aˬ yawꞈ maꞈ daˇ heh baw-awˇ, aˬ yawꞈ maꞈ yuˇ luꞈ-eu ciˬ cuˇ kʼoˆ paˆ-euˬ meh.

²⁰Dzeˇ-eu aˇ muˇ kʼoeˇ nyiˬ muˇ kʼawꞈ kʼoeˇ loꞈ-ehˇ jahˇ-euˬ meh. Aˬ yawꞈ maꞈ dawˬ tawˆ luꞈ, aˇ caˇ laꞈ-ahˇ tsiˇ kʼmˬ ciˬ-awˇ, aˇ maˇ laꞈ-ahˇ daˇ heh yuˇ-awˇ, “Sahˬpaˬ Miˬyehˇ hawˇ-eu Giˇdoˬ gʼaˇ duˬ mi cehˇ” lehˇ guˇ-eu meh.

²¹Yawˬ gʼaˬ na luꞈ taˆ jawˬ jawˬ-ehˇ yawˬ ha-euˬ jawˇ duˬ-ahˇ yawꞈ luꞈ ngeh, muiˇ-eu deuˬ-euˬ taˆ taˆ lah-ehˇ guˇ guˇ-ehˇ cehˆ-eu meh.

²²Giˇdoˬ-euˬ tsawˇ haˬ deuˬ daˇ heh baw luꞈ ngeh, muiˇ-eu deuˬ yawˬ ha cawˬ cawˬ mi cehˇ yuˇ-awˇ deuˆ ceh ceh ni, Sahˬpaˬ Miˬyehˇ jahˇ nehˬ-euˬ meh. Aˬ yawꞈ maꞈ Zaˬleˬdaˬ meuˬ paw cehˆ-awˇ, Behˬshiˇtahˇ meuˬ-ahˇ keuˆ ni maˬ ehˇ, Taˬbaˆ meuˬ dawˬ peh jaˆ-eu Aˬbeˬlaˆmeˬhawˇlahˬ meuˬ-ahˇ keuˆ ni maˬ ehˇ, cehˆ-euˬ meh.

²³Naˬtaˬliˇ tsawˇ jeuˬ, Aˬshaˬ tsawˇ jeuˬ hawˇ-eu, Yawˇdaˬ lawˇ baˬ kʼoeˇ baˬ heu baˬ-ahˇ jawˇ-eu Maˬnaˇseˬ tsawˇ haˬ nyiˬ maꞈ luꞈ-ahˇ kuˇ gaˬ-iˇ ngeh, Miˇdiˬyaˬ tsawˇ haˬ deuˬ-euˬ mehˬ nah aˬ yawꞈ maꞈ teh-euˬ meh.

²⁴Eˇpaˬleˬ miˇ kʼahˬ gawˬ jawˬ gawˬ duˇ-ahˇ Giˇdoˬ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ-iˇ-euˬ meh. “Oe ka-awˇ, Miˇdiˬyaˬ tsawˇ haˬ deuˬ-ahˇ guiˇ deuˆ le-awˬ. Yawˇdaˬ lawˇ baˬ hawˇ-eu Behˬbaˬlahˬ meuˬ-ahˇ keuˆ ni jaˆ-eu lawˇ gawˆ aˬ yawꞈ gawˆ yawꞈ-ahˇ, Miˇdiˬyaˬ tsawˇ haˬ deuˬ maˬ bi cehˆ tsehˆ ni loꞈ tsoeˬ jiˇ-awˬ” lehˇ bi tsaꞈ gaˬ iˇ-euˬ meh.

²⁵Miˇdiˬyaˬ tsawˇ haˬ yaw huiˬ nyiˬ gʼaˬ pyeuꞈ-eu Awˇleˇbaˆ hawˇ-eu Ziˇbaˬ-ahˇ aˬ yawꞈ maꞈ nyehꞈ mi-awˇ, Awˇleˇbaˆ lo gahˬ lehˇ kuˇ-eu jawˇ duˬ-ahˇ, Awˇleˇbaˆ-ahˇ sehꞈ-awˇ, Ziˇbaˬ aˬ gaꞈ dzaˇ uiˇ lehˬ duˬ lehˇ kuˇ-eu jawˇ duˬ-ahˇ, Ziˇbaˬ gʼaˬ-ahˇ sehꞈ-eu meh. Miˇdiˬyaˬ tsawˇ haˬ deuˬ-euˬ mehˬ nah aˬ yawꞈ maꞈ paˇ teh-awˇ, Yawˇdaˬ lawˇ baˬ nahˇ ma doˆ kʼehˬ paw iˇ keuˆ taˬ-euˬ Giˇdoˬ jawˇ gaˇ, Awˇleˇbaˆ hawˇ-eu Ziˇbaˬ-euˬ uˬ duˬ yuˇ gʼeh nehˬ-euˬ meh.