Read Akha Yaˇ kʼaˬ daˇ 8 Bible Online

Yaˇ kʼaˬ daˇ 8 - Akha bible

Yaˇ kʼaˬ daˇ 8

¹Kʼoeˇ naˇ, Eˇpaˬleˬ tsawˇ haˬ deuˬ Giˇdoˬ-ahˇ ehˇ-eu, “Miˇdiˬyaˬ tsawˇ haˬ deuˬ-ahˇ nawˇ guiˇ deuˆ leˇ ngeh, aˬ jeˬ miˇ neh nga maꞈ-ahˇ maˬ kuˇ gaˬ teˬ. Aˬ jeˬ miˇ neh teu loꞈ-ehˇ jahˇ nehˬ laꞈ te” lehˇ ehˇ-awˇ, nui ma maˬ saˇ ni iˬ baˇ taˬ-euˬ meh.

²Ehˇ kʼawꞈ, Giˇdoˬ ehˇ-eu, “Naw maꞈ neh mˇ gʼaˬ-euˬ jeˬ-ahˇ shaˇ cehˆ haw naˇ, ngaˇ mˇ nya-eu jeˬ-aˬ ehˇ nyaꞈ maˬ nyeuˆ-a. Naw maꞈ Eˇpaˬleˬ tsawˇ haˬ deuˬ neh ui cuiˆ tehꞈ-ehˇ mˇ-euˬ kʼawꞈ, nga maꞈ aˇ jeuˬ jeuˬ lah ni mˇ-euˬ naˆ maˬ tseˇ poeˬ dzehˬ-eu meh.

³Dawˬ tawˆ luꞈ kʼoeˇ taˆ ya ehˇ leꞈ naˇ, Miˬyehˇ-euˬ baoˬ baˬ da neh, Miˇdiˬyaˬ aˬ yuiꞈ nyiˬ gʼaˬ pyeuꞈ-eu Awˇleˇbaˆ hawˇ-eu Ziˇbaˬ aˬ nyaꞈ-ahˇ naw maꞈ sehꞈ nya-euˬ meh. Kʼoeˇ gaˇ shaˇ cehˆ nya paˬ-ehˇ, ngaˬ neh mˇ taˬ-euˬ aˬ jeˬ paˇ jaˆ ta.” Aˬ yawꞈ kʼoeˇ loꞈ-ehˇ ehˇ nehˬ gʼaˬ ngeh, aˬ yawꞈ maꞈ nui ma pehˇ-eu shuꞈ-iˇ-euˬ meh.

⁴Kʼoeˇ naˇ, Giˇdoˬ hawˇ-eu aˬ yawꞈ-euˬ tsawˇ haˬ smˇ gʼaˬ Yawˇdaˬ lawˇ baˬ-ahˇ oe doˆ-awˇ, lawˇ baˬ tsehˆ doˆ gʼaˬ-euˬ meh. Aˬ yawꞈ maꞈ gʼaˬ doeˇ doeˇ laˇ taˬ-euˬ kʼawꞈ, muiˇ-eu deuˬ-euˬ mehˬ nah teh luꞈ-a siˬ.

⁵Aˬ yawꞈ maꞈ Suˇkoˆ meuˬ-ahˇ le keuˆ ngeh, meuˬ kʼoeˇ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ ehˇ nehˬ-eu, “Ngaˬ-euˬ tsawˇ haˬ deuˬ-ahˇ kaˬ muˇ ui cuiˆ biꞈ nehˬ-iˬ sheˇ. Aˬ yawꞈ maꞈ gʼaˬ doeˇ doeˇ laˇ taˬ-euˬ meh. Miˇdiˬyaˬ sahˬ paˬ Zeˬbah hawˇ-eu Zaˬlaˬmoˇnaˬ-euˬ mehˬ nah nymˬ-mˇ keuˆ ni ngaˇ teh luꞈ-eu ma.”

⁶Ehˇ kʼawꞈ, Suˇkoˆ meuˬ-euˬ aˬ yuiꞈ aˬ tsu deuˬ ehˇ-eu, “Zeˬbah hawˇ-eu Zaˬlaˬmoˇnaˬ-ahˇ naw maꞈ maˬ nyehꞈ mi gʼaˬ-euˬ gaˇ, aˬ jeˬ miˇ neh nawˬ-eu guiˇ maꞈ-ahˇ nga maꞈ dzaˇ ya biꞈ ta.”

⁷Giˇdoˬ ehˇ-eu, “Toˆ-ehˇ ngeuˇ naˇ, Sahˬpaˬ Miˬyehˇ ngaˬ-ahˇ Zeˬbah hawˇ-eu Zaˬlaˬmoˇnaˬ aˬ nyaꞈ a nehˬ laꞈ ngeh, bawˇ tsahˬ-ahˇ jaˆ-eu aˬ gah tsoꞈ-eu daˇ cuiˇ neh naw maꞈ-ahˇ ngaˇ diˬ ma.”

⁸Peˬnoeˬlaˇ meuˬ-ahˇ Giˇdoˬ paˇ iˇ gʼeh-awˇ, kʼoeˇ gaˇ jawˇ-eu tsawˇ haˬ deuˬ-ahˇ kʼawꞈ kʼoeˇ loꞈ-ehˇ paˇ ehˇ-iˇ-euˬ meh. Ehˇ kʼawꞈ, kʼoeˇ gaˇ jawˇ-eu tsawˇ haˬ deuˬ kʼawꞈ, Suˇkoˆ meuˬ-ahˇ jawˇ-eu tsawˇ haˬ deuˬ loꞈ-ehˇ paˇ ehˇ kʼoꞈ nehˬ-euˬ meh.

⁹Kʼoeˇ ngeh, tsawˇ haˬ kʼoeˇ deuˬ-ahˇ aˬ yawꞈ ehˇ nehˬ-eu, “Ngaˇ tiˬ jeˬ-iˬ maˬ lehˬ maˬ ca ni heu gaˇ paˇ gʼoꞈ keuˆ laˇ ma. Ngaˇ paˇ gʼoꞈ keuˆ laˇ ngeh, naw maꞈ-euˬ loꞈ duˬ nymˇ goˇ heu-ahˇ ngaˇ laˆ cawˆ ma.”

¹⁰Zeˬbah hawˇ-eu Zaˬlaˬmoˇnaˬ aˬ nyaꞈ-aˬ, aˬ yawꞈ nyaꞈ-euˬ guiˇ maꞈ deuˬ nehˬ-ehˇ Kaˬkawˬ meuˬ-ahˇ jawˇ luꞈ-eu meh. Nahˇ ma doˆ kʼehˬ paw jawˇ-eu tsawˇ jeuˬ deuˬ-euˬ guiˇ guiˇ maꞈ maꞈ lah ni laꞈ kʼoeˇ, tiˬ seh nyiˬ muiˇ gʼaˬ bi sehꞈ-awˇ, tiˬ muiˇ ngaˬ heˇ gʼaˬ tehꞈ-ehˇ dzeˇ yaꞈ-euˬ meh.

¹¹Giˇdoˬ-aˬ, Noˇbaˬ meuˬ hawˇ-eu Yoˇbeˬhaˇ meuˬ-euˬ nahˇ ma doˆ kʼehˬ paw bawˇ tsahˬ bawˇ dahˇ gaˇ dzeˇ paw dahˇ-eu gaˇ ma caw caw-ehˇ iˇ-awˇ, guiˇ maꞈ kʼoeˇ maꞈ maˬ noeˬ maˬ duˇ-ehˇ jawˇ gaˇ guiˇ deuˆ-iˇ-euˬ meh.

¹²Miˇdiˬyaˬ sahˬ paˬ nyiˬ gʼaˬ pyeuꞈ-eu Zeˬbah hawˇ-eu Zaˬlaˬmoˇnaˬ aˬ nyaꞈ cehˆ-euˬ meh. Ehˇ kʼawꞈ, aˬ yawꞈ nyaꞈ-ahˇ Giˇdoˬ teh mi-awˇ nyehꞈ-euˬ meh. Aˬ yawꞈ nyaꞈ-euˬ guiˇ maꞈ -ahˇ kʼawꞈ, laˆ luˬ laˆ seˇ nehˬ-euˬ meh.

¹³Giˇdoˬ guiˇ deuˆ gʼaˬ-awˇ, Heˬyehˆ gʼaˬ lahˇ paw neh gʼoꞈ laˇ ngeh,

¹⁴Suˇkoˆ meuˬ-ahˇ jawˇ-eu zaˬ guˬ tiˬ gʼaˬ-ahˇ nyehꞈ-awˇ naˇ haˬ-euˬ meh. Zaˬ guˬ kʼoeˇ gʼaˬ, Suˇkoˆ meuˬ-ahˇ jawˇ-eu aˬ yuiꞈ aˬ tsu shiꞈ tseˇ shiꞈ gʼaˬ-euˬ tsawˇ myahˇ Giˇdoˬ-ahˇ boꞈ nehˬ-euˬ meh.

¹⁵Kʼoeˇ naˇ, Suˇkoˆ meuˬ-ahˇ jawˇ-eu tsawˇ haˬ deuˬ jawˇ gaˇ Giˇdoˬ iˇ-awˇ ehˇ nehˬ-eu, “Naw maꞈ neh nga maꞈ-ahˇ ngehˬ ma gʼeh ni bi iˇ nehˬ laꞈ-euˬ gaˇ kawˆ kʼoeˇ, nawˬ-ahˇ ngehˇ-euˬ nya loˇ. Zeˬbah hawˇ-eu Zaˬlaˬmoˇnaˬ-ahˇ nga maꞈ maˬ nyehꞈ mi-euˬ miˇ neh, gʼaˬ doeˇ doeˇ dui dui luꞈ-eu ngaˬ-euˬ guiˇ maꞈ-ahˇ dzaˬ dzaˬ dawˇ dawˇ maˬ biꞈ lehˇ naw maꞈ ehˇ-euˬ maˬ ngeuˇ te loˇ. Aˬ nyaꞈ-ahˇ ngaˇ nyehꞈ mi laꞈ-euˬ gaˇ haw le sheˇ.”

¹⁶Kʼoeˇ naˇ, bawˇ tsahˬ bawˇ dahˇ-ahˇ jaˆ-eu aˬ gah tsoꞈ-eu daˇ cuiˇ deuˬ aˬ yawꞈ yuˇ-awˇ, Suˇkoˆ meuˬ-euˬ aˬ yuiꞈ aˬ tsu deuˬ-ahˇ kʼehˬ nehˬ kʼaˆ nehˬ-euˬ meh.

¹⁷Peˬnoeˬlaˇ meuˬ-ahˇ jaˆ-eu loꞈ-eu nymˇ goˇ-ahˇ kʼawꞈ, aˬ yawꞈ laˆ cawˆ nehˬ-awˇ, meuˬ kʼoeˇ meuˬ-ahˇ jawˇ-eu tsawˇ haˬ deuˬ-ahˇ sehꞈ-euˬ meh.

¹⁸Kʼoeˇ naˇ, “Taˬbawˬ meuˬ-ahˇ naw maꞈ neh sehꞈ-euˬ tsawˇ haˬ kʼoeˇ deuˬ aˬ joˆ-ehˇ gʼeh ta” lehˇ, Zeˬbah hawˇ-eu Zaˬlaˬmoˇnaˬ-ahˇ Giˇdoˬ naˇ haˬ nehˬ-euˬ meh. Aˬ yawꞈ nyaꞈ ehˇ-eu, “Aˬ yawꞈ maꞈ nawˬ-ahˇ duˇ-eu meh. Aˬ yawꞈ gʼaˬ yawꞈ sahˬpaˬ-euˬ aˬ li loꞈ-ehˇ gʼeh-eu tsawˇ haˬ tehꞈ meh.”

¹⁹Giˇdoˬ ehˇ-eu, “Aˬ yawꞈ maꞈ-aˬ, ngaˬ ma neh baw-euˬ ngaˬ-euˬ aˬ nyiˇ deuˬ meh. Naw nyaꞈ aˬ yawꞈ maꞈ-ahˇ maˬ sehꞈ law nmˇ-aˬ, naw nyaꞈ-ahˇ kʼawꞈ, ngaˇ maˬ sehꞈ lehˇ kamˬ peuˬ ma.”

²⁰Kʼoeˇ naˇ, aˬ yawꞈ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Yeˬdeuˬ-ahˇ, “Aˬ yawꞈ nyaꞈ-ahˇ sehꞈ-awˬ” lehˇ aˬ yawꞈ ehˇ nehˬ-euˬ meh. Ehˇ kʼawꞈ, aˬ li kʼoeˇ li, zaˬ pyeuꞈ-eu miˇ neh, mi cehˇ maˬ gʼeu doˆ-ehˇ, guˆ-eu laꞈ kʼoeˇ nyi naˬ nyi naˬ-ehˇ jawˇ-euˬ meh.

²¹Zeˬbah hawˇ-eu Zaˬlaˬmoˇnaˬ aˬ nyaꞈ Giˇdoˬ-ahˇ ehˇ-eu, “Nawˬ-euˬ gʼawˇ mawˇ oe-awˇ nga nyaꞈ-ahˇ sehꞈ-awˬ tawˇ. Tsawˇ kʼaˆ ya mˇ-eu gaˇ-ahˇ aˬ jeˬ miˇ neh zaˬ-ahˇ kʼehˇ te.” Kʼoeˇ ngeh, aˬ yawꞈ nyaꞈ-ahˇ Giˇdoˬ sehꞈ-awˇ, aˬ yawꞈ nyaꞈ-euˬ law taw-euˬ kawˬ lahˇ-ahˇ dah luꞈ-eu myawˬ guˇ deuˬ yuˇ geuꞈ-euˬ meh.

²²Kʼoeˇ naˇ, Iˇsaˬleˬlaˆ tsawˇ haˬ deuˬ Giˇdoˬ-ahˇ ehˇ nehˬ-eu, “Nawˇ hawˇ-eu nawˬ-euˬ zaˬ nawˬ-euˬ uˆ deuˬ nga maꞈ kʼoeˇ taˆ uˆ lahˇ-awˬ. Miˇdiˬyaˬ tsawˇ haˬ deuˬ-euˬ aˬ laꞈ laꞈ kʼoeˇ, nga maꞈ-ahˇ nawˇ ka kʼoꞈ-euˬ meh.”

²³Giˇdoˬ ehˇ-eu, “Ngaˇ maˬ ehˇ, ngaˬ li maˬ ehˇ, naw maꞈ-ahˇ uˆ lahˇ-eu gʼaˬ maˬ geuꞈ. Sahˬpaˬ Miˬyehˇ naw maꞈ-ahˇ uˆ lahˇ tehꞈ-a.”

²⁴Ehˇ kʼawꞈ, aˬ yawꞈ heu loꞈ-ehˇ paˇ ehˇ-eu meh. “Naw maꞈ-ahˇ ngaˇ heu loꞈ-ehˇ shaˇ-eu ma. Naw maꞈ yawˬ gʼaˬ na luꞈ, yawˬ ha neh yuˇ taˬ-euˬ naˬ bawˇ naˬ yoˆ ngaˬ-ahˇ biꞈ laꞈ-awˬ.” (Miˇdiˬyaˬ tsawˇ haˬ deuˬ kʼawꞈ, nahˇ ma doˆ kʼehˬ paw jawˇ-eu tsawˇ jeuˬ deuˬ loꞈ-ehˇ, shuiˇ naˬ bawˇ naˬ yoˆ geuꞈ-eu meh.)

²⁵Iˇsaˬleˬlaˆ tsawˇ haˬ deuˬ gʼeh, “Nga maꞈ laˬ kʼaˬ cehˇ taˆ ni nawˬ-ahˇ biꞈ-eu ma” lehˇ ehˇ-awˇ, saˬ paˇ kʼawˬ-awˇ, yawˬ gʼaˬ na luꞈ, yawˬ ha neh kʼaˇ yuˇ taˬ-euˬ naˬ bawˇ naˬ yoˆ deuˬ, kʼoeˇ gaˇ yuˇ taˬ le-euˬ meh.

²⁶Giˇdoˬ neh shaˇ uiˬ-euˬ naˬ bawˇ naˬ yoˆ dawˬ tawˆ luꞈ, tseˇ nyiꞈ jawꞈ-i ehˇ gʼaˬ ni byah-eu meh. Kʼoeˇ-euˬ laꞈ kʼoeˇ, myawˬ guˇ deuˬ, lawˇ dah deuˬ, Miˇdiˬyaˬ sahˬ paˬ deuˬ dm-eu neˇ naˆ naˆ-eu mehˬ tsoeˬ deuˬ hawˇ-eu, law taw-euˬ kawˬ lahˇ-ahˇ bi geuꞈ-euˬ lahˇ baˆ deuˬ kʼawꞈ, maˬ ahˇ leˇ-aˬ siˬ.

²⁷Giˇdoˬ-aˬ, shuiˇ kʼoeˇ deuˬ neh tahˬ pahˬ aˬ ma mawˇ kawˇ tiˬ hmˬ tehˆ-awˇ, aˬ yawꞈ jawˇ-eu Awˇpaˬlaˇ meuˬ-ahˇ bi jaˆ-euˬ meh. Iˇsaˬleˬlaˆ tsawˇ haˬ dawˬ tawˆ luꞈ Sahˬpaˬ Miˬyehˇ-ahˇ byehˇ dzeh-awˇ, kʼoeˇ gaˇ iˇ-awˇ, tahˬ pahˬ aˬ ma mawˇ kawˇ kʼoeˇ hmˬ-ahˇ uˬ duˬ tahˬ-euˬ meh. Kʼoeˇ-aˬ, Giˇdoˬ hawˇ-eu aˬ yawꞈ-euˬ miˬ sawˇ zaˬ deuˬ gʼaˇ duˬ lahˇ ju kʼmˇ taˬ-euˬ gaˇ duˇ-eu meh.

²⁸Kʼoeˇ loꞈ-ehˇ, Iˇsaˬleˬlaˆ tsawˇ haˬ deuˬ Miˇdiˬyaˬ tsawˇ haˬ-ahˇ deuˆ gʼaˬ-awˇ, guˆ kʼaˇ maˬ za ni pyeuꞈ-iˇ-euˬ meh. Giˇdoˬ shiˇ ngeh keuˆ ni, oeˬ tseˇ kʼoꞈ byah ni, miˇ kʼahˬ kʼoeˇ kʼahˬ laꞈ kʼoeˇ guiˇ maˬ deuˆ-ehˇ nui saˇ oꞈ-eu jeˬ jaˆ-euˬ meh.

²⁹Giˇdoˬ-aˬ, aˬ yawꞈ-euˬ nymˇ-ahˇ gʼoꞈ-iˇ-awˇ jawˇ-euˬ meh.

³⁰Aˬ yawꞈ miˬ zaˬ myaˬ-eu miˇ neh, aˬ li shiꞈ tseˇ li jawˇ-eu meh.

³¹Sheˬkmˬ meuˬ-ahˇ kʼawꞈ, aˬ yawꞈ-euˬ ma nyiˇ tiˬ gʼaˬ jawˇ-awˇ, ma nyiˇ kʼoeˇ gʼaˬ aˬ yawꞈ gʼaˇ duˬ aˬ li tiˬ li bi dehꞈ le-euˬ meh. Aˬ li kʼoeˇ li-ahˇ Aˬbiˇmaˬlehˆ lehˇ aˬ yawꞈ myahˇ nehˬ-euˬ meh.

³²Yawˇshaˆ-euˬ aˬ li Giˇdoˬ-aˬ, tsawˇ mawˬ mawˬ laˇ-awˇ, ziˇ dehꞈ jiˇ-euˬ meh. Aˬbyeˇzaˬ aˇ jeuˬ-euˬ meuˬ pyeuꞈ-eu Awˇpaˬlaˇ meuˬ-ahˇ jaˆ-eu aˬ yawꞈ-euˬ aˬ da Yawˇshaˆ-euˬ lmˬ bymˇ-ahˇ, aˬ yawꞈ-ahˇ baꞈ pahˬ-euˬ meh.

³³Giˇdoˬ shiˇ dzeuˇ ngeh, Iˇsaˬleˬlaˆ tsawˇ haˬ deuˬ Miˬyehˇ-ahˇ saˇ jaˇ puiˬ-awˇ, Baˬlaˇ miˬ yehˇ deuˬ-ahˇ uˬ duˬ tahˬ-euˬ meh. Dawˬ ma saˇ jaˇ-euˬ Baˬlaˇ miˬ yehˇ lehˇ kuˇ-eu miˬ yehˇ-ahˇ aˬ yawꞈ maꞈ-euˬ miˬ yehˇ bi geuꞈ-euˬ meh.

³⁴Aˬ yawꞈ maꞈ-euˬ jawˬ jawˬ-ehˇ jawˇ luꞈ-eu muiˇ-eu deuˬ dawˬ tawˆ luꞈ-euˬ laꞈ-ahˇ neh aˬ yawꞈ maꞈ-ahˇ ka kʼoꞈ-euˬ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ maˬ tahˬ ni byehˇ-euˬ meh.

³⁵Iˇsaˬleˬlaˆ tsawˇ jeuˬ gʼaˇ duˬ, Giˇdoˬ-euˬ nymˇ jiˇ muiˬ-eu jeˬ mˇ nehˬ laꞈ-euˬ miˇ neh, guiˬ lahˬ huiˬ miˇ-a lehˇ kʼawꞈ aˬ yawꞈ maꞈ maˬ noeˬ-a.