Read Akha Pah meuˬ-eu 10 Bible Online

Pah meuˬ-eu 10 - Akha bible

Pah meuˬ-eu 10

¹Kʼoeˇ naˇ, gʼaˬ kʼaˆ dui dui-eu mˬ taˆ gʼaˬ kʼehˇ tiˬ gʼaˬ mˬ-ahˇ neh zaꞈ ka le gaˇ ngaˇ ya mawˇ-euˬ ma. Aˬ yawꞈ-ahˇ mˬ dmˇ neh lahˇ kaˬ taˬ-awˇ, uˬ duˬ tiˬ jawˬ aˇ deˇ leˇ kʼah tiˬ kʼah jaˆ-eu meh. Aˬ yawꞈ-euˬ myaˆ pyawˬ nahˇ ma-ahˇ duˇ-awˇ, aˬ kuiˇ miˬ dzaˬ kʼawˇ zeuˇ-ahˇ duˇ-eu meh.

²Aˬ laꞈ-ahˇ sahˬ boꞈ paˇ yoˆ tiˬ yoˆ pah-awˇ tuˆ tehˬ taˬ-euˬ meh. Aˇ maˇ kuiˇ iˬ ma laˆ shaˆ-ahˇ nawˬ tehˬ taˬ-awˇ, aˇ caˇ kuiˇ miˇ tsaˬ-ahˇ nawˬ tehˬ taˬ-euˬ meh.

³Aˇ laˬ jaˬ shiˇ joeˬ-eu teˇ saˇ loꞈ-ehˇ, aˬ yawꞈ yaw kʼaˆ-ehˇ guˇ-eu meh. Aˬ yawꞈ kʼoeˇ loꞈ-ehˇ guˇ gʼaˬ ngeh, mˬ jeˬ shiꞈ teˇ jeˬ-euˬ meh.

⁴Aˬ yawꞈ maꞈ dawˬ ngehˬ doˆ laˇ-eu nehˬ-ehˇ boꞈ ahˇ taˬ-eu lehˇ gʼeh-euˬ ma. Ehˇ kʼawꞈ, “Mˬ jeˬ shiꞈ teˇ neh ehˇ-euˬ dawˬ kʼoeˇ deuˬ maˬ boꞈ ni zaꞈ taˬ-awˬ” lehˇ, mˬ-ahˇ neh ehˇ leꞈ-euˬ teˇ saˇ-ahˇ ngaˇ ya gaˬ-euˬ ma.

⁵Kʼoeˇ naˇ, iˬ ma laˆ shaˆ hawˇ-eu miˇ tsaˬ kʼoeˇ taˆ yawꞈ luꞈ-eu ngaˇ mawˇ-euˬ mˬ taˆ gʼaˬ kʼehˇ kʼoeˇ gʼaˬ, aˇ maˇ laꞈ mˬ paw baꞈ diˇ-euˬ meh.

⁶Kʼoeˇ naˇ, mˬ maˬ maˬ byaˆ zaˇ ziˇ dehꞈ-eu gʼaˬ pyeuꞈ-eu, mˬ, miˇ, iˬ ma laˆ shaˆ hawˇ-eu kʼoeˇ deuˬ-euˬ laꞈ kʼoeˇ kʼaˇ dehꞈ kʼaˇ jawˇ-eu jeˬ dawˬ tawˆ luꞈ-ahˇ beh-euˬ Miˬyehˇ-euˬ tsawˇ myahˇ uˬ moˆ heu loꞈ-ehˇ kamˬ-eu meh. “Aˇ yamˬ maˬ paˇ jiˆ nya meh.

⁷Mˬ taˆ gʼaˬ kʼehˇ shiꞈ gʼaˬ tiˬ gʼaˬ daˇ heh baw laˇ-awˇ, Miˬyehˇ aˬ yawꞈ neh zaꞈ taˬ-euˬ jeˬ pyeuꞈ-eu, aˬ yawꞈ gʼaˇ duˬ ngehˬ dah-eu aˬ yawꞈ-euˬ zaˬ kʼaˆ deuˬ-ahˇ ehˇ nehˬ taˬ-euˬ zaꞈ taˬ-euˬ jeˬ bi keuˆ le-euˬ meh.”

⁸Kʼoeˇ naˇ, “Iˬ ma laˆ shaˆ hawˇ-eu miˇ tsaˬ kʼoeˇ taˆ yawꞈ luꞈ-eu mˬ taˆ gʼaˬ kʼehˇ kʼoeˇ gʼaˬ-euˬ aˬ laꞈ-ahˇ ahˇ-eu pah taˬ-euˬ sahˬ boꞈ paˇ yoˆ kʼoeˇ yoˆ yuˇ laˬ-iˇ-awˬ” lehˇ, mˬ-ahˇ neh ngaˬ-ahˇ ngehˬ cawˬ-eu teˇ saˇ kʼoeˇ saˇ tiˬ poˆ paˇ ehˇ-eu meh.

⁹Mˬ taˆ gʼaˬ kʼehˇ kʼoeˇ gʼaˬ jawˇ gaˇ ngaˇ iˇ-awˇ, sahˬ boꞈ paˇ yoˆ yoˆ zaˬ kʼoeˇ hmˬ shaˇ-iˇ-euˬ ma. Aˬ yawꞈ ngaˬ-ahˇ ehˇ-eu, “Yuˇ-awˇ dzaˬ-awˬ. Sahˬ boꞈ paˇ yoˆ heu nawˬ-euˬ uˬ maˆ laꞈ kʼoeˇ cehˇ myawˆ ni gʼeh kʼawꞈ, nawˬ-euˬ kʼaˬ meh-ahˇ byaˬ byaˬ uiˇ loꞈ-ehˇ coeˇ oˆ ni gʼeh tehꞈ-a.”

¹⁰Aˬ yawꞈ-euˬ aˬ laꞈ-ahˇ ahˇ-eu sahˬ boꞈ paˇ yoˆ yoˆ zaˬ kʼoeˇ yoˆ ngaˇ yuˇ-awˇ dzaˬ ngeh, ngaˬ-euˬ kʼaˬ meh-ahˇ byaˬ byaˬ uiˇ loꞈ-ehˇ coeˇ-eu meh. Ehˇ kʼawꞈ, ngaˇ myoꞈ ahˇ gʼaˬ ngeh, uˬ maˆ laꞈ kʼoeˇ cehˇ myawˆ ni pyeuꞈ-iˇ-euˬ meh.

¹¹Kʼoeˇ naˇ, “Miˇ tsaˬ tsawˇ jeuˬ tsawˇ ca dawˬ tawˆ luꞈ gaˇ kawˆ, Miˬyehˇ gʼaˇ duˬ nawˇ paˇ ya ngehˬ dah meh” lehˇ, ngaˬ-ahˇ ehˇ nehˬ laꞈ-euˬ meh.