Read Akha Pah meuˬ-eu 12 Bible Online

Pah meuˬ-eu 12 - Akha bible

Pah meuˬ-eu 12

¹Kʼoeˇ naˇ, huiˬ dui dui-eu zahˬ leˇ paˬ-ehˇ gʼeh-eu jeˬ mˬ kʼoeˇ taˆ ya mawˇ-euˬ ma. Zaˬ miˬ zaˬ tiˬ gʼaˬ nahˇ ma-ahˇ dm-awˇ, ba la-ahˇ nawˬ tehˬ taˬ-awˇ, aˬ guiˇ tseˇ nyiꞈ siˬ tsoꞈ-eu shuiˇ uˬ kʼoˆ kʼoˆ luꞈ-eu meh.

²Zaˬ miˬ zaˬ kʼoeˇ gʼaˬ zaˬ ciˬ deˇ le-awˇ, uˬ maˆ naˇ-eu mahˇ luꞈ-eu meh.

³Zahˬ leˇ paˬ-ehˇ gʼeh-eu yawˬ jeˬ yawˬ mˬ kʼoeˇ taˆ paˇ ya mawˇ-euˬ ma. Neˇ tseuˆ ni gʼeh-eu byaˆ yahˬ tiˬ mawˇ uˬ duˬ shiꞈ siˬ tsoꞈ-awˇ, uˬ coeˇ tseˇ coeˇ tsoꞈ-eu meh. Uˬ duˬ aˬ yawꞈ siˬ yawꞈ-ahˇ, shuiˇ uˬ kʼoˆ kʼoˆ luꞈ-eu meh.

⁴Aˬ yawꞈ-euˬ dawˬ miˬ neh mˬ taˆ-euˬ aˬ guiˇ smˬ bymˇ tiˬ bymˇ-ahˇ miˇ tsaˬ kʼoeˇ taˆ yaˆ dzeh leꞈ-euˬ meh. Byaˆ yahˬ kʼoeˇ mawˇ zaˬ miˬ zaˬ kʼoeˇ gʼaˬ-euˬ mehˬ shi yawꞈ-awˇ, zaˬ ciˬ doˆ leꞈ-eu nehˬ-ehˇ dzaˬ-eu lehˇ gʼeh-eu meh.

⁵Kʼoeˇ naˇ, zaˬ miˬ zaˬ kʼoeˇ gʼaˬ shmˇ gawˬ yoeˬ neh tsawˇ jeuˬ dawˬ tawˆ luꞈ kʼoeˇ taˆ uˆ lahˇ-eu aˬ li tiˬ li ciˬ-euˬ meh. Ehˇ kʼawꞈ, aˬ li kʼoeˇ li-ahˇ Miˬyehˇ jawˇ gaˇ hawˇ-eu Miˬyehˇ-euˬ dzoeˬ dzaˬ nuiˇ mahˬ jaˆ gaˇ bi ciˬ leꞈ-euˬ meh.

⁶Zaˬ miˬ zaˬ kʼoeˇ gʼaˬ-aˬ, Miˬyehˇ neh aˬ yawꞈ-euˬ gʼaˇ duˬ lehˬ hmˬ taˬ-euˬ bawˇ tsahˬ-ahˇ cehˆ-euˬ meh. Kʼoeˇ gaˇ, aˬ yawꞈ-ahˇ tiˬ heˇ nyiˬ yaˇ koꞈ tseˇ nah byah ni bo saˆ haw piˇ nehˬ-eu gʼaˇ duˬ pyeuꞈ-eu meh.

⁷Kʼoeˇ naˇ, mˬ kʼoeˇ taˆ guiˇ deuˆ-euˬ meh. Miˇkeˬlaˇ hawˇ-eu aˬ yawꞈ-euˬ mˬ taˆ gʼaˬ kʼehˇ deuˬ byaˆ yahˬ kʼoeˇ mawˇ-ahˇ deuˆ-awˇ, byaˆ yahˬ kʼoeˇ mawˇ gʼeh, aˬ yawꞈ-euˬ mˬ taˆ gʼaˬ kʼehˇ deuˬ sheuˬ-awˇ deuˆ-euˬ meh.

⁸Ehˇ kʼawꞈ, byaˆ yahˬ kʼoeˇ mawˇ guiˇ bi deuˆ gʼaˬ-awˇ, aˬ yawꞈ hawˇ-eu aˬ yawꞈ-euˬ mˬ taˆ gʼaˬ kʼehˇ deuˬ-ahˇ mˬ kʼoeˇ taˆ maˬ paˇ bi jawˇ ni bi teh dzeh-euˬ meh.

⁹Aˇ hu ba-euˬ aˇ lawˇ kʼoeˇ mawˇ pyeuꞈ-eu, Nehꞈ sahˬ paˬ hawˇ-eu nehꞈ Saˬ daˬ lehˇ kuˇ-eu, miˇ tsaˬ zaˬ dawˬ tawˆ luꞈ-ahˇ sheuˬ bahˬ-euˬ byaˆ yahˬ yahˬ ma kʼoeˇ mawˇ miˇ tsaˬ kʼoeˇ taˆ bi biˬ ka leꞈ-awˇ, aˬ yawꞈ-euˬ mˬ taˆ gʼaˬ kʼehˇ dawˬ tawˆ luꞈ kʼawꞈ, aˬ yawꞈ nehˬ-ehˇ bi biˬ ka leꞈ-euˬ meh.

¹⁰Kʼoeˇ naˇ, mˬ kʼoeˇ taˆ teˇ saˇ yaw kʼaˆ-ehˇ heu loꞈ-ehˇ ehˇ gaˇ ngaˇ ya gaˬ-euˬ ma. “Miˬyehˇ-euˬ ka kʼoꞈ-eu jeˬ nymˬ-mˇ keuˆ le taˬ-euˬ meh. Miˬyehˇ aˬ yawꞈ Sahˬpaˬ pyeuꞈ-eu gaˇ kawˆ, aˬ yawꞈ-euˬ baoˬ nymˬ-mˇ bi mawˇ laꞈ-euˬ meh. Aˬ yawꞈ-euˬ Ka li kʼawꞈ, uˆ lahˇ-eu baoˬ bi mawˇ laꞈ-euˬ meh. Aˬ jeˬ miˇ neh ehˇ naˇ, Miˬyehˇ-euˬ mehˬ shi yawꞈ-awˇ, aˬ dui-euˬ aˬ yuiꞈ aˬ nyiˇ Ka li zaˬ deuˬ-ahˇ uˬ ciꞈ nah gʼahˇ maˬ ehˇ iˬ baˇ poˆ luꞈ-eu gʼaˬ-aˬ, mˬ-ahˇ neh bi biˬ ka-euˬ meh.

¹¹Aˬ dui-euˬ aˬ yuiꞈ aˬ nyiˇ Ka li zaˬ deuˬ-aˬ, Yawˇzaˬ-euˬ shiˬ hawˇ-eu aˬ yawꞈ maꞈ mehˬ luꞈ-eu yaw tsaˬ yaw dawˇ jeˬ baˬ da neh aˬ yawꞈ-ahˇ gʼaˬ leˇ-euˬ meh. Aˬ yawꞈ maꞈ-aˬ, gʼawˇ mawˇ shiˇ dah peuˬ-eu meh.

¹²Kʼoeˇ miˇ neh, mˬ hawˇ-eu mˬ kʼoeˇ taˆ kʼaˇ jawˇ kʼaˇ deuˬ laˬ kʼaˬ cehˇ-awˬ. Ehˇ kʼawꞈ, miˇ tsaˬ hawˇ-eu iˬ ma laˆ shaˆ naw nyaꞈ aˇ naˆ ni noeˬ shaˬ paˬ-ehˇ gʼeh-eu nga. Aˬ jeˬ miˇ neh ehˇ naˇ, Nehꞈ sahˬ paˬ naw nyaꞈ jawˇ gaˇ zaꞈ ka keuˆ le-awˇ, aˬ yawꞈ gʼaˇ duˬ aˇ yamˬ ui cuiˆ maˬ ngeuˇ naˇ maˬ paˇ jaˆ meh lehˇ siˬ nya-eu miˇ neh, nui ma pehˇ dui dui-eu meh.

¹³Byaˆ yahˬ kʼoeˇ mawˇ-aˬ, aˬ yawꞈ-ahˇ miˇ tsaˬ kʼoeˇ taˆ biˬ ka nehˬ-euˬ siˬ leˇ ngeh, aˬ li zaˬ nahˬ ciˬ taˬ-euˬ zaˬ miˬ zaˬ kʼoeˇ gʼaˬ-euˬ mehˬ nah teh-eu meh.

¹⁴Zaˬ miˬ zaˬ kʼoeˇ gʼaˬ, smˇ kʼoꞈ uˬ taꞈ tiˬ paˆ keuˆ ni byaˆ yahˬ kʼoeˇ mawˇ-euˬ laꞈ-ahˇ neh haw piˇ nehˬ-eu lehˇ lehˬ hmˬ nehˬ taˬ-euˬ bawˇ tsahˬ kʼoeˇ tsahˇ-ahˇ zaw kʼoꞈ gʼeh nya ni, kʼaˬ dzeˇ dzeˇ ma-euˬ aˬ dahˇ nyiˬ pyawˬ laˆ tsoꞈ nehˬ taˬ-euˬ meh.

¹⁵Byaˆ yahˬ kʼoeˇ mawˇ-aˬ, zaˬ miˬ zaˬ kʼoeˇ gʼaˬ bi bu byoˆ gʼeh-eu gʼaˇ duˬ, kʼaˬ meh-ahˇ iˇ jeuˬ jeuˬ ma tahˬ kʼaˇ doˆ leꞈ-euˬ meh.

¹⁶Ehˇ kʼawꞈ, miˇ tsaˬ tahˬ kʼawˇ neh zaˬ miˬ zaˬ kʼoeˇ gʼaˬ-ahˇ caw ba-awˇ, byaˆ yahˬ-euˬ kʼa meh-ahˇ neh yoeˇ doˆ le-euˬ iˇ cuꞈ kʼoeˇ-ahˇ kʼaˬ meh mˇ nga-awˇ dawˇ ahˇ jiˇ-euˬ meh.

¹⁷Byaˆ yahˬ kʼoeˇ mawˇ zaˬ miˬ zaˬ kʼoeˇ gʼaˬ-ahˇ nui ma pehˇ dui dui laˇ-awˇ, zaˬ miˬ zaˬ kʼoeˇ gʼaˬ-euˬ dzeˇ luꞈ-eu zaˬ deuˬ uˆ deuˬ pyeuꞈ-eu, Miˬyehˇ-euˬ ehˇ dawˬ naˇ haˬ-awˇ Yeˬsuˇ neh pah mehˬ-euˬ yaw tsaˬ yaw dawˇ jeˬ-ahˇ saˇ jaˇ ziꞈ-eu tsawˇ haˬ dawˬ tawˆ luꞈ-ahˇ, guiˇ deuˆ-eu lehˇ doˆ-iˇ-euˬ meh.

¹⁸Kʼoeˇ naˇ, byaˆ yahˬ kʼoeˇ mawˇ iˬ ma laˆ shaˆ lawˇ deh-ahˇ yawꞈ-euˬ meh.