Read Akha Pah meuˬ-eu 18 Bible Online

Pah meuˬ-eu 18 - Akha bible

Pah meuˬ-eu 18

¹Kʼoeˇ naˇ, mˬ taˆ gʼaˬ kʼehˇ tiˬ gʼaˬ mˬ-ahˇ neh paˇ zaꞈ ka le gaˇ ngaˇ ya mawˇ-euˬ ma. Aˬ yawꞈ-aˬ, huiˬ dui dui-eu uˆ lahˇ-eu baoˬ ahˇ-awˇ, aˬ yawꞈ-euˬ yaw shehꞈ kʼahˬ sehˇ miˇ tsaˬ kʼoeˇ taˆ yawˬ gaˇ na luꞈ bya keuˆ-eu meh.

²Aˬ yawꞈ teˇ saˇ yaw kʼaˆ-ehˇ guˇ-awˇ ehˇ-eu, “Aˬ yawꞈ coˬ-iˇ-euˬ meh. Huiˬ dui dui-eu Baˬbuˇloˬ meuˬ coˬ-iˇ-euˬ meh. Aˬ yawꞈ-aˬ, nehꞈ deuˬ hawˇ-eu maˬ muiˬ maˬ shawˇ-eu yaw sahˇ deuˬ yaw bui bui duˬ pyeuꞈ-iˇ-euˬ meh. Jawꞈ dui dui-awˇ maˬ haw cawˬ nahˇ paˬ-ehˇ gʼeh-eu aˇ jiˇ dawˬ tawˆ luꞈ kʼoeˇ gaˇ jawˇ-eu meh.

³Aˬ jeˬ miˇ neh ehˇ naˇ, miˇ kʼahˬ tsawˇ jeuˬ dawˬ tawˆ luꞈ taˆ dui dui-eu aˬ gaꞈ dzaˇ uiˇ dawˇ yehꞈ-euˬ loꞈ-ehˇ, aˬ yawꞈ nehˬ-ehˇ joe-eu jeˬ-ahˇ dawˇ yehꞈ jiˇ-awˇ, miˇ tsaˬ kʼoeˇ taˆ jeˬ gaꞈ jeˬ ka mˇ-eu tsawˇ haˬ deuˬ aˬ yawꞈ-euˬ byawˬ gʼa mo gʼa-eu pyuˇ shuiˇ myawˬ gahˬ baˬ da neh smˇ muiˬ muiˬ laˇ jiˇ-euˬ meh.”

⁴Kʼoeˇ naˇ, mˬ kʼoeˇ taˆ heu loꞈ-ehˇ paˇ ehˇ-eu dawˬ-ahˇ ngaˇ ya gaˬ-euˬma. “Ngaˬ-euˬ tsawˇ haˬ deuˬ doˆ laˇ-awˬ. Aˬ yawꞈ jawˇ gaˇ neh doˆ laˇ-awˬ. Aˬ yawꞈ iˬ baˇ mˇ gaˇ taˬ ahˇ. Aˬ yawꞈ-euˬ shaˬ zahˬ taˬ caw pi.

⁵Yawꞈ-euˬ iˬ baˇ mˬ-ahˇ tuˆ-awˇ, yawꞈ neh mˇ-euˬ yaw haiˬ jeˬ-ahˇ, Miˬyehˇ ngehˇ-awˇ maˬ taˬ nehˬ-a.

⁶Yawꞈ neh yaw doeˇ kʼaˇ mˇ-euˬ jeˬ, yawꞈ-ahˇ paˇ mˇ poˆ kʼoꞈ nehˬ-awˬ. Yawꞈ neh mˇ taˬ-euˬ naˆ maˬ tseˇ, nyiˬ bymˇ dzehˬ ni mˇ kʼoꞈ nehˬ-awˬ. Yawꞈ neh bi dawˇ laꞈ-euˬ kʼmˬ maˬ, nyiˬ bymˇ taˆ-eu ciˬ kʼoꞈ nehˬ-awˬ.

⁷Aˬ yawꞈ yaw shehꞈ kʼahˬ sehˇ huiˬ-awˇ, byawˬ gʼa mo gʼa dehˆ-euˬ kʼoeˇ-ahˇ, shaˬ zahˬ gʼaˬ di di kʼoꞈ nehˬ-awˬ. ‘Sahˬ ma geuꞈ-awˇ ngaˇ nuiˇ luꞈ ma. Miˬ coeˬ miˬ ma pyeuꞈ-eu maˬ ngeuˇ. Shaˬ zahˬ tiˬ jawˇ-iˬ maˬ mˇ’lehˇ, aˬ yawꞈ ehˇ taˬ-euˬ jaˆ-eu meh.

⁸Kʼoeˇ naˆ ni jahˇ gʼeh-eu miˇ neh, aˬ yawꞈ kʼoeˇ taˆ shaˬ zahˬ guˆ gaˆ, shiˇ-eu naˇ-eu mehꞈ-eu shuꞈ-eu, tiˬ nah kaꞈ dzahˬ-awˇ oe tehꞈ-a. Yaˇ kʼaˬ daˇ-eu Sahˬpaˬ Miˬyehˇ, baoˬ huiˬ dui dui-eu baˬ da neh, yawꞈ-ahˇ miˬ dzaˬ puiˆ dzeh tehꞈ-a.”

⁹Aˬ yawꞈ nehˬ-ehˇ joe-awˇ byawˬ gʼa mo gʼa-euˬ miˇ kʼahˬ sahˬ paˬ deuˬ-aˬ, aˬ yawꞈ-ahˇ puiˆ dzaˬ-eu miˬ dzaˬ uˬ kʼoeˬ-ahˇ ya mawˇ ngeh, aˬ yawꞈ gʼaˇ duˬ tsawˇ ngoeˇ ngoeˇ tehꞈ-a.

¹⁰Aˬ yawꞈ maꞈ-aˬ, aˬ yawꞈ-euˬ shaˬ zahˬ ya caw pi gaˇ guˆ-eu miˇ neh gaˇ mahˇ kaˬ gaˇ yawꞈ-awˇ haw tehꞈ-a. Aˬ yawꞈ maꞈ ehˇ-eu, “Aˇ naˆ ni guˆ laˇ paˬ-ehˇ gʼeh-eu nga. Aˇ naˆ ni zahˬ leˇ paˬ-ehˇ gʼeh-eu nga. Baoˬ huiˬ dui dui-eu Baˬbuˇloˬ-oˇ, nawˇ-aˬ, naˬ liˬ tiˬ laꞈ laꞈ kʼoeˇ tehꞈ-ehˇ bi kʼehˬ byoˆ leꞈ-euˬ ngaˇ.”

¹¹Miˇ tsaˬ kʼoeˇ taˆ jeˬ gaꞈ jeˬ ka mˇ-eu deuˬ kʼawꞈ, aˬ yawꞈ gʼaˇ duˬ tsawˇ ngoeˇ ngoeˇ-eu meh. Aˬ jeˬ miˇ neh ehˇ naˇ, aˬ yawꞈ maꞈ-euˬ myawˬ gahˬ zeuˇ-eu gʼaˬ maˬ jawˇ-ehˇ pyeuꞈ-iˇ-euˬ meh.

¹²A yawꞈ maꞈ-euˬ shuiˇ deuˬ, pyuˇ deuˬ, aˇ poeˬ kʼaˆ-eu kʼaˬ lo sehˇ deuˬ, aˇ caˇ caˇ kʼawꞈ sehˇ deuˬ, shawˇ jehˆ ni gʼeh-eu saˬ paˇ paˇ pyuˇ deuˬ, neˇ naˆ naˆ-eu saˬ paˇ deuˬ, boeˬ saˬ paˇ deuˬ, poeˬ dui dui-eu daˇ kawˬ deuˬ, ya ma juiˇ hawˇ-eu aˇ poeˬ kʼaˆ-eu daˇ kawˬ neh jahˇ taˬ-euˬ mˇ myawˬ deuˬ, guiˬ shuiˇ, shmˇ hawˇ-eu lo pyuˇ neh jahˇ taˬ-euˬ mˇ myawˬ deuˬ,

¹³cawˬ kʼaˬ cawˬ piˇ deuˬ, tsaˬ gawˬ baˬ gawˬ deuˬ, dzaˇ muiˇ dzaˇ sawˇ deuˬ, aˬ gaꞈ dzaˇ uiˇ deuˬ, dzaˬ-eu tsiˇ deuˬ, cehˇ meu hawˇ-eu cehˇ deuˬ, mawˇ neˇ hawˇ-eu yawˇ deuˬ, mahˬ hawˇ-eu mahˬ laˆ lawˬ deuˬ, zaˬ kʼaˆ deuˬ, tsawˇ haˬ-euˬ saꞈ laˇ deuˬ, heu deuˬ-ahˇ zeuˇ-eu gʼaˬ maˬ jawˇ-ehˇ pyeuꞈ-iˇ-euˬ meh.

¹⁴Jeˬ gaꞈ jeˬ ka mˇ-eu tsawˇ haˬ kʼoeˇ deuˬ aˬ yawꞈ-ahˇ ehˇ-eu, “Nawˇ nui kʼahˇ jaˆ dui dui-eu jeˬ dawˬ tawˆ luꞈ hawˇ-eu, nawˬ-euˬ pyuˇ shuiˇ myawˬ gahˬ, yaw shehꞈ kʼahˬ sehˇ dawˬ tawˆ luꞈ byoˆ-iˇ jiˇ-awˇ, kʼoeˇ deuˬ-ahˇ nawˇ tiˬ jawˇ-iˬ maˬ paˇ ya mawˇ haw-aˇ.”

¹⁵Meuˬ kʼoeˇ meuˬ nehˬ-ehˇ gaꞈ taꞈ ka taꞈ-awˇ smˇ muiˬ muiˬ laˇ-euˬ tsawˇ haˬ kʼoeˇ deuˬ-aˬ, aˬ yawꞈ-euˬ shaˬ zahˬ ya caw pi nehˬ gaˇ guˆ-awˇ, gaˇ mahˇ kaˬ gaˇ yawꞈ-awˇ haw tehꞈ-a. Aˬ yawꞈ maꞈ heu loꞈ-ehˇ dawˬ kawˬ kawˬ-awˇ ngoeˇ tehꞈ-a.

¹⁶“Aˬ huˇ-i, huiˬ-eu meuˬ-ahˇ haw sheˇ. paˇ pyuˇ paˇ shawˇ dm-awˇ, paˇ neˇ neˇ naˆ dm-awˇ, shuiˇ myawˬ guˇ deuˬ geuꞈ-awˇ, kʼaˬ lo sehˇ deuˬ geuꞈ-awˇ, caˇ kʼawꞈ sehˇ deuˬ geuꞈ-euˬ,

¹⁷naˬ liˬ tiˬ laꞈ laꞈ kʼoeˇ, pyuˇ shuiˇ myawˬ gahˬ dawˬ tawˆ piˬ jiˇ byoˆ jiˇ-euˬ nga.” Saˇ baoˬ kʼoeˇ taˆ aˬ yuiꞈ geuꞈ-eu deuˬ, saˇ baoˬ dziˬ-eu tsawˇ haˬ deuˬ hawˇ-eu, saˇ baoˬ laꞈ kʼoeˇ gaˇ mˇ-eu tsawˇ haˬ dawˬ tawˆ luꞈ, gaˇ mahˇ kaˬ gaˇ yawꞈ-awˇ haw-eu meh.

¹⁸Aˬ yawꞈ-ahˇ puiˆ dzaˬ-euˬ miˬ dzaˬ uˬ kʼoeˬ-ahˇ aˬ yawꞈ maꞈ ya mawˇ ngeh, “Huiˬ dui dui-eu meuˬ heu meuˬ-ahˇ duˇ-eu meuˬ tiˬ meuˬ-iˬ maˬ jaˆ haw-aˬ” lehˇ guˇ-eu meh.

¹⁹Aˬ yawꞈ maꞈ uˬ duˬ-ahˇ kʼaˬ lehˇ tawˆ daˆ-awˇ, heu loꞈ-ehˇ dawˬ kawˬ kawˬ-awˇ ngoeˇ-eu meh. Aˬ huˇ-i, huiˬ-eu meuˬ-ahˇ haw sheˇ. Aˬ yawꞈ pyuˇ shuiˇ byehˬ-euˬ miˇ neh, laˆ shaˆ saˇ baoˬ kʼaˇ jaˆ-euˬ deuˬ, q3 smˇ muiˬ muiˬ laˇ-euˬ meh. Ehˇ kʼawꞈ naˬ liˬ tiˬ laꞈ laꞈ kʼoeˇ, aˬ yawꞈ piˬ le byoˆ le-euˬ meh.

²⁰Aˬ yawꞈ luˬ-iˇ seˇ-iˇ-euˬ gaˇ, Mˬ-oˇ laˬ kʼaˬ cehˇ-awˬ. Miˬyehˇ-euˬ tsawˇ haˬ deuˬ, Miˬyehˇ-euˬ gʼaˬ kʼehˇ deuˬ hawˇ-eu, bawˇ lawˇ peh[4] deuˬ laˬ kʼaˬ cehˇ-awˬ. Naw maꞈ gʼaˇ duˬ meuˬ kʼoeˇ meuˬ-ahˇ, Miˬyehˇ yaˇ kʼaˬ daˇ nehˬ-euˬ meh.”

²¹Kʼoeˇ naˇ, gʼaˬ kʼaˆ dui dui-eu mˬ taˆ gʼaˬ kʼehˇ tiˬ gʼaˬ lo lehˬ hui ni ahˇ-eu kʼaˬ lo tiˬ siˬ iˬ ma laˆ shaˆ-ahˇ baꞈ puꞈ gʼeh-awˇ, heu loꞈ-ehˇ ehˇ-eu meh. “Huiˬ dui dui-eu Baˬbuˇloˬ meuˬ, heu loꞈ-ehˇ bi baꞈ dzeh gʼeh-awˇ, tiˬ jawˇ-iˬ maˬ paˇ ya mawˇ-aˇ.

²²deuˇ-mˬ, bawˬ law, daˇ heh teˇ saˇ, tiˬ jawˇ-iˬ maˬ paˇ ya gaˬ-aˇ, Gaꞈ-eu ka-eu, laꞈ myawˬ laꞈ muˆ, tiˬ jawˇ-iˬ maˬ paˇ ya mawˇ-aˇ.

²³Tsiˇ kʼmˬ doꞈ bya taˬ-euˬ yaw shehꞈ, tiˬ jawˇ-iˬ maˬ paˇ ya mawˇ-aˇ. Miˬ daꞈ zaˬ daꞈ jiˇ cehˇ gʼeh-eu, teˇ saˇ maˬ paˇ ya gaˬ haw-aˇ. Nawˬ-euˬ tsawˇ haˬ baw gaꞈ kʼoeˇ deuˬ, miˇ tsaˬ kʼoeˇ taˆ kʼawˇ teˇ doˆ-awˇ, nawˬ-euˬ mah loˬ ja maw kʼoeˇ neh, miˇ tsaˬ zaˬ-ahˇ shuiˇ tawˆ-euˬ meh.

²⁴Bawˇlawˇpeh deuˬ-euˬ shiˬ, tsawˇ muiˬ tsawˇ jaˬ-euˬ shiˬ, miˇ tsaˬ heu-euˬ kʼoeˇ taˆ, kʼaˇ bi sehꞈ yoeˇ-euˬ shiˬ, nawˬ-euˬ laꞈ kʼoeˇ ya mawˇ-euˬ meh.”