Read Akha Pah meuˬ-eu 4 Bible Online

Pah meuˬ-eu 4 - Akha bible

Pah meuˬ-eu 4

¹Kʼoeˇ naˇ, mˬ kʼoeˇ taˆ laˇ gʼoˆ pah taˬ-euˬ gaˇ, Yaw sahˇ laꞈ kʼoeˇ ngaˇ paˇ ya mawˇ-euˬ ma. Yaw beh ngaˬ-ahˇ dawˬ ngehˬ cawˬ le-euˬ daˇ heh baw gaˇ duˇ-eu teˇ saˇ kʼoeˇ saˇ ngaˬ-ahˇ ehˇ-eu, “Heu gaˇ daˆ laˇ-awˬ. Mehˬ hu paw pyeuꞈ laˇ-eu lehˇ gʼeh-eu gaˇ kawˆ ngaˇ nawˬ-ahˇ mehˬ nehˬ nyaˇ.”

²Kʼoeˇ ngeh, tiˬ poˆ tehꞈ-ehˇ Yaw sahˇ Miˬyehˇ ngaˬ-ahˇ uˆ lahˇ le-euˬ meh. Mˬ kʼoeˇ taˆ dzoeˬ dzaˬ nuiˇ mahˬ tiˬ mahˬ jaˆ-awˇ, tsawˇ haˬ tiˬ gʼaˬ nuiˇ luꞈ-eu meh.

³Aˬ yawꞈ-euˬ myaˆ pyawˬ-aˬ, yaw byaꞈ byaꞈ-eu kʼaˬ lo sehˇ hawˇ-eu neˇ tseuˆ ni gʼeh-eu kʼaˬ lo sehˇ-ahˇ duˇ-awˇ, dzoeˬ dzaˬ nuiˇ mahˬ kʼoeˇ-euˬ tiˬ jawˬ, neˇ naˆ naˆ-eu kʼaˬ lo sehˇ-ahˇ duˇ-eu aˇ deˇ leˇ kʼah jaˆ-eu meh.

⁴Dzoeˬ dzaˬ nuiˇ mahˬ kʼoeˇ-euˬ tiˬ jawˬ, dzoeˬ dzaˬ nuiˇ mahˬ nyiˬ tseˇ oeˬ mahˬ jaˆ-awˇ, mehˬ tsoeˬ yaw pyuˇ dm-awˇ shuiˇ uˬ kʼoˆ kʼoˆ luꞈ-eu aˬ yuiꞈ aˬ tsu nyiˬ tseˇ oeˬ gʼaˬ nuiˇ luꞈ-eu meh.

⁵Dzoeˬ dzaˬ nuiˇ mahˬ kʼoeˇ mahˬ mˬ myawꞈ myawꞈ-awˇ, teˇ saˇ gʼawˬ mya jeˬ hawˇ-eu mˬ jeˬ jeˬ-eu teˇ saˇ mahˇ doˆ laˇ-eu meh. Dzoeˬ dzaˬ nuiˇ mahˬ mehˬ shi Miˬyehˇ-euˬ yaw sahˇ shiꞈ sahˇ pyeuꞈ-eu tsiˇ du shiꞈ du doꞈ luꞈ-eu meh.

⁶Dzoeˬ dzaˬ nuiˇ mahˬ kʼoeˇ-euˬ mehˬ shi, doˆ coˆ-ehˇ haw mawˇ nya-eu shawˇ jehˆ ni gʼeh-eu pyawˬ haw lah-ahˇ duˇ-eu lah tiˬ lah jaˆ-eu meh. Dzoeˬ dzaˬ nuiˇ mahˬ kʼoeˇ-euˬ tiˬ jawˬ oeˬ pyawˬ luꞈ, mehˬ shi naˇ kʼah myaˆ nuiˆ tiˬ byah ni tsoꞈ gʼoeˬ taˬ-euˬ dehꞈ luꞈ-eu jeˬ zaˬ oeˬ mawˇ jawˇ-eu meh.

⁷Yaw beh mawˇ-aˬ, aˇ laˬ jaˬ shiˇ-ahˇ duˇ-awˇ, nyiˬ mawˇ tiˬ mawˇ-aˬ, mawˇ neˇ mawˇ gaw-ahˇ duˇ-eu meh. Smˬ mawˇ ti mawˇ-aˬ, tsawˇ haˬ-euˬ myaˆ pyawˬ tsoꞈ-awˇ, oeˬ mawˇ tiˬ mawˇ-aˬ, zaw luꞈ-eu kʼaˬ dzeˇ dzeˇ ma-ahˇ duˇ-eu meh.

⁸Jeˬ zaˬ aˬ yawꞈ mawˇ yawꞈ aˬ dahˇ koꞈ dahˇ tsoꞈ-awˇ, aˬ dahˇ kʼoeˇ deuˬ-euˬ laꞈ kʼoeˇ laꞈ nyiˇ nyiˬ pyawˬ luꞈ myaˆ nuiˆ tiˬ byah ni tsoꞈ gʼoeˬ taˬ-euˬ meh. Jeˬ zaˬ kʼoeˇ deuˬ uˬ ciꞈ nah gʼahˇ maˬ ehˇ heu loꞈ-ehˇ caˇ-eu meh. “Baoˬ huiˬ-eu Sahˬpaˬ Miˬyehˇ-aˬ, muiˬ meh shawˇ meh, muiˬ meh shawˇ meh, muiˬmeh shawˇ meh. Aˇ hu maˬ ehˇ, nymˬ-mˇ maˬ ehˇ, mˬ maˬ maˬ byaˆ zaˇ ziˇ dehꞈ meh.”

⁹Jeˬ zaˬ kʼoeˇ oeˬ mawˇ-aˬ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu mˬ maˬ maˬ byaˆ zaˇ ziˆ dehꞈ-eu gʼaˬ-ahˇ, yaw shehꞈ kʼahˬ sehˇ huiˬ gaˇ ja ceuˬ-eu caˇ dawˬ, ciˬ huiˬ ciˬ mahˇ-eu caˇ dawˬ hawˇ-eu, guiˬ lahˬ-ahˇ ja ceuˬ-eu caˇ dawˬ caˇ-eu meh. Aˬ yawꞈ maꞈ kʼoeˇ loꞈ-ehˇ caˇ ngeh,

¹⁰aˬ yuiꞈ aˬ tsu kʼoeˇ nyiˬ tseˇ oeˬ gʼaˬ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ mehˬ shi awˆ byaˆ-awˇ, mˬ maˬ maˬ byaˆ zaˇ ziˇ dehꞈ-eu gʼaˬ pyeuꞈ-eu aˬ yawꞈ-ahˇ uˬ duˬ tahˬ-eu meh. Dzoeˬ dzaˬ nuiˇ mahˬ mehˬ shi aˬ yawꞈ maꞈ shuiˇ uˬ kʼoˆ dzeh taˬ-awˇ,

¹¹“Nga maꞈ-euˬ Sahˬpaˬ Miˬyehˇ-oˇ, yawˬ jeˬ na luꞈ nawˬ neh beh-awˇ, nawˬ-euˬ nui kʼahˇ baˬ da baˇ neh, jaˆ luꞈ jawˇ luꞈ-eu baˬ da neh, yaw shehꞈ kʼahˬ sehˇ maˬ ehˇ, taˬ huiˬ taˬ mahˇ-eu jeˬ maˬ ehˇ, baoˬ maˬ ehˇ, nawˇ za geuˇ-eu meh.”