Read Akha Pah meuˬ-eu 8 Bible Online

Pah meuˬ-eu 8 - Akha bible

Pah meuˬ-eu 8

¹Jmˬ diˬ taˬ-euˬ shiꞈ hmˬ tiˬ hmˬ-ahˇ Yawˇzaˬ ngawˬ paˆ ngeh, mˬ kʼoeˇ taˆ naˬ liˬ tiˬ kʼawˬ-iˬ byah ni ciˬ cuˇ ni pyeuꞈ-iˇ-euˬ meh.

²Kʼoeˇ naˇ, Miˬyehˇ mehˬ shi yawꞈ luꞈ-eu mˬ taˆ gʼaˬ kʼehˇ shiꞈ gʼaˬ-ahˇ ngaˇ mawˇ-euˬ ma. Aˬ yawꞈ maꞈ-ahˇ daˇ heh shiꞈ hmˬ biꞈ nehˬ-euˬ meh.

³Shuiˇ neh jahˇ taˬ-euˬ tsiˇ yaw saw jeˬ doꞈ duˬ yuˇ luꞈ-eu mˬ taˆ gʼaˬ kʼehˇ yawˬ gʼaˬ yawˬ oe-awˇ, lawˇ duˬ-ahˇ yawꞈ le-euˬ meh. Miˬyehˇ-euˬ tsawˇ haˬ dawˬ tawˆ luꞈ guiˬ lahˬ shaˇ gaˇ geuꞈ-eu gʼaˇ duˬ hawˇ-eu, dzoeˬ dzaˬ nuiˇ mahˬ mehˬ shi jaˆ-eu lawˇ duˬ kʼoeˇ taˆ bi lawˇ-eu gʼaˇ duˬ, aˬ yawꞈ-ahˇ tsiˇ yaw saw jeˬ gʼawˬ mya ni biꞈ taˬ-euˬ meh.

⁴Tsiˇ yaw saw jeˬ doꞈ-eu saꞈ kʼoeˬ kʼoeˇ-aˬ, Miˬyehˇ-euˬ tsawˇ haˬ kʼoeˇ deuˬ-euˬ guiˬ lahˬ shaˇ dawˬ nehˬ-ehˇ tiˬ kawˆ loꞈ-ehˇ, mˬ taˆ gʼaˬ kʼehˇ kʼoeˇ gʼaˬ-euˬ laꞈ-ahˇ neh Miˬyehˇ jawˇ gaˇ le keuˆ-eu meh.

⁵Kʼoeˇ naˇ, tsiˇ yaw saw jeˬ doꞈ duˬ kʼoeˇ-ahˇ mˬ taˆ gʼaˬ kʼehˇ kʼoeˇ gʼaˬ yuˇ-awˇ, lawˇ duˬ kʼoeˇ taˆ doꞈ luꞈ-eu miˬ dzaˬ pehˆ ahˇ-awˇ, miˇ tsaˬ kʼoeˇ taˆ biˬ ka gʼeh-euˬ meh. Kʼoeˇ ngeh, teˇ saˇ gʼawˬ mya jeˬ hawˇ-eu mˬ jeˬ jeˬ-eu teˇ saˇ gaˬ le-awˇ, mˬ myawꞈ myawꞈ-awˇ miˇ luˆ luˆ-euˬ meh.

⁶Kʼoeˇ naˇ, daˇ heh shiꞈ hmˬ yuˇ luꞈ-eu mˬ taˆ gʼaˬ kʼehˇ kʼoeˇ shiꞈ gʼaˬ, daˇ heh baw-eu lehˬ hmˬ-euˬ meh.

⁷Mˬ taˆ gʼaˬ kʼehˇ yaw beh gʼaˬ daˇ heh baw ngeh, shiˬ keuˬ-eu uˬ yehˇ aˇ siˬ miˇ tsaˬ kʼoeˇ taˆ ga le-awˇ, miˇ tsaˬ tahˬ kʼawˇ smˬ bymˇ tiˬ bymˇ, aˇ bawˇ smˬ bymˇ tiˬ bymˇ hawˇ-eu, buˬ nyoeˇ dawˬ tawˆ luꞈ puiˆ dzaˬ jiˇ-euˬ meh.

⁸Mˬ taˆ gʼaˬ kʼehˇ nyiˬ gʼaˬ tiˬ gʼaˬ daˇ heh baw ngeh, gawˬ jawˬ jawˬ ma-ahˇ duˇ-eu tiˬ jeˬ miˬ dzaˬ doꞈ doꞈ-ehˇ iˬ ma laˆ shaˆ-ahˇ ga ahˇ-iˇ-awˇ, iˬ ma laˆ shaˆ smˬ bymˇ tiˬ bymˇ shiˬ pyeuꞈ-iˇ-euˬ meh.

⁹Iˬ ma laˆ shaˆ laꞈ kʼoeˇ kʼaˇ dehꞈ kʼaˇ jawˇ-eu jeˬ smˬ bymˇ tiˬ bymˇ shiˇ-awˇ, saˇ baoˬ smˬ bymˇ tiˬ bymˇ luꞈ-iˇ seˇ-iˇ-euˬ meh.

¹⁰Kʼoeˇ naˇ, mˬ taˆ gʼaˬ kʼehˇ smˇ gʼaˬ tiˬ gʼaˬ daˇ heh baw ngeh, miˬ dzaˬ miˬ doꞈ-ahˇ duˇ-eu aˬ guiˇ guiˇ ma tiˬ siˬ mˬ-ahˇ neh ga ka le-awˇ, lawˇ baˬ baˬ ma smˬ bymˇ tiˬ bymˇ hawˇ-eu, lawˇ gawˆ gawˆ zaˬ deuˬ kʼoeˇ taˆ ga daˆ le-euˬ meh.

¹¹Aˬ guiˇ kʼoeˇ siˬ-euˬ tsawˇ myahˇ-aˬ, “Kʼaˬ jawꞈ ni gʼeh-eu aˇ bawˇ” lehˇ kuˇ-eu meh. Iˇ cuꞈ smˬ bymˇ tiˬ bymˇ yaw kʼaˬ kʼaˬ-iˇ-awˇ, tsawˇ haˬ gʼawˬ mya ni iˇ cuꞈ dawˇ-awˇ shiˇ-euˬ meh. Aˬ jeˬ miˇ neh ehˇ naˇ, iˇ cuꞈ kʼoeˇ kʼaˬ dui dui-eu meh.

¹²Kʼoeˇ naˇ, mˬ taˆ gʼaˬ kʼehˇ oeˬ gʼaˬ tiˬ gʼaˬ daˇ heh baw ngeh, nahˇ ma smˬ paˆ tiˬ paˆ, ba la smˬ paˆ tiˬ paˆ hawˇ-eu, aˬ guiˇ smˬ bymˇ tiˬ bymˇ-ahˇ zaw leˇ-awˇ, nahˇ ma, ba la , aˬ guiˇ kʼoeˇ deuˬ-euˬ yaw shehꞈ smˬ bymˇ tiˬ bymˇ teˬ-iˇ-euˬ meh. Nah gʼahˇ smˬ bymˇ tiˬ bymˇ hawˇ-eu, uˬ ciꞈ smˬ bymˇ tiˬ bymˇ yaw bya maˬ bya ni pyeuꞈ-iˇ-euˬ meh.

¹³Kʼoeˇ naˇ, ngaˇ haw gʼeh ngeh, yaw goˇ-ahˇ zaw luꞈ-eu kʼaˬ dzeˇ dzeˇ ma tiˬ mawˇ yaw kʼaˆ-ehˇ guˇ-awˇ heu loꞈ-ehˇ ehˇ-eu teˇ saˇ ya gaˬ-euˬ ma. “Aˇ loˇ. Guˆ-eu gaˆ-eu jeˬ, guˆ-eu gaˆ-eu jeˬ. Dzeˇ-eu mˬ taˆ gʼaˬ kʼehˇ kʼoeˇ smˇ gʼaˬ daˇ heh paˇ baw laˇ naˇ, miˇ tsaˬ kʼoeˇ taˆ kʼaˇ jawˇ-eu deuˬ aˇ naˆ ni ya guˆ ya gaˆ, ya shaˬ ya zahˬ-eu maˬ paˇ ehˇ jiˇ coeˇ ngaˇ.”