Read Akha Luˇta 2 Bible Online

Luˇta 2 - Akha bible

Luˇta 2

¹Nawˇmi-euˬ kʼaˬ dzeˇ zaˬ Aˬliˇmaˬ lehˇ-euˬ aˇ jeuˬ aˇ ca pyeuꞈ-eu, smˇ muiˬ muiˬ dui dui-awˇ, baoˬ ahˇ-eu, Bawˇza lehˇ myahˇ-euˬ Nawˇmi-euˬ aˬ yuiꞈ aˬ nyiˇ tiˬ gʼaˬ jawˇ-eu meh.

²Tiˬ nah keuˆ laˇ ngeh, Nawˇmi-ahˇ Luˇta ehˇ nehˬ-eu, “Deh yaˇ doe doe-ehˇ iˇ-awˇ, cehˇ yehˬ-eu deuˬ neh bi ga ka yaꞈ-euˬ cehˇ nmˇ gʼoˆ-iˇ-eu gʼaˇ duˬ, ngaˬ-ahˇ bi iˇ nehˬ laꞈ sheˇ. Yawˬ ha neh cehˇ yehˬ gʼaˬ-euˬ gaˇ, cehˇ nmˇ bi gʼoˆ mawꞈ-euˬ tsawˇ haˬ tiˬ gʼaˬ na ya mawˇ-eu baw le.” Nawˇmi ehˇ-eu, “Iˇ nya tehꞈ-a tsu-oˇ.”

³Kʼoeˇ naˇ, deh yaˇ-ahˇ Luˇta iˇ-awˇ, cehˇ yehˬ-eu deuˬ-euˬ mehˬ nah caw caw-ehˇ, ga ka yaꞈ-euˬ cehˇ nmˇ deuˬ gʼoˆ-iˇ-euˬ meh. Aˬliˇmaˬlehˇ-euˬ aˬ yuiꞈ aˬ nyiˇ pyeuꞈ-eu Bawˇza-euˬ deh yaˇ-ahˇ, Luˇta iˇ zaˬ-euˬ meh.

⁴Tiˬ kʼehˬ keuˆ laˇ naˇ, Behˬlehˬhehˬ meuˬ-ahˇ neh deh yaˇ-ahˇ Bawˇza oe keuˆ-awˇ, “Sahˬpaˬ Miˬyehˇ naw maꞈ nehˬ-ehˇ jawˇ luꞈ-uˇ” lehˇ cehˇ yehˬ-eu deuˬ-ahˇ aˬ yawꞈ dawˬ cawˬ puˬ nehˬ ngeh, “Miˬyehˇ nawˬ-ahˇ guiˬ lahˬ biꞈ luꞈ-uˇ” lehˇ aˬ yawꞈ maꞈ aˬ yawꞈ-ahˇ paˇ ehˇ kʼoˬ nehˬ-euˬ meh.

⁵Cehˇ yehˬ gaˇ bi haw bi pyaˆ-euˬ gʼaˬ-ahˇ, “Zaˬ miˬ zaˬ zaˬ guˬ kʼoeˇ gʼaˬ aˬ suˇ gʼaˬ-a” lehˇ Bawˇza naˇ haˬ-euˬ meh.

⁶Tsawˇ haˬ kʼoeˇ gʼaˬ ehˇ-eu, “Aˬ yawꞈ-aˬ, Mawˇbaˆ miˇ kʼahˬ-ahˇ neh Nawˇmi mehˬ nah caw teh laꞈ-euˬ boeˇ miˬ shiˬ kʼaˬ tiˬ gʼaˬ meh.

⁷Cehˇ yehˬ-eu deuˬ mehˬ nah caw caw-ehˇ, cehˇ nmˇ bi gʼoˆ nehˬ laꞈ lehˇ aˬ yawꞈ ngaˬ-ahˇ shaˇ-eu meh. Nymˇ shawˬ yaw naꞈ-ehˇ gʼeh ngeh neh, nymˬ-mˇ keuˆ ni cehˇ nmˇ aˬ yawꞈ gʼoˆ luꞈ-eu meh. Nymˬ-mˇ hawˇ-eu naˇ shmˇ cehˆ awˆ-iˇ-euˬ tehꞈ-a siˬ.”

⁸Kʼoeˇ naˇ, Luˇta-ahˇ Bawˇza ehˇ nehˬ-eu, “Ngaˇ nawˬ-ahˇ tiˬ jeˬ ehˇ nehˬ nyaˇ. Deh yaˇ heu kawˬ laꞈ kʼoeˇ tehꞈ-ehˇ cehˇ nmˇ gʼoˆ-awˬ. Yawˬ gaˇ yawˬ taˬ paˇ gʼoˆ-iˇ. Zaˬ miˬ zaˬ heu deuˬ-euˬ dawˬ peh gʼoˆ-awˬ.

⁹Aˬ yawꞈ maꞈ aˬ geu tsahˇ-ahˇ cehˇ yehˬ-eu nga lehˇ haw-awˇ, caw teh-awˬ. Nawˬ-ahˇ tiˬ jeˬ-iˬ taˬ ehˇ nehˬ lehˇ, ngaˬ-euˬ tsawˇ haˬ deuˬ-ahˇ ngaˇ ehˇ nehˬ gʼaˬ-euˬ ma. Iˇ cuꞈ kʼaˇ mehꞈ laˇ ngeh, aˬ yawꞈ maꞈ neh iˇ cuꞈ kʼawꞈ ahˇ taˬ-euˬ mui deuˇ oeˬ lahˬ-ahˇ dawˇ-iˇ-awˬ.”

¹⁰Luˇta naˇ kʼawˇ miˇ tsa tuˆni awˆ byaˆ-awˇ ehˇ-eu, “Aˬ jeˬ miˇ neh nawˇ ngaˬ-euˬ gʼaˇ duˬ teu naˆ naˆ-ehˇ shaˇ noeˬ nehˬ laꞈ te. Ngaˇ loꞈ-ehˇ gʼeh-eu boeˇ miˬ shiˬ kʼaˬ tiˬ gʼaˬ-ahˇ, aˬ jeˬ miˇ neh nawˇ teu naˆ naˆ-ehˇ gʼawˬ shaˬ gaˬ nehˬ laꞈ te.”

¹¹Bawˇza ehˇ-eu, “Nawˬ-euˬ kʼaˬ dzeˇ zaˬ shiˇ ngeh nah neh, nawˬ-euˬ zahˇ shaˇ aˬ ma-ahˇ nawˇ aˬ joˆ-ehˇ bo saˆ luꞈ-eu gaˇ kawˆ, ngaˇ ya gaˬ jiˇ taˬ-euˬ ma. Nawˬ ma nawˬ da hawˇ-eu nawˬ-euˬ miˇ kʼahˬ-ahˇ nawˇ byehˇ dzeh yaꞈ-awˇ, yawˬ ha maˬ siˬ maˬ suˇ-eu tsawˇ jeuˬ nehˬ-ehˇ jawˇ laˇ ma lehˇ, nawˇ noeˬ tsehˆ-awˇ laˇ-euˬ gaˇ kawˆ kʼawꞈ, ngaˇ ya siˬ gʼaˬ-euˬ ma.

¹²Nawˇ kʼoeˇ loꞈ-ehˇ mˇ-eu baˬ da neh, Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ. Iˇsaˬleˬlaˆ tsawˇ haˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ aˬ dahˇ uˬ moˆ, nawˇ tah uˇ laˇ-eu loꞈ-ehˇ, aˬ yawꞈ nawˬ-ahˇ guiˬ lahˬ tiˬ byah tiˬ loꞈ biꞈ laꞈ luꞈ-uˇ.”

¹³Luˇta ehˇ-eu, “Nawˇ ngaˬ-ahˇ gʼawˬ shaˬ gaˬ dui dui-eu miˇ neh guiˬ lahˬ huiˬ miˇ-a. Ngaˇ-aˬ, nawˬ-euˬ zaˬ kʼaˆ tiˬ gʼaˬ naˆ maˬ tseˇ nyiˇ teˬ dzehˬ-eu kʼawꞈ, nawˇ ngaˬ-ahˇ gʼawˬ shaˬ gaˬ-eu laꞈ kʼoeˇ, dawˬ nahˬ yu ni ngehˬ cawˬ nehˬ laꞈ-eu miˇ neh, ngaˬ-euˬ nui ma-ahˇ gʼaˬ ahˇ dui dui laˇ nya” lehˇ ehˇ nehˬ-euˬ meh.

¹⁴Gʼahˇ hawˬ dzaˬ yamˬ keuˆ laˇ ngeh, “Kaˬ muˇ yuˇ-awˇ, aˬ gaꞈ dzaˇ uiˇ-ahˇ lehꞈdzaˬ laˇ-awˬ” lehˇ Luˇta-ahˇ Bawˇza ehˇ nehˬ-euˬ meh. Kʼoeˇ ngeh, cehˇ yehˬ-eu deuˬ nehˬ-ehˇ Luˇta nuiˇ leˇ-euˬ meh. Kʼoeˇnaˇ Bawˇza neh Luˇta-ahˇ cehꞈ nyawˬ biꞈ miˇ nehˬ-euˬ meh. Luˇta tiˬ dehˆ dzaˬ-euˬ kʼawꞈ, ui cuiˆ paˇ dzehˬ laˇ-euˬ meh.

¹⁵Cehˇ nmˇ paˇ gʼoˆ-iˇ-eu lehˇ Luˇta doˆ-iˇ ngeh, aˬ yawꞈ-euˬ gaˇ mˇ-eu tsawˇ haˬ deuˬ-ahˇ Bawˇza heu loꞈ-ehˇ ehˇ nehˬ-euˬ meh. “Cehˇ cehˇ dzahˬ ga gaˇ aˬ yawꞈ cehˇ nmˇ gʼoˆ kʼawꞈ, bi gʼoˆ-awˬ.

¹⁶Aˬ yawꞈ-ahˇ tiˬ jeˬ-iˬ taˬ ehˇ. Taˬ laˆ tsoeˬ. Kʼoeˇ uˬ taꞈ, aˬ yawꞈ bi gʼoˆ geuꞈ-eu gʼaˇ duˬ, cehˇ cehˇ dzahˬ laꞈ kʼoeˇ cehˇ nmˇ ui cuiˆ gʼeu doˆ-awˇ bi ga yaꞈ-awˬ.”

¹⁷Nahˇ ma ga ahˇ ngeh keuˆ ni, deh yaˇ-ahˇ Luˇta cehˇ nmˇ gʼoˆ-euˬ meh. Aˬ yawꞈ neh gʼoˆ uiˬ-euˬ cehˇ nmˇ kʼoeˇ deuˬ juiꞈ kʼaˇ jiˇ ngeh, cehˇ tiˬ puˬ ehˇ gʼaˬ ni ga le-euˬ meh.

¹⁸Cehˇ kʼoeˇ iˇ kahˇ-ahˇ aˬ yawꞈ pi kʼoꞈ gʼeh-awˇ, aˬ yawꞈ cehˇ aˇ myaˆ ni gʼoˆ uiˬ laꞈ-euˬ aˬ yawꞈ-euˬ zahˇ shaˇ aˬ ma -ahˇ mehˬ nehˬ-euˬ meh. Gʼahˇ hawˬ dzaˬ ngeh aˬ yawꞈ neh maˬ dzaˬ jiˇ coeˇ-ehˇ dzeˇ laˇ-euˬ dzaˇ kʼoeˇ deuˬ kʼawꞈ, zahˇ shaˇ aˬ ma gʼaˬ-ahˇ aˬ yawꞈ biꞈ nehˬ-euˬ meh.

¹⁹Kʼoeˇ ngeh, aˬ yawꞈ-ahˇ Nawˇmi ehˇ-eu, “Iˬ nah nawˇ cehˇ nmˇ aˬ geu paw gʼoˆ-iˇ teˬ. Aˬ suˇ gʼaˬ-euˬ deh yaˇ-ahˇ gʼoˆ-iˇ teˬ. Nawˬ-ahˇ gʼawˬ shaˬ gaˬ nehˬ-euˬ tsawˇ haˬ kʼoeˇ gʼaˬ-ahˇ Miˬyehˇ guiˬ lahˬ biꞈ luꞈ-uˇ.” Bawˇza lehˇ myahˇ-euˬ tsawˇ haˬ tiˬ gʼaˬ-euˬ deh yaˇ-ahˇ aˬ yawꞈ cehˇ nmˇ gʼoˆ-iˇ-euˬ gaˇ kawˆ, Nawˇmi-ahˇ Luˇta ehˇ nehˬ-euˬ meh.

²⁰Nawˇmi ehˇ-eu, “Shiˇ dzeuˇ-euˬ tsawˇ haˬ-ahˇ maˬ ehˇ, dehꞈ luꞈ-eu tsawˇ haˬ-ahˇ maˬ ehˇ, aˬ myah luꞈ saˇ jaˇ ziꞈ-eu Sahˬpaˬ Miˬyehˇ, aˬ yawꞈ-ahˇ guiˬ lahˬ biꞈ luꞈ-uˇ.” Nawˇmi paˇ ehˇ-eu, “Tsawˇ haˬ kʼoeˇ gʼaˬ-aˬ, aˬ dui pehˬ-ahˇ haw piˇ paˬ-ehˇ tsaˬ-eu aˬ dui pehˬ-euˬ aˬ yuiꞈ aˬ nyiˇ meh.”

²¹Luˇta ehˇ-eu, “Kʼoeˇ uˬ taꞈ, heu loꞈ-ehˇ aˬ yawꞈ paˇ ehˇ ta siˬ. Cehˇ maˬ laˆ luiˆ jiˇ kʼoeˇ keuˆ ni, aˬ yawꞈ-euˬ deh yaˇ-ahˇ oe-awˇ, cehˇ yehˬ-eu tsawˇ haˬ dawˬ peh, cehˇ nmˇ gʼoˆ le-awˬ lehˇ, aˬ yawꞈ ngaˬ-ahˇ paˇ ehˇ ta siˬ.”

²²Luˇta-ahˇ Nawˇmi ehˇ nehˬ-eu, “Ngeuˇ tehꞈ-a tsu-oˇ. Yawˬ gʼaˬ yawˬ-euˬ deh yaˇ-ahˇ iˇ naˇ, nymˬ-mˇ aˬ cawˬ nawˬ-ahˇ yehˬ bawˬ sehˇ lu-ehˇ ehˇ laˇ-eu maˬ siˬ. Bawˇza-euˬ deh yaˇ-ahˇ cehˇ yehˬ luꞈ-eu zaˬ miˬ zaˬ kʼoeˇ deuˬ dawˬ peh cehˇ nmˇ gʼoˆ-eu-aˬ, nawˬ-euˬ gʼaˇ duˬ muiˬ dzehˬ tehꞈ-a.”

²³Kʼoeˇ naˇ, cehˇ yehˬ cehˇ diˬ luiˆ jiˇ ngeh keuˆ ni, Bawˇza-euˬ deh yaˇ-ahˇ gaˇ mˇ luꞈ-eu tsawˇ haˬ deuˬ dawˬ peh, Luˇta cehˇ nmˇ gʼoˆ-awˇ, aˬ yawꞈ-euˬ zahˇ shaˇ a ma nehˬ-ehˇ dehꞈ daˆ leꞈ-euˬ meh.