Read Akha Luˇta 4 Bible Online

Luˇta 4 - Akha bible

Luˇta 4

¹Meuˬ lahˇ kʼehˬ dawˬ peh jaˆ-eu, meuˬ-ahˇ jawˇ-eu tsawˇ haˬ deuˬ mehˬ bawˬ bawˬ dzaˬ duˬ-ahˇ Bawˇza le-awˇ, nuiˇ luꞈ-eu meh. Kʼoeˇ ngeh, aˬ yawꞈ neh Luˇta-ahˇ ehˇ nehˬ-euˬ Aˬliˇmaˬlehˇ-ahˇ aˬ yuiꞈ aˬ nyiˇ peh dzehˬ-eu tsawˇ haˬ kʼoeˇ gʼaˬ iˇ tsehˆ gʼeh gaˇ aˬ yawꞈ mawˇ-awˇ, “Mawˬ cawˬ-oˇ, heu gaˇ laˇ-awˇ nuiˇ laˇ-awˬ” lehˇ kuˇ-euˬ meh. Kʼoeˇ ngeh, tsawˇ haˬ kʼoeˇ gʼaˬ kʼoeˇ gaˇ le-awˇ nuiˇ leˇ-euˬ meh.

²Kʼoeˇ naˇ, meuˬ kʼoeˇ taˆ aˬ yuiꞈ aˬ tsu geuꞈ-awˇ haw luꞈ pyaˆ luꞈ-eu tsawˇ haˬ tseˇ gʼaˬ-ahˇ Bawˇza kuˇ doˆ laꞈ-awˇ, kʼoeˇ gaˇ bi nuiˇ-eu meh. Aˬ yawꞈ maꞈ kʼoeˇ gaˇ nuiˇ keuˆ laˇ jiˇ ngeh, aˬ yawꞈ-euˬ aˬ yuiꞈ aˬ nyiˇ kʼoeˇ gʼaˬ-ahˇ Bawˇza heu loꞈ-ehˇ ehˇ nehˬ-euˬ meh.

³“Mawˇbaˆ miˇ kʼahˬ-ahˇ neh Nawˇmi gʼoꞈ laˇ-awˇ, nymˬ-mˇ heu gaˇ jawˇ luꞈ-eu meh. Aˬ dui nyaꞈ-euˬ aˬ yuiꞈ aˬ nyiˇ Aˬliˇmaˬlehˇ-euˬ deh yaˇ kʼoeˇ kawˬ, aˬ yawꞈ ahˬ mawꞈ-eu meh.

⁴Gaˇ kawˆ heu nawˇ ya siˬ-eu tsaˬ tehꞈ-a lehˇ ngaˇ noeˬ-eu ma. Teu miˇ neh, deh yaˇ kʼoeˇ kawˬ nawˇ zeuˇ mawꞈ naˇ, heu gaˇ nuiˇ luꞈ-eu aˬ yuiꞈ aˬ tsu heu myaˆ ni gʼeh-eu mehˬ shi zeuˇ-awˬ. Maˬ zeuˇ mawꞈ naˇ kʼawꞈ, maˬ zeuˇ mawꞈ nya lehˇ ehˇ-awˬ. Aˬ jeˬ miˇ neh ehˇ naˇ, deh yaˇ kʼoeˇ kawˬ zeuˇ-eu a kawˬ-aˬ jaˆ-eu tsawˇ haˬ yaw beh gʼaˬ-aˬ, nawˇ meh. Nawˇ jiˇ naˇ, ngaˇ ma.”

⁵Bawˇza ehˇ-eu, “Muiˬ tehꞈ-a. Nawˇmi-euˬ deh yaˇ nawˇ zeuˇ ma lehˇ ngeuˇ naˇ, shiˇ dzeuˇ-euˬ gʼaˬ-euˬ nymˇ dahˬ hawˇ-eu, aˬ yawꞈ-euˬ zaˬ deuˬ uˆ deuˬ-euˬ aˬ laꞈ laꞈ kʼoeˇ neh, deh yaˇ kʼoeˇ kawˬ maˬ ya bi doˆ-iˇ ni, Mawˇbaˆ tsawˇ haˬ miˬ coeˬ miˬ ma Luˇta jiˇ, nawˬ-eu miˬ zaˬ ya bi geuꞈ tehꞈ-a.”

⁶Kʼoeˇ ngeh, tsawˇ haˬ kʼoeˇ gʼaˬ ehˇ-eu, “Toˆ-ehˇ maˇ diˇ ngeuˇ naˇ kʼawꞈ, ngaˇ ya geuꞈ paˬ-ehˇ tsaˬ-eu deh yaˇ kʼoeˇ kawˬ ngaˇ maˬ paˇ zeuˇ ma. Aˬ jeˬ miˇ neh ehˇ naˇ, deh yaˇ kʼoeˇ kawˬ ngaˇ paˇ zeuˇ law hawˇ kʼawꞈ, ngaˬ-eu zaˬ ngaˬ-euˬ uˆ deuˬ maˬ paˇ ya geuꞈ-eu nga. Teu miˇ neh, nawˇ zeuˇ-awˬ. Ngaˇ maˬ paˇ zeuˇ ma.”

⁷Aˇ nah aˇ yamˬ kʼoeˇ yamˬ-ahˇ, Iˇsaˬleˬlaˆ miˇ kʼahˬ laꞈ kʼoeˇ tiˬ jeˬ paˬ ahˬ taꞈ zeuˇ taꞈ-eu maˬ ehˇ, ngaˬ-eu paˇ-eu maˬ ehˇ, heu loꞈ-ehˇ zahˇ taˬ taˬ-euˬ meh. Ahˬ sahˇ gʼaˬ yawˬ ha-euˬ sehˬ nawˆ lehˆ-awˇ, zeuˇ sahˇ gʼaˬ-ahˇ ya biꞈ-eu meh. Heu-aˬ, Iˇsaˬleˬlaˆ tsawˇ haˬ deuˬ tiˬ jeˬ paˬ ahˬ tsehˆ paˆ tsehˆ-eu gaˇ kawˆ saˇ kiˇ pyeuꞈ-eu meh.

⁸Kʼoeˇ miˇ neh, tsawˇ haˬ kʼoeˇ gʼaˬ Bawˇza-ahˇ, “Nawˇ zeuˇ-awˬ” lehˇ ehˇ nehˬ ngeh, aˬ yawꞈ-euˬ sehˬ nawˆ lehˆ-awˇ biꞈ nehˬ-euˬ meh.

⁹Kʼoeˇ ngeh, aˬ yuiꞈ aˬ tsu kʼoeˇ deuˬ hawˇ-eu, kʼoeˇ gaˇ jawˇ-eu tsawˇ haˬ deuˬ-ahˇ, Bawˇza heu loꞈ-ehˇ ehˇ nehˬ-euˬ meh. “Iˬ nah naw maꞈ-euˬ mehˬ shi, Aˬliˇmaˬlehˇ, Ciˇlahˬ hawˇ-eu Maˬhaˬloˬ-ahˇ kʼaˇ taꞈ-eu jeˬ dawˬ tawˆ luꞈ, Nawˇmi-euˬ laꞈ-ahˇ neh ngaˬ neh zeuˇ tsehˆ gʼaˬ-euˬ gaˇ kawˆ, naw maꞈ saˇ kiˇ pyeuꞈ-eu meh.

¹⁰Kʼoeˇ uˬ taꞈ, Maˬhaˬloˬ-euˬ nymˇ dahˬ pyeuꞈ-eu Mawˇbaˆ tsawˇ jeuˬ Luˇta kʼawꞈ, ngaˬ-euˬ miˬ zaˬ pyeuꞈ laˇ gʼaˬ-euˬ meh. Kʼoeˇ miˇ neh, myawˬ heu deuˬ dawˬ tawˆ luꞈ, shiˇ dzeuˇ-euˬ gʼaˬ-euˬ nymˇ jiˇ laꞈ kʼoeˇ jaˆ-awˇ, aˬ yawꞈ-euˬ zaˬ deuˬ uˆ deuˬ kʼawꞈ, aˬ yawꞈ-eu tsawˇ haˬ laꞈ kʼoeˇ hawˇ-eu aˬ yawꞈ-euˬ meuˬ laꞈ kʼoeˇ, tsuiꞈ dahˬ maˬ dahˬ-iˇ ni, paˇ jawˇ laˇ tehꞈ-a. Iˬ nah, naw maꞈ-aˬ, gaˇ kawˆ heu hmˬ-euˬ saˇ kiˇ pyeuꞈ-eu meh.”

¹¹Aˬ yuiꞈ aˬ tsu kʼoeˇ deuˬ hawˇ-eu, kʼoeˇ gaˇ jawˇ luꞈ-eu tsawˇ haˬ deuˬ ehˇ-eu, “Ngeuˇ ma. Nga maꞈ saˇ kiˇ pyeuꞈ-eu ma. Nawˬ-euˬ nymˇ-ahˇ jawˇ uˇ le-euˬ zaˬ miˬ zaˬ heu gʼaˬ-ahˇ, Sahˬpaˬ Miˬyehˇ gʼawˬ shaˬ gaˬ nehˬ-awˇ, Yaˬkoˆ gʼaˇ duˬ zaˬ gʼawˬ mya ni bi jawˇ le-euˬ Laˬkeˬlaˇ hawˇ-eu Leˇaˬ loꞈ-ehˇ bi pyeuꞈ laˇ luꞈ-uˇ. Eˇpaˬlaˇ aˇ jeuˬ aˇ ca deuˬ laꞈ kʼoeˇ, nawˇ-aˬ, smˇ muiˬ muiˬ dui dui laˇ-awˇ, Behˬlehˬhehˬ meuˬ laꞈ kʼoeˇ tsawˇ myahˇ doˆ luꞈ-uˇ.

¹²Zaˬ miˬ zaˬ heu gʼaˬ o neh, Sahˬpaˬ Miˬyehˇ nawˬ-ahˇ biꞈ-euˬ aˬ buˇ aˬ li deuˬ baˬ da neh, Yuˇdaˆ hawˇ-eu Taˬmaˬ-euˬ aˬ li pyeuꞈ-eu Paˬyehˆ-euˬ nymˇ jiˇ loꞈ-ehˇ, nawˬ-euˬ nymˇ jiˇ kʼawꞈ tsawˇ myahˇ doˆ luꞈ-uˇ.”

¹³Kʼoeˇ naˇ, Luˇta-ahˇ aˬ yawꞈ-euˬ nymˇ-ahˇ Bawˇza sheuˬ kʼoꞈ gʼeh-awˇ, aˬ yawꞈ-euˬ miˬ zaˬ pyeuꞈ laˇ-euˬ meh. Luˇta-ahˇ Sahˬpaˬ Miˬyehˇ guiˬ lahˬ biꞈ nehˬ-euˬ miˇ neh, aˬ nyiˇ pi leˇ-awˇ, aˬ li tiˬ li ciˬ-euˬ meh.

¹⁴Behˬlehˬhehˬ meuˬ-ahˇ jawˇ-eu zaˬ miˬ zaˬ deuˬ Nawˇmi-ahˇ ehˇ nehˬ-eu, “Sahˬpaˬ Miˬyehˇ-euˬ guiˬ lahˬ-ahˇ ja ceuˬ-awˬ. Nawˬ-ahˇ bi mˇ cu-eu gʼaˇ duˬ, Sahˬpaˬ Miˬyehˇ nawˬ-ahˇ oeˬ paˬ tiˬ gʼaˬ biꞈ laꞈ-euˬ meh. Aˬ li heu li-aˬ, Iˇsaˬleˬlaˆ miˇ kʼahˬ laꞈ kʼoeˇ tsawˇ myahˇ doˆ-eu tsawˇ haˬ pyeuꞈ laˇ luꞈ-uˇ.

¹⁵Nawˬ-euˬ kuiˬ ma-aˬ, nawˬ-ahˇ gaˬ-awˇ, aˬ li shiꞈ li naˆ maˬ tseˇ, nawˬ-eu gʼaˇ duˬ aˬ yawꞈ gaˇ dahˇ tsoeˬ-eu meh. Nymˬ-mˇ poˆ-aˬ, nawˬ-euˬ gʼaˇ duˬ aˬ li tiˬ li aˬ yawꞈ bi dehꞈ le-awˇ, aˬ li heu li-aˬ, nawˇ yaw dehꞈ dehꞈ-eu jeˬ-ahˇ yaw shuiꞈ shuiꞈ-ehˇ bi pyeuꞈ laˇ tehꞈ-a. Nawˇ tsawˇ mawˬ mawˬ laˇ ngeh, aˬ yawꞈ nawˬ-ahˇ haw piˇ tehꞈ-a.”

¹⁶Nawˇmi-aˬ, aˬ li kʼoeˇ li-ahˇ aˬ yawꞈ-euˬ bawˇ kʼahˇ laꞈ kʼoeˇ ciˬ uˇ-awˇ bo saˆ-euˬ meh.

¹⁷Dawˬ peh jawˇ-eu zaˬ miˬ zaˬ deuˬ aˬ li kʼoeˇ li-ahˇ, Awˇbehˆ lehˇ myahˇ nehˬ-euˬ meh. “Nawˇmi gʼaˇ duˬ aˬ li tiˬ gʼaˬ dehꞈ le gʼaˬ meh” lehˇ tsawˇ haˬ yawˬ gʼaˬ na luꞈ-ahˇ aˬ yawꞈ maꞈ ja gaˬ-euˬ meh. Awˇbehˆ-aˬ, Yeˬshehˇ-euˬ aˬ da pyeuꞈ-awˇ, Yeˬshehˇ-aˬ, sahˬ paˬ Daˬbiˇ-euˬ aˬ da pyeuꞈ-eu meh.

¹⁸Heu-aˬ, Paˬyehˆ-ahˇ neh, sahˬ paˬ Daˬbiˇ-ahˇ keuˆ ni taꞈ-eu tsuiꞈ meh. Paˬyehˆ, Heˬzaˬloˬ, Lam, Aˬmiˇnaˬdehˇ, Naˬshoˬ, Saˬlaˬmoˬ, Bawˇza, Awˇbehˆ, Yeˬshehˇ, Daˬbiˇ.