Read Akha 1 Saˬmeuˬlaˆ 1 Bible Online

1 Saˬmeuˬlaˆ 1 - Akha bible

1 Saˬmeuˬlaˆ 1

¹Eˇpaˬleˬ tsawˇ jeuˬ laꞈ kʼoeˇ, Eˇlaˬ kaˬnaˬ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Eˇpaˬleˬ miˇ kʼahˬ gawˬ jawˬ gawˬ duˇ paw jaˆ-eu Laˬmahˇ meuˬ-ahˇ aˬ yawꞈ jawˇ-eu meh. Aˬ yawꞈ-aˬ, Zuˇpaˬ aˇ jeuˬ-ahˇ taꞈ-eu Toˇhuˇ aˇ jeuˬ aˇ ca tiˬ gʼaˬ pyeuꞈ-eu meh. Aˬ yawꞈ-euˬ aˬ bawˇ-aˬ, Eˇliˇhuˆ pyeuꞈ-awˇ, aˬ yawꞈ-euˬ aˬ da-aˬ, Yeˬloˇhamˬ meh.

²Eˇlaˬkaˬnaˬ-aˬ, Haˬnahˬ hawˇ-eu Peˬniˇnaˬ lehˇ myahˇ-euˬ miˬ zaˬ nyiˬ gʼaˬ jawˇ-eu meh.

³Peˬniˇnaˬ gʼaˬ zaˬ jawˇ le kʼawꞈ, Haˬnahˬ gʼaˬ zaˬ maˬ jawˇ le-a. Eˇlaˬkaˬnaˬ-aˬ, aˬ yawꞈ kʼoꞈ yawꞈ Laˬmahˇ meuˬ-ahˇ neh Shiˇloˬ meuˬ-ahˇ le-awˇ, Sahˬpaˬ Miˬyehˇ-ahˇ uˬ duˬ tahˬ-awˇ lawˇ-eu shehˇ-eu meh. Hawˇpaˬniˇ hawˇ-eu Piˇnaˬhaˇ lehˇ myahˇ-euˬ Eˇliˆ-euˬ aˬ li nyiˬ li, Shiˇloˬ meuˬ-ahˇ piˇ ma geuꞈ luꞈ-eu meh.

⁴Aˬ yawꞈ kʼoꞈ yawꞈ Eˇlaˬkaˬnaˬ kʼaˇ lawˇ kʼaˇ shehˇ ngeh, Peˬniˇnaˬ hawˇ-eu aˬ yawꞈ-euˬ zaˬ yawˬ gʼaˬ na luꞈ-ahˇ, tiˬ gʼaˬ-ahˇ shaˬ jiˇ tiˬ bymˇ Eˇlaˬkaˬnaˬ bymˇ nehˬ-euˬ meh.

⁵Haˬnahˬ-ahˇ aˬ yawꞈ gaˬ dui dui kʼawꞈ, shaˬ jiˇ tiˬ bymˇ tehꞈ-ehˇ aˬ yawꞈ biˇ oꞈ nehˬ-eu meh. Aˬ jeˬ miˇ neh ehˇ naˇ, Haˬnahˬ-ahˇ Sahˬpaˬ Miˬyehˇ zaˬ maˬ bi jawˇ le-euˬ miˇ neh meh.

⁶Sahˬpaˬ Miˬyehˇ Haˬnahˬ-ahˇ zaˬ maˬ bi jawˇ le-eu miˇ neh, aˬ yawꞈ nui ma shaˬ zahˬ mˇ-awˇ ya shaꞈ dawˇ ni, aˬ yawꞈ-ahˇ bye-eu Peˬniˇnaˬ gʼaˬ, aˬ yawꞈ-ahˇ ja bu ja doeˇ nehˬ-eu meh.

⁷Aˬ yawꞈ kʼoꞈ yawꞈ Sahˬpaˬ Miˬyehˇ-euˬ nymˇ-ahˇ aˬ yawꞈ maꞈ kʼaˇ le ngeh, aˬ yawꞈ nui ma cawˆ ni Peˬniˇnaˬ gʼaˬ aˬyawꞈ-ahˇ ja bu ja doeˇ-eu miˇ neh, aˬ yawꞈ ngoeˇ ngoeˇ ehˇ tiˬ jeˬ-iˬ maˬ dzaˬ maˬ dawˇ ni jawˇ-eu meh.

⁸Kʼoeˇ ngeh, aˬ yawꞈ-euˬ kʼaˬ dzeˇ zaˬ aˬ yawꞈ-ahˇ ehˇ nehˬ-eu, “Haˬnahˬ-oˇ, aˬ jeˬ miˇ neh ngoeˇ te. Aˬ jeˬ miˇ neh maˬ dzaˬ maˬ dawˇ ni aˬ myah luꞈ noeˬ shaˬ noeˬ shaˬ-ehˇ jawˇ te. Aˬ li tseˇ gʼaˬ naˆ maˬ tseˇ ngaˇ nawˬ-eu gʼaˇ duˬ gaˇ dahˇ tsoeˬ dzehˬ-eu maˬ ngeuˇ nya loˇ.”

⁹Tiˬ nah-aˬ, Shiˇloˬ meuˬ laꞈ kʼoeˇ aˬ yawꞈ maꞈ dzaˬ dehˆ dawˇ dehˆ gʼaˬ ngeh, Haˬnahˬ tsawˬ tuˇ laˇ-euˬ meh. Kʼoeˇ ngeh, Sahˬpaˬ Miˬyehˇ-euˬ nymˇ-ahˇ, laˇ gʼoˆ bahˬ dawˬ peh jaˆ-eu nuiˇ boˆ-ahˇ piˇ ma Eˇliˆ nuiˇ luꞈ-eu meh.

¹⁰Haˬnahˬ nui ma cawˆ dui dui-eu laꞈ kʼoeˇ, guˇ guˇ-ehˇ ngoeˇ-awˇ, Sahˬpaˬ Miˬyehˇ-ahˇ guiˬ lahˬ shaˇ-euˬ meh.

¹¹Haˬnahˬ heu loꞈ-ehˇ saˇ jaˇ dzaˬ-euˬ meh. “Baoˬ huiˬ dui dui-eu gʼaˬ pyeuꞈ-eu Sahˬpaˬ Miˬyehˇ-oˇ, nawˬ-euˬ zaˬ kʼaˆ pyeuꞈ-eu ngaˬ-ahˇ haw sheˇ. Ngaˇ shaˬ zahˬ naꞈ dui dui luꞈ gaˇ haw mawˇ-awˇ, ngaˬ-ahˇ maˬ ngehˇ ni noeˬ keuˆ nehˬ laꞈ-awˬ. Nawˇ ngaˬ-ahˇ aˬ li tiˬ li bi jawˇ le nehˬ laꞈ naˇ, aˬ li kʼoeˇ li-euˬ uˬ duˬ tsehˇ kahˇ tiˬ jawˇ-iˬ maˬ tehˬ ni bi jaˆ-awˇ, aˬ yawꞈ-euˬ gʼawˇ mawˇ maˬ shiˇ tiˬ ziˇ nawˬ-ahˇ a nehˬ ma lehˇ nawˬ nehˬ-ehˇ ngaˇ saˇ jaˇ dzaˬ ma.”

¹²Sahˬpaˬ Miˬyehˇ-ahˇ Haˬnahˬ gʼawˬ myahˇ ni guiˬ lahˬ shaˇ luꞈ ngeh, aˬ yawꞈ-euˬ mehˬ luˬ-ahˇ Eˇliˆ haw luꞈ-eu meh.

¹³Aˬ yawꞈ ciˬ cuˇ ni guiˬ lahˬ shaˇ luꞈ-eu laꞈ kʼoeˇ, aˬ yawꞈ-euˬ mehˬ luˬ luˆ luꞈ-eu meh. Ehˇ kʼawꞈ, teˇ saˇ maˬ doˆ-a. Kʼoeˇ miˇ neh, aˬ yawꞈ aˬ gaꞈ dzaˇ uiˇ yehꞈ luꞈ-eu nga lehˇ Eˇliˆ noeˬ-eu meh.

¹⁴Aˬ yawꞈ-ahˇ Eˇliˆ ehˇ nehˬ-eu, “Aˇ myah keuˆ ni aˬ gaꞈ dzaˇ uiˇ yehꞈ yehꞈ-ehˇ jawˇ-eu gʼeh te. Aˬ gaꞈ dzaˇ uiˇ taˬ paˇ dawˇ hawˇ-awˬ.”

¹⁵Haˬnahˬ ehˇ-eu, “Aˬ bawˇ piˇ ma-oˇ, ngaˇ aˬ gaꞈ dzaˇ uiˇ yehꞈ-eu maˬ ngeuˇ. Nui ma cawˆ dui dui-eu miˇ neh, ngaˬ-euˬ nui ma laꞈ kʼoeˇ shaˬ zahˬ kʼaˇ mˇ luꞈ-eu jeˬ dawˬ tawˆ luꞈ, guiˬ lahˬ shaˇ-eu laꞈ kʼoeˇ Sahˬpaˬ Miˬyehˇ-ahˇ dzawˇ nehˬ luꞈ-eu ma.

¹⁶Gaˇ dahˇ maˬ tsoeˬ-eu zaˬ miˬ zaˬ tiˬ gʼaˬ law hawˇ nga lehˇ ngaˬ-ahˇ taˬ noeˬ nehˬ laꞈ. Ngaˬ-euˬ nui ma shaˬ zahˬ naꞈ dui dui-eu miˇ neh, heu loꞈ-ehˇ guiˬ lahˬ shaˇ luꞈ-eu jeˬ pyeuꞈ-eu ma.”

¹⁷Eˇliˆ ehˇ-eu, “Nui ma coꞈ ngehˇ ni taˬ-awˇ, gʼoꞈ-iˇ-awˬ. Nawˬ neh kʼaˇ shaˇ-euˬ jeˬ Iˇsaˬleˬlaˆ tsawˇ jeuˬ-euˬ Miˬyehˇ nawˬ-ahˇ biꞈ laꞈ luꞈ-uˇ.”

¹⁸Haˬnahˬ ehˇ-eu, “Nawˇ aˬ myah luꞈ ngaˬ-ahˇ gʼawˬ shaˬ gaˬ nehˬ laꞈ nya luꞈ-uˇ.” Kʼoeˇ naˇ, aˬ yawꞈ gʼoꞈ-iˇ-awˇ, dzaˬ-eu dawˇ-awˇ, maˬ paˇ noeˬ shaˬ ni jawˇ-euˬ meh.

¹⁹Yawˬ shawˬ yawˬ Eˇlaˬkaˬnaˬ hawˇ-eu aˬ yawꞈ-euˬ miˬ sawˇ zaˬ deuˬ yaw naꞈ-ehˇ tuˇ-awˇ, Sahˬpaˬ Miˬyehˇ-ahˇ uˬ duˬ tahˬ gʼaˬ ngeh, Laˬ mahˇ meuˬ-ahˇ gʼoꞈ-iˇ-euˬ meh. Eˇlaˬkaˬnaˬ hawˇ-eu Haˬnahˬ aˬ nyaꞈ dzeˇ zaˬ jawˇ taꞈ-awˇ, Haˬnahˬ-euˬ guiˬ lahˬ shaˇ dawˬ-ahˇ Miˬyehˇ noeˬ keuˆ nehˬ-euˬ meh.

²⁰Kʼoeˇ naˇ, Haˬnahˬ aˬ nyiˇ pi leˇ-awˇ, aˬ li tiˬ li ciˬ-euˬ meh. Kʼoeˇ ngeh, “Aˬ yawꞈ gʼaˇ duˬ ngaˇ guiˬ lahˬ shaˇ-euˬ ma” lehˇ Haˬnahˬ ehˇ-awˇ, aˬ li kʼoeˇ li-ahˇ Saˬmeuˬlaˆ[1] lehˇ myahˇ nehˬ-euˬ meh.

²¹Eˇlaˬkaˬnaˬ hawˇ-eu aˬ yawꞈ-euˬ miˬ sawˇ zaˬ deuˬ Shiˇloˬ meuˬ-ahˇ tiˬ poˆ paˇ le-awˇ, aˬ yawꞈ kʼoꞈ yawꞈ lawˇ luꞈ-eu lawˇ-eu jeˬ hawˇ-eu, aˬ yawꞈ neh Sahˬpaˬ Miˬyehˇ-ahˇ lawˇ nehˬ-eu gʼaˇ duˬ saˇ jaˇ dzaˬ tsehˆ taˬ-euˬ lawˇ-eu jeˬ lawˇ nehˬ leˇ-eu aˇ yamˬ paˇ tsaˬ laˇ-euˬ meh.

²²Ehˇ kʼawꞈ, kʼoeˇ poˆ jawˇ Haˬnahˬ gʼaˬ maˬ caw teh leˇ ni jawˇ yaꞈ-euˬ meh. “Aˬ li aˬ coeˇ byehˇ-eu nehˬ-ehˇ Sahˬpaˬ Miˬyehˇ-euˬ nymˇ-ahˇ ciˬ gʼeh-awˇ aˬ yawꞈ-euˬ tiˬ ziˇ kʼoeˇ gaˇ bi jawˇ ma” lehˇ, aˬ yawꞈ-euˬ kʼaˬ dzeˇ zaˬ-ahˇ aˬ yawꞈ ehˇ nehˬ-euˬ meh.

²³“Nawˬ neh kʼaˇ noeˬ-euˬ loꞈ-ehˇ geuꞈ-awˬ. Aˬ li aˬ coeˇ gʼehˆ laˇ ngeh keuˆ ni iˇ kahˇ-ahˇ jawˇ-awˬ. Nawˬ neh saˇ jaˇ dzaˬ taˬ-euˬ loꞈ-ehˇ pyeuꞈ laˇ ni Sahˬpaˬ Miˬyehˇ jahˇ luꞈ-uˇ” lehˇ, Eˇlaˬkaˬnaˬ ehˇ-eu meh. Kʼoeˇ naˇ, Haˬnahˬ gʼaˬ iˇ kahˇ-ahˇ jawˇ yaꞈ-awˇ, aˬ yawꞈ-euˬ aˬ li-ahˇ bo saˆ-euˬ meh.

²⁴Aˬ li kʼoeˇ li aˬ coeˇ gʼehˆ laˇ ngeh, Shiˇloˬ meuˬ-ahˇ ciˬ gʼeh-euˬ meh. Smˇ kʼoꞈ byah-eu mawˇ neˇ mawˇ gaw zaˬ tiˬ mawˇ, cehˇ meu smˇ pehˬ hawˇ-eu, aˬ gaꞈ dzaˇ uiˇ tiˬ byah ni dahˬ-eu shaˬ kʼoˆ iˇ puˬ tiˬ siˬ aˬ yawꞈ yuˇ gʼeh-euˬ meh. Aˬ li zaˬ nahˬ Saˬmeuˬlaˆ-ahˇ, Shiˇloˬ meuˬ-ahˇ jaˆ-eu Sahˬpaˬ Miˬyehˇ-euˬ nymˇ-ahˇ aˬ yawꞈ ciˬ gʼeh-euˬ meh.

²⁵Mawˇ neˇ mawˇ gaw kʼoeˇ mawˇ sehꞈ gʼaˬ ngeh, aˬ li kʼoeˇ li-ahˇ Eˇliˆ jawˇ gaˇ aˬ yawꞈ maꞈ ciˬ gʼeh-euˬ meh.

²⁶Eˇliˆ-ahˇ Haˬnahˬ ehˇ nehˬ-eu, “Aˬ bawˇ piˇ ma-oˇ, nawˇ ngaˬ-ahˇ noeˬ nya siˬ loˇ. Nawˬ-euˬ mehˬ shi heu tsahˇ yawꞈ-awˇ Sahˬpaˬ Miˬyehˇ-ahˇ guiˬ lahˬ shaˇ-euˬ zaˬ miˬ zaˬ zaˬ guˬ kʼoeˇ gʼaˬ ngaˇ ma tawˇ.

²⁷Aˬ li heu li za ni aˬ yawꞈ-ahˇ ngaˇ guiˬ lahˬ shaˇ-awˇ, ngaˬ neh kʼaˇ shaˇ-euˬ loꞈ-ehˇ biꞈ nehˬ laꞈ-euˬ meh.

²⁸Kʼoeˇ miˇ neh, Sahˬpaˬ Miˬyehˇ-ahˇ aˬ li heu li a nehˬ-eu ma. Aˬ yawꞈ kʼaˇ dehꞈ-eu tiˬ ziˇ Sahˬpaˬ Miˬyehˇ-ahˇ biꞈ tsehˆ nehˬ yaꞈ-eu ma.” Kʼoeˇ naˇ, aˬ yawꞈ maꞈ kʼoeˇ gaˇ Sahˬpaˬ Miˬyehˇ-ahˇ uˬ duˬ tahˬ-euˬ meh.