Read Akha 1 Saˬmeuˬlaˆ 11 Bible Online

1 Saˬmeuˬlaˆ 11 - Akha bible

1 Saˬmeuˬlaˆ 11

¹Ba la tiˬ siˬ ehˇ gʼaˬ ni myahˇ laˇ ngeh, Aˬmoˬ sahˬ paˬ Naˬhaˆ-aˬ, aˬ yawꞈ-euˬ guiˇ maꞈ sheuˬ-awˇ, Giˇlaˆ miˇ kʼahˬ Jaˬbehˆ meuˬ-ahˇ loꞈ jawˬ le-euˬ meh. Kʼoeˇ ngeh, Jaˬbehˆ meuˬ-ahˇ jawˇ-eu tsawˇ haˬ deuˬ sahˬ paˬ Naˬhaˆ-ahˇ, “Nga maꞈ nehˬ-ehˇ saˇ jaˇ dzaˬ nehˬ laꞈ-awˬ. Nawˇ uˆ lahˇ-eu uˬ moˆ nga maꞈ jawˇ ma” lehˇ ehˇ nehˬ-euˬ meh.

²Naˬhaˆ ehˇ-eu, “Naw maꞈ yawˬ gʼaˬ na luꞈ-euˬ myaˆ nuiˆ aˇ maˇ paw nuiˆ tsawˆ behꞈ nehˬ jiˇ-awˇ, Iˇsaˬleˬlaˆ tsawˇ haˬ dawˬ tawˆ luꞈ-euˬ nui ma-ahˇ deuˬ leˇ ni mˇ haw nehˬ gʼaˬ miˇ tsa maˬ ngeuˇ naˇ, naw maꞈ nehˬ ehˇ ngaˇ saˇ jaˇ maˬ dzaˬ.”

³Jaˬbehˆ meuˬ-ahˇ jawˇ-eu aˬ yuiꞈ aˬ tsu deuˬ Naˬhaˆ-ahˇ ehˇ nehˬ-eu, “Iˇsaˬleˬlaˆ miˇ kʼahˬ doe ni tsawˇ haˬ pyehˬ gʼeh-awˇ, gaˇ kawˆ heu bi tsaꞈ gaˬ-iˇ-eu gʼaˇ duˬ, nga maꞈ-ahˇ aˇ yamˬ shiꞈ nah biꞈ nehˬ laꞈ-awˬ. Nga maꞈ-ahˇ caw ba le-eu tiˬ gʼaˬ-iˬ maˬ jawˇ naˇ, nga maꞈ-euˬ gʼawˇ mawˇ nawˬ-euˬ aˬ laꞈ laꞈ kʼoeˇ a nehˬ ma”

⁴Dawˬ tsaꞈ tsaꞈ le-euˬ tsawˇ haˬ deuˬ, Sawˇluˆ jawˇ-eu Giˇbyaˬ meuˬ-ahˇ oe keuˆ-awˇ gaˇ kawˆ kʼoeˇ dzawˇ nehˬ ngeh, kʼoeˇ gaˇ jawˇ-eu tsawˇ haˬ deuˬ noeˬ shaˬ dui dui-eu laꞈ kʼoeˇ ngoeˇ-eu meh.

⁵Kʼoeˇ ngeh, Sawˇluˆ deh yaˇ-ahˇ neh mawˇ neˇ teh-awˇ gʼoꞈ keuˆ laˇ-awˇ, “Aˬ jeˬ gʼeh ta. Aˬ jeˬ miˇ neh yawˬ gʼaˬ na luꞈ ngoeˇ luꞈ ta” lehˇ naˇ haˬ-euˬ meh. Jaˬbehˆ meuˬ-ahˇ neh oe-awˇ dawˬ tsaꞈ tsaꞈ gaˬ le-euˬ gaˇ kawˆ, aˬ yawꞈ-ahˇ aˬ cawˬ dzawˇ nehˬ-euˬ meh.

⁶Gaˇ kawˆ kʼoeˇ Sawˇluˆ ya gaˬ ngeh, Miˬyehˇ-euˬ yaw sahˇ aˬ yawꞈ-ahˇ uˆ lahˇ le-awˇ, aˬ yawꞈ nui ma pehˇ dui dui laˇ-euˬ meh.

⁷Kʼoeˇ naˇ, mawˇ neˇ mawˇ gaw nyiˬ mawˇ tsahˇ-awˇ, gʼawˬ mya tm deuˆ tm-awˇ, dawˬ tsaꞈ tsaꞈ le-euˬ tsawˇ haˬ kʼoeˇ deuˬ neh Iˇsaˬleˬlaˆ miˇ kʼahˬ bi baꞈ haw doe-awˇ, “Sawˇluˆ hawˇ-eu Saˬmeuˬlaˆ nehˬ-ehˇ guiˇ maˬ deuˆ laˇ-eu tsawˇ haˬ-euˬ mawˇ neˇ deuˬ-ahˇ, heu loꞈ-ehˇ jahˇ nehˬ ma” lehˇ bi tsaꞈ gaˬ doe-euˬ meh. Sahˬpaˬ Miˬyehˇ kʼehˬ nehˬ kʼaˆ nehˬ laꞈ gaˇ Iˇsaˬleˬlaˆ tsawˇ haˬ deuˬ guˆ-eu miˇ neh, tiˬ gʼaˬ-iˬ maˬ jawˇ yaꞈ ni, yawˬ gʼaˬ na luꞈ tiˬ kawˆ loꞈ-ehˇ doˆ laˇ-euˬ meh.

⁸Tsawˇ haˬ kʼoeˇ deuˬ-ahˇ, Beˬzehˇ meuˬ-ahˇ Sawˇluˆ kuˇ uiˬ-euˬ meh. Iˇsaˬleˬlaˆ miˇ kʼahˬ-ahˇ neh oe-euˬ smˬ seh gʼaˬ byah-awˇ, Yuˇdaˆ miˇ kʼahˬ-ahˇ neh laˇ-euˬ smˬ muiˇ gʼaˬ byah-eu meh.

⁹“Ni shawˬ nah nah loˆ maˬ ceh laˇ mi naˆ-ehˇ ka kʼoꞈ laˇ ma lehˇ, naw maꞈ-euˬ tsawˇ haˬ deuˬ-ahˇ ehˇ nehˬ leˇ-awˬ” lehˇ, Jaˬbehˆ meuˬ-ahˇ neh oe-awˇ dawˬ tsaꞈ tsaꞈ le-euˬ tsawˇ haˬ kʼoeˇ deuˬ-ahˇ aˬ yawꞈ maꞈ ehˇ nehˬ-euˬ meh. Jaˬbehˆ meuˬ-ahˇ jawˇ-eu tsawˇ haˬ deuˬ dawˬ kʼoeˇ dawˬ-ahˇ ya gaˬ ngeh, laˬ kʼaˬ cehˇ dui dui-eu meh.

¹⁰Kʼoeˇ ngeh jawˇ, sahˬ paˬ Naˬhaˆ-ahˇ aˬ yawꞈ maꞈ ehˇ nehˬ-eu, “Ni shawˬ nah nga maꞈ-euˬ gʼawˇ mawˇ nawˬ-euˬ aˬ laꞈ laꞈ kʼoeˇ a nehˬ ma. Nga maꞈ-ahˇ nawˇ kʼaˇ jahˇ mawꞈ-eu jeˬ jahˇ nya tehꞈ-a.”

¹¹Yawˬ nah yawˬ uˬ shawˬ yaw naꞈ-ehˇ, Sawˇluˆ aˬ yawꞈ-euˬ tsawˇ haˬ deuˬ-ahˇ smˬ muˇ biˇ-awˇ, uˬ bya bya laˇ-eu nehˬ-ehˇ Aˬmoˬ tsawˇ haˬ deuˬ-euˬ taˆ-ahˇ uˇ leˇ-awˇ guiˇ deuˆ-euˬ meh. Nah loˆ ceh laˇ ngeh, Aˬmoˬ tsawˇ haˬ gʼawˬ mya ni aˬ yawꞈ maꞈ deuˆ sehꞈ-euˬ meh. Maˬ shiˇ-ehˇ dzeˇ-eu tsawˇ haˬ deuˬ kʼawꞈ, tiˬ paw tiˬ gʼaˬ-ehˇ cehˆ byaˆ jiˇ-euˬ meh.

¹²Kʼoeˇ ngeh, Iˇsaˬleˬlaˆ tsawˇ haˬ deuˬ Saˬmeuˬlaˆ-ahˇ heu loꞈ-ehˇ ehˇ nehˬ-euˬ meh. “Sawˇluˆ-ahˇ aˬ dui-euˬ sahˬ paˬ bi geuꞈ-eu maˬ tsaˬ-a lehˇ ehˇ-eu tsawˇ haˬ kʼoeˇ deuˬ aˬ gaˇ jawˇ ta. Tsawˇ haˬ kʼoeˇ deuˬ nga maꞈ-ahˇ a nehˬ laꞈ-awˬ. Nga maꞈ sehꞈ dzeh jiˇ ma.”

¹³Ehˇ kʼawꞈ, Sawˇluˆ ehˇ-eu, “Iˬ nah tsawˇ haˬ tiˬ gʼaˬ-iˬ maˬ ya sehꞈ-a. Aˬ jeˬ miˇ neh ehˇ naˇ, iˬ nah-aˬ, Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ ka kʼoꞈ-euˬ aˇ nah meh.”

¹⁴Kʼoeˇ naˇ, aˬ yawꞈ maꞈ-ahˇ Saˬmeuˬlaˆ ehˇ nehˬ-euˬ “Aˬ dui maꞈ Giˇlaˇgaˬlaˇ meuˬ-ahˇ le-awˇ, Sawˇluˆ-ahˇ sahˬ paˬ tiˬ poˆ paˇ ka nehˬ leˇ kaˇ-euˇ.”

¹⁵Aˬ yawꞈ maꞈ dawˬ tawˆ luꞈ Giˇlaˇgaˬlaˇ meuˬ-ahˇ le-awˇ, muiˬ-eu shawˇ-eu jawˇ duˬ-ahˇ, Sawˇluˆ-ahˇ sahˬ paˬ ka nehˬ-euˬ meh. Cawˬ cawˬ taꞈ-eu lawˇ-eu jeˬ aˬ yawꞈ maꞈ lawˇ-awˇ, Sawˇluˆ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ byawˬ dui dui-eu laꞈ kʼoeˇ bawˬ-iˬ gʼeh-euˬ meh.