Read Akha 1 Saˬmeuˬlaˆ 15 Bible Online

1 Saˬmeuˬlaˆ 15 - Akha bible

1 Saˬmeuˬlaˆ 15

¹Sawˇluˆ-ahˇ Saˬmeuˬlaˆ heu loꞈ-ehˇ ehˇ nehˬ-euˬ meh. “Ngaˇ-aˬ, nawˬ-ahˇ tsiˇ shehˆ daˆ-awˇ, Sahˬpaˬ Miˬyehˇ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ jeuˬ kʼoeˇ taˆ sahˬ paˬ bi geuꞈ-eu lehˇ tseˇ doˆ-eu gʼaˇ duˬ, Sahˬpaˬ Miˬyehˇ neh bi oe-euˬ gʼaˬ ma. Baoˬ huiˬ-eu Sahˬpaˬ Miˬyehˇ-euˬ dawˬ-ahˇ, nymˬ-mˇ nawˇ naˇ haˬ-awˬ.

²Aˬmaˬlehˇ tsawˇ jeuˬ-ahˇ Sahˬpaˬ Miˬyehˇ kʼehˬ nehˬ-eu lehˇ gʼeh-eu meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, Aˬmaˬlehˇ tsawˇ haˬ-euˬ aˬ poeˬ aˬ bawˇ deuˬ gaˇ ma-ahˇ loꞈ tsoeˬ-euˬ meh.

³Aˬmaˬlehˇ tsawˇ haˬ deuˬ-ahˇ nawˇ guiˇ deuˆ-iˇ-awˇ, aˬ yawꞈ maꞈ kʼaˇ jaˆ-eu jeˬ dawˬ tawˆ luꞈ geuꞈ-eu jeˬ maˬ ahˇ-ehˇ pyeuꞈ-iˇ ngeh keuˆ ni laˆ luˬ laˆ seˇ jiˇ nehˬ-awˬ. Tiˬ jeˬ-iˬ taˬ bi dzeˇ yaꞈ. Zaˬ miˬ zaˬ kʼaˬ dzeˇ zaˬ hawˇ-eu, zaˬ guˬ zaˬ nahˬ maˬ tseˇ paˆ ni, dawˬ tawˆ luꞈ sehꞈ jiˇ-awˬ. Mawˇ neˇ, yawˇ, law taw, mahˬ tahˬ laˆ dawˬ tawˆ luꞈ sehꞈ dzeh jiˇ-awˬ.”

⁴Sawˇluˆ-aˬ, aˬ yawꞈ-euˬ guiˇ maꞈ dawˬ tawˆ luꞈ-ahˇ kuˇ uiˬ-awˇ, Teˬlmˬ meuˬ laꞈ kʼoeˇ aˬ yawꞈ maꞈ-ahˇ pyehˆ tseˇ haw-euˬ meh. Iˇsaˬleˬlaˆ miˇ kʼahˬ-ahˇ neh oe-euˬ yehˇ nyiˬ seh gʼaˬ byah-awˇ, Yuˇdaˆ miˇ kʼahˬ-ahˇ neh laˇ-euˬ yehˇ tiˬ muiˇ gʼaˬ byah-eu meh.

⁵Kʼoeˇ naˇ, aˬ yawꞈ hawˇ-eu aˬ yawꞈ-euˬ tsawˇ haˬ deuˬ Aˬmaˬlehˇ meuˬ-ahˇ iˇ-awˇ, gʼaˬ lawˬ-ahˇ dzuˇ zaꞈ-awˇ loꞈ-euˬ meh.

⁶Kaˬnaˆ tsawˇ jeuˬ jawˇ gaˇ Sawˇluˆ tsawˇ haˬ pyehˬ gʼeh-awˇ, “Naw maꞈ Aˬmaˬlehˇ tsawˇ haˬ deuˬ nehˬ-ehˇ maˬ jawˇ keuˬ ni jiˆ doˆ-iˇ-awˬ. Maˬ jiˆ doˆ-iˇ naˇ, aˬ yawꞈ maꞈ-ahˇ ngaˇ sehꞈ ngeh naw maꞈ kʼawꞈ bi sehꞈ keuˬ nmˬ-mˇ. Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, naw maꞈ-euˬ aˬ poeˬ aˬ bawˇ deuˬ Iˇsaˬleˬlaˆ tsawˇ haˬ deuˬ-ahˇ caw ba nehˬ-euˬ miˇ neh, naw maꞈ-ahˇ ngaˇ heu loꞈ-ehˇ tsaꞈ leꞈ-eu ma.” Kʼoeˇ ngeh, Kaˬnaˆ tsawˇ haˬ deuˬ jiˆ doˆ-iˇ-euˬ meh.

⁷Haˬbiˇlaˬ meuˬ-ahˇ neh Iˇjiˇtuˆ miˇ kʼahˬ-euˬ nahˇ ma doˆ kʼehˬ paw jaˆ-eu Shuˇyaˆ meuˬ-ahˇ keuˆ ni guiˇ deuˆ keuˆ-awˇ, Aˬmaˬlehˇ tsawˇ haˬ deuˬ-ahˇ Sawˇluˆ deuˆ gʼaˬ-euˬ meh.

⁸Aˬmaˬlehˇ sahˬ paˬ Aˬgaˆ-ahˇ yaw dehꞈ-ehˇ nyehꞈ mi-awˇ, tsawˇ haˬ dawˬ tawˆ luꞈ-ahˇ sehꞈ-euˬ meh.

⁹Ehˇ kʼawꞈ, Sawˇluˆ hawˇ-eu aˬ yawꞈ-euˬ tsawˇ haˬ deuˬ Aˬgaˆ-ahˇ maˬ sehꞈ ni bi jawˇ-euˬ meh. Muiˬ dui dui-eu yawˇ hawˇ-eu mawˇ neˇ deuˬ maˬ ehˇ, muiˬ dui dui-eu yawˇ zaˬ hawˇ-eu mawˇ neˇ mawˇ zaˬ deuˬ maˬ ehˇ, maˬ sehꞈ ni bi jawˇ-euˬ meh. Kʼaˇ muiˬ-eu jeˬ dawˬ tawˆ luꞈ-ahˇ maˬ laˆ cawˆ ni bi jaˆ-euˬ meh. Gaˇ dahˇ maˬ tsoeˬ-eu jeˬ hawˇ-eu aˇ poeˬ maˬ baw-eu jeˬ tehꞈ-ehˇ aˬ yawꞈ maꞈ laˆ cawˆ-euˬ meh.

¹⁰Saˬmeuˬlaˆ-ahˇ Sahˬpaˬ Miˬyehˇ ehˇ nehˬ-eu,

¹¹“Ngaˬ neh Sawˇluˆ-ahˇ sahˬ paˬ bi geuꞈ-euˬ gaˇ kawˆ-ahˇ ngaˇ nui ma maˬ saˇ nya. Aˬ yawꞈ ngaˬ-ahˇ byehˇ dzeh-awˇ, ngaˬ-euˬ zahˇ dawˬ kʼoꞈ dawˬ deuˬ-ahˇ maˬ naˇ haˬ geuꞈ-a.” Saˬmeuˬlaˆ nui ma pehˇ-eu laꞈ kʼoeˇ, uˬ ciꞈ miˇ lah-ehˇ Sahˬpaˬ Miˬyehˇ-ahˇ guiˬ lahˬ shaˇ-euˬ meh.

¹²Yawˬ nah yawˬ uˬ shawˬ yaw naꞈ-ehˇ, Sawˇluˆ jawˇ gaˇ le-eu lehˇ Saˬmeuˬlaˆ doˆ-iˇ-euˬ meh. Sawˇluˆ Gaˬlaˬmeˬlaˇ meuˬ-ahˇ le dzeuˇ-awˇ, aˬ yawꞈ-ahˇ bi noeˬ keuˆ-eu gʼaˇ duˬ kʼaˬ lo tiˬ siˬ kaˬ tuˇ gʼaˬ-awˇ, Giˇlaˇgaˬlaˇ meuˬ paw paˇ le gʼeh leꞈ-euˬ gaˇ kawˆ Saˬmeuˬlaˆ ya gaˬ-euˬ meh.

¹³Sawˇluˆ jawˇ gaˇ Saˬmeuˬlaˆ le keuˆ ngeh, Saˬmeuˬlaˆ-ahˇ Sawˇluˆ ha-awˇ, “Saˬmeuˬlaˆ-oˇ, Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ. Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ ngaˇ caw teh-awˇ mˇ luꞈ ma” lehˇ ehˇ nehˬ-euˬ meh.

¹⁴Saˬmeuˬlaˆ ehˇ-eu, “Toˆ-ehˇ maˇ-iˬ, mawˇ neˇ hawˇ-eu yawˇ deuˬ mahˇ luꞈ-eu teˇ saˇ ngaˬ-ahˇ gaˬ laˇ-eu teu aˬ jeˬ-a.”

¹⁵Sawˇluˆ ehˇ-eu, “Teu deuˬ-aˬ, ngaˬ-euˬ tsawˇ haˬ deuˬ neh teh leꞈ-euˬ Aˬmaˬlehˇ tsawˇ haˬ deuˬ-euˬ jeˬ zaˬ meh. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ nehˬ-eu gʼaˇ duˬ, muiˬ dui dui-eu yawˇ hawˇ-eu mawˇ neˇ deuˬ-ahˇ aˬ yawꞈ maꞈ tseˇ doˆ taˬ-awˇ, kʼaˇ dzeˇ-eu deuˬ dawˬ tawˆ luꞈ-ahˇ, tiˬ mawˇ-iˬ maˬ bi dzeuˇ-iˇ ni laˆ luˬ laˆ seˇ nehˬ yaꞈ jiˇ-euˬ meh.”

¹⁶Saˬmeuˬlaˆ ehˇ-eu, “Tiˬ jeˬ-iˬ taˬ paˇ ja. Miˇ ciꞈ Sahˬpaˬ Miˬyehˇ ngaˬ-ahˇ ehˇ nehˬ laꞈ-euˬ gaˇ kawˆ ngaˇ nawˬ-ahˇ dzawˇ nehˬ nyaˇ.” Sawˇluˆ ehˇ-eu, “Dzawˇ nehˬ laꞈ-awˬ.”

¹⁷Saˬmeuˬlaˆ ehˇ-eu, “Nawˇ-aˬ, huiˬ-eu tsawˇ haˬ tiˬ gʼaˬ maˬ ngeuˇ lehˇ yawˬ haˇ yaw ha noeˬ kʼawꞈ, Iˇsaˬleˬlaˆ tsawˇ jeuˬ tsawˇ ca heu myaˆ ni gʼeh-eu kʼoeˇ taˆ aˬ yuiꞈ geuꞈ-awˇ sheuˬ gʼeh luꞈ-eu tsawˇ haˬ tiˬ gʼaˬ meh. Iˇsaˬleˬlaˆ miˇ kʼahˬ-euˬ sahˬ paˬ bi geuꞈ-eu gʼaˇ duˬ, Sahˬpaˬ Miˬyehˇ neh nawˬ-ahˇ tsiˇ shehˆ daˆ taˬ-euˬ meh.

¹⁸Maˬ tsaˬ maˬ dawˇ-eu Aˬmaˬlehˇ tsawˇ haˬ kʼoeˇ deuˬ-ahˇ laˆ luˬ laˆ seˇ-iˇ-awˬ lehˇ, Sahˬpaˬ Miˬyehˇ nawˬ-ahˇ dawˬ biꞈ-awˇ bi iˇ-euˬ meh. Aˬ yawꞈ maꞈ dawˬ tawˆ luꞈ-ahˇ sehꞈ jiˇ ngeh keuˆ ni guiˇ deuˆ-awˬ lehˇ, aˬ yawꞈ nawˬ-ahˇ ehˇ nehˬ taˬ-euˬ meh.

¹⁹Toˆ-ehˇ ngeuˇ naˇ, aˬ jeˬ miˇ neh aˬ yawꞈ-euˬ ehˇ dawˬ-ahˇ nawˇ maˬ naˇ haˬ geuꞈ teˬ. Aˬ jeˬ miˇ neh naw maꞈ neh deuˆ za-euˬ mˇ myawˬ yuˇ geuꞈ-eu laꞈ kʼoeˇ Sahˬpaˬ Miˬyehˇ nui ma maˬ saˇ-eu jeˬ mˇ teˬ.”

²⁰Sawˇluˆ ehˇ-eu, “Sahˬpaˬ Miˬyehˇ-euˬ ehˇ dawˬ-ahˇ ngaˇ maˬ naˇ haˬ geuꞈ-euˬ maˬ ngeuˇ. Aˬ yawꞈ neh ehˇ nehˬ laꞈ-euˬ loꞈ-ehˇ ngaˇ iˇ-awˇ, sahˬ paˬ Aˬgaˆ-ahˇ nyehꞈ kʼoꞈ laꞈ-awˇ, Aˬmaˬlehˇ tsawˇ haˬ dawˬ tawˆ luꞈ-ahˇ sehꞈ jiˇ-euˬ ma.

²¹Ehˇ kʼawꞈ, ngaˬ-euˬ tsawˇ haˬ deuˬ, yawˬ ha neh nyehꞈ mi-euˬ jeˬ zaˬ deuˬ laꞈ kʼoeˇ, muiˬ dui dui-eu yawˇ hawˇ-eu mawˇ neˇ deuˬ-ahˇ maˬ sehꞈ ni, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ nehˬ-eu gʼaˇ duˬ, heu gaˇ Giˇlaˇgaˬlaˇ meuˬ-ahˇ tsahˇ kʼoꞈ laꞈ-euˬ ma.”

²²Saˬmeuˬlaˆ ehˇ-eu, “Sahˬpaˬ Miˬyehˇ aˬ geu jeˬ-ahˇ geuꞈ mawꞈ dzehˬ ta. Aˬ yawꞈ-euˬ ehˇ dawˬ naˇ haˬ geuꞈ-eu jeˬ-ahˇ geuꞈ mawꞈ dzehˬ ta loˇ. Maˬ ngeuˇ naˇ, aˬ yawꞈ-ahˇ damˬ nehˬ-eu jeˬ hawˇ-eu lawˇ nehˬ shehˇ nehˬ-eu jeˬ-ahˇ geuꞈ mawꞈ dzehˬ ta loˇ. Aˬ yawꞈ-euˬ dawˬ-ahˇ naˇ haˬ geuꞈ-eu jeˬ-aˬ, muiˬ dui dui-eu yawˇ lawˇ nehˬ-eu naˆ maˬ tseˇ muiˬ dzehˬ-eu meh.

²³Aˬ yawꞈ-ahˇ puiˬ-eu jeˬ-aˬ, jaˬ nehꞈ pyehˬ-eu naˆ ni doeˇ-awˇ, nui ma gʼahˇ-eu jeˬ-aˬ, miˬ yehˇ nui gʼaˬ-ahˇ uˬ duˬ tahˬ-eu naˆ ni iˬ baˇ huiˬ-eu meh. Sahˬpaˬ Miˬyehˇ-euˬ dawˬ-ahˇ nawˇ byehˇ dzeh-euˬ miˇ neh, nawˬ-ahˇ sahˬ paˬ lehˇ maˬ paˇ sawˇ nehˬ ni, aˬ yawꞈ gʼeh nawˬ-ahˇ byehˇ dzeh-euˬ meh.”

²⁴Sawˇluˆ ehˇ-eu, “Ngeuˇ ma. Ngaˇ iˬ baˇ mˇ gʼaˬ-euˬ ma. Sahˬpaˬ Miˬyehˇ-euˬ dawˬ hawˇ-eu nawˬ neh mehˬ nehˬ tsoˆ nehˬ laꞈ-euˬ jeˬ-ahˇ ngaˇ maˬ naˇ haˬ geuꞈ ni, mˇ lehˬ shaˇ lehˬ gʼaˬ-euˬ miˇ-a. Ngaˬ-euˬ tsawˇ haˬ deuˬ-ahˇ ngaˇ guˆ-eu miˇ neh, aˬ yawꞈ maꞈ kʼaˇ bi mˇ mawꞈ-eu loꞈ-ehˇ mˇ-euˬ ma.

²⁵Ehˇ kʼawꞈ, nymˬ-mˇ ngaˇ nawˬ-ahˇ heu loꞈ-ehˇ shaˇ-eu ma. Ngaˬ-ahˇ iˬ baˇ pyehˬ nehˬ laꞈ-awˇ, Sahˬpaˬ Miˬyehˇ-ahˇ ngaˇ uˬ duˬ ya tahˬ ni, Giˇlaˇgaˬlaˇ meuˬ-ahˇ ngaˬ nehˬ-ehˇ gʼoꞈ leˇ nehˬ laꞈ-awˬ.”

²⁶Saˬmeuˬlaˆ ehˇ-eu, “Nawˬ nehˬ-ehˇ ngaˇ maˬ gʼoꞈ leˇ. Sahˬpaˬ Miˬyehˇ-euˬ dawˬ-ahˇ nawˇ byehˇ dzeh-euˬ miˇ neh, nawˬ-ahˇ Iˇsaˬleˬlaˆ tsawˇ jeuˬ-euˬ sahˬ paˬ lehˇ aˬ yawꞈ maˬ paˇ sawˇ-ehˇ, aˬ yawꞈ nawˬ-ahˇ byehˇ dzeh gʼaˬ-euˬ meh.”

²⁷Kʼoeˇ naˇ, Saˬmeuˬlaˆ doˆ-iˇ-eu lehˇ gʼawˇ pyawˇ ngeh, aˬ yawꞈ-euˬ pehˇ kʼahˬ pehˇ mahˇ-ahˇ Sawˇluˆ gʼeu tehˬ-awˇ, pehˇ kʼahˬ pehˇ mahˇ kʼoeˇ kahˇ pyaˬ-iˇ-euˬ meh.

²⁸Kʼoeˇ ngeh, Sawˇluˆ-ahˇ Saˬmeuˬlaˆ heu loꞈ-ehˇ ehˇ nehˬ-euˬ meh. “Iˬ nah Iˇsaˬleˬlaˆ miˇ kʼahˬ-ahˇ, nawˬ-euˬ aˬ laꞈ laꞈ kʼoeˇ neh Sahˬpaˬ Miˬyehˇ gʼeu pyaˬ doˆ-awˇ, nawˇ naˆ maˬ tseˇ geuˇ-eu tsawˇ haˬ tiˬ gʼaˬ-ahˇ biꞈ nehˬ gʼaˬ-euˬ meh.

²⁹Iˇsaˬleˬlaˆ miˇ kʼahˬ-euˬ yawˬ shehꞈ kʼahˬ sehˇ pyeuꞈ-eu Sahˬpaˬ Miˬyehˇ-aˬ, jaˬ myawꞈ maˬ myawꞈ-a. Nui ma poˆ laˆ maˬ paˇ-a.”

³⁰Sawˇluˆ ehˇ-eu, “Ngaˇ mˇ lehˬ shaˇ lehˬ gʼaˬ-euˬ ma. Ehˇ kʼawꞈ, ngaˬ-euˬ tsawˇ haˬ deuˬ-euˬ aˬ yuiꞈ aˬ tsu deuˬ hawˇ-eu Iˇsaˬleˬlaˆ tsawˇ jeuˬ dawˬ tawˆ luꞈ-euˬ mehˬ shi, aˬ joˆ-ehˇ gʼeh-awˇ neh kʼawꞈ ngaˬ-ahˇ yaw zeu ui cuiˆ baw nehˬ laꞈ-awˬ. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngaˇ uˬ duˬ tahˬ nya ni, ngaˬ nehˬ-ehˇ tiˬ poˆ gʼoꞈ leˇ nehˬ laꞈ-awˬ.”

³¹Kʼoeˇ naˇ, Giˇlaˇgaˬlaˇ meuˬ-ahˇ Sawˇluˆ nehˬ-ehˇ Saˬmeuˬlaˆ gʼoꞈ leˇ-awˇ, Sahˬpaˬ Miˬyehˇ-ahˇ Sawˇluˆ uˬ duˬ tahˬ-euˬ meh.

³²“Sahˬ paˬ Aˬgaˆ-ahˇ heu gaˇ sheuˬ laꞈ sheˇ” lehˇ, Saˬmeuˬlaˆ dawˬ biꞈ-euˬ meh. Aˬgaˆ yaw dzuˬ dzuˬ dzuˬ-ehˇ aˬ yawꞈ jawˇ gaˇ laˇ-eu laꞈ kʼoeˇ, “Shiˇ-eu jeˬ-ahˇ tahˬ puˬ leˇ-eu heu aˇ naˆ ni shaˬ zahˬ naꞈ law hawˇ maˬ siˬ miˇ-a” lehˇ, aˬ yawˇ yawꞈ noeˬ kʼoeˬ luꞈ-eu meh.

³³Saˬmeuˬlaˆ ehˇ-eu, “Nawˬ-euˬ mi cehˇ neh aˬ ma gʼawˬ mya gʼaˬ-ahˇ zaˬ maˬ jawˇ ni bi pyeuꞈ-iˇ-euˬ loꞈ-ehˇ, nymꞈ-mˇ poˆ jawˇ-aˬ, nawˬ ma kʼawꞈ zaˬ maˬ paˇ jawˇ ni ya shaˬ tehꞈ-a.” Kʼoeˇ naˇ, Giˇlaˇgaˬlaˇ meuˬ-ahˇ jaˆ-eu lawˇ duˬ mehˬ shi, Aˬgaˆ-euˬ gʼawˇ mawˇ-ahˇ Saˬmeuˬlaˆ neh deuˆ tm deuˆ tmˇ jiˇ nehˬ-euˬ meh.

³⁴Kʼoeˇ naˇ, Saˬmeuˬlaˆ gʼaˬ Laˬ mahˇ meuˬ-ahˇ iˇ-awˇ, Sawˇluˆ gʼaˬ Giˇ byaˬ meuˬ-ahˇ gʼoꞈ leˇ-euˬ meh.

³⁵Saˬmeuˬlaˆ laˇ ziˇ jiˇ leˇ ngeh keuˆ ni, sahˬ paˬ-ahˇ tiˬ poˆ-iˬ maˬ paˇ ya mawˇ ni ziˇ dehꞈ jiˇ-euˬ meh. Ehˇ kʼawꞈ, sahˬ paˬ gʼaˇ duˬ aˬ yawꞈ nui ma maˬ saˇ ni toˇ toˇ-ehˇ jawˇ-euˬ meh. Kʼoeˇ ngeh, Sawˇluˆ-ahˇ Sahˬpaˬ Miˬyehˇ gʼawˬ shaˬ haw gaˬ-awˇ, Iˇsaˬleˬlaˆ tsawˇ jeuˬ-euˬ sahˬ paˬ paˇ bi geuꞈ-euˬ meh.