Read Akha 1 Saˬmeuˬlaˆ 16 Bible Online

1 Saˬmeuˬlaˆ 16 - Akha bible

1 Saˬmeuˬlaˆ 16

¹Saˬmeuˬlaˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Sawˇluˆ gʼaˇ duˬ nawˇ nui ma maˬ saˇ-ehˇ, aˬ myah keuˆ ni toˇ toˇ-ehˇ jawˇ-eu gʼeh te. Iˇsaˬleˬlaˆ miˇ kʼahˬ kʼoeˇ taˆ sahˬ paˬ maˬ paˇ bi geuꞈ-eu gʼaˇ duˬ, aˬ yawꞈ-ahˇ ngaˇ byehˇ dzeh gʼaˬ-euˬ ma. Ehˇ kʼawꞈ, nawˇ saˬ loˬ tsiˇ ui cuiˆ yuˇ-awˇ, Behˬlehˬhehˬ meuˬ-ahˇ Yeˬshehˇ lehˇ myahˇ-euˬ tsawˇ haˬ kʼoeˇ gʼaˬ jawˇ gaˇ nymˬ-mˇ iˇ-awˬ. Aˬ jeˬ miˇ neh ehˇ naˇ, sahˬ paˬ bi geuꞈ-eu gʼaˇ duˬ, aˬ yawꞈ-euˬ aˬ li tiˬ li-ahˇ ngaˇ tseˇ doˆ gʼaˬ-euˬ ma.”

²Saˬmeuˬlaˆ ehˇ-eu, “Ngaˇ teu loꞈ-ehˇ aˬ joˆ-ehˇ mˇ nya nmˇ. Gaˇ kawˆ kʼoeˇ Sawˇluˆ ya gaˬ naˇ, ngaˬ-ahˇ sehꞈ laˇ tehꞈ-a.” Sahˬpaˬ Miˬyehˇ ehˇ-eu, “Nawˇ mawˇ neˇ mawˇ kʼaˇ zaˬ tiˬ mawˇ tsahˇ gʼeh-awˇ, Sahˬpaˬ Miˬyehˇ-ahˇ lawˇ nehˬ-eu lehˇ oe-euˬ ma lehˇ ehˇ nehˬ-awˬ.

³Nawˇ lawˇ-eu shehˇ-eu jeˬ mˇ luꞈ-eu jawˇ duˬ-ahˇ Yeˬshehˇ-ahˇ kuˇ-awˬ. Nawˇ aˬ joˆ-ehˇ ya jahˇ-eu gaˇ kawˆ nawˬ-ahˇ ngaˇ ehˇ nehˬ ma. Ngaˬ neh nawˬ-ahˇ mehˬ nehˬ-euˬ gʼaˬ-ahˇ, sahˬ paˬ bi geuꞈ-eu gʼaˇ duˬ tsiˇ shehˆ daˆ nehˬ-awˬ.”

⁴Saˬmeuˬlaˆ-aˬ. Sahˬpaˬ Miˬyehˇ neh kʼaˇ ehˇ nehˬ-euˬ loꞈ-ehˇ jahˇ-awˇ, Behˬlehˬhehˬ meuˬ-ahˇ iˇ-euˬ meh. Kʼoeˇ gaˇ jawˇ-eu meuˬ-euˬ aˬ yuiꞈ aˬ tsu geuꞈ luꞈ-eu deuˬ aˬ yawꞈ jawˇ gaˇ laˇ-awˇ, yaw dzuˬ dzuˬ-eu laꞈ kʼoeˇ, “Shaˆ ma-oˇ, yaw lehˬ aˬ geu jeˬ paˇ doˆ laˇ-euˬ miˇ neh heu gaˇ oe teˬ” lehˇ naˇ haˬ-euˬ meh.

⁵Aˬ yawꞈ ehˇ-eu, “Yaw lehˬ doˆ laˇ-euˬ miˇ neh oe-euˬ maˬ ngeuˇ. Sahˬpaˬ Miˬyehˇ-ahˇ lawˇ nehˬ-eu lehˇ oe-euˬ tehꞈ ma. Naw maꞈ-euˬ gʼawˇ mawˇ shawˇ-awˇ ngaˬ nehˬ-ehˇ laˇ-awˬ.” Yeˬshehˇ hawˇ-eu aˬ yawꞈ-euˬ aˬ li deuˬ kʼawꞈ, gʼawˇ mawˇ shawˇ-awˇ lawˇ gaˇ shehˇ gaˇ laˇ-eu gʼaˇ duˬ aˬ yawꞈ kuˇ-euˬ meh.

⁶Aˬ yawꞈ maꞈ laˇ keuˆ ngeh, Yeˬshehˇ-euˬ aˬ li Eˇliˇbaˆ-ahˇ Saˬmeuˬlaˆ ya mawˇ-awˇ, “Heu gaˇ Sahˬpaˬ Miˬyehˇ-euˬ mehˬ shi yawꞈ luꞈ-eu heu gʼaˬ-aˬ, aˬ diˇ aˬ maˇ aˬ yawꞈ neh tseˇ doˆ-euˬ gʼaˬ ngeuˇ-eu jeˬ nga” lehˇ aˬ yawˇ yawꞈ shaˇ noeˬ-euˬ meh.

⁷Ehˇ kʼawꞈ, aˬ yawꞈ-ahˇ Sahˬpaˬ Miˬyehˇ ehˇ nehˬ-eu, “Aˬ yawꞈ aˇ gahˬ aˇ goˇ muiˬ-awˇ aˇ gʼehˇ muiˬ gaˇ taˬ haw. Aˬ yawꞈ-ahˇ ngaˇ tseˇ doˆ-euˬ maˬ ngeuˇ. Aˬ jeˬ miˇ neh ehˇ naˇ, tsawˇ haˬ zaˬ haw mawˇ-eu hawˇ-eu ngaˇ haw mawˇ-eu maˬ duˇ leˇ-a. Tsawˇ haˬ zaˬ-aˬ, laꞈ nyiˇ aˇ gʼehˇ-ahˇ tehꞈ-ehˇ haw-eu meh. Ehˇ kʼawꞈ, ngaˇ-aˬ nui ma-ahˇ haw-eu ma.”

⁸Kʼoeˇ naˇ, Yeˬshehˇ-aˬ, aˬ yawꞈ-euˬ aˬ li Aˬbiˇnaˬdehˇ-ahˇ kuˇ-awˇ, Saˬmeuˬlaˆ-euˬ mehˬ shi sheuˬ laꞈ-euˬ meh. “Heu gʼaˬ-ahˇ kʼawꞈ, Sahˬpaˬ Miˬyehˇ maˬ tseˇ doˆ-a” lehˇ Saˬmeuˬlaˆ ehˇ-eu meh.

⁹Shaˬmahˇ gʼaˬ-ahˇ Yeˬshehˇ paˇ sheuˬ laꞈ-euˬ meh. Ehˇ kʼawꞈ, “Heu gʼaˬ-ahˇ kʼawꞈ Sahˬpaˬ Miˬyehˇ maˬ tseˇ doˆ-a” lehˇ Saˬmeuˬlaˆ ehˇ-eu meh.

¹⁰Kʼoeˇ loꞈ-ehˇ, Yeˬshehˇ-aˬ, aˬ yawꞈ-euˬ aˬ li shiꞈ gʼaˬ-ahˇ Saˬmeuˬlaˆ-euˬ mehˬ shi sheuˬ laꞈ nehˬ-euˬ meh. Ehˇ kʼawꞈ, “Heu deuˬ laꞈ kʼoeˇ tiˬ gʼaˬ-ahˇ-iˬ Sahˬpaˬ Miˬyehˇ maˬ tseˇ doˆ-a” lehˇ, Yeˬshehˇ-ahˇ Saˬmeuˬlaˆ ehˇ nehˬ-euˬ meh.

¹¹Kʼoeˇ naˇ, “Nawˬ-euˬ aˬ li nui gʼaˬ jawˇ te siˬ loˇ” lehˇ, Yeˬshehˇ-ahˇ Saˬmeuˬlaˆ laˇ naˇ haˬ-euˬ meh. Yeˬshehˇ ehˇ-eu, “Aˬ li zaˬ saˬ gʼaˬ jawˇ te siˬ. Ehˇ kʼawꞈ, aˬ yawꞈ yawˇ bo-iˇ dzeuˇ-euˬ meh.” Saˬmeuˬlaˆ ehˇ-eu, “Aˬ yawꞈ-ahˇ bi kuˇ kʼoꞈ laˬ-iˇ-awˬ. Aˬ yawꞈ maˬ gʼoꞈ keuˆ laˇ kʼoeˇ keuˆ ni aˬ dui maꞈ maˬ lawˇ maˬ shehˇ-ehˇ jawˇ tawˬ ma.”

¹²Kʼoeˇ naˇ, Yeˬshehˇ tsawˇ haˬ pyehˬ gʼeh-awˇ, aˬ li kʼoeˇ li-ahˇ bi kuˇ kʼoꞈ laˬ-iˇ-euˬ meh. Aˬ yawꞈ-aˬ, aˬ lmˬ aˇ gʼehˇ muiˬ-eu tiˬ gʼaˬ pyeuꞈ-awˇ, myaˆ nuiˆ taˆ dui dui-eu meh. Kʼoeˇ ngeh, “Heu-aˬ ngaˬ neh tseˇ doˆ-euˬ gʼaˬ ma. Aˬ yawꞈ kʼoeˇ taˆ tsiˇ shehˆ daˆ nehˬ-awˬ” lehˇ, Saˬmeuˬlaˆ-ahˇ Sahˬpaˬ Miˬyehˇ ehˇ nehˬ-euˬ meh.

¹³Saˬmeuˬlaˆ saˬ loˬ tsiˇ yuˇ-awˇ, aˬ yawꞈ-euˬ aˇ doˆ deuˬ mehˬ shi Daˬbiˇ-ahˇ tsiˇ shehˆ daˆ nehˬ-euˬ meh. Sahˬpaˬ Miˬyehˇ-euˬ yaw sahˇ Daˬbiˇ-ahˇ ja pyuˬ ni uˆ lahˇ le-awˇ, kʼoeˇ ngeh nah neh naˇ, yaw sahˇ kʼoeˇ aˬ yawꞈ nehˬ-ehˇ jawˇ-euˬ meh. Kʼoeˇ naˇ, Laˬmahˇ meuˬ-ahˇ Saˬmeuˬlaˆ gʼoꞈ leˇ-euˬ meh.

¹⁴Sahˬpaˬ Miˬyehˇ-euˬ yaw sahˇ Sawˇ luˆ-ahˇ byehˇ dzeh yaꞈ-awˇ, Sahˬpaˬ Miˬyehˇ neh bi oe-euˬ haiˬ-eu yaw sahˇ aˬ yawꞈ-ahˇ laˆ suˬ saˬ-euˬ meh.

¹⁵Aˬ yawꞈ-euˬ zaˬ kʼaˆ deuˬ aˬ yawꞈ-ahˇ ehˇ-eu, “Sahˬpaˬ Miˬyehˇ neh bi oe-euˬ haiˬ-eu yaw sahˇ nawˬ-ahˇ laˆ suˬ saˬ luꞈ-eu nga maꞈ siˬ nya ma.

¹⁶Kʼoeˇ miˇ neh, deuˇ-mˬ diˬ nya-eu tsawˇ haˬ tiˬ gʼaˬ poˆ-iˇ-eu gʼaˇ duˬ nga maꞈ-ahˇ dawˬ biꞈ laꞈ-awˬ. Haiˬ-eu yaw sahˇ kʼoeˇ nawˬ-euˬ kʼoeˇ taˆ keuˆ le ngeh, tsawˇ haˬ kʼoeˇ gʼaˬ deuˇ-mˬ diˬ naˇ nawˇ nui ma paˇ saˇ laˇ tehꞈ-a.”

¹⁷Kʼoeˇ ngeh, “Deuˇ-mˬ yaw muiˬ paˬ-ehˇ diˬ nya-eu tsawˇ haˬ tiˬ gʼaˬ poˆ mawˇ-awˇ, ngaˇ jawˇ gaˇ sheuˬ laꞈ-awˬ” lehˇ Sawˇluˆ dawˬ biꞈ-euˬ meh.

¹⁸Aˬ yawꞈ-euˬ zaˬ kʼaˆ tiˬ gʼaˬ ehˇ-eu, “Behˬlehˬhehˬ meuˬ-ahˇ jawˇ-eu Yeˬshehˇ lehˇ myahˇ-euˬ tsawˇ haˬ kʼoeˇ gʼaˬ deuˇ-mˬ yaw muiˬ paˬ-ehˇ diˬ nya-eu aˬ li tiˬ li jawˇ meh. Aˬ li kʼoeˇ gʼaˬ nui ma kʼaˬ duˬ ni gʼeh-awˇ aˇ gʼehˇ muiˬ-eu uˬ taꞈ, muiˬ-eu yehˇ tiˬ gʼaˬ pyeuꞈ-awˇ, dawˬ ngehˬ-eu kʼawꞈ yaw nya meh. Aˬ yawꞈ nehˬ-ehˇ Sahˬpaˬ Miˬyehˇ jawˇ-eu meh.”

¹⁹Kʼoeˇ naˇ, Yeˬshehˇ jawˇ gaˇ Sawˇluˆ tsawˇ haˬ pyehˬ gʼeh-awˇ, “Yawˇ bo-eu gʼaˬ pyeuꞈ-eu nawˬ li Daˬbiˇ-ahˇ ngaˇ jawˇ gaˇ bi laˇ-awˬ” lehˇ bi tsaꞈ gaˬ-iˇ-euˬ meh.

²⁰Yeˬshehˇ gʼeh, ciꞈ myehꞈ ciꞈ zaˬ tiˬ mawˇ, kaˬ muˇ bi tawˬ-euˬ mahˬ tahˬ laˆ tiˬ mawˇ hawˇ-eu, aˬ gaꞈ dzaˇ uiˇ tiˬ byah ni dahˬ-eu shaˬ kʼoˆ iˇ puˬ tiˬ siˬ shaˇ dawˆ nehˬ-awˇ, Daˬbiˇ-ahˇ Sawˇluˆ jawˇ gaˇ bi le-euˬ meh.

²¹Sawˇluˆ jawˇ gaˇ Daˬbiˇ laˇ-awˇ, aˬ yawꞈ-euˬ gaˇ mˇ nehˬ-euˬ meh. Daˬbiˇ-ahˇ Sawˇluˆ nui kʼahˇ shiˇ dui dui-awˇ, aˬ yawꞈ-euˬ guiˇ deuˆ-eu keu ka baꞈ-eu gʼaˬ bi geuꞈ-euˬ meh.

²²“Daˬbiˇ-ahˇ ngaˇ nui kʼahˇ shiˇ dui dui nya. Teu miˇ neh ngaˬ-euˬ gaˇ mˇ-awˇ ngaˬ nehˬ-ehˇ bi jawˇ ma” lehˇ, Yeˬshehˇ-ahˇ bi tsaꞈ gaˬ-iˇ-euˬ meh.

²³Kʼoeˇ ngeh nah neh dahˬ beh-awˇ, Miˬyehˇ neh bi oe-euˬ haiˬ-eu yaw sahˇ kʼoeˇ Sawˇluˆ kʼoeˇ taˆ kʼaˇ keuˆ le ngeh, Daˬbiˇ deuˇ-mˬ diˬ nehˬ-euˬ meh. Kʼoeˇ loꞈ-ehˇ jahˇ ngeh, haiˬ-eu yaw sahˇ kʼoeˇ Sawˇluˆ jawˇ gaˇ neh doˆ-iˇ-awˇ nui ma paˇ bi saˇ laˇ-eu meh.