Read Akha 1 Saˬmeuˬlaˆ 17 Bible Online

1 Saˬmeuˬlaˆ 17 - Akha bible

1 Saˬmeuˬlaˆ 17

¹Piˇliˇtiˆ tsawˇ haˬ deuˬ guiˇ deuˆ-eu gʼaˇ duˬ lehˬ hmˬ-awˇ, Yuˇdaˆ miˇ kʼahˬ Sawˇkoˬ meuˬ-ahˇ uiˬ leˇ taˬ-euˬ meh. Sawˇkoˬ meu hawˇ-eu Aˬzeˬkaˬ meuˬ yaw kaˬ-ahˇ jaˆ-eu Eˇpeˇdaˬmeˬ lehˇ kuˇ-eu jawˇ duˬ-ahˇ, aˬ yawꞈ maꞈ taˆ tsoˆ-awˇ naˬ luꞈ-eu meh.

²Sawˇluˆ hawˇ-eu Iˇsaˬleˬlaˆ tsawˇ haˬ deuˬ kʼawꞈ tiˬ gaˇ uiˬ leˇ-awˇ, Eˇlahˬ deh kʼawꞈ-ahˇ taˆ tsoˆ-awˇ jawˇ-eu laꞈ kʼoeˇ, Piˇliˇtiˆ tsawˇhaˬ deuˬ-ahˇ guiˇ deuˆ-eu gʼaˇ duˬ lehˬ hmˬ dah taˬ-euˬ meh.

³Piˇliˇtiˆ tsawˇ haˬ deuˬ gawˬ duˇ tiˬ duˇ kʼoeˇ taˆ yawꞈ cehˆ taˬ-awˇ, Iˇsaˬleˬlaˆ tsawˇ haˬ deuˬ kʼawꞈ, gʼaˬ lawˬ tiˬ lawˬ kaˬ-ehˇ, gawˬ duˇ yawˬ duˇ yawˬ kʼoeˇ taˆ kʼoeˇ baˬ heu baˬ-ehˇ yawꞈ luꞈ-eu meh.

⁴Gaˬdaˇ meuˬ-ahˇ neh oe-euˬ Gawˇliˇyaˆ lehˇ myahˇ-euˬ Piˇliˇtiˆ tsawˇ haˬ tiˬ gʼaˬ, aˬ yawꞈ maꞈ-euˬ taˆ laꞈ kʼoeˇ neh doˆ le-euˬ meh. Aˬ yawꞈ-aˬ, koꞈ caˆ uˬ taꞈ tiˬ toˇ ehˇ gʼaˬ ni goˇ-eu tsawˇ haˬ tiˬ gʼaˬ pyeuꞈ-eu meh.

⁵Smˬ tseˇ ngaˬ jawꞈ-i byah-eu guiˇ deuˆ-eu guiˬ shuiˇ mehˬ tsoeˬ dm luꞈ-awˇ, guiˬ shuiˇ uˬ kʼoˆ kʼoˆ taˬ-euˬ meh.

⁶Aˬ yawꞈ-euˬ aˬ kuiˇ-ahˇ guiˬ shuiˇ kuiˇ bahˬ bahˬ taˬ-awˇ, baꞈ pu kʼoeˇ taˆ guiˬ shuiˇ gahˬ baꞈ luꞈ-eu meh.

⁷Aˬ yawꞈ-euˬ gahˬ yoeˬ-aˬ, saˬ nmˇ bahˬ yoˆ hui ni ahˇ-awˇ, shmˇ tehˆ tsoꞈ taˬ-euˬ gahˬ gahˬ paꞈ tehꞈ-ehˇ kʼawꞈ, oeˬ jawꞈ-i ngaˬ kaˇ ehˇ gʼaˬ ni byah-eu meh. Aˬ yawꞈ-euˬ dehˬ daˬ duˬ baꞈ luꞈ-eu yehˇ tiˬ gʼaˬ aˬ yawꞈ-euˬ mehˬ nah cah-eu meh.

⁸Gawˇliˇyaˆ gawˬ yawꞈ yawꞈ-awˇ, Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ guˇ-eu meh. “Naw maꞈ teu gaˇ aˬ jeˬ gʼeh le teˬ. Guiˇ deuˆ-eu lehˇ yawꞈ luꞈ-eu maˬ ngeuˇ loˇ. Sawˇluˆ-euˬ zaˬ kʼaˆ deuˬ-oˇ, ngaˇ Piˇliˇtiˆ tsawˇ haˬ ma. Ngaˬ nehˬ-ehˇ deuˆ ceh ceh-eu gʼaˇ duˬ naw maꞈ tsawˇ haˬ tiˬ gʼaˬ tseˇ doˆ-awˬ.

⁹Aˬ yawꞈ ngaˬ-ahˇ deuˆ gʼaˬ-awˇ sehꞈ nya naˇ, nga maꞈ naw maꞈ-euˬ zaˬ kʼaˆ geuꞈ ma. Ehˇ kʼawꞈ, aˬ yawꞈ-ahˇ ngaˇ deuˆ gʼaˬ-awˇ ngaˬ neh bi sehꞈ naˇ, naw maꞈ nga maꞈ-euˬ zaˬ kʼaˆ ya geuꞈ meh.

¹⁰Ngaˬ nehˬ-ehˇ deuˆ ceh ceh peuˬ-eu tsawˇ haˬ tiˬ gʼaˬ, iˬ nah tseˇ doˆ-awˬ lehˇ, Iˇsaˬleˬlaˆ tsawˇ haˬ deuˬ-ahˇ ngaˇ kuˇ-eu ma.”

¹¹Piˇliˇtiˆ tsawˇ haˬ kʼoeˇ gʼaˬ-euˬ dawˬ-ahˇ ya gaˬ ngeh, Sawˇluˆ hawˇ-eu aˬ yawꞈ-euˬ tsawˇ haˬ deuˬ guˆ dui dui-euˬ meh.

¹²Daˬbiˇ-aˬ, Yuˇdaˆ miˇ kʼahˬ Behˬlehˬ hehˬ meuˬ-ahˇ jawˇ-eu Eˇpaˬleˬ tsawˇ jeuˬ Yeˬshehˇ-euˬ aˬ li pyeuꞈ-eu meh. Yeˬshehˇ-aˬ, aˬ li yehꞈ li jawˇ-eu meh. Sawˇluˆ sahˬ paˬ geuꞈ luꞈ ngeh, aˬ yawꞈ tsawˇ mawˬ mawˬ dui dui laˇ-euˬ meh.

¹³Aˬ yawꞈ-euˬ aˬ li aˬ yuiꞈ smˇ gʼaˬ Sawˇluˆ nehˬ-ehˇ guiˇ deuˆ leˇ-euˬ meh. Aˬ li aˬ yuiꞈ yuiꞈ saˬ gʼaˬ pyeuꞈ-eu Eˇliˇbaˆ, aˬ gʼahˇ gʼaˬ pyeuꞈ-eu Aˬbiˇnaˬdehˇ hawˇ-eu, aˬ nyiˇ gʼaˬ pyeuꞈ-eu Shaˬmahˇ aˬ ha smˬ mehˇ nmˇ guiˇ deuˆ leˇ-euˬ meh.

¹⁴Daˬbiˇ-aˬ, aˬ li zaˬ saˬ gʼaˬ pyeuꞈ-eu meh. Aˬ yawꞈ-euˬ aˇ doˆ kʼoeˇ smˇ gʼaˬ Sawˇluˆ nehˬ-ehˇ jawˇ laˇ ngeh,

¹⁵Daˬbiˇ gʼaˬ maˬ myahˇ kaˬ-ahˇ Behˬlehˬhehˬ meuˬ-ahˇ gʼoꞈ-iˇ-awˇ, aˬ yawꞈ aˬ da-euˬ yawˇ deuˬ-ahˇ ya haw-iˇ-eu meh.

¹⁶Gawˇliˇyaˆ-aˬ, Iˇsaˬleˬlaˆ tsawˇ haˬ deuˬ aˬ yawꞈ-ahˇ guiˇ deuˆ laˇ-awˬ lehˇ, oeˬ tseˇ nah byah ni yawˬ shawˬ yawˬ miˇ na luꞈ guˇ luꞈ-eu meh.

¹⁷Tiˬ nah keuˆ laˇ ngeh, Daˬbiˇ-ahˇ Yeˬshehˇ heu loꞈ-ehˇ ehˇ nehˬ-euˬ meh. “Aˇ saˇ aˇ poˬ heu tseˇ pehˬ hawˇ-eu kaˬ muˇ heu tseˇ siˬ yuˇ-awˇ, taˆ-ahˇ jawˇ luꞈ-eu nawˬ-euˬ aˇ doˆ deuˬ jawˇ gaˇ yaw kawˇ-ehˇ le-awˬ.

¹⁸Guiˇ maꞈ-ahˇ uˆ lahˇ-eu gʼaˬ jawˇ gaˇ kʼawꞈ, mawˇ neˇ aˬ coeˇ neh jahˇ taˬ-euˬ kaˬ muˇ tseˇ siˬ yuˇ gʼeh nehˬ-awˬ. Nawˬ-euˬ aˇ doˆ deuˬ aˬ joˆ-ehˇ jawˇ luꞈ nga lehˇ haw-awˇ, aˬ yawꞈ maꞈ-ahˇ nawˇ haw mawˇ yaꞈ-euˬ yaw duˬ baw ni, tiˬ jeˬ paˬ yuˇ kʼoꞈ leꞈ-awˬ.

¹⁹Sahˬ paˬ Sawˇluˆ hawˇ-eu nawˬ-euˬ aˇ doˆ deuˬ ahˇ leˇ-ehˇ, Iˇsaˬleˬlaˆ tsawˇ haˬ dawˬ tawˆ luꞈ, Eˇlahˬ deh kʼawꞈ-ahˇ Piˇliˇtiˆ tsawˇ haˬ deuˬ nehˬ-ehˇ guiˇ deuˆ luꞈ meh.”

²⁰Yawˬ nah yawˬ uˬ shawˬ yaw naꞈ-ehˇ Daˬbiˇ tuˇ-awˇ, yawˇ kʼoeˇ deuˬ-ahˇ yawˬ gʼaˬ yawˬ bi haw tawˬ yaꞈ-awˇ, Yeˬshehˇ neh aˬ yawꞈ-ahˇ ehˇ nehˬ-euˬ loꞈ-ehˇ, dzaˬ dzaˬ dawˇ dawˇ kʼoeˇ deuˬ yuˇ-awˇ le-euˬ meh. Aˬ yawꞈ taˆ-ahˇ le keuˆ-eu nehˬ-ehˇ, Iˇsaˬleˬlaˆ tsawˇ haˬ deuˬ guˇ guˇ-ehˇ guiˇ deuˆ duˬ-ahˇ le luꞈ gaˇ ya mawˇ-euˬ meh.

²¹Piˇliˇtiˆ guiˇ maꞈ hawˇ-eu Iˇsaˬleˬlaˆ guiˇ maꞈ deuˬ guiˇ deuˆ-eu gʼaˇ duˬ lehˬ hmˬ deuˇ taˬ-awˇ, kʼoeˇ baˬ heu baˬ-ehˇ yawꞈ cehˆ taˬ-euˬ meh.

²²Daˬbiˇ-aˬ, aˬ yawꞈ neh yuˇ laꞈ-euˬ dzaˬ dzaˬ dawˇ dawˇ kʼoeˇ deuˬ-ahˇ, dzaˬ-eu dawˇ-eu paw haw-eu aˬ yuiꞈ geuꞈ-eu gʼaˬ jawˇ gaˇ bi jaˆ yaꞈ-awˇ, guiˇ deuˆ duˬ-ahˇ cehˆ gʼeh-awˇ, aˬ yawꞈ-euˬ aˇ doˆ deuˬ aˬ joˆ-ehˇ jawˇ luꞈ-eu gaˇ kawˆ naˇ haˬ leˇ-euˬ meh.

²³Aˬ yawꞈ-euˬ aˇ doˆ deuˬ-ahˇ aˬ yawꞈ dawˬ ngehˬ cawˬ luꞈ ngeh, Gawˇliˆyaˆ mehˬ hu paw doˆ le-awˇ, aˬ myah myah kʼaˇ guˇ-eu loꞈ-ehˇ, aˬ yawꞈ-ahˇ guiˇ deuˆ laˇ-awˬ lehˇ Iˇsaˬleˬlaˆ tsawˇ haˬ deuˬ-ahˇ guˇ luꞈ gaˇ Daˬbiˇ yaˬ gaˬ-euˬ meh.

²⁴Iˇsaˬleˬlaˆ tsawˇ haˬ deuˬ Gawˇliˇyaˆ-ahˇ mawˇ ngeh, guˆ-awˇ cehˆ-euˬ meh.

²⁵Aˬ yawꞈ maꞈ tiˬ gʼaˬ tiˇ gʼaˬ ehˇ-eu, “Aˬ yawꞈ-ahˇ haw sheˇ. Aˬ yawꞈ guˇ gaˇ naˇ haˬ sheˇ. Sahˬ paˬ Sawˇluˆ heu loꞈ-ehˇ saˇ jaˇ dzaˬ taˬ-euˬ maˬ ngeuˇ-a loˇ. Tsawˇ haˬ teu gʼaˬ-ahˇ kʼaˇ deuˆ sehꞈ nya-eu gʼaˬ-ahˇ huiˬ dui dui-eu laꞈ sawˬ biꞈ-awˇ, aˬ yawꞈ-euˬ aˬ buˇ-ahˇ bi sheuˬ-eu uˬ taꞈ, aˬ yawꞈ-euˬ aˬ da-euˬ nymˇ jiˇ kʼawꞈ doˆ-eu ka-eu jeˬ ma bi baꞈ ni bi dzeuˇ-iˇ ma lehˇ saˇ jaˇ dzaˬ taˬ-euˬ maˬ ngeuˇ-a loˇ.”

²⁶Aˬ yawꞈ dawˬ peh jawˇ-eu deuˬ-ahˇ Daˬbiˇ naˇ haˬ-eu, “Tsawˇ haˬ heu gʼaˬ-ahˇ sehꞈ-awˇ, Iˇsaˬleˬlaˆ miˇ kʼahˬ-ahˇ noeˬ shaˬ noeˬ zahˬ-eu jeˬ laꞈ kʼoeˇ neh ka kʼoꞈ nehˬ nya-eu gʼaˬ aˬ jeˬ laꞈ sawˬ za meh ehˇ ta lehˇ. Dehꞈ luꞈ-eu Miˬyehˇ-euˬ guiˇ maꞈ-ahˇ guˇ guˇ-ehˇ lmˬ paˬ-ehˇ, Miˬyehˇ-ahˇ maˬ siˬ nya-eu teu loꞈ-ehˇ gʼeh-eu lawˇ ciꞈ ciꞈ kʼaˆ pyeuꞈ-eu Piˇliˇtiˆ tsawˇ haˬ teu gʼaˬ aˬ pa jeˬ-a.”

²⁷Kʼoeˇ ngeh, Gawˇliˇyaˆ-ahˇ sehꞈ-eu tsawˇ haˬ-ahˇ aˬ joˆ-ehˇ gʼeh-eu laꞈ sawˬ biꞈ ma lehˇ ehˇ taˬ-euˬ gaˇ kawˆ, aˬ yawꞈ maꞈ aˬ yawꞈ-ahˇ dzawˇ nehˬ-euˬ meh.

²⁸Tsawˇ haˬ kʼoeˇ deuˬ nehˬ-ehˇ Daˬbiˇ kʼoeˇ loꞈ-ehˇ ngehˬ cawˬ luꞈ gaˇ, Daˬbiˇ-euˬ aˇ doˆ aˬ yuiꞈ yuiꞈ saˬ gʼaˬ pyeuꞈ-eu Eˇliˇbaˆ gʼaˬ ya gaˬ ngeh, Daˬbiˇ-ahˇ nui ma pehˇ laˇ-awˇ, heu loꞈ-ehˇ dehˬ-euˬ meh. “Nawˇ heu gaˇ aˬ jeˬ gʼeh laˇ teˬ. Bawˇ tsahˬ bawˇ dahˇ-ahˇ bi jawˇ-euˬ yawˇ kʼoeˇ deuˬ-ahˇ aˬ suˇ gʼaˬ bi haw yaꞈ teˬ. Zaˬ zaˬ uˬ zaˬ dawˆ nawˇ. Aˬ cawˬ guiˇ deuˆ gaˇ haw laˇ-eu lehˇ laˇ-euˬ maˬ ngeuˇ loˇ teu.”

²⁹Daˬbiˇ ehˇ-eu, “Aˬ jeˬ guˬ nya lehˇ ngaˬ-ahˇ dehˬ te. Dawˬ tiˬ dawˬ-iˬ maˬ naˇ haˬ kʼmˬ ta loˇ.” Kʼoeˇ naˇ, yawˬ gʼaˬ yawˬ jawˇ gaˇ paˇ iˇ-awˇ, dawˬ kʼoeˇ dawˬ paˇ naˇ haˬ poˆ-iˇ-euˬ meh.

³⁰Aˬ yawꞈ kʼaˇ naˇ haˬ doe-euˬ tsawˇ haˬ dawˬ tawˆ luꞈ, aˬ yawꞈ tiˬ dawˬ tehꞈ-ehˇ ehˇ kʼoꞈ nehˬ-euˬ meh.

³¹Daˬbiˇ kʼoeˇ loꞈ-ehˇ ehˇ luꞈ gaˇ tsawˇ haˬ tiˬ paˆ na deuˬ ya gaˬ-awˇ Sawˇluˆ-ahˇ ehˇ nehˬ leˇ ngeh, Sawˇluˆ neh Daˬbiˇ-ahˇ bi kuˇ laˬ-iˇ-euˬ meh.

³²Sawˇluˆ-ahˇ Daˬbiˇ ehˇ nehˬ-eu, “Sahˬ paˬ-oˇ, Piˇliˇtiˆ tsawˇ haˬ kʼoeˇ gʼaˬ-ahˇ tiˬ gʼaˬ-iˬ guˆ-eu maˬ loˬ-aˇ. Aˬ yawꞈ-ahˇ ngaˇ deuˆ ceh ceh leˇ ma.”

³³Sawˇluˆ ehˇ-eu, “Nawˇ aˬ joˆ-ehˇ jahˇ-awˇ aˬ yawꞈ-ahˇ deuˆ ceh ceh nya nmˇ. Nawˇ-aˬ, aˬ li zaˬ guˬ tehꞈ nga siˬ. Aˬ yawꞈ-aˬ, guiˇ deuˆ myahˇ laꞈ-euˬ yehˇ tiˬ gʼaˬ meh.”

³⁴Daˬbiˇ ehˇ-eu, “Sahˬ paˬ-oˇ, ngaˇ-aˬ ngaˬ da-euˬ yawˇ deuˬ-ahˇ bo saˆ haw piˇ-eu gʼaˬ ma. Aˇ laˬ jaˬ shiˇ hawˇ-eu kʼaˬ hmˇ deuˬ yawˇ zaˬ baꞈ dzaˬ laˇ ngeh,

³⁵ngaˇ caw teh gʼeh-awˇ ceh-iˇ-eu laꞈ kʼoeˇ, yawˇ zaˬ-ahˇ ka kʼoꞈ-euˬ ma. Aˇ laˬ jaˬ shiˇ hawˇ-eu kʼaˬ hmˇ deuˬ ngaˬ-ahˇ ceh laˇ naˇ, kuˬ byahˬ-ahˇ tsuˆ tehˬ-awˇ diˬ sehꞈ-euˬ ma.

³⁶Aˇ laˬ jaˬ shiˇ hawˇ-eu kʼaˬ hmˇ deuˬ-ahˇ ngaˇ sehꞈ-euˬ loꞈ-ehˇ, dehꞈ luꞈ-eu Miˬyehˇ-euˬ guiˇ maꞈ-ahˇ guˇ guˇ-ehˇ lmˬ luꞈ-eu, Miˬyehˇ-ahˇ maˬ siˬ nya-eu lawˇ ciꞈ zaˬ pyeuꞈ-eu Piˇliˇtiˆ tsawˇ haˬ kʼoeˇ gʼaˬ-ahˇ kʼawꞈ, kʼoeˇ loꞈ-ehˇ jahˇ nehˬ ma.

³⁷Aˇ laˬ jaˬ shiˇ hawˇ-eu kʼaˬ hmˇ deuˬ-euˬ aˬ laꞈ laꞈ kʼoeˇ, Sahˬpaˬ Miˬyehˇ ngaˬ-ahˇ ka kʼoꞈ-euˬ meh. Kʼoeˇ gaˇ duˇ ni, Piˇliˇtiˆ tsawˇ haˬ kʼoeˇ gʼaˬ-euˬ aˬ laꞈ laꞈ kʼoeˇ kʼawꞈ, aˬ yawꞈ ngaˬ-ahˇ ka kʼoꞈ nehˬ laꞈ tehꞈ-a.” Sawˇluˆ gʼeh, “Toˆ-ehˇ ngeuˇ naˇ, iˇ-awˬ. Sahˬpaˬ Miˬyehˇ nawˬ nehˬ-ehˇ jawˇ luꞈ-uˇ” lehˇ ehˇ nehˬ-euˬ meh.

³⁸Sawˇluˆ-aˬ, aˬ yawꞈ-euˬ guiˇ deuˆ-eu keu ka Daˬbiˇ-ahˇ biꞈ-awˇ bi dm-euˬ meh. Daˬbiˇ-euˬ uˬ duˬ-ahˇ guiˬ shuiˇ uˬ kʼoˆ bi kʼoˆ-awˇ, shmˇ pehˇ kʼahˬ bi dm-euˬ meh.

³⁹Shmˇ pehˇ kʼahˬ kʼoeˇ taˆ Sawˇluˆ-euˬ mi cehˇ dawꞈ-awˇ, Daˬbiˇ gaˇ ma cah haw-euˬ meh. Ehˇ kʼawˬ, keu ka kʼoeˇ deuˬ-ahˇ aˬ yawꞈ tiˬ jawˇ-iˬ maˬ zmˬ haw-euˬ miˇ neh, gaˇ ma maˬ cah gahˇ nya-a. “Keu ka heu deuˬ-ahˇ ngaˇ tiˬ jawˇ-iˬ maˬ zmˬ haw-euˬ miˇ neh, keu ka heu deuˬ neh guiˇ maˬ deuˆ nya luꞈ nya” lehˇ, Sawˇluˆ-ahˇ aˬ yawꞈ ehˇ nehˬ-euˬ meh. Kʼoeˇ miˇ neh, keu ka kʼoeˇ deuˬ aˬ yawꞈ lehˆ dzeh jiˇ-euˬ meh.

⁴⁰Kʼoeˇ naˇ, aˬ yawꞈ-euˬ yawˇ bo-eu gawˬ yoeˬ yuˇ-awˇ, lawˇ gawˆ-ahˇ ga-eu kʼaˬ lo lo juˇ ngaˬ siˬ gʼoˆ-awˇ, pehˇ tahˇ-ahˇ dawˆ ahˇ-euˬ meh. Aˬ yawꞈ-euˬ caˬ oeˬ lehˬ hmˬ-awˇ, Gawˇliˇyaˆ jawˇ gaˇ le-euˬ meh.

⁴¹Piˇliˇtiˆ tsawˇ haˬ kʼoeˇ gʼaˬ-aˬ, aˬ yawꞈ-euˬ dehˬ daˬ duˬ baꞈ luꞈ-eu gʼaˬ-ahˇ mehˬ hu paw bi cah-awˇ, Daˬbiˇ-euˬ dawˬ peh oe peh luꞈ-eu meh.

⁴²Daˬbiˇ-ahˇ aˬ yawꞈ mawˇ duˬ ngeh, noeˬ teˬ dui dui-awˇ, nui ma pehˇ laˇ-euˬ meh. Aˬ jeˬ miˇ neh ehˇ naˇ, Daˬbiˇ-aˬ, nahˬ jawˆ ni gʼeh-awˇ, aˇ gʼehˇ muiˬ dui dui-eu aˬ li zaˬ guˬ tiˬ gʼaˬ pyeuꞈ luꞈ gaˇ aˬ yawꞈ ya mawˇ-euˬ meh.

⁴³Daˬbiˇ-ahˇ aˬ yawꞈ ehˇ nehˬ-eu, “Daˇ cuiˇ teu hmˬ aˬ jeˬ jahˇ-eu lehˇ yuˇ luꞈ te. Nawˇ ngaˬ-ahˇ aˬ kuiˬ tiˬ mawˇ loˆ ni tehꞈ-ehˇ sawˇ-eu ngaˇ laˬ” Kʼoeˇ naˇ, aˬ yawꞈ-euˬ miˬ yehˇ-euˬ tsawˇ myahˇ-ahˇ gʼoe-awˇ, Daˬbiˇ-ahˇ yaˬ kʼehˇ yaˬ nehˬ-euˬ meh.

⁴⁴“Laˇ-awˬ, kʼoeˇ taˆ paw zaw-eu aˇ jiˇ deuˬ hawˇ-eu bawˇ tsahˬ jeˬ zaˬ deuˬ-ahˇ, nawˬ-eu shaˬ jiˇ bi dzaˬ ma” lehˇ, Daˬbiˇ-ahˇ aˬ yawꞈ ehˇ nehˬ-euˬ meh.

⁴⁵Daˬbiˇ ehˇ-eu, “Gahˬ gahˬ zaˬ gahˬ ma kuꞈ ni baꞈ-awˇ, mi cehˇ shaꞈ-eu laꞈ kʼoeˇ, ngaˬ-ahˇ deuˆ laˇ-eu lehˇ nawˇ laˇ-eu nga laˬ. Ehˇ kʼawꞈ, ngaˇ-aˬ, nawˇ lmˬ luꞈ-eu Iˇsaˬleˬlaˆ guiˇ maꞈ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-euˬ tsawˇ myahˇ uˬ moˆ, nawˬ-ahˇ guiˇ deuˆ le-euˬ ma.

⁴⁶Iˬ nah Sahˬpaˬ Miˬyehˇ-aˬ, nawˬ-euˬ gʼawˇ mawˇ-ahˇ ngaˬ-euˬ aˬ laꞈ laꞈ kʼoeˇ a nehˬ laꞈ tehꞈ-a. Nawˬ-ahˇ ngaˇ deuˆ gʼaˬ-awˇ, nawˬ-euˬ uˬ duˬ ngaˇ toˆ tsehˆ ma. Kʼoeˇ naˇ, shiˇ taˬ-awˇ ga-eu Piˇliˇtiˆ yehˇ deuˬ, aˇ jiˇ hawˇ-eu bawˇ tsahˬ jeˬ zaˬ deuˬ-ahˇ ngaˇ bi dzaˬ ma. Kʼoeˇ ngeh, Iˇsaˬleˬlaˆ tsawˇ jeuˬ nehˬ-ehˇ Miˬyehˇ jawˇ-eu gaˇ kawˆ, miˇ kʼahˬ dawˬ tawˆ luꞈ ya siˬ tehꞈ-a.

⁴⁷Kʼoeˇ uˬ taꞈ, Sahˬpaˬ Miˬyehˇ aˬ yawꞈ-euˬ tsawˇ haˬ-ahˇ ka kʼoꞈ-eu gʼaˇ duˬ, gahˬ hawˇ-eu mi cehˇ maˬ gʼoe-eu gaˇ kawˆ, heu gaˇ jawˇ-eu tsawˇ haˬ dawˬ tawˆ luꞈ ya siˬ ya mawˇ duˬ tehꞈ-a. Aˬ yawꞈ-aˬ, gʼaˬ leˇ-eu gʼaˬ pyeuꞈ-awˇ, naw maꞈ dawˬ tawˆ luꞈ-ahˇ nga maꞈ-euˬ aˬ laꞈ laꞈ kʼoeˇ a nehˬ laꞈ tehꞈ-a”

⁴⁸Daˬbiˇ jawˇ gaˇ Gawˇliˇyaˆ jiˆ peh le luꞈ ngeh, Piˇliˇtiˆ tsawˇ haˬ deuˬ guiˇ daˬ daˬ taˬ-eu paw neh laˇ luꞈ-eu Gawˇliˇyaˆ jawˇ gaˇ Daˬbiˇ coeˬ gʼeh-euˬ meh.

⁴⁹Aˬ yawꞈ-euˬ pehˇ tahˇ-ahˇ ahˇ-eu kʼaˬ lo tiˬ siˬ beuˬ doˆ-awˇ, Gawˇliˇyaˆ-ahˇ beuˆ-euˬ meh. Kʼaˬ lo kʼoeˇ Gawˇliˇyaˆ-euˬ naˇ kʼawˇ nyiˬ paˆ-ehˇ zaw leˇ-awˇ, uˬ duˬ kʼmˬ beuˆ pehꞈ-euˬ miˇ neh, Gawˇliˇyaˆ gʼaˬ, miˇ tsa moꞈ jaˆ-ehˇ ga-iˇ-euˬ meh.

⁵⁰Kʼoeˇ loꞈ-ehˇ, mi cehˇ maˬ zmˬ ni, caˬ oeˬ hawˇ-eu kʼaˬ lo lo zaˬ neh tehꞈ-ehˇ, Gawˇliˇyaˆ-ahˇ Daˬbiˇ sehꞈ-euˬ meh.

⁵¹Kʼoeˇ naˇ, Gawˇliˇyaˆ ga gaˇ Daˬbiˇ cehˆ gʼeh-awˇ, aˬ yawꞈ kʼoeˇ taˆ nawˬ tehˬ-awˇ, aˬ yawꞈ-euˬ mi cehˇ tawˆ kʼawˆ-ahˇ ahˇ-eu mi cehˇ gʼawˇ doˆ-euˬ meh. Mi cehˇ kʼoeˇ neh aˬ yawꞈ-euˬ uˬ duˬ deuˆ tsehˆ-awˇ sehꞈ-euˬ meh. Aˬ yawꞈ maꞈ nui kʼaˬ tsmˬ-euˬ gʼaˬ shiˇ-euˬ gaˇ Piˇliˇtiˆ tsawˇ haˬ deuˬ ya mawˇ ngeh, cehˆ byaˆ jiˇ-euˬ meh.

⁵²Iˇsaˬleˬlaˆ tsawˇ haˬ deuˬ hawˇ-eu Yuˇdaˆ tsawˇ haˬ deuˬ guˇ guˇ-ehˇ aˬ yawꞈ maꞈ mehˬ nah teh-awˇ, Gaˬdaˇ meuˬ-ahˇ iˇ-eu gaˇ ma hawˇ-eu Eˇkaˬloˬ meuˬ-euˬ lahˇ kʼehˬ-ahˇ keuˆ ni teh keuˆ-euˬ meh. Shaˬleˬ meuˬ-ahˇ iˇ-eu gaˇ ma tiˬ kahˇ law caw-ehˇ, Gaˬdaˇ meuˬ hawˇ-eu Eˇkaˬloˬ meuˬ-ahˇ keuˆ ni, deuˆ naˇ taˬ-euˬ Piˇliˇtiˆ tsawˇ haˬ deuˬ ga-eu meh.

⁵³Iˇsaˬleˬlaˆ tsawˇ haˬ deuˬ Piˇliˇtiˆ tsawˇ haˬ deuˬ-euˬ taˆ-ahˇ jaˆ yaꞈ-euˬ myawˬ deuˬ yuˇ geuꞈ-euˬ meh.

⁵⁴Daˬbiˇ-aˬ, Gawˇliˇyaˆ-euˬ uˬ duˬ yuˇ-awˇ, Yeˬluˇsaˬlehˬ meuˬ-ahˇ hehˇ kʼoꞈ gʼeh-euˬ meh. Ehˇ kʼawꞈ, Gawˇliˇyaˆ-euˬ guiˇ deuˆ-eu keu ka deuˬ-ahˇ, aˬ yawꞈ-euˬ sehˬ gʼawˆ-ahˇ bi jaˆ yaꞈ-euˬ meh.

⁵⁵Gawˇliˇyaˆ-ahˇ deuˆ ceh ceh-eu lehˇ Daˬbiˇ le luꞈ gaˇ Sawˇluˆ ya mawˇ ngeh, aˬ yawꞈ-euˬ guiˇ maꞈ kʼoeˇ taˆ aˬ yuiꞈ geuꞈ luꞈ-eu Aˬbaˬnaˬ-ahˇ, “Aˬbaˬnaˬ-oˇ, aˬ li teu gʼaˬ aˬ suˇ gʼaˬ-euˬ zaˬ-a” lehˇ naˇ haˬ-euˬ meh. Aˬbaˬnaˬ gʼeh, “Sahˬ paˬ-oˇ, ngaˇ maˬ siˬ nya nya” lehˇ paˇ ehˇ kʼoꞈ nehˬ-euˬ meh.

⁵⁶“Toˆ-ehˇ ngeuˇ naˇ, aˬ suˇ gʼaˬ-euˬ aˬ li nga lehˇ pyehˆ tseˇ duˬ haw-iˇ-awˬ” lehˇ, Sawˇluˆ dawˬ biꞈ nehˬ-euˬ meh.

⁵⁷Gawˇliˇyaˆ-ahˇ Daˬbiˇ sehꞈ-awˇ taˆ-ahˇ gʼoꞈ le ngeh, Aˬbaˬnaˬ neh Daˬbiˇ-ahˇ Sawˇluˆ jawˇ gaˇ sheuˬ gʼeh-euˬ meh. Kʼoeˇ ngeh keuˆ ni, Gawˇliˇyaˆ-euˬ uˬ duˬ Daˬbiˇ baꞈ luꞈ-eu meh.

⁵⁸“Aˬ li zaˬ guˬ-oˇ, nawˇ aˬ suˇ gʼaˬ-euˬ aˬ li te” lehˇ Sawˇluˆ naˇ haˬ ngeh. “Ngaˇ-aˬ, Behˬlehˬhehˬ meuˬ-ahˇ jawˇ-eu nawˬ-euˬ zaˬ kʼaˆ Yeˬshehˇ-euˬ aˬ li ma” lehˇ, Daˬbiˇ ehˇ kʼoꞈ nehˬ-euˬ meh.